SASABANGNGA 34
34
Darua watu pamoṛṛetanna apan bakku
(Tah. 10:1-5)
1Wua'udde Mawu nabbisara si Musa, “Pamaangke ruan kul᷊appa watu ere dorone. Su watu udde i Ya'u sarun mamoṛṛettu manga wisara apan uasul᷊ungnga su watu appan buatte Ta'u nipesangnga udde. 2Pandiahite ana waugu tiṛṛabbi marua'allo saate su Wowon Sinai wuṛṛu saruante si Ya'u su puiddu wowone udde. 3Tawe wotongnge pia sangkatou tumantalongnga ringannu ara'e suwageangngu tampa su wowone udde. Manga sapi wuṛṛu manga domba esakka arie pabbala'a manioma ara'e umanna nannal᷊o su wawal᷊annu wowone udde.” 4Ana see i Musa namaangnga ruan kul᷊appa watu apia, wuṛṛu tiṛṛabbine marua'allo i tou nangapidde sinuma'a su puiddu Wowon Sinai ere buatte niparentan Mawu si tou.
5Ne Mawu sinumossoke i sulal᷊ummu sambau winabbawa; i Tou dirumarisikka ringanni Musa su tampa udde, wuṛṛu nabballon aran-Ne apan susi, eteudde Mawu. 6Wua'udde Mawu sinumabbi ringanni Musa wuṛṛu nabbisara, “I Ya'u Mawu, eteudde Ruata apan napenen naungnga mapia wuṛṛu darangngu. Darungngu-U nilumambalanna, i Ya'u satia wuṛṛu mal᷊iwue masa'u. 7I Ya'u sidutu mandangngu papapulunna su ṛiwune wuṛṛu mangngampungnga passal᷊a wuṛṛu rosa; arawe taumata nassal᷊a mangke tawe Ta'u ipallossa wuassu ṛuumanne, wuṛṛu Ta'u iṛṛuumanna lai manga anangnge wuṛṛu manga pulunne ma'oman sara papapulunne atallun ṛawanne wuṛṛu aiappanne ana waugu paddarosan hagurangnge”.
8Orassa udde lai i Musa niumal᷊intudda nassubba. 9Wisarane, “Mawu, amungkangngu I'o atonna-tonna ma'apulu'u, i ya'u sumal᷊ande, doronganna Mawu tumantalongnga si yami. Walahanna udde atonna mangke tawe maddaringikka, arawe ampungewe al᷊al᷊eo wuṛṛu rosan kami wuṛṛu sengkamawe yami maola'a al᷊aṛṛanang-Ngu sassane.”
Pa'aire nilimbakku
(Sab. 23:14-19; Tah. 7:1-5, 16:1-17)
10Unnu Mawu si Musa, “Orassa indi i Ya'u ma'ola'a pa'aire ringannu walahannu Israel. Su saruannu matan mangitou i Ya'u sarun ma'ola'a manga al᷊aṛṛindu'a apan taambe saran paassa niola'a su anambon balahanna su runia. Anambon balahanna sarun maasilo manga al᷊aṛṛindu'a apan sarun Ta'u olaanna, ana waugu i Ya'u, Mawu sarun ma'ola'a sambau apan ma'ata'utta si yamiu. 11Paatuṛṛute manga tita apan Ta'u nionggola si yamiu allo indi. i Ya'u sarun mallimbuakka balahannu Amori, Kanaan, Het, Feris, Hewi wuṛṛu Yebus su tempo i yamiu umamatte. 12Imbaṛṛangnga ma'ola'a pa'aire ringannu manga taumata apan rantanni yamiu, ana waugu olangnge udde wotongnge maola'a wal᷊ati'a apan maapate si yamiu. 13Nariaddi, imbaṛṛangnga ma'ola'a aroddi, arawe paṛṛaa'a manga mezbah mangitou, ṛimunsa'a manga palem paal᷊uanni mangitou wuṛṛu tuwangke manga diṛṛin Asyera, monganni mangitou.
14Imbaṛṛangnga massubba Mawu waine, ana waugu i Ya'u Mawu, eteudde Ruata apan tawe iasul᷊ungngu manga apa su ruania indi. 15Imbaṛṛangnga ma'ola'a pa'aire ringannu balahannu wanua udde, ana waugu su tempo i mangitou massubba wuṛṛu mangngonggolu sasamba su manga Mawu mangitou, i mangitou sarun mangahe si yamiu, wuṛṛu i yamiu sarun tumantalongnga. 16Amungkangngu manga anangngu ma'awingngu manga wawinen taumata raho, i mangitou sarun isal᷊o'u manga wawine udde tadea'u manantang-Ku wuṛṛu massubba manga Mawu mangitou.
17Imbaṛṛangnga ma'ola'a wuṛṛu massubba manga Mawu wuassu atta'a.
18Ramea'e Andeangngu Roti Tawe Ragine. Ere lai buatte Ta'u nirolokka si'o, i yamiu ṛinone umanna roti tawe ragine al᷊annune pitu allo sulal᷊ummu wul᷊anna Abib, ana waugu sulal᷊ummu wul᷊anna udde i yamiu nanantangngu Mesir.
19Suapan ana'a esakka pahul᷊une wuṛṛu winatangnga esakka apan paarorone nariaddi uddewe pussaa-U, 20arawe i yamiu ṛinone mamaekka ana'u keledai apan paarorone nariaddi ringannu mangonggolu sambau ana'u domba maola'a hahantine. Amungkangngu i yamiu maddiri mamaekka, ullekkan keledai udde ṛinone latto'anni yamiu. Suapan anangngu esakka pahul᷊une ṛinone waeṛṛanni yamiu.
Tawe sangkatou apan botongnge rumanta ringang-Ku amungkangngu i tou tawe uaapiddu sasamba.
21Pia annumu allo ipammanara; imbaṛṛangnga mammanara su allo appitune, salaiwe udde sulal᷊ummu tempo mammasolla ara'e tempo mangitingnga.
22Ramea'e Andeangngu Pangangitingnga su tempo i yamiu mannattake mangitingnga wuan gandumma paarorone. Ramea'e lai Andeangngu Rasannu Rongnga su panginsueannu tonna, su tempo i yamiu mani'o manga wuang kaaluaanna.
23Paatallu santonna anambon taumata esakka ṛinone rumanta massubba si Ya'u, Ruatan Israel. 24Napawe i Ya'u buatte nallimbuakka manga balahanna wuassu saruannu wuṛṛu Ta'u hewal᷊anna letangngu, tawe saran sangkatou apan waṛṛani mangaṛṛo wanuanu su tempo i yamiu inai mallaghun Andeangngu Roti Tawe Ragine, Andeangngu Pangangitingnga wuṛṛu Andeangngu Rasannu Rongnga.
25Su tempo i yamiu mangonggolu sasamba niṛṛata, imbaṛṛangnga mangonggolu saranapa apan niola'a nappaattu ragi. Winatangnga apan niṛṛata maola'a sasamba su ramean Paskah ṛinone insueanna ṛabbi udde lai; tawe wotongnge pia lambene ma'oman sara tiṛṛabbine marua allo.
26Suapan tonna i yamiu ṛinone mangapidda watukku Wal᷊en Mawu Ruatanu wua paarorone wuassu hessin letangngu.
Ṛemessu ana'u domba ara'e ana'u ambinga tawe wotongnge lahannu ua'en susun inangnge.”
27Unnu Mawu si Musa, “Woṛṛeta'e manga wisara udde, ana waugu pinangianannu wisara udde i Ya'u na'ola'a pa'aire si'o wuṛṛu ringannu walahannu Israel.” 28Appatu pul᷊o su allone appatu pul᷊o su ṛabbine i Musa uatana'a isudde suadio'a ringannu Mawu, wuṛṛu su al᷊annune udde i tou tawe umanna wuṛṛu tawe ma'inumma. Manga wisara pa'aire udde, eteudde Mapul᷊o Titan Duata, niwoṛṛetti su watu.
I Musa sinumosokka wuassu Wowon Sinai
29Su tempo i Musa sinumossokka wuassu Wowon Sinai uaapiddu Mapul᷊o Tita udde, hatine lullansiangnga ana waugu i tou buatte naggahato Mawu, arawe i Musa sassane wagga manungku hatine lullansiangnga. 30I Harun wuṛṛu anambon tumana'u soa naasilo manungku i Musa lullansiangnga hatine, i mangitou matta'utta mangundanin i Musa. 31Arawe i Musa namaggo si mangitou, ne i Harun wuṛṛu anambon piaṛṛa'i mangitou nangundanin tou, wuṛṛu i Musa nabbisarate si mangitou. 32Napawe wua'udde tumana'u Israel sarangkanambone na'ammula namal᷊iwutta si tou, wuṛṛu si mangitou sarangkanambone i Musa namasingkatu anambon tita apan nionggolu Mawu si tou su puiddu Wowon Sinai. 33Napawe buatte naggahatton mangitou, i Musa nanaappa hatine ringannu mal᷊aṛṛenessa. 34Suapan i Musa sumutta sulal᷊ummu Rasannu Mawu ana waugu maggahahaton Mawu, mal᷊aṛṛenessa udde wu'anna ma'oman sara i tou sumabbangnga. Napawe i tou buatte namasingkatta su walahannu Israel anambon tanatan Mawu, 35wuṛṛu i mangitou naasilo hatin i Musa lullansiangnga. Ne i tou nanaappa hatine apia na'oman sara tempone manansunna amungkangngu i tou maggahaton Mawu apia.
सध्या निवडलेले:
SASABANGNGA 34: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन