PANDARIADDI 24
24
Sangkatou awingnga si Ishak
1I Abraham timmadete atonna, wuṛṛu i tou nial᷊amatannu Mawu sulal᷊ummu al᷊awo'u manara. 2Su allo sambau i Abraham nabbisarate allangnge atimmaranne, apan ual᷊u'adda alawo'u darotongnge, “Addoa'e limanu su wallatu palangku. 3Passalute ringannu arannu Mawu, Ruata apan uataṛṛino langitta wuṛṛu runia, manungku i'o tawe madea'a awingngi Ishak ana'u wuassu wallatu manga taumatan Kanaan indi. 4I'o ṛinone mabelengnga watukku wanua niasungkangangku madea'a awingngi tou wuassu wallatu manga tuṛṛangku.”
5Ana see allangnga udde naiwal᷊ote si tou, “Ereapa amungkangngu maṛṛuala udde maddiri manantangngu wal᷊ene wuṛṛu madiri tumantalongnga si ya'u watukku wanua indi? Ṛinone i ya'u mangapiddu ana'i Tuangnga watukku wanua niasungkanganni Tuangnga?”
6Arawe i Abraham sinumimbakka, “Naunge! Imbaṛṛangnga i'o mangapiddu ana'u poiaroddi! 7Mawu, Ruata apan uataṛṛino langitta, buatte nangapi'u wuassu wal᷊en iamangku wuṛṛu wuassu wanua manga tuṛṛangku, wuṛṛu i Tou buatte nassalu si ya'u manungku i Tou sarun mangonggolu wanua indi su papapulungku. I Tou lai sarun mandolokku mala'ekan-Ne mantul᷊ungngu, tadea'u i'o wotongnge maasomba sangkatou awingngu ana'u wua poiaroddi. 8Arawe amungkangngu maṛṛuala udde madiri tumantalongnga si'o, ne i'o mal᷊iu wuassu sasalu indi. Salaiwe ereapa imbaṛṛangnga i'o mangapiddu ana'u poiaroddi.” 9Ana see allangnga udde nangaddoten limane su wallatu palangngi Abraham mawune, wuṛṛu nassalu sarun mangutungngu darorongngi Abraham udde.
10Allangnga udde nanganute mapul᷊on bau onta ana see al᷊awo'u saranapa maarega pusa'a mawune wuṛṛu inaite watukku soa tampa atatanaanni Nahor su tempo nipabbiaṛṛanne; addone su samba'an sawannakku Mesopotamia. 11Napawe i tou na'omate poiaroddi, niapatalle manga unta udde tadea'u mangillol᷊o maranin sambau paṛṛihi su liuddu soa. Allo wawalote, wuṛṛu eteudde tempone manga wawine mania ua'e. 12Ana see allangnga udde niumal᷊iomanna, “Mawu, Ruata mawu'u Abraham, tul᷊ungaawe, tadea'u i ya'u maaola'a manara'u su allo indi; akkanaawe mawu'u Abraham. 13Pa'ellege, i ya'u uarisikka maranin paṛṛihi indi. Tate mal᷊annu lai manga maṛṛuala wuassu soa sarun dumanta mania ua'e. 14I ya'u sarun mabbisara sangkatou suwallati mangitou, ‘Tul᷊unga'a lintuṛṛa'a wowongngu wuṛṛu i ya'u painuma'a.’ Amungkangngu i tou sumimbakka, ‘Pa'inumpe, wuṛṛu manga untan Papa sarun ta'u iapa'inumma lai!’ ete i tou apan nipile Mawu hunan Ishak allang-Ngu. Amungkangngu olangnge udde matipussa, i ya'u sarun maasingkatta manungku Mawu pia naungnga mapia su mawu'u Abraham.”
15-16Su tempo i tou tantal᷊anna u'al᷊iomanna, i Ribka, sangkatou maṛṛuala apan aṛṛamahanne wuṛṛu taambe naawingnga, naranta su paṛṛihi uapassanna wowongnga su wambangnge. I tou ana'i Betuel, wuṛṛu hagurangngi Betuel eteudde i Nahor wuṛṛu i Milka; i Nahor udde iaangngi Abraham. I Ribka mattudan paṛṛihi udde wuṛṛu nalloṛṛo wowongnge, ana see napul᷊e. 17Allangngi Abraham tinumal᷊angnga nangundanin tou wuṛṛu nabbisara, “Tul᷊unga'a, ana'a, painuma'a i ya'u wuassu wowongngu udde.”
18Maṛṛuala udde sinumimbakka, “Pa'inumpe Papa,” ana see ringannu nasasaṛṛawutta nanossokku wowongnge wuassu wambangnge, wuṛṛu lapiddu uaagassa wowongnga udde i tou napa'inummu allangnga udde. 19Napawe allangnga udde buatte na'inumma; maṛṛuala udde nabbisara, “I ya'u sarun inai mania ua'e, iapa'inumma su manga untan Papa lai, tadea'u anambon binatangnga udde ma'inumma sara mal᷊aidda.” 20Wua'udde ringannu nasasaṛṛawutta ua'e sulal᷊ummu wowongnga nilal᷊inna su paainumannu unta, ana see i tou tinumal᷊angke apia watukku paṛṛihi mania ua'e lembon manambo lai tadea'u anambon binatangnga udde mawusa ma'inumma. 21Tantal᷊anna udde allangngi Abraham sidutu mannutukka si tou ringannu tawe bisarane saran sampadi. I tou maapulu maasingkatta atanne Mawu ma'ola'a manarane pia gessine ara'e tawe.
22Napawe anambon unta udde nawusate na'inumma, allangngi Abraham nanganute saranapa wul᷊awanna apan maarega ana see niele su ngirunnu maṛṛuala udde. Su pul᷊al᷊anne niluṛṛeannu hal᷊angnga sampare. 23Ana see allangnga udde nabbisara, “Wal᷊oa'a isai iamangngu. Piawe tampa panaṛṛabiangku wuṛṛu manga taumata'u su wal᷊ene?”
24“Iamangku i Betuel, ana'i Nahor wuṛṛu i Milka,” sasimbakku maṛṛuala udde. 25“Su wal᷊en kami pia tampa panaṛṛabianni Papa wuṛṛu manambo laṛṛami annu winatangnga.”
26Ne allangnga udde niumal᷊intudate nassubba Mawu. 27Wisarane, “Paddalote Mawu, Ruata mawu'u Abraham. Mawu sidutu matul᷊idda wuṛṛu mapia su mawu'u Abraham. I tou nangehetta si ya'u watukku manga tuṛṛangnge.”
28Wua'udde maṛṛuala udde tinumal᷊angnga watukku wal᷊en wuṛṛu nabbatti'u al᷊awo'a apan buatte nariaddi. 29-30I Ribka pia sangkatou iaangnga aranne i Laban. I tou naaringikka watti'u tuarine su ola'u apa apan niapasingkatu allangnga udde. I tou naasilo lai lal᷊ogakka su ngirunna wuṛṛu hal᷊angnga su pul᷊al᷊annu tuarine udde. Ne i Laban tinumal᷊angke watukku liuddu wal᷊en maisasomban allangngi Abraham udde apan ta'e uarisikka ringannu manga untane maranin paṛṛihi. 31Ana see unni Laban, “Papa taumata apan nial᷊amatannu Mawu! Arie paatana'a su liudde isindi. Wette sutta'e su wal᷊en kami. I yami buatte nanahangginna wabbo'a atatiil᷊anni Papa wuṛṛu tampa manga untan Papa.”
32Ana see allangnga udde tinumantalongke wuṛṛu sinumuttate sulal᷊ummu wal᷊en. I Laban nanossokku lurannu manga unta, wuṛṛu nangonggollu laṛṛami niapaanna su manga winatangnga udde. Wua'udde i tou nangapiddu ua'e aukkassa leddan allangngi Abraham wuṛṛu manga taumatane. 33Napawe uasaruante anna, allangnga udde nabbisara, “I ya'u tawe umanna amungkangngu taambe napabbal᷊on tanata apan uaapidda si ya'u.”
I Laban nabbisara, “Wette wal᷊oa'e.”
34Ana see allangngi Abraham nanattake mabbatti'a, wisarane, “I ya'u indi allangngi Abraham. 35Mawu lembon nangal᷊amatta mawu'u udde wuṛṛu na'ola'a si tou ala manasai. Mawu buatte nangonggollu manambo domba, ambinga, sapi, unta, keledai, wuṛṛu lai sal᷊a'a, wul᷊awanna, see allangnga esakka wuṛṛu wawine. 36Su uukka apan timmadete, i Sara awingngu mawu'u udde buatte nanungkangngu sangkatou ana'a esakka, wuṛṛu mawu'u buatte nanantillu al᷊awo'u darotongnge su anangnge udde. 37I tou nandolo'u maddiandi ringannu sasalu tadea'u tumuṛṛutta parentane. Wisarane, ‘Imbaṛṛangnga i'o mamile awingngu ana'u wuassu wallatu manga maṛṛuala su leta'u Kanaan indi, 38ewe'e wuassu wallatu manga tuṛṛangnga ṛuanganni yamangku. Nariaddi inaite paal᷊ihakka poiaroddi.’ 39Ana see i ya'u naiwal᷊o si tou, ‘Ereapa amungkangngu maṛṛuala udde madiri tumantalongnga si ya'u?’ 40Ana see i tou sinumimbakka, ‘Mawu apan sidutu tattuṛṛutangku, sarun mandolokku mala'ekan-Ne iapatul᷊ungnga tadea'u manaranu pia gessine. I'o sarun maasangkalla awingngu ana'u wuassu wallatu ṛuangangku sassane, eteudde wuassu ana'u tuṛṛangngu iamangku. 41Tumba'u amungkangngu i mangitou napaawelengngu, ne wakkute udde i'o mal᷊iu wuassu sasalunu.’
42Wuṛṛu napawe tanginna i ya'u na'omate su paṛṛihi, i ya'u niumal᷊iomanna sulal᷊ummu naungnga, ‘Ruata mawu'u Abraham, ṛinone ma'ola'a manara'u pia gessine. 43I ya'u sidutu uarisikka maranin paṛṛihi udde. Napawe pia sangkatou maṛṛuala rumanta mania ua'e, i ya'u sarun madorongnga si tou ua'e inumanna. 44Amungkangngu i tou maapulu, wuṛṛu mangonggolla lai mapa'inummu manga unta'u, ne ete i tou apan nipile Mawu maola'a awingngu ana'u mawu'u udde.’ 45Taambe lai i ya'u nanguddussu aal᷊iomanna udde sulal᷊ummu naungnga, i Ribka nirumantate uaapiddu wowongnga papasannananna ana see nania ua'e wuassu paṛṛihi. Wua'udde i ya'u nabbisara si tou, ‘Tul᷊unga'a painuma'a i ya'u.’ 46Ringannu nasasaṛṛawutta i tou nanossokku wowongnga udde wuassu wambangnge wuṛṛu nabbisara, ‘Pa'inumpe, wuṛṛu manga untan Papa lai ta'u iapa'inumma.’ Ana see i ya'u na'inumpe wuṛṛu manga unta'u lai niapa'inumma. 47Wua'udde i ya'u naiwal᷊o, ‘Isai iamangngu?’ Wuṛṛu i tou sinumimbakka, ‘Iamangku i Betuel, ana'i Nahor wuṛṛu i Milka.’ Ana see i ya'u nalluṛṛeten lal᷊ogakka wul᷊awanna su ngirunne wuṛṛu sampare hal᷊angnga su pul᷊al᷊anne. 48I ya'u niumal᷊intudda nassubba wuṛṛu naddalo Mawu, Ruatan mawu'u Abraham. I Tou buatte nangehetta si ya'u naddatingngu tampa indi, ringannu manga alahannu mawu'u, na'oman sara i ya'u naasomba maṛṛuala indi maola'a paren anangnge. 49Orassa indi, amungkangngu i yamiu pia apendamma ma'ola'a mawu'u ringannu mapia wuṛṛu manuungngu darorongnge si yamiu sulal᷊ummu pasasangkatuṛṛanganna, antimanna mamasingkatta si ya'u, arawe amungkangngu tawe, wal᷊oa'e lai, tadea'u i ya'u masingkatta apa sarun olaangku.”
50I Laban wuṛṛu i Betuel sinumimbakka, “Ana waugu sarangkanambone apan buatte nariaddi indi darantane wuassu Mawu, i yami tawe suṛṛinone makkawessa. 51Indite i Ribka; wala'e i tou tumantalongnga si Papa wuṛṛu mabbal᷊i awingngu ana'u mawun Papa, ere buatte niapaasingkattu Mawu sassane.” 52Napawe allangngi Abraham naaringikka wisara mangitou, i tou niumal᷊intudda nassubba Mawu. 53Ana see i tou napasabangngu manga laubba, lal᷊oggaka sal᷊a'a wuṛṛu wul᷊awanna, wuṛṛu sarangkanambone udde nionggolla si Ribka. See lai iaangnge wuṛṛu inangngene nionggol᷊anni tou aonggolla apan maarega.
54Wua'udde allangngi Abraham wuṛṛu manga taumatane niumante wuṛṛu na'inumma, ana see nanaṛṛabite isudde. Napawe i mangitou napu'ote tiṛṛabine, allangnga udde nabbisara, “Walaawe i ya'u mapul᷊e ringannu mawu'u.”
55Arawe iaangnge wuṛṛu inangngi Ribka nabbisara, “Walaawe i Ribka matana'a ringanni yami al᷊annune iraṛṛangngo sangkamisa ara'e mapul᷊o allo lai, wua'udde i tou wotongnge inai.”
56Arawe allangnga udde nabbisara, “Ariewe mama'ungnga si ya'u. Mawu na'ola'a amatangku pia gessine; walaawe i ya'u mapul᷊e ringannu mawu'u.”
57I mangitou sinumimbakka, “Weete i ite mamago si Ribka wuṛṛu maiwal᷊o tanne adapanne ereapa.” 58Ana see i mangitou namago si Ribka wuṛṛu naiwal᷊o, “I'o mappulute tumantalongnga taumata indi?”
Maṛṛuala udde sinumimbakka, “Ore, i ya'u mappulu.”
59-60Ne i mangitou namalaten Ribka wuṛṛu mallal᷊u'adde inai ringannu allangngi Abraham wuṛṛu manga taumatane. Ana see i mangitou nangal᷊amatta si Ribka ringannu manga wisara indi,
“Antimanna i'o, Ribka mabbal᷊i inangngu taumata nambo!
Antimanna papapulunnu mapasuṛṛubawa manga soan seenne!”
61Wua'udde i Ribka nandiahite suadio'a ringannu manga wawine saṛṛen tumuwo apan naola'a allangnge, ana see sinuma'ete unta wuṛṛu inaite tinumantalongnga allangngi Abraham udde.
62Tantal᷊anna udde i Ishak nirumantate wuassu wadda'a lol᷊okka, sinumabbi paṛṛihi apan isassago “I Tou Apan Sidutu Uaintanno si Ya'u” wuṛṛu natana'e su samba'an timukku Kanaan. 63Su sambau wawallo i tou sinumabbangnga wuassu rasanne inai u'a'amatta su wawail᷊anne, ana see i tou naasilo manga unta inawarea. 64Napawe i Ribka naasilo si Ishak, i tou sinumossokka wuassu untane, 65wuṛṛu naiwal᷊o allangngi Abraham udde, “Isai esakka su wailla udde apan u'amatta mattudan kite?”
“I tou mawu'u,” sasimbakku allangnga udde. Ana see i Ribka nanganu nasane wuṛṛu pinallindumma hatine.
66Wua'udde allangnga udde nabbatti'a si Ishak al᷊awo'a apan buatte nimanarane. 67Wua'udde i Ishak nangapiddi Ribka sinumutta sulal᷊ummu rasanni Sara inangnge, wuṛṛu i tou natambaten Ribka. I Ishak marangngu si Ribka; ne nal᷊uasse naungngi Ishak apan massusa ana waugu niapateannu inangnge.
सध्या निवडलेले:
PANDARIADDI 24: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन