SASABANGNGA 10
10
Sal᷊awa'u taṛṛangassa
1 Mawu nabbisara si Musa, “Roote sumaruanna ratu. I Ya'u buatte na'ola'a si tou wuṛṛu manga mammamanaran araratuanne naungnge maattikka, tadea'u i Ya'u wotongnge ma'ola'a manga al᷊aṛṛindu'a su pattangnganni mangitou, 2wuṛṛu tadea'u i'o wotongnge mabbatti'a su ana'a pulunnu ereapa i Ya'u nannalangnga balahannu Mesir ringannu manga al᷊aṛṛindu'a udde. Ne i yamiu sarangkanambone masingkatta manungku ete i Ya'u Mawu.”
3Ana see i Musa wuṛṛu i Harun inaite sinumaruanna ratu wuṛṛu nabbisara si tou, “Mawu, Ruatan balahannu Ibrani, nabbisara, ‘Sara tingngera i'o tawe massuṛṛubawa si Ya'u? Wala'awe al᷊aṛṛana'U inai, tadea'u i mangitou wotongnge mattaṛṛamawu si Ya'u. 4Amungkangngu i'o ta'e lai manol᷊a'a, ne tiṛṛabbi Ya'u mandantan taṛṛangassa su wanuanu. 5Ahewallu wowon leta'a sarangkanambone sarun ataapannu taṛṛangassa apan aroddi anambone. Anambon lamben sasuanna, ewe'e lai manga aaluanna apan tawe nate su uranna masunge, sarun insueannu taṛṛangassa udde. 6Wal᷊en araratuannu, manga wal᷊en mammamanaran araratuanna wuṛṛu manga wal᷊en tumanangnge sarun mapenen taṛṛangassa. Asasilaka indi massadatanna wuassu apan buatte niapendamannu iupungngu al᷊amonanu.’ ” Wua'udde i Musa nabbal᷊i'a wuṛṛu napul᷊e.
7Manga mammamanaran araratuanna nabbisara ratu, “Ma'oman sara tingngera taumatan udde mapaasusan kite? Wala'e anambon taumatan Israel udde inai mattaṛṛamawu su Mawu, Ruata mangitou. Pa'ellege wanuan kite indi nahahakke!”
8Ne i Musa ruan i Harun niwagoante apia sinumaruanna ratu. Unnu ratu sitarua, “I yamiu wotongnge inai mattaṛṛamawu su Mawu, Ruatanu. Arawe isai su wallatti yamiu udde inai?”
9Sasimbakki Musa, “Yami sarangkanambone, mawae ete dario'a aroddi lai timmade. Yami sarun mangapiddu ana'i yami sarangkanambone, anambon sapi, domba wuṛṛu ambingngi yami, ana waugu yami sarun mallaghun sambau ramea wahewalla ipangaddata Mawu.”
10Unnu ratu, “Tawe mariaddi ya'u mamalan kamiu mangapiddu manga taumata wawine wuṛṛu manga anangngu! Apan raddoronganni yamiu udde nassul᷊ungngu ringannu mangngantimma i ya'u madorongnga Mawu mangal᷊amatta si yamiu. Nasemakke si ya'u manungku i yamiu pia pandumma lal᷊eo. 11Tawe! Tumba'u ingana'a esakka wotongnge inai mattaṛṛamawu su Mawu, amungkangngu atonna-tonna i yamiu maapulu mattaṛṛamawu!” Ringannu manga wisara udde i Musa wuṛṛu i Harun nilimbuaṛṛanna wuassu wal᷊en araratuanna.
12Ana see Mawu nabbisara si Musa, “Wattea'a ta'iakku su wowon leta'u Mesir. Manga taṛṛangassa sarun dumanta wuṛṛu umanna al᷊awo'u sasuanna apan ta'e nallambe su uranna masunge.” 13I Musa namatten ta'inne wuṛṛu Mawu na'ola'a anginna ra'i tinumiuppa su wanua udde su al᷊o'engngu allo wuṛṛu su al᷊o'engngu ṛabbi. Marua allo anginna udde uaapidden manga taṛṛangassa 14apan tumanite manambo, na'oman sara napenete ahewallu runia. Taambe saran paassa taumata naasilo taṛṛangassa aroddi anambone, wuṛṛu napawe wua'udde olangnge udde tate nariaddi apia. 15Ahewallu leta'a napenen taṛṛangassa wuṛṛu aellehanna nabbal᷊i ma'itumma. I mangitou u'anna al᷊awo'a apan tawe nasue su uranna masunge udde, nasutta manga wuassu aaluanna. Su ahewallu leta'u Mesir tate saran sambau apan ma'elomma apan nallambe su manga aaluanna ara'e manga sasuanna.
16Ratu ringannu mal᷊ihakka namaggo si Musa wuṛṛu si Harun ana see nabbisara, “I ya'u narosate su lantakku hatin Duatanu wuṛṛu su saruanni yamiu. 17Ampungewe rosa'u paassa indi, wuṛṛu aal᷊iomante su Mawu Ruatanu, tadea'u i Tou mangal᷊appa wuassia'u ṛuumanna apan ma'apate indi.” 18I Musa nanantangken datu wuṛṛu niumal᷊iomante su Mawu. 19Mawu namal᷊ute anginna nabbal᷊i anginna waṛṛatta apan tumanite ma'ikkatta. Manga taṛṛangassa udde nitiuppu anginna wuṛṛu niapidde watukku Tahal᷊oangngu Gelagahi. Saran sambau tawedu natantangnga su ahewallu leta'u Mesir. 20Arawe Mawu na'ola'a naungngu ratu maattikka, wuṛṛu i tou maddiri mamalan taumatan Israel inai mapul᷊e.
Wasa tuudda su Mesir
21 Mawu nabbisara si Musa, “Wattea'e ta'iakku ire'e, ne leta'u Mesir sarun mabbal᷊i wasa tuudda.” 22I Musa namatten limane ire'e, wuṛṛu al᷊annune tallu allo ahewallu leta'u Mesir wasa tuudda. 23Taumatan Mesir tawe maasilo manga apa wuṛṛu al᷊annune udde tawe saran sangkatou apan umamatta suapa-suapa. Arawe su wal᷊en manga taumatan Israel sidutu masemakka.
24Ana see ratu namago si Musa wuṛṛu nabbisara, “I yamiu wotongnge inai mattaṛṛamawu Mawunu. Ingana'a wawine wuṛṛu al᷊aṛṛana'a wotongnge lai tumantalongnga. Arawe sapi, domba, wuṛṛu ambingngi yamiu tawe wotongnge iapidda.”
25I Musa sinumimbakka, “Amungkangngu aroddi i Tuangku ṛinone mangonggola si yami winatangnga olaanna sasamba wuṛṛu sasamba itattambunna su Mawu, Ruatan kami. 26Anambon binatangngi yami sarun iapiddi yami; saran sambau tawe itantangngi yami. Wuassu winatangnga udde yami mamile suapane apan sarun olaanna sasamba su Ruatang kami. Wakkute poiaroddi yami sarun maasingkatta winatangnga suapane apan sarun ionggoli yami.”
27 Mawu na'ola'a ratu naungnge maattikka na'oman sara i tou maddiri mamalan balahannu Israel inai mapul᷊e. 28Unnu ratu si Musa, “Passal᷊iu wuassu saruangku! I ya'u tate maasilo si'o apia! Amungkangngu niasiloangku apia hatinu, i'o sarun mate!”
29“Ere su wisaran i Tuangku,” unni Musa, “i Tuangku sarun tate maasilo si ya'u lai.”
सध्या निवडलेले:
SASABANGNGA 10: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन