KORINTUS 1 8
8
Soaḷ kaanon inta pinosumba kon berhala
1Yo tanaa in soaḷ kaanon inta inogoi saḷaku sosumba kon berhala. Oo, totuubí in kain intau, “Kita in komintan bidon nongopandoi.” Táe pandoi tatua in nokopobaḻídon kon intau mokaḷakuang, táe aka tabi, yo mokobiag kon intau. 2Intau inta monganggap kon nobayongdon in kinotaauannea, sabanarnea in diábí nonotaau totok in sia. 3Táe intau inta totu-totuudon motabi kon i Allah, sia tua in kotaauanbí totok i Allah.
4Yo soaḷ mokaan kon kaanon inta ain pinosumba kon berhala, sabanarnea in kinotaauanbí naton kon berhala tua in diábí onda. Sin kinotaauanbí doman naton kon tongábí tobatú in ki Allah; diábí in ibanea mako. 5Totuubí kon moantó doman inta sinangoian ki allah andeka ki tuhan in kon dunia naa. 6Táe kita in nopirisayabí kon tongábí tobatú in ki Allah. Inta nomaḻí kon bayongan bonu in dunia naa. Bo tongábí mobiag kon kopontingan-Nea in kita. Ki Tuhan in tongábí doman tobatú, tuata in ki Yesus Kristus. Pinongin i-Nia tua bayongan in yagi-yagi binaḻí, bo lantaran doman Sia dá nobiag in kita.
7Umpaka natua, táe diábí komintan intau in nonotaau kon soaḷ tatua. Sin umaaipa doman masa in tanaa oyúonpa in umuran mosumba kon berhala mita. Tuamai oyúonpa doman in raian kon kaanon inta ain pinosumba kon berhala in kaanonbí doman in berhala. Manangka intua aka kaanon monia in kaanon tatua yo porasaan monia in baradosaanbí in mosia; tua komintan popisíbí in diápa noguyang in pirisaya monia. 8Sabanarnea kaanon in diábí mokopobaḻí konbá modiug kon i Allah in kita. Aka kaanon naton in kaanon tatua, yo diábí in pongarunea. Diábí in kauntungannea bo diábí doman in karugiannea.
9Tongá musti mokopopia! Sinbá diá mokopopisí kon intau mita inta diápa noguyang in pirisaya monia in baradosaan, sin popisí in moiko nobebasdon in mogaid kon onukadon. 10Nanaa i makusudku: Aka kuma moiko inta aindon nopirisaya totu-totuu bo indoianmai iḻimitúbí mako bo mongaan kon bonu in baḷoi pobobogoian kon sosumba kon berhala, bo inontong in intau mita inta diápa noguyang in pirisayanea. Dá tantú oaidmu tatua in mobogoi bidon in contoh kon intau ibanea sahingga in nobarani intau tatua nokaan kon kaanon inta inogoidon pinosumba kon berhala? 11Mangaḻenea kon naa, binaradosadon intau ibanea popisí in pirisayamu tatua. Bokaka lantarandon mosia tua dá ki Kristus in minatoi. 12Bo aka natua in tantú aidan monimu kon bayongan utat mita Keresten – dá mangaḻenea kon tua, moiko in nomoguyaatdon kon pirisaya in intau inta diápa noguyang in pirisaya – dá baradosaandon kon i Kristus in moiko. 13Tuamai aka mokobaradosabí kon i utatku mita in kaanon tatua, dá doí bidon in akuoi mokaan kon ponoyá tatua. Sin dikabo baradosaan in ki utatku tua popisí akuoi.
सध्या निवडलेले:
KORINTUS 1 8: INOMOG
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Alkitab Singog In Mongondow Masa In Tanaa © Indonesian Bible Society, 2016.