Luka 20
20
Wambumbula Jesu Dia Wulu Andi
(Mat. 21:23-27; Mak. 11:27-33)
1Lushi lomotshi, lamʼaketshaka Jesu ante lu etemwelo ndu lamʼakandasambishaka lukumu lʼololo, elombedi a waki la afundji la dikumanyi wakutumbela. 2Vo wakawumbula vati: Ututeli, uma lu wulu akona watuyutshaka akambu ane? Akakusha wulu one na? 3Ndi akâkaluya diui ati: Ndu dimi layunyumbula umbula omotshi, keli kanyukadimweli. 4Batiza ka Joani akayi uma lʼulungu kana uma le antu? 5Vo wakakaui yimba vati: Naka shu tayuta shati: Uma lʼulungu, ndi ayuta ati: Okoko wana akinyu kumbetawo? 6Keli naka shu tayuta shati: Uma le antu, antu tshe wayutuka ave, ne dia vo mbetawoka vati: Umvutshi mbakindi. 7Ku vo wakûkaluya diui vati: Hateyi uma lene akito. 8Jesu akawatela ati: Ndu dimi, halanyutela uma lu wulu akona watshami akambu ane.
Wela wʼEkambi wʼEkambo
(Mat. 21:33-46; Mak. 12:1-12)
9Jesu akatatela mbuka antu wela one ati: Untu akakambi ekambo kʼelua,#20:9 Is. 5:1. akakitshikela ekambi, akatshu lu kete kina la ntudjase edja. 10Lamʼakakuki eleku kʼelua, ndi akatumi ukambi andi omotshi le ekambi wʼekambo, dia vo mbusha elua uma lʼekambo. Keli ekambi wʼekambo wakokomola, wakiikaluya anyanya. 11Ku ndi akatumi ukambi andi ukina. Vo wakokomola ndu ndi, wakotenge, wakûkaluya anyanya. 12Ndi akatumi ndu la satu. Vo wakokote puta ndu ndi, wakawutshanya. 13Ku kanga ekambo akati ati: Kayumutsha na? Dimi layutuma onʼami la ngandji, kana vo wayolemia, undu. 14Keli lamʼakawenyi ekambi wʼekambo, vo wakatanela vati: Ukito uku. Nyeso tudiaki, sangu diayali diasu. 15Ku vo wakusukula uma lʼekambo, wakudiaki. Wuhu akona wayatshela kanga ekambo? 16Ndi ayuyulanya ekambi ako, ayusha akina ekambo kandi. Lamʼakawuki diui so, vo wakati vati: Unyashungu ashimbi dikambu dia wuhu oso! 17Keli ndi akawaendi tee, akawambula ati: Na kitshimudi ka diui ne, diakafundama ati:
Dive diakatuni ambiki wa luudu,
Diakayala ote wa tshuku?#20:17 Esam. 118:22.
18One tshe layoko lu dive so, ayuhimbohimbo tenyi, keli untu layudiokwela, diayuhandjula uku ditshu.
Wambumbula Jesu Dia Munda lu Lulimi: Kana Ololo Nambula Kayisa
(Mat. 22:15-22; Mak. 12:13-17)
19Afundji la elombedi a waki wakeyi vati: Jesu, shu mbukedindi wela oso. Vo wakayangi mbunda lu unya ako, keli vo wakuki antu woma. 20Vo wakokeshanya, wakatumi atopi dia vo ndjafanya uku antu wʼololo, dia mbosa aui andi la mbukimo le umbuledi, kanga diulelu. 21Vo wakawumbula vati: Umbetsha, shu mbeyaka shati: We atutaka ndu atetshaka antu ololo; we kema la shonodi, keli we atetshaka antu mbuka ka Unyashungu lu mete. 22Eko ekila shu nambula Kayisa, kana kema? 23Keli ndi akeyi lukesu lawo, akawatela ati: 24Uhunyumenya denariyo. Kanga efanelu la efundelu keli loko? Vo wakati vati: Ka Kayisa. 25Ndi akawatela ati: Okone nyusha Kayisa diango dia Kayisa. Nyusha Unyashungu diango dia Unyashungu. 26Ku vo kumbeya munda Jesu lu aui andi la ntundu kʼantu. Vo wakambi dia diui diakandakaluya, ku wakalembohala ki.
Kana Eulwelu kʼUma lu Nyoi Keko
(Mat. 22:23-33; Mak. 12:18-27)
27Asaduke, wane watutaka vati: Eulwelu kʼuma lu nyoi kemako,#20:27 Etsh. 23:8. wakayi le Jesu. 28Vo wakawumbula vati: Umbetsha, Mose akatufundela ati: Naka untu ambuvo, ambutshika wadendi, aha la ona, onangu kakitani la ndi, kawulweli luhanga.#20:28 Euh. 25:5. 29Anangu esambeli wakiko. Lʼenundu akatshuki wadi, akavu, kuntshika ona. 30La hendi akakitana la wadendi, akavu kuntshika ona. 31Ndu la satu akakitana la ndi. Okone vo tshe esambeli wakavu, kuntshika ana. 32Lʼokongo awo, vo tshe, ndu umuntu akayuvo. 33Okone lu eulwelu kʼuma lu nyoi, ndi ayuyala wadi a na! ne dia ndi aki wadewo vo esambeli. 34Jesu akawatela ati: Ana wa lʼetena kene watutshukaka, ndu watutshukamaka. 35Wane weli ololo, wayukuma lʼetena kako la lu eulwelu kʼuma lu nyoi, vo hawutshuki kuyanga ntshukama. 36Vo haweyi mvo ntu, ne dia vo wambedima la andjelo. Vo weli ana wa Unyashungu, ne dia vo weko ana wʼeulwelu kʼuma lu nyoi. 37Keli wavo watulwamaka, ndu Mose akatenya dikambu diako lu ahuli wata dikambu dia dikumbu, lene akandeti Khumadiondjo ati: Unyashungu a Abarahama, Unyashungu a Isaka, Unyashungu a Jakoba.#20:37 Etum. 3:6. 38Ndi kema Unyashungu a wavo, keli ndi eko Unyashungu a wasena, ne dia tshe weko la lumu le ndi. 39Afundji amotshi wakâkaluya diui vati: Umbetsha, ololo mbutshiye. 40Lʼokongo wa akambu aso, vo kundjala la dihunga dia mbumbula akambu akina ntu.
Jesu Ambumbula Afundji Dia Kristu
(Mat. 22:41-46; Mak. 12:35-37)
41Jesu akawambula ati: Ukundi watawo vati Kristu eko kanula ya Davidi? 42Ne dia Davidi ndame akati lu Buku diʼEsambu ati:
Khumadiondjo akatela Khumemi ati:
Udjase lu lunya lami la pami,
43Edja ndu lamʼayumete atunyi aye kihuna kʼekulu aye.#20:43 Esam. 110:1. 44Davidi ndame mbetaka ati: Khumadiondjo; ya ukundi wendi kanula yandi na?
Jesu Ambewula Antu Dia Afundji
(Mat. 23:1-36; Mak. 12:38-40; Luk. 11:37-54)
45Antu tshe wakuki lamʼakatela Jesu ambeki andi ati: 46Nyewo afundji! Vo watulangaka nkendakenda lʼekutu wʼetali; watulangaka antu mbaemula lu tuka, la mbasha die diuleki ame ta lu temwelo, ndu ahuli wa nemo lu alambu; 47vo watohotolaka wadi waki edu mvudu, ku dia vo nkesa antu, mbatuwolombaka alombelo wʼetali. Vo mbayuleka manyema!
सध्या निवडलेले:
Luka 20: TLL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
La Bible en Otetela © Allianee Biblique de la Republique Democratique du Congo, 1991
