KADADDIYAN ATOR MAMOLAN
ATOR MAMOLAN
Ketab Kadaddiyan paneka notorragi pancepta'anna alam dunnya, asal-osolla manossa, lantaranna dusa sareng kasangsara'an e dunnya, jugan kadi ponapa Allah se ahubungan sareng manossa. Ketab Kadaddiyan paneka kengeng ebagi daddi dhu bagiyan se penting:
1. Pasal 1-11. Pancepta'anna alam dunnya sareng asal-osolla manossa. E bagiyan paneka etotorragi jugan parkara Adam sareng Hawa, Kain sareng Habil, Ennoh sareng banjir se raja, sareng manara Babil.
2. Pasal 12-50. Asal-osolla lalohorra bangsa Isra'il. Lalohor se nomer settong enggi paneka Ibrahim, se kalonta lantaran imanna sareng kata'adanna ka Allah. Pas eterrossagi sareng sajarana Ishak pottrana Ibrahim, sareng Yakub pottrana Ishak. (Yakub paneka enyamae jugan Isra'il.) Saamponna gapaneka eterrossagi sareng sajarana pottra lalake'anna Yakub se dhubellas oreng, se noronnagi suku Isra'il se dhubellas. Se nyerrat ketab paneka ngotama'agi caretana sala settong dhari pottrana Yakub se anyama Yusup sareng sadajana kadaddiyan se dhi-budhina daddi lantaranna Yakub sareng tra-pottrana tor kalowargana bang-sebang padha ngalle ka Messer.
Sanare ketab paneka notorragi parkara reng-oreng e jaman awwal, namong se eotama'agi enggi paneka caretana pa-ponapa se elampa'agi sareng Allah. Ketab paneka emolae sareng notorragi epaterrang ja' Allah nyepta'agi alam dunnya, sareng eahere kalaban janji ja' Allah bakal teptebba ngorosa ommadda. Se daddi peranan otama e dhalem ketab paneka dhari parmola'an kantos ka panotobba enggi paneka Allah se ahakime sareng se ngokom pasera'a saos se alako sala. Allah gapaneka jugan se nonton sareng nolong ommadda, sareng se abadhi sajarana ommat gapaneka. Ketab se kona paneka etoles kaangguy nyathet sajarana imanna settong bangsa, sarengngan jugan kaangguy abanto sopaja iman gapaneka teptep odhi'.
Essena Ketab
Allah nyepta'agi alam dunnya ban manossa 1:1–2:25
Lantaranna dusa ban kasangsara'an 3:1-24
Dhari Adam sampe' ka Ennoh 4:1–5:32
Ennoh ban banjir raja 6:1–10:32
Manara Babil 11:1-9
Dhari Sem sampe' ka Abram 11:10-32
Para Kapala Kalowarga: Ibrahim, Ishak, Yakub 12:1–35:29
Toronanna Esau 36:1-43
Yusup ban tan-taretanna 37:1–45:28
Oreng Isra'il e Messer 46:1–50:26
सध्या निवडलेले:
KADADDIYAN ATOR MAMOLAN: MAD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन