मत्ती 9

अधरौंगा वाल़ौ आदमी च़ांगौ कौरणौ

(मरकुस 2:1-12; लुका 5:17-26)

1तैबै यीशु किश्ती दी च़ौड़ियौ पारभिलै डैऔ, और आपणै इलाकै दी आशौ। 2और देखौ, भौरी लोग एक आदमी बिस्तरै दी आणौ ज़ासकै आपणै ज़िसमा रौ केज़ौ भी आंग नाईं हिलाइया थौ। यीशुऐ तिऊंरौ विश्वास देखीयौ, तेस बिमार आदमी लै बोलौ, “ओ गोश्टण, हिम्मत छ़ाड़। तैरै पाप माफ हुई गौऐ ई।” 3एथ माथै कई शास्त्रिउऐ सुंच़ौ, “एऊ ता परमेश्‍वरा री बुराई कौरा सा?” 4यीशुऐ तिउंरै मौना री बुशै ज़ाणीऔ बोलौ, “तुमै लोग आपणै-आपणै मौना दी बुरौ कैलै सुंच़दै लागै औन्दै? 5आसान का सा? बिमार आदमी लै इणौ बोलणौ कि तैरै पाप माफ हुऐ या खौड़ौ उठ आपणौ बिस्तरौ च़ुंग और हांडदै लाग? 6पाप माफ सिरफ परमेश्‍वर ई कौरी बौल़ा आ। तुमुकै देखाउणा लै कि पाप माफ कौरणै रौ हक्क मुकै आ, ज़ुण परमेश्‍वरा री तौरफा कु भेज़ौ औन्दौ,” तैबै यीशुऐ तेस बिमार आदमी देखीयौ बोलौ, 7“हाऊं ताउंलै बोलाऊ, खौड़ौ उठ, आपणौ बिस्तरौ च़ुंग और घौरै डेऊ।” 8लोग इणौ देखीयौ डौरी गौऐ और परमेश्‍वरा री बौड़ाई कौरदै लागै ज़ुणिऐ आदमी लै इणौ हक्क दैऔ सा।

मत्ती आपु आइलै औटाउणौ

(मरकुस 2:13-17; लुका 5:27-32)

9तिदरा कु औगाड़िऐ डेइयौ यीशुऐ मत्ती नावां रै एकी आदमी लै ज़ो मामलै निणै वाल़ै रै आड्डै माथै थौ बोशौ औन्दौ सेऊ देखौ, और तेसलै बोलौ, “मुं पिछ़ु आश।” सेऊ उठीयौ यीशु पिछ़ु हांडदै लागौ। 10और ज़ेबी यीशु मत्ती रै घौरा दी रोटी खांदै बोशौ ता तिऐ भौरी मामलै निणै वाल़ै और पापी लोग आशीयौ यीशु और तेसरै च़ेलै आइलै रोटी खांदै बोशै। 11इणौ देखीयौ फरीसीउऐ यीशु रै च़ेलेऊ लै बोलौ, “तुमारौ भविष्यवक्ता मामलै निणै वाल़ै और पापी लोगु आइलै रोटी कैलै खा पिआ आ?” 12इणौ शुणियौ यीशुऐ तिउंलै बोलौ, “डाक्टरा री ज़ुरत भौलै-च़ांगेउ लै नाईं पर बिमार लोगु लै औआ सा। 13एथीलै तुमै डेइयौ एथरौ मतलब शिखौ ‘हाऊं बौल़ी नाईं पर दया च़ाहा ऊ।’ कैलैकि हाऊं धौर्मी लोगु नाईं पर पापी लोगु औटाउंदेऊ आशौ ऊ।”

ब्रौता (उपवासा) रौ सवाल

(मरकुस 2:18-22; लुका 5:33-39)

14तैबै यहुन्ना रै च़ेलेउऐ यीशु काऐ आशीयौ बोलौ, “का मतलब आ कि आमै और फरीसी एती ब्रौत छ़ाड़ी ई, पर तैरै च़ेलै ब्रौत नाईं छ़ाड़दै?” 15यीशुऐ तिउंलै बोलौ, “का बराती, ज़ेबी झ़ांऊ लाड़ौ तिऊं आइलै आ, ब्रौत कौरी सौका ई? पर सै दीन आशालै ज़ेबी लाड़ौ तिऊंकु अलग कौरालै, सेज़ै बौगता दी सै ब्रौत कौरा ई।” 16“केज़ौ भी आदमी नौऐं जुड़कै रौ टालकौ पुराणै जुड़कै दी नाईं लाइंदौ। नाईं ता धोइदीं बारै सेऊ नौऐं जुड़कै रौ टालकौ तेस पुराणौ जुड़कौ पोरु थोसियौ ज़ादड़ौ च़ीरा सा। और सेऊ टालकौ पुराणै जुड़कै आइलै मेल भी नाईं खान्दौ। 17कोई भी आदमी अंगुरा री सूर चाणना लै ताज़ौ अंगुरा रौ रस पुराणै खाल़ढै दी नाईं छ़ाड़दौ। नाईं ता अंगुरा रौ रस दख बौगता बासिऐ फैलीयौ तेस पुराणै खाल़ढै रौ थोउलौ भी पोरु च़ीरा ज़ेथ कौरीऐ अंगुरा रौ रस और खाल़ढौ दुइया बरबाद हुआ आ। पर नौउंऔ अंगुरा रौ रस नौउंऐ खाल़ढै दी भौराई और सै दुइया बौच़ी रौआ ई।”

मौरी औन्दी छ़ोटी और बिमार छ़ेउड़ी

(मरकुस 5:21-43; लुका 8:40-56)

18यीशु तिऊं आइलै एज़ी बुशै लाइंदै थौ लागौ औन्दौ, कि देखौ, एक आराधनालय रै मुख्यै आशीयौ यीशु कै ढाल की और बोलौ, “मेरी मांई इबी मौरी आ, पर च़ाल आपणौ हाथ तिंआ माथै छ़ाड़, ता सै ज़िउंदी हुआ सा।” 19यीशु उठीयौ आपणै च़ेलै आइलै तेस पिछ़ु डेई गौऐ। 20और देखौ, एक छ़ेउड़ीऐ ज़ासदी बाराह बौरशा ओउलै लोऊ बौइणै री बिमारी थी सै यीशु रै नज़दीक आशी, 21कैलैकि सै आपणै मौना दी बोला थी, “अगर हाऊं यीशु रै जुड़कौ छ़ूंऊं लै ता हाऊं ठीक हुआ ऊ।” तैबै तिंआऐ यीशु पिछ़ु आशीयौ यीशु रै जुड़कै छ़ुऐं 22यीशुऐ मुड़ियौ सै देखी और बोलौ, “धीया हिम्मत छ़ाड़, तैरै विश्वासै तू ठीक कौरी गोई आ।” तैबै सै छ़ेउड़ी तेबी ई ठीक हुई गोई। 23ज़ेबी यीशु तेस याईरा रै घौरा काऐ पौउंच़ौ ता तिऐ बांइशी बज़ाउणै वाल़ै और भीड़ देखी, 24तैबै बोलौ, “दूर हुऔ इदरु, मांई मौरी नाईं, पर सुती ऐन्दी आ।” एथ माथै सै यीशु रौ मज़ाक उड़ाउंदै लागै। 25पर ज़ेबी भीड़ गाड़ी गोई, ता यीशुऐ भितरै डेइयौ तिऐं मांई रौ हाथ पाकड़ौ, और सै ज़िउंदी हुई गोई। 26और एज़ी बुशै री खुशी री खौबर तेस सारै देशा दी फैअली गोई।

दुई शेड़ेऊ लै आखी देणी

27ज़ेबी यीशु तिदरु औगांऊ डैऔ, ता दुई शेड़ै तेस पिछ़ु इणौ औटाउंदै लागै, “ओ यीशु, राज़ै दाऊदा री खानदानी रौ, आमु माथै दया कर।” 28ज़ेबी यीशु घौरा दी पौउंच़ौ, ता सै शेड़ै यीशु काऐ आशै, और यीशुऐ तिउंलै बोलौ, “का तुमुकै विश्वास आ कि हाऊं तुमु च़ांगै कौरी सौका ऊ? तिंउऐ यीशु लै बोलौ, ‘ओ, प्रभु, आमै विश्वास कौरी कि तुमै आमु च़ांगै कौरी सौका ई!’ 29तैबै यीशुऐ तिउंरी आखी छ़ुंइऔ बोलौ, ‘तुमारै विश्वासा रै ज़ौरिऐ तुमै च़ांगै हुआई।’ 30और सै देखदै लागै। यीशुऐ तिउंकै च़ितल़ाइऔ बोलौ, ‘खौबरदार, कासी कै भी एज़ी बुशा रौ पौतौ ना च़ांई लागौ।’ ” 31पर तिंउऐ डेइयौ सारै देशा दी यीशु रौ नाऊं फैलाई गौ।

एक लाटौ च़ांगौ कौरणौ

32ज़ेबी सै बाइरै थै डेउंदै लागै औन्दै ता देखौ, लोगु एक लाटौ ज़ासदी बुरी आत्मा थी लागी ऐन्दी, यीशु काऐ आणौ। 33और ज़ेबी यीशुऐ बुरी आत्मा गाड़ी गोई, ता लाटौ बोलदै लागौ। एथ माथै भीड़ हैरान हुईऔ बोलदै लागी, “आमुऐ इस्राइल देशा दी इणौ केबी नाईं देखौ।” 34पर फरीसीउऐ बोलौ, “एऊ ता बुरी आत्मा रै मुख्यै री सहायता कौरी बुरी आत्मा गाड़ा सा।”

भौरी कम ज़िमदार

35तैबै यीशु और तेसरै च़ेलै गलील परदेशा रै सारै इलाकै और गांवा दी डेवै, और तिउंरै आराधनालय दी डेइऔ शिक्षा दैंदै थाकौ लागी, और परमेश्‍वरा रै राज़्य री खुश-खौबरी रौ परचार कौरदै, और सौभी रौंगा री बिमारी और कमज़ोरी दूर कौरदै थाकौ लागी। 36ज़ेबी यीशुऐ भीड़ देखी ता तेसरै लोगु माथै दया आशी, कैलैकि सै लोग इणै थै ज़िणी बिण भेराल़डु री भेरै हुआई। और सै परेशान और भटकै औन्दै थै। 37तैबै यीशुऐ आपणै च़ेलेऊ लै बोलौ, “पाच़ी ऐन्दी फसल ता भौरी सी, पर तिऐं फसली मेटणे वाल़ै ज़िमदार भौरी कम ई। 38एथीलै डोखरै रै मालिका कु औरज़ कौरौ कि आपणै डोखरै दी पाच़ी ऐन्दी फसली लौइणा लै ज़िमदार भेज़।”

सध्या निवडलेले:

मत्ती 9: BFZ-NT

ठळक

सामायिक करा

कॉपी करा