SASABANGNGA 39
39
Na'ola'a laubbu imam
(Sab. 28:1-14)
1I Bezaleel wuṛṛu i Aholiab na'ola'a laubbu patataṛṛamawu wuassu wol ma'elomma, ungu wuṛṛu maṛṛamu iluṛṛem manga imam su tempo i mangitou mammanara su Wabbo'a Susi. Laubbu imam iluṛṛe si Harun niola'a ere darolokku Mawu si Musa.
2Laubbu imam niola'a wuassu mal᷊aṛṛenessa linen al᷊ussa, wol ma'elomma, ungu wuṛṛu maṛṛamu, wuṛṛu wananna wul᷊awanna. 3I mangitou nanassalla manga wul᷊awanna apan wua'udde nipototta nabbal᷊i wananna manipissa, ana see niraddu'u mal᷊aṛṛenessa linen al᷊ussa wuṛṛu wol ma'elomma, ungu wuṛṛu maṛṛamu. 4Wua'udde na'ola'a darua tal᷊in bambangnga ipama'issa laubbu imam apan nitabbi'a su sandiṛṛanne. 5Papeṛṛetta apan niraddu'a al᷊ussa niola'a wuassu mal᷊aṛṛenessa apan uasul᷊ungnga wuṛṛu nitabbi'a su laubbu imam udde na'oman sara nabbal᷊i wageangnge sambau ere buatte niparentan Mawu si Musa. 6I mangitou nangasan batu delima ana see nitaṛṛo sulal᷊ummu wingke wul᷊awanna. Ringannu napenen asingkatta i mangitou nanguitta manga arannu mapul᷊o dua ana'i Yakub su manga watu udde. 7Wua'udde manga watu udde nitabbia'a su tal᷊in bambangngu laubbu imam maola'a tatiala pananaunganna su mapul᷊o dua ṛuangannu Israel, ere buatte niparentan Mawu si Musa.
Na'ola'a lal᷊indumma ro'o
(Sab. 28:15-30)
8I Bezaleel wuṛṛu i Aholiab na'ola'a lal᷊indumma ro'o wuassu mal᷊aṛṛenessa apan uasul᷊ungngu laubbu imam, wuṛṛu karawange lai uasul᷊ugnga. 9Saṛṛene uataṛṛawu'u appata wuṛṛu nilappu darua, al᷊alakke wuṛṛu al᷊o'engnge sambau-sambau 22 sentimetere. 10Su lal᷊indumma ro'o udde i mangitou nangelen appatu raddaga watu permata. Su raddage paarorone watu delima, topas wuṛṛu baiduri sepah. 11Su raddage aruane zamrud, watu nilam wuṛṛu intan. 12Su raddage atallune watu lazuardi, akik wuṛṛu watu kecubung. 13Su raddage aiappane watu pirus, yakut, wuṛṛu ratna cempaka. Mapul᷊o dua permata udde niwa'issu wul᷊awanna. 14Su tiappu sambau permata ni'uitta arannu sangkatou su wallatu mapul᷊o dua ana'i Yakub maola'a pananaunganna su manga ṛuangannu Israel. 15Ana see niola'a darua ṛate wuassu wul᷊awanna tutune apan niandongnga ere tal᷊i. 16Niola'a lai darua hal᷊angnga wul᷊awanna apan nipase su pentakke darua al᷊iu rosone su lal᷊indummu ro'o udde. 17Ana see darua ṛate wul᷊awanna udde nisuṛṛi sulal᷊ummu manga hal᷊angnga udde, 18wuṛṛu pentakke darua waine niwa'issa su darua wingke, na'oman sara lal᷊idumma ro'o udde wotongnge isampa'u wageangngu tal᷊in bambangngu saruanne wuassu laubbu imam. 19Ana see niola'a lai darua hal᷊angnga wul᷊awanna apia apan nipase su lal᷊indumma ro'o udde su pentakke wowane wageangngu lal᷊umme apan niaṛṛinoannu laubbu imam. 20Wua'udde niola'a darua hal᷊angnga wul᷊awanna apan nipase su saruannu darua tal᷊in bambangngu laubbu imam, maranin sampa'u tatabinge maranin bowane, su wowon papeṛṛetta apan niraddu'a al᷊ussa. 21Nassul᷊ungngu parentan Mawu si Musa, hal᷊angngu lal᷊indumma ro'o nisampa'u tal᷊i ma'elomma su hal᷊angngu laubbu imam, na'oman sara lal᷊indumma ro'o udde sidutu su wowon papeṛṛetta wuṛṛu tawe mal᷊uatta.
Na'ola'a laubba wain iluṛṛen manga imam
(Sab. 28:31-43)
22Juba apan uaṛṛawanna laubbu imam, sarangkahewalle niola'a wuassu wol ma'elomma. 23Loṛṛangngu ulekkane nitohassu tal᷊i niraddu'a tadea'u tawe mahesa'a. 24-26Uapal᷊iwutta wiwikke wowane niola'a hambarannu wuan delima wuasu mal᷊aṛṛenessa linen al᷊ussa wuṛṛu wol ma'elomma, ungu wuṛṛu maṛṛamu, niwallatannu wawungkelene wuassu wul᷊awanna, ere buatte niparentan Mawu si Musa.
27I mangitou na'ola'a kamejan i Harun wuṛṛu manga anangnge, 28see lai paporongnga, dastere sal᷊ana maa'utta wuassu linen, 29wuṛṛu papeṛṛetta wuassu mal᷊aṛṛenessa linen al᷊ussa, wol ma'elomma, ungu wuṛṛu maṛṛamu, nilogaṛṛannu suji, ere buatte niparentan Mawu si Musa. 30See lai niola'a hambaranna wuassu wul᷊awanna tutune, tatiala manungku i mangitou buatte niṛṛaen Mawu. Su hambaranna udde ni'uitta manga wisara “Niṛṛae hunan Mawu”. 31Lal᷊ogakka udde nireetta su saruannu paporongnga, ere buatte niparentan Mawu si Musa.
Manara udde niinsue
(Sab. 35:10-19)
32Panginsueanne nuddusse anambon manara ma'ola'a Rasannu Mawu. Taumatan Israel buatte na'ola'a sarangkanambone ere buatte niparentan Mawu si Musa. 33I mangitou nangapidda ringanni Musa Rasanna ringannu al᷊awo'u saranapane, manga aainne,manga alu wawarene, manga diṛṛi wuṛṛu apampakke, 34lal᷊uubbe wuassu pisin ambinga esakka apan niwuṛṛannu maṛṛamu, lal᷊uubbe wuassu pisi al᷊ussa, mal᷊aṛṛenessa tatindungnga. 35Wantallu Pa'aire apan lal᷊oṛṛoannu watu darua ringannu alu papasannane wuṛṛu lal᷊uubbe, 36medda wuṛṛu anambon saranapane wuṛṛu roti ia'imbe, 37leddan sol᷊o wuassu wul᷊awanna tutune, manga sol᷊one ringannu al᷊awo'u saranapane, lanan sol᷊o, 38mezbah wuassu wul᷊awanna, lanan lal᷊aghu, amania mawangngi, pampelen ngaran Dasanna, 39mezbah witu'a ringannu kawa nianamma wuassu witu'a, alu papasanna ringannu al᷊awo'u saranapane; bakka tampan pangukkasanna ringannu apampakke, 40manga senggotu rallaka wuṛṛu manga diṛṛi see apampakke, pampelen ngaran pasallanganna see manga tal᷊ine, manga pati'annu Rasanna; anambon aolangnge apan ipaatta sulal᷊ummu Rasanna, 41wuṛṛu laubbu patataṛṛamawu manga imam su tempo i mangitou mammanara su Wabbo'a Susi wuṛṛu laubba apan niṛṛae si Musa wuṛṛu manga anangnge. 42Taumatan Israel buatte nammanara sarangkanambone ere buatte niparentan Mawu si Musa. 43I Musa namarikissa sarangkanambone wuṛṛu naasilo manungku i mangitou buatte na'ola'a uasul᷊ungngu parentan Mawu. Ana see i Musa nangal᷊amatta si mangitou.
सध्या निवडलेले:
SASABANGNGA 39: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन