Matyu 4
4
To panangsulisug ne̍ Satanas e̍ Je̍sus
Mar. 1:12-13; Luk. 4:1-13
1Ket itun, naiturung nge̍ Je̍sus gapu iya Ispiritu ne̍ Apu Diyus manipud ito wangag, nga naipen ka away, tasun malak-aman na ya panangsulisug niya diyablu. 2Ket iya unus eppat nga pulu nga algew se̍ gabi antuni, pulus nga madi nangnangan nge̍ Je̍sus. Ket kalpasan na, nabisinan ngarudin. 3Ket imadenni to mangsulisug, ket kinunen na e̍ Je̍sus, “No tutu nga Anac naka nge̍ Apu Diyus, bilinem man didi nga batu nga agbalin da nga tinapay,” kunen na.
4Ngem kinunen ne̍ Je̍sus, “Uwed naisurat iya Bibliya nga kunen na,
‘Ya pagbiyag niya toley,
bekken nas nga tinapay,
no di pe̍ diya amin nga kagi
nga tumaud e̍ Apu Diyus,’”
kunen na.
5Ket itun, nipen niya diyablu nge̍ Je̍sus ka He̍rusale̍m, nga itu ya siyudad nga ipatpateg ne̍ Apu Diyus. Ket pinagsikad na nge̍ Je̍sus iya tuctuc niya Te̍mplu, 6se̍ na kinunen igina, “No tutu nga Anac naka nge̍ Apu Diyus, lumatuc ka man idi. Ta uwed met naisurat iya Bibliya nga kunen na,
‘Bilinen ne̍ Apu Diyus
diya anghe̍le̍s na nga mangaywan ikew.
Tapayaen daka nad kadiya ima da,
tasun orey ya sakam,
madi met masakitan ka batu,’
kunen na iya Bibliya,” kunen niya diyablu.
7Ket kinunen manin ne̍ Je̍sus igina, “Naisurat met pe̍ iya Bibliya nga, ‘Madi ka sigiren ya Apu nga Diyus mu,’” kunen na.
8Ket ya diyablu, nipen na manin nge̍ Je̍sus iya isa nga nangudu nga unay nga tageytey. Ket nipasingen niya diyablu igina diya amin nga pagpagariyan iya lubung, se̍ diya amin nga kinapaw-is nga uwed igida. 9Ket kinunen na e̍ Je̍sus, “E̍cde̍c ikew amin didi, no agparintumeng ka nga agdayaw iyaken,” kunen na.
10Ket kinunen met ne̍ Je̍sus igina itun, “Agtalew ka idi nin, Satanas! Ta uwed met naisurat iya Bibliya nga kunen na, ‘Agdayaw ka ngarud iya Apu nga Diyus mu, ket ig-igina ngas ya pagsirbiyam,’” kunen na.
11Ket to diyablu, pinanawan na ngarud nge̍ Je̍susin. Ket itun, uwed da met anghe̍le̍s nga nawe̍ nangistimar e̍ Je̍sus.
To panangirugi ne̍ Je̍sus iya gagara na
Mar. 1:14-15; Luk. 4:14-15
12Ket ito nadamag ne̍ Je̍sus nga naibalud nge̍ Juan, pimanaw nga simoli iya prubinsiya nga Galilya ngin. 13Ket enna Galilya, pimanaw met nge̍ Je̍sus iya ili nga Nasare̍t. Nawe̍ nagedyan ka Kape̍rnaum, nga isa nga ili iya pingit nito baybay ka Galilya, iya sakup niya ginet dito iSabulun se̍ iNe̍ptali itun. 14Ket agten iyan ngarud ya napasamac itun, tasun matungpal to kinunen nito mammadtu nga Isayas itun, ito kinunen na,
15“Uwed napasamac kadiya pagedyanan
diya iSabulun se̍ iNe̍ptali,
enna dalan nga mawe̍ iya baybay,
iya bangir niya wangag Hordan,
nga lugar nga managan ka Galilya,
nga ginet diya bekken nga Hudyu.
Ket agten idi ya napasamac antuni:
16Diya toltoley antuni,
maiyarig kadiya aged-edyan iya gicbet.
Ngem ita, nasingen dan ya nabileg nga wada.
Ngarud, diya maiyarig kadiya
aged-edyan iya lugar nga pakatayan,
ket uwed met wada nga nangdarang igidan,”
kunen nito mammadtu itun.
17Ket nanipud itun, rinugiyan ne̍ Je̍sus ya mangaskasaba, nga kinunen na iya panangasaba na, “Agbabawi kayu ngarudin, ta dandani mettin ya panangituray niya Nailangitan,” kunen na.
Dito mangngalap nga simurut e̍ Je̍sus
Mar. 1:16-20; Luk. 5:1-11
18Ket ito manmanalan nge̍ Je̍sus iya pingit nito baybay ka Galilya, uwed da nasingen na nga agkabsat nga mangngalap, nga igida de̍ Simon nga maawagan pe̍ ka Pe̍dru, se̍ e̍ Andre̍s. Madama da nga agtabtabukul itun. 19Ket kinunen ne̍ Je̍sus igida, “Suruten dac lugudin, ta pagbalinen nakayu nga arig nga mangngalap ka toley nga gennung,” kunen na. 20Ket sigida met nga pinanawan da dito iket da, ket simurut da ngarud iginan.
21Ket nituluy ne̍ Je̍sus ya nanalan, ket uwed da manin nasingen na nga duwa nga sabali nga agkabsat, nga anac ne̍ Se̍be̍dyu, nga itu de̍ Santiyagu nge̍ Juan. Kabulun da nge̍ ama da nga Se̍be̍dyu, ket uwed da iya bangka da nga agay-ayuma kadiya iket da. Inayaban ne̍ Je̍sus dito agkabsat, 22ket sigida da nga pinanawan to bangka se̍ e̍ ama da, ket simurut da ngarud e̍ Je̍susin.
To panursuru ne̍ Je̍sus
Luk. 6:17-19
23Ket nawe̍ ngarud pinasyar ne̍ Je̍sus diya amin nga parte̍ niya prubinsiya nga Galilya. Ket nangisursuru kadiya gigimungan da, nga nikaskasaba na ya Makaparagsac nga Damag maipanggep iya nadiyusan nga panangituray. Ket pinalaing na pe̍ diya toley kadiya orey nagan na nga sakit winno kinakapsut da. 24Ket iya agten iyan, nagdinamag met pe̍ nge̍ Je̍sus iya amin nga parte̍ niya prubinsiya nga Sirya. Ket nipen ngarud diya toltoley igina diya amin nga uwed dipe̍re̍nsiya winno pakarigatan da, nga agten kadiya naluganan ka sairu, diya agkeskessiw, se̍ diya madi makakiwa ya beggi da. Ket pinalaing ngarud ne̍ Je̍sus da. 25Ket adu met diya toltoley nga nibulubulun igina, nga gayat da iyan mettas nga prubinsiya nga Galilya, se̍ gayat da pe̍ iya pagiliyan nga De̍kapulis, iya siyudad nga He̍rusale̍m, iya prubinsiya nga Hudya, se̍ gayat da pe̍ kadiya il-ili iya demmang niya wangag Hordan.
सध्या निवडलेले:
Matyu 4: YBT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 1990 New Tribes Mission, Sanford, FL 32771-1487, USA.
Printed in the Philippines.
