SASABANGNGA 19
19
Taumatan Israel su Wowon Sinai
1-2Wua'udde walahannu Israel nanantangngu Rafidim, wuṛṛu su allo paarorone wul᷊anna atallune napawe i mangitou wua nanantangngu Mesir, i mangitou naddatingke su wadda'u Sinai. I mangitou naddasanna su wawal᷊annu Wowon Sinai, 3wuṛṛu i Musa sinuma'a wowone udde inai maisasomban Duata.
Mawu nabbisara si Musa wuassu wowone udde wuṛṛu nandolokki tou niapaal᷊iata su taumatan Israel, papapulunni Yakub. 4“I yamiu naasilote apa apan buatte Ta'u niola'a su saruannu taumatan Mesir, wuṛṛu ereapa i Ya'u nangapiddi yamiu ringang-Ku su tampa indi ringannu taṛṛino wahewalla, naal᷊ihidda manu'a rajawali nangapiddu anangnge su wowon papaidde. 5Orassa indi amungkangngu i yamiu matuṛṛutta su pa'aire-U, i yamiu sarun Ta'u olaanna al᷊aṛṛana-U sassane. Ahewallu runia indi udde tatahuanang-Ku, arawe i yamiu sarun maola'a pussaa-U arangnguang-Ku, 6mawae su watangang-Ku sassane, wuṛṛu i yamiu sarun mangimbe si Ya'u maola'a manga imam.” 7Ne i Musa sinumossokke wuṛṛu namago manga piaṛṛangnge tadea'u ma'ammulla, ana see i tou nabbatti'a si mangitou al᷊awo'a apan nirolokku Mawu si tou. 8-9I mangitou sarangkanambone sinumimbakka ringannu naṛṛindo'a, “Yami mappulu tumuṛṛutta al᷊awo'a apan nirolokku Mawu,” wuṛṛu sasimbakka udde nippasingkatti Musa su Mawu. Ana see unnu Mawu si Musa, “I Ya'u sarun rumanta ringannu aoosanu winabbawa apan maappala; manga taumata sarun maddaringikka si Ya'u mabbisara si'o, wuṛṛu manattakka orassa udde i mangitou sarun sidutu mangngimanna si'o. 10Orassa indi sombaite manga taumata udde, wuṛṛu doloṛṛa'e i mangitou allo indi wuṛṛu tiṛṛabbi mandiahi watanganne mattaṛṛamawu. I mangitou ṛinone mabbansalla laubbi mangitou. 11Tillorega i mangitou ṛinone nariahite. Su allo udde Ya'u sarun sumossokka su puiddu Wowon Sinai, su tampa taumata sarangkanambone wotongnge maasilo si Ya'u. 12Pa'ola'e tatiala su uapal᷊iwutta wowone indi maola'a passaranna apan tawe wotongnge lewesannu walahanna udde. Singara'e walahanna udde suma'a su wowone, ewe'e arie lai pangundani. Isai-sai apan nalliu passaranne, sarun iṛṛuumanna pateanna; 13taumata udde ṛinone tuntungannu watu ara'e piti'anna, wuṛṛu tawe wotongnge indinganna. Indi mariaddi su taumata ara'e lai su winatangnga; sarangkanambone apan nilumiu passaranna udde ṛinone iṛṛuumanna pateanna. Su tempo aṛṛingiṛṛanna tingikku trompeta apan mal᷊annu, manga taumata udde ṛinone sumaate su wowone.”
14-15Wua'udde i Musa sinumossokka wuassu wowone wuṛṛu nandolokku manga taumata udde nandiahi ana waugu inaite mattaṛṛamawu. Wisarane, “Tillorega i yamiu ṛinone nariahite, wuṛṛu tantal᷊anna i yamiu imbaṛṛangnga matatamba.” Ana see balahanna udde nandiahite wuṛṛu nabbansalle laubbi mangitou.
16Su allo atallune, su tempo marua allo, pia dallu'a wuṛṛu sawallo. Winabbawa apan maappala nilumapputa wuassu puiddu wowone wuṛṛu niaringikke tingikku trompetta apan tumaniten ma'ikatta. Anambon taumata su paddasananna mangngindon atata'utta. 17I Musa nangapiddi mangitou sinumabbangnga tadea'u maisasomban Duata, ana see i mangitou dirumarisikka su wawal᷊annu wowone udde. 18Ahewallu Wowon Sinai aoopannu timbulla, ana waugu Mawu sinumossokka su puidde sulal᷊ummu putungnga. Timbulla udde sussal᷊oi naal᷊ihidda timbulla wuassu padduru'anna, wuṛṛu ahewallu wowone niumio'a ringannu lembone. 19Tingikku trompeta mallannu ma'ikkata. I Musa nabbisara, wuṛṛu Ruata sinumimbakka ringannu rallu'a. 20Mawu sinumossoka su puiddu Wowon Sinai, wuṛṛu namago si Musa niaparanta su puiddu wowone udde. Ana see i Musa sinumaate, 21wuṛṛu Mawu nabbisara si tou, “Lintukke wuṛṛu paanaunga manga taumata udde manungku i mangitou tawe wotongnge malliu passaranna ana waugu rumanta ma'ellega si Ya'u. Amungkangngu i mangitou lumawangnga lai, manambo su wallati mangitou sarun mate. 22Ewe'e lai manga imam apan ma'apulu mangundani-U, ṛinone mangukkasa watanganne; amungkangngu tawe, i mangitou sarun Ta'u iṛṛuumanna.”
23Unni Musa su Mawu, “Manga taumata udde tawe maasa'a, ana waugu I'o nandolokki yami mapaola'a wowone indi tampa apan na'ukkassa wuṛṛu sidutu ma'ellega passaranna pal᷊iwu.”
24 Mawu sinumimbakka, “Sossokke, ana see pabbelengke isindi suadio'a ringanni Harun. Arawe manga imam wuṛṛu manga tumanangnge tawe wotongnge malliu passaranna wuṛṛu rumanta ringang-Ku. Amungkangngu i mangitou malliu, i mangitou Ta'u iṛṛuumanna.” 25Ana see i Musa sinumossokke naisasomban balahanna udde wuṛṛu i tou namasingkattu tanatan Mawu si mangitou.
सध्या निवडलेले:
SASABANGNGA 19: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन