PANDARIADDI 40
40
I Yusuf nanal᷊a'an atappasannu wal᷊iawa manga taumatan ṛuumanna
1Manga pira tempo wua'udde ruan katou mangangimben datu Mesir, eteudde mangangimben ua'e wuṛṛu roti, na'ola'a pasasal᷊a su saruannu ratu. 2Ne ratu nasa'ute su darua mangangimbe udde, 3ana see itarua niapaasutta sulal᷊ummu tutupanna su wal᷊en tembonannu mandariaga wal᷊en araratuanna udde, su tampa i Yusuf tataṛṛanganna. 4Allannune lai mangitou su tutupanna udde, wuṛṛu mandariaga wal᷊en araratuanna nandolokki Yusuf niapal᷊u'adda sitarua.
5Su ṛabbi sambau mangangimben ua'e wuṛṛu mangangimben roti udde sangkatou-sangkatou nabbal᷊iawa. Atappasannu wal᷊iawan tarua uapapaṛṛala. 6Su tempo i Yusuf nirumanta ringanni tarua tiṛṛabine marua allo, itarua aellehanna massusa. 7Ana see i tou naiwal᷊o, “Anio tuṛṛa-tuṛṛangnga aroddi massusa allo indi?”
8Itarua sinumimbakka, “Naallawanna yambua nabbal᷊iawa, wuṛṛu tawedu maasingkattu atappasanne.”
Unni Yusuf, “Tumba'u Ruata apan mangonggola su taumata manal᷊a'an atappasannu wal᷊iawa. Annama'o wattia'a wal᷊iawanu udde.”
9Mangangimben ua'e udde nabbisara, “Sulal᷊ummu wal᷊iawa udde i ya'u naasilo pia punnu anggore su saruangku. 10Punnu anggore udde naddanna tatallu. Wakkute manga rannane mannatakke madongnga, tawe nal᷊annu manga wantine nati'akke, ana see wuane nal᷊ahate. 11Su tempo udde i ya'u tantal᷊anna uaagassa halasi pa'inumannu ratu, nariaddi ya'u nani'o wuan anggore udde wuṛṛu ta'u nipakka sulal᷊ummu halasin datu, ana see ta'u niimbe si tou.”
12I Yusuf nabbisara, “Ete indi tal᷊aane: Tatallu ranna udde atappasanne tallu allo. 13Sulal᷊ummu tallu allo indi i'o sarun ipallossu ratu, i tou sarun mangampunga si'o wuṛṛu mapa'awelengngu su manaranu paarorone. I'o sarun mangimben halasi pa'inumannu ratu ere paarorone. 14Arawe naungewe i ya'u napawe i'o naola'e mapia. Tul᷊unga'a hatto'u su ratu, tadea'u i ya'u ipallossa wuassu tutupanna indi. 15Ana waugu, paarorone i ya'u niaṛṛo wuassu wanuan taumatan Ibrani wuṛṛu isindi lai, su Mesir indi, tawe saran paassa i ya'u na'ola'a al᷊al᷊eo na'oman sara i ya'u nitaṛṛo sulal᷊ummu tutupanna.”
16Napawe mangangimben doti udde naasingkatta manungku atappasannu wal᷊iawan mangangimben ua'e mapia, ne i tou lai nabbisara si Yusuf, “I ya'u lai nabbal᷊iawa, i ya'u uarandangu tatallu ul᷊a'u roti su pua'u. 17Sulal᷊ummu ul᷊a'a al᷊iurosone pia al᷊awo'a hatin kukisse annu ratu, arawe manga manu'u winalanganna nirumanta niumanna manga kukisse udde.”
18I Yusuf sinumimbakka, “Indiwe tal᷊a'an bal᷊iawa udde; Tallung kul᷊a'a udde atappasanne tallu allo. 19Sulal᷊ummu tallu allo indi ratu sarun mandolokku taumata iapaponggo'a puanu ana see iele winal᷊unannu su sambau riṛṛi, wuṛṛu manga manu'u winalanganna sarun uminassa ṛemessa wuassu winal᷊unannu.”
20Tallu allo wua'udde eteudde allo niasungkangannu ratu, wuṛṛu i tou ma'ola'a andeangnga wahewalla su anambon mamanaran araratuanne. I tou mamarenta tadea'u mangangimben ua'e wuṛṛu mangangimben doti iapasabanga wuassu tutupanna wuṛṛu iapidda sumaruanna anambon mamanaran araratuanna. 21Mangangimben ua'e niapawelengnga su manarane paarorone. 22Arawe mangangimben doti iṛṛuumanna pateanna. Sarangkanambone udde nariaddi ere buete niwal᷊on i Yusuf. 23Arawe mangangimben ua'e udde tate naanaungnga si Yusuf. I tou mangke naabul᷊in tou.
सध्या निवडलेले:
PANDARIADDI 40: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन