Génesis 5
5
Adán ape disi ejórigo ore íode u udojo nanique
1Enga e yatata Adán ape disi ejórigo ore íode, jé aja sequeredie iji ore itoringai yúode. Uje Dupade pésu jnani bajai nanique enga jé gajnui tu dapesudi jnani nanique. 2Enga uje Dupade pésu ore iji taningai nanique enga chequé uña, ga jé jnani uñai. Enga doi nanique enga cho darúja ore ome cucha omone nanique. Enga chajire ore nanique enga chojninga: "Ayoré yipesudode udore."
3Enga sequeredie chise 130 iji Adán yui nanique uje abi Set base nanique, enga uté chopise dayé nanique. 4Udojo quigade enga Adán guejnanie sequerei chise 800 años nanique enga quene topísi. Mu que gusu Adán ape bajade, Caín, aja Abel, Set ore nanique mu ejode dépoji to rĩ enga diyoqui uñéngo, jé diyequé uñanie.
5Yáta guejnanie sequerei udire aja ñane enga e chise 930 años nanique ome Adán aja dagachodi.
6Enga Set uté guejnanie sequerei chise 105 años nanique uje abi Enós base nanique. 7Mu udojo quigade enga guejnanie sequerei chise 807 años nanique enga quene Set topísi to nanique. Mu que gusu abi Enós gotique nanique mu ape ejode dépoji rĩ, enga diyoqui uñéngo, jé basa diyequé uñanie rĩ. 8Enga yáta guejnanie sequerei udire aja ñane enga e chise 912 nanique ome Set uté jé aja uje topísi to nanique.
9Enga Enós guejnanie sequerei chise 90 años nanique uje abi Cainán base nanique. 10Udojo quigade enga guejnanie sequerei chise to 815 años nanique jé aja cachodi uje topísi nanique. Mu que gusu abi Cainán gotique mu ape ejode dépoji to rĩ enga diyoqui uñéngo, jé basa diyequé uñanie. 11Enga yáta guejnanie sequerei aja ñane enga chise 905 nanique ome Enós jé aja uje topísi to nanique rĩ.
12Enga Cainán guejnanie sequerei e chise 70 años uje abi Mahalaleel base to nanique. 13Udojo quigade enga guejnanie sequerei chise 840 nanique jé aja itoringai uje topísi. Mu que gusu abi Mahalaleel gotique nanique mu ape ejode cuse to nanique enga diyoqui uñane, jé basa ga diyequé uñanie. 14Enga yáta guejnanie sequerei aja ñane enga chise 910 nanique ome Cainán jé aja uje topísi nanique.
15Enga Mahalaleel guejnanie sequerei chise 65 nanique uje abi Jared base nanique. 16Udojo quigade enga guejnanie sequerei chise 830 nanique jé aja itoringai uje topísi nanique. Mu que gusu abi Jared nanique gotique mu ape ejode cuse to ga diyoqui uñane, jé basa diyequé uñanie. 17Enga yáta guejnanie sequerei aja ñane enga chise 895 años ome Mahalaleel nanique jé aja uje topísi nanique.
18Enga Jared guejnanie sequerei chise 162 años nanique uje abi Enoc base nanique. 19Udojo quigade enga guejnanie sequerei chise 800 nanique jé aja itoringai uje topísi nanique. Enga que gusu abi Enoc mu ape ejode dépoji to nanique rĩ enga diyoqui uñane, jé basa diyequé uñanie nanique rĩ. 20Enga yáta guejnanie sequerei aja ñane enga chise 962 años ome Jared jé aja uje topísi nanique.
21Enga Enoc guejnanie sequerei e chise 65 años nanique uje abi Matusalén base to nanique. 22,23,24Mu Enoc uté que chacho doi Dupade ajegaidode nanique jé iji deréjnane nanique. Enga Enoc uté guejnanie sequerei chise 300 iji abi Matusalén quigade nanique. Enga que gusu abi Matusalén nanique mu ape ejode cuse to nanique rĩ enga diyoqui uñane, jé basa diyequé uñanie. Mu uje Enoc guejnanie sequerei chise 365 nanique enga urasade ore chijnángui nanique enga que ore chiraja quitique. Chamáñaje Dupade jno údi bisideque nanique gu, ga chicáji gaté bisideque ome dáringai ayoré pórecajna nanique. Enoc que chacho doi Dupade ajegaidode nanique iji deréjnane jecute Dupade jno údi bisideque nanique ga chicáji gaté.
25Enga Matusalén guejnanie sequerei chise 187 años nanique uje abi Lamec base to nanique. 26Udojo quigade enga guejnanie sequerei chise 782 años nanique jé aja cachodi nanique uje topísi. Mu que gusu abi Lamec gotique nanique mu ape ejode cusapo nanique rĩ enga diyoqui uñane, jé basa diyequé uñanie. 27Enga yáta guejnanie sequerei aja ñane enga chise 969 ome Matusalén jé aja uje topísi to nanique rĩ.
28Enga Lamec guejnanie sequerei chise 182 años nanique uje abi base to. 29Enga pésu dabi i enga chĩ́care Noé aja nanique. Enga chojninga: "Pangarádejnai Dupade urugaite jnumi udé nanique. Jecute yoco yocujuñame yoque ome yoquisagode cucha iji jnumi tudé. Mu yabi tudé a ipesute jne ujetiga yocopo yocujñare jne rĩ iji yoquisaque uajádode udojo." 30Iji dabi Noé uté quigade enga Lamec guejnanie sequerei chise 595 jé aja cachodi nanique uje topísi. Mu que gusu abi Noé nanique, mu ape ejode cuse to nanique enga diyoqui uñane, jé basa diyequé uñanie. 31Enga yáta guejnanie sequerei aja ñane enga chise 777 ome Lamec jé aja uje topísi to nanique.
32Noé guejnanie sequerei chise 500 años nanique uje abode cuse to nanique enga abode uñai i tu Sem, jé basa uñai i tu Cam, jé basa uñai i tu Jafet.
सध्या निवडलेले:
Génesis 5: Ayore
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2021 Ethnos360