KORINTUS 1 12
12
Totabi mita i Allah
1Pogumanku tanaa in soaḷbí totabi inta inogoi in Roho i Allah. Ibogonku bá totokbí in kotaauan monimu in soaḷ tanaa. 2Toropdon, kon wakutu in moiko diápa nonotaau kon i Tuhan, moiko in umuranpabí dinumudui kon berhala inta bobó. 3Manangka intua mustibí kotaauan monimu kon intau inta kinawasadon in Roho i Allah in diábí motaau mosingog, “Binaḷa-baḷa in ki Yesus!” Ná doman tua, diábí doman in tobatúmai intau in moguman, “Ki Yesus tua in Tuhanbí!” aka intau tatua bo diá kinawasa in Roho i Allah.
4 #
Rm. 12:6-8
Norupa-rupamai in totabi in Roho i Allah kon intau, táe inta nobogoi in tongábí Roho tobatú tatua. 5Bo norupa-rupamai oaidan pogundoi kon i Tuhan, táe ki Tuhan inta inundoi tatua in Sia-Siakabí! 6Bo norupa-rupamai in pogogaid kon oaidan i Tuhan, táe ki Allah inta nobogoi in ropot mogaid kon oaidan tatua Sia-Siakabí doman. 7Tongá pomuḷoi in intau inogoian bidon i Tuhan in totabi sin pakéon moyotakin. 8Oyúon intau in nokouḻí kon totabi mosingog kon inta mopia, oyúon doman in nokouḻí kon totabi motundú kon soaḷ ki Allah. 9Kon intau tobatú, Roho tatua in nobogoi doman in komampuan kon intau ibanea sinbá mopirisayadon totok kon i Kristus; bo kon intau ibanea doman, Roho tatua in nobogoi in totabi mongundam kon intau. 10Intau tobatú inogoian totabi mogaid kon soaḷ mita inta mokoherang, yo ibanea inogoian in totabi mopotaau in tomayá mita i Allah. Bo ibanea doman inogoian in komampuan motaau mopoyoposi onda in totabi inta nongkon Roho i Allah bo onda in deeman. Oyúon inogoian in komampuan mosingog kon bonu in bahasa inta mokoherang, bo oyúon doman inogoian in komampuan moginsilang kon mangaḻe in singog mita tatua. 11Tua komintan in tongábí inaidan in Roho i Allah tobatú tatua; pomuḷoi in intau in mokouḻíbí kon totabi noyo-noyoposimai poduduibí ibog in Roho tatua.
Nobarong in anggota táe toawakanbí
12 #
Rm. 12:4-5
Ki Kristus tua in ná bí onda bo awak in intau; awak naa in tongábí tobatú, táe nobarong in anggotanea. Táe umpakabí nobarong in anggota in awak tua, táe tongoawakanbí monag. 13Natua doman in kita komintan, intau in Yahudi ande deeman, ata ande deeman; kita komintan ain bidon binaptis in Roho inta kotangoianmai naa, sinbá motobatúdon in kita kon awak i Kristus bo mokorasa doman kon Roho inta notongkai doman tatua.
14Sin awak tatua in deemanbí tongá tobatú in anggotanea, táe nobarongbí. 15Aka sioḷ bo moguman, “Akuoi in deemanbí ḻima, tuamai akuoi in diábí notobatú in awak,” yo degá totuu kon sia tua deemanbí anggota in awak. 16Bo aka bongoḷan in moguman, “Soaḷnea akuoi naa in deemanbí mata, tuamai in deemanbí anggota in awak akuoi,” yo degá totuu kon bongoḷan tua in deemanbí anggota in awak? 17Aka kuma bo awak naa komintan mata, yo naondabí sinbá mokodongog in awak? Andeka awak naa bo komintan bongoḷan, yo naondabí bá mokobó in awak tatua? 18Kinotaauan bidon naton, kon tua komintan ain bidon sinampat i Allah kinotompia kon awak naton podudui in ibog-Nea. 19Aka tua komintan bo tongábí tobatú anggota, yo ondabí sinangoian awak. 20Dá totuu kon nobarongbí in anggota, táe tongábí tongoawakan monag.
21Manangka intua mata in diábí motaau in moguman kon ḻima, nanaa, “Akuoi in diábí moparaḷu kon inimu!” andeka uḷu in moguman kon sioḷ, “Akuoi in diábí moparaḷu kon inimu!” 22Sin inta inanggap naton diá baraguna, tuabí inta totok in paraḷuon naton; 23bo inta inanggap naton diá koboḻi, tuatabí inta totok hargaan naton. Sin onda inta diá mopia ontongon naton, yo tuatabí in totok tarukiraan naton. 24Onda inontong naton nopira, diábí tarukiraanmai naton. Tua komintan ain bidon sinampat i Allah kon awak naton kinotompia totok, sahingga onda in kai naton diá koboḻi tuatabí in totok koboḻi. 25Awak naa in diábí nosila-silai; bo tumpaḷa mositarukiraan. 26Manangka intua aka anggota tobatú bo mokorasa kon roriga, yo anggota ibanea in mokorasa doman kon roriga tatua; bo aka tobatú anggota bo duíon, yo gina in anggota ibanea in tumpaḷabí moḷunganga.
27Moiko nion in komintanbí awak i Kristus bo komintan doman anggota-Nea. 28#Ep. 4:11 Natua doman in kon jamaat. Tampat in bayongan intau ain bidon sinantú i Allah. Muna in rasul mita; nogindua in nabi mita, nogintoḷu in guru mita bo intau mita inta nogaid kon mokoherang, onda intua intau mita inta inogoian in totabi mongundam bo motuḷung kon intau ande inta mobaḻí duduianmai, ande mosia inta inogoian totabi mosingog kon mokoherang. 29Mosia in deemanbí komintan rasul, andeka nabi, andeka guru. Diábí komintan intau inogoian in totabi mogaid kon bayongan inta mokoherang, 30andeka mongundam kon intau, andeka mosingog kon bonu in bahasa inta mokoherang, andeka moginsilang kon mangaḻe in bahasa mita tatua. 31Tuamai poramuji totok in moiko sinbá mokouḻí kon totabi inta totok in moponting.
Tundúankubí in daḷan inta mopia-pia in moiko moiduduimai.
सध्या निवडलेले:
KORINTUS 1 12: INOMOG
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Alkitab Singog In Mongondow Masa In Tanaa © Indonesian Bible Society, 2016.