Mɔl 4
4
Keen nee Ebɛle
1Adam#4.1 Adam: Duma ɛhye abo a le “Sonla dasanli.” nee ɔ ye Yive#4.1 Yive: Duma ɛhe abo a le “Ngoane”, na ɛke, ɔ bo a le “Sonla.” lale, na Yive vale ɛkolɛ na ɔwole ralɛ nrenya. Bɛdonle ye Keen.#4.1 Keen: Ɔ bo a le “Menyia bie.” Yive edwɛkɛ a le kɛ, “Ɔlua Ɛdɛnkɛma moalɛ zo mewo ralɛ nrenya.” 2Nzinlii Yive wole Keen anzi ralɛ nrenya, na bɛdonle ye Ebɛle. Ebɛle ɛnee sie mboane, yɛɛ Keen yɛ egyinli. 3Mekɛ hɔle bie la, Keen vale ye egyinli ne anu aleɛ ne bie bɔle azu manle Ɛdɛnkɛma. 4#Hib 11.4 Ebɛle noko hyele mboane mralɛ mɔɔ ye mboane ne mɔ bie lumuale wole bɛ la, na ɔvale bɛ nee bɛ ɛleka mɔɔ ɛlɔ kpalɛ la ɔbɔle azu ɔmanle Ɛdɛnkɛma. Ɛdɛnkɛma anye zɔle Ebɛle azubɔdeɛ ne, 5na ɔ nye anzɔ Keen azubɔdeɛ ɛdeɛ ne. Ɛhye manle Keen ati zile aze na ɛya hunle ye kpole. 6Ɛdɛnkɛma bizale Keen kɛ, “Duzu ati a ɛ nyunlu ɛyɛ kpundikpundi na wɔva ɛya ɛ? 7Asoo saa ɛyɛle ye boɛ a, anrɛɛ ɛ nyunlu ɛnrɛra anyia? Na wɔanyɛ ye boɛ la, ɛtane ɛhɔ ɛ nwo nzia; ɔkpondɛ kɛ ɔfo ɛ nwo zo, na wɔmɔ yɛɛ ɔwɔ kɛ ɛfo ɔ nwo zo a.”
8 #
1 Dw 3.12
Ɛhye anzi Keen zele ɔ diema Ebɛle kɛ, “Maa yɛhɔ ɛbɔ nu.” Bɛhɔle la, Keen holole ɔ diema Ebɛle anwo zo na ɔhunle ye.
9Na Ɛdɛnkɛma bizale Keen kɛ, “Ɛ diema Ebɛle wɔ nienwu?”
Keen buale kɛ, “Menze, mame a menea me diema ne anwo zo a?”
10Ɛdɛnkɛma bizale ye kɛ, “Duzu debie a wɔyɛ la? Ɛ diema ne mogya ne mɔɔ gua azɛlɛ ne anwo la ɛlɛsu avɛlɛ me. 11Wɔbɔ munzule kɛ wɔha ɛ diema ne mogya wɔgua, wɔmaa azɛlɛ ye ɛmeme a. 12Ɔvi ɛnɛ mɔɔ kɔ la, debie biala mɔɔ ɛkɛlua ye azɛlɛ ye azo la ɛnrɛyɛ kpalɛ ɛnrɛmaa wɔ ɛlɛ; ɛkɛdɔ ɛ bɔ nu na mgbɔsamgbɔsa adɔ ɛ nwo wɔ azɛlɛ ye azo.”
13Na Keen hanle hilele Ɛdɛnkɛma kɛ, “Me ndeanlɛ ne bo me nwo zo. 14Wɔye me sa wɔvi azɛlɛ ye mɔɔ medidi zolɛ la anwo; wɔvoa me wɔvi ɛ nye zo. Mebadɔ ɛbɔ nu, na eza mgbɔsamgbɔsa adɔ me nwo wɔ azɛlɛ ye azo; saa awie biala nee me yia a, ɔbahu me.”
15Na Ɛdɛnkɛma zele ye kɛ, “Kyɛkyɛ, ɔnle zɔhane! Awie biala mɔɔ kɛhu Keen la, bɛbali ye nzenralɛ fane nsuu bɛazie ɔ bo zo.” Na Ɛdɛnkɛma yɛle Keen nzonlɛ, amaa awie biala mɔɔ nee ye kɛyia la angu ye. 16Akee Keen vile Ɛdɛnkɛma anyunlu na ɔhɔdɛnlanle Nɔɔdo wɔ Yidɛn tola ne aduduleɛ.
Keen abo zo amra
17Keen vale ɔ ye na ɔ ye wole ralɛ nrenya, bɛdonle ye Yinɔko. Keen kyekyele suakpole ko na ɔvale ɔ ra ne duma ɔdole zolɛ. 18Yinɔko wole ralɛ nrenya, bɛfɛlɛ ye Ayelade; Ayelade wole Mɛhugyeeyɛle. Mɛhugyeeyɛle wole Mɛtuhyeeyɛle, yɛɛ Mɛtuhyeeyɛle wole Leemɛke. 19Leemɛke gyale mraalɛ nwiɔ; bɛfɛlɛ ko Eda, yɛɛ bɛfɛlɛ ko Zela. 20Eda wole Gyeebale, mɔɔ ɔ bo zo amra a yɛle ndanlɛ azua lale nu la yɛɛ eza bɛlɛ nyɛmoa. 21Gyeebale adiema nrenya a le Dwubale. Dwubale abo zo amra a le menli mɔɔ vale getaa nee fulutu bɔle edwɛne a. 22Raalɛ Zela wole Tubale Keen, mɔɔ ɔ bo zo amra a vale mbulalɛ nee kɔbele yɛle ɛyazonlɛ nee konle ninyɛne la. Ɔ diema raalɛ a le Neeyama.
23Leemɛke zele ye mraalɛ ne mɔ kɛ,
“Eda nee Zela, bɛdie me aneɛ; me ye mɔ, bɛdie mɔɔ melɛka la:
Mehu kpavolɛ bie mɔɔ bɔle me, bodale me la.
24Saa mɔɔ kɛhu Keen la bɛkɛli ye nzenralɛ fane nsuu a,
ɛnee mɔɔ kɛhu medame Leemɛke la, bɛkɛli ye nzenralɛ fane abulasuu nee nsuu.”
Sɛte nee Yinɔhye
25Adam nee ɔ ye wole ralɛ nrenya bieko. Ɔ ye hanle kɛ, “Nyamenle ɛmaa me ralɛ nrenya ɛmaa meva mezie Ebɛle, mɔɔ Keen hunle ye la abo zo.” Na ɔdonle ye Sɛte. 26Sɛte wole ralɛ nrenya na ɔdonle ye Yinɔhye. Mekɛ ne anu menli bɔle ɔ bo kɛ bɛsonle Ɛdɛnkɛma.
सध्या निवडलेले:
Mɔl 4: NB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Bible in Nzema © Bible Society of Ghana, 1998.