MATIUS 2
2
Kuari-kuari jak Timur
1Isa dilaherko di kota Betlehem di negeri Yudea waktu masa pemerintahan Raja Herodes. Pada waktu seno pira-pira ahli ilmu bintang jak Timur ratong mik Yerusalem. 2Tian betanya di dipa-dipa, “Di dipado Sanak seno, sai laher untuk jadi raja ulun Yahudi? Sekam ngeliak bintang-Ni terbit di kebelah timur, rik sekam ratong untuk nyumbah Ia.”
3Waktu Raja Herodes ngedengi hal seno, ia tekanjat nihan, reno juga sunyinni jelma di Yerusalem. 4Maka ia ngayun sunyinni imam kepala rik guru-guru agama bangsa Yahudi ratong bekumpul. Raduni ia betanya jama tian, “Di dipado haga laher Raja sai dijanjiko Allah?”
5Tian ngejawab, “Di kota Betlehem di negeri Yudea. Mani rejido ditulis ulih sai nabi,
6 #
Mi. 5:1
‘Niku Betlehem, di negeri Yehuda,
niku sekali-kali lain hak sai paling lunik di hantara kota-kota utama di Yehuda.
Mani jak niku haga ratong sai jelma sai mimpin
sai haga mimpin umat-Ku Israel.’ ”
7Seraduni mansa keterangan udi, Herodes ngurau ahli-ahli bintang jak Timur ano secara hema-hema. Raduni ia betanya jama tian kapan tepatni bintang ano mulai keliakan. 8Radu jak seno ia ngayun tian mik Betlehem jama luhot, “Mikdo, sepokdo Sanak udi jama teliti. Rik kik keti ngehalu Ia, keni pandai jama nyak, in nyak juga mik nyumbah Ia.”
9-10Raduni mikdo tian. Tian ngeliak lagi bintang sai tian liak tumbai di kebelah timur. Hara riangni tian ngeliak bintang udi! Bintang udi ngehena tian, raduni taru tepat di atas rang Sanak udi. 11Tian kuruk mik delom lamban udi rik ngeliak Sanak udi jama Maria, emak-Ni. Tian sujud rik nyumbah Sanak seno, raduni ngebukak rang harta tian, rik mempersembahko jama Ia emas, kemiyan, rik mur. 12Allah ngingokko tian di delom hanipi in dang muloh jama Herodes. Jadi tian mulang ngeliu renglaya sai bareh.
Ngungsi mik Mesir
13Seraduni ahli-ahli bintang udi berangkat, malaikat Tuhan ngeliakko diri jama Yusuf di delom hanipi. Malaikat udi cawa, “Herodes bemaksud nyepok Sanak udi untuk ngebunuh Ia. Ulihni seno minjakdo, usungdo Sanak seno jejama emak-Ni ngungsi mik Mesir. Tinggaldo di disan sampai Nyak cawa lagi jama niku.”
14Yusuf minjak, rik bingi seno juga ia ngusung Sanak seno jejama emak-Ni ngungsi mik Mesir. 15#Hos. 11:1 Tian tinggal di disan sampai Herodes mati.
Maka tejadido api sai diucakko Tuhan liwat nabi-Ni, reji, “Nyak ngurau Anak-Ku jak Mesir.”
Pembunuhan sanak-sanak
16Waktu Herodes pandai bahwa ahli-ahli bintang jak Timur udi ngebuhung, ia butong nihan. Raduni ia merintahko untuk ngebunuh sunyin sanak bakas sai umor rua tahun mik debah di Betlehem rik sekitarni. Udi cucok jama keterangan sai didapokni jak ahli-ahli bintang udi tentang waktuni bintang udi keliakan.
17Maka tejadido api sai pernah diucakko ulih Nabi Yeremia, yakdo,
18 #
Yer. 31:15
“Di Rama kedengian suara bebatui,
keluhan rik hiwangan.
Rahel ngebatui anak-anakni;
ia mak haga dihibur mani tian radu mak ngedok.”
Muloh jak Mesir
19Seraduni Herodes mati, waktu Yusuf masih di Mesir sai malaikat Tuhan ngeliakko dirini luot jama Yusuf di delom hanipi. 20Malaikat udi cawa, “Jelma-jelma sai haga ngebunuh Sanak udi radu mati. Ulihni seno minjakdo, akuk Sanak seno rik emak-Ni rik mulohdo mik Israel.” 21Yusuf pun minjak, raduni ngusung Sanak seno rik Maria muloh mik Israel.
22Kidang kak raduni Yusuf ngedengi bahwa Arkelaus, anakni Herodes radu ngegantiko bakni jadi raja negeri Yudea. Jadi Yusuf rabai mik di dudi. Seraduni ia mansa petunjuk Tuhan lebih lanjut delom hanipi, ia mik daerah Galilea. 23#Mrk. 1:24; Luk. 2:39; Yoh. 1:45 Di dudi ia tinggal di kota sai gelarni Nazaret. Injuk reno tejadido api sai diucakko ulih nabi-nabi mengenai Sanak seno: “Ia haga disebut Ulun Nazaret.”
सध्या निवडलेले:
MATIUS 2: LAILJP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
@ LAI 2002 Indonesian Bible Society (Lembaga Alkitab Indonesia)
