SASABANGNGA 15
15
Aantari Musa
1Ana see i Musa wuṛṛu manga taumatan Israel nangantarin aantari indi ipaddalo Mawu,
“I Ya'u maapulu mangantari su Mawu,
ana waugu i Tou naauntungke ringannu wahewalla.
Anambon awal᷊o wuṛṛu sumasa'ene
nituntungi Tou sulal᷊ummu tahal᷊oangnga.
2 Mawu mananahe'u apan matohassa;
ete i Tou nanal᷊amatta si ya'u.
I Tou Ruata'u, i ya'u maapulu maddalo si Tou,
Ruata sassubbannu iupungngu al᷊amona'u, wabbantuhangku i Tou.
3 Mawu udde mamamagalo apan matohassa,
Mawu, uddewe aran-Ne.
4Tantara Mesir wuṛṛu anambon keretane
nituntungngi Tou sulal᷊ummu tahal᷊oangnga.
Manga tembonannu tantara apan awaṛṛanianne
nilumakkubba su Tahal᷊oangngu Gelagah.
5I mangitou niallupu tahal᷊oangnga apan mal᷊al᷊umma,
wuṛṛu naal᷊ihidda watu niwontolla su wantane.
6Atatohan-Nu mangke ma'atiangnga, oh Mawu,
I'o na'ola,a seetta nasue-sue.
7Ringannu awawantuga apan bahewalla
I'o namate sarangkanambone apan lullawangnga Si'o.
Asasa'u-Nu sussal᷊oi naal᷊ihidda putungnga,
wuṛṛu nanutungnga si mangitou naal᷊ihidda laṛṛami.
8I'o nattiuppa tahal᷊oangnga, ua'e mallul᷊unna matanggakka,
uarisikka matul᷊idda naal᷊ihidda darandungnga, na'oman sara wantan tahal᷊oangnga wotongnge amatanna.
9Unnu seetta, ‘I mangitou sarun ta'u enggenanna wuṛṛu ta'u sametanna,
ta'u sawutanna hal᷊ele'u, wuṛṛu ta'u pateanna abbi i mangitou.
Ana see anambon darotongngi mangitou ta'u anuanna,
ta'u tahianna wuṛṛu ipaatta ma'oman sara mawusa.’
10Arawe Mawu ringannu paassa sumangngo
nandantan allo ma'asusa su Mesir.
I mangitou nilumakkuba naal᷊ihidda tima apan mawakkata
sulal᷊ummu lua'a apan matandi'a.
11Ruata suapane apan botongnge maasul᷊ungnga Si'o,
oh Mawu Apan Lembon Mawantuga wuṛṛu na'ukkassa?
Isai wotongnge mappa'ola'a manga al᷊aṛṛindu'a
wuṛṛu inolaanna apan bahewalla ere Mawu?
12I'o nakkatadda lima uanannu,
ne seetta nawul᷊ite niallupu runia.
13I'o nangehetta walahanna apan buatte niapasal᷊amatta indi,
ana waugu I'o uanaungnga pa'aire-Nu.
Ringannu atatohassa apan bahewalla i mangitou sasirungan-Nu,
wuṛṛu niehen-Nu watukku leta'a apan susi.
14-15Manga walahanna naaringikka wuṛṛu mangngindo;
taumatan Filistin wuṛṛu manga piaṛṛa'u Edom nata'utta.
Taumatan Moab apan matohassa mangngiladda,
taumatan Kanaan naungnge naadio'a.
16I mangitou tumaniten matta'utta
nabbiala atatohassu Mawu.
Su tempo al᷊aṛṛanang-Ngu sinumabbi, seetta tawe taṛṛino ipanaṛṛangnga;
naal᷊iute walahanna apan buatte nipallossu Mawu.
17Ana see Israel niuntudda
watukku tampa apan buatte nipile-Nu maola'a atatanaan-Nu.
I mangitou namanua su wuiddu Mawu apan susi,
su Wal᷊en apan buatte niolang-Ngu sassane.
18Ete I'o Mawu, Ratu,
apan uaparenta saran mal᷊annu-l᷊annu.”
Aantarin i Miryam
19Su tempo taumatan Israel namare tahal᷊oangnga, i mangitou niumamatta su wantane apan mamara. Arawe su tempo manga kereta wuassu Mesir ringannu awal᷊o wuṛṛu sumasa'ene nasutta sulal᷊ummu tahal᷊oangnga, Mawu na'ola'a uaene nangelekka apia na'oman sara i mangitou nilumakkubba.
20Ana see i Miryam, sangkatou nabiah, iaangngi Harun, nanganu rebanane wuṛṛu anambon bawine nanengkella lai rebana apiddu massal᷊aingnga. 21I Miryam nangantarin aantari mangitou,
“Pangantarite paddalo Mawu,
ana waugu i Tou naauntungnga ringannu mapia atonna.
Anambon awal᷊o wuṛṛu sumasa'ene
nituntungngi Tou sulal᷊ummu Tahal᷊oangnga.”
Ua'e mapetta
22Wua'udde i Musa nangapiddu walahannu Israel wuassu Tahal᷊oangngu Gelagah nabattuku wadda'u Syur. Al᷊annune tallu allo i mangitou u'amatta su wadda'a, ringannu tawe nasomba ua'e. 23Ana see i mangitou na'omate su tampa aranne Mara, arawe ua'e isudde tumaniten mapetta, na'oman sara tawe ia'inumma. Ana waugu udde tampa udde nissago Mara, atappasanne mapetta. 24Ne manga taumata udde sussawutulle si Musa wuṛṛu naiwal᷊o, “Apate inumanni ite?” 25I Musa niumal᷊iomanna ringannu atonna-tonna su Mawu, ana see Mawu namantingidda si tou alu sampaddi. Alu udde nituntungngi Musa sulal᷊ummu ua'e, ana see ua'e udde nabbal᷊i maammi, na'oman sara wotongngete ia'inumma.
Su tampa udde Mawu nangonggolu manga atoranna si mangitou, wuṛṛu isudde lai i Tou namono'a si mangitou. 26Unnu Mawu, “Paatuṛṛutte si Ya'u ringannu atonna-tonna, wuṛṛu pa'ola'e apa apan aellehang-Ku mapia; paatuṛṛutte anambon parenta-U. Amungkangngu i yamiu ma'ola'a aroddi, yamiu tawe Ta'u iṛṛuumanna ringannu manga radda'a apan Ta'u niaparanta su taumata Mesir. Ete i Ya'u Mawu apan nangapia si yamiu.”
27Wua'udde i mangitou na'omate su tampa aranne Elim. Isudde pia mapul᷊o dua al᷊imatang kua'e wuṛṛu pitu pul᷊o punnu alu kurma. I mangitou naddasanna maraning kua'e udde.
सध्या निवडलेले:
SASABANGNGA 15: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन