KUPUTUKA 1
1
Kalunga mwatenga vyuma
1 #
Yowa. 1.1, 2. Hakuputuka Kalunga atangile melu namavu.
2Hamavu hapwile hapimbi, hapwile hamokomoko, kaha helu lyakajinga hapwile milima. Kaha Xipilitu yaKalunga apwile nakutengenya helu lyameya.
3 #
Samu 33.6; Koli. 2, 4.6. Kalunga ambile ngwenyi, Kupwenga kumunyika, kaha kumunyika kucapwilenga.
4Kalunga amwene kumunyika ngwenyi, cinawahe, kaha Kalunga ahandunwine kumunyika namilima.
5Kumunyika Kalunga acilukile ngwenyi, Musana, kaha milima ayilukile ngwenyi, Ufuku. Kwapwile cingoloxi, kaha kwapwile cimene, likumbi limwe.
6Kalunga ambile ngwenyi, Mukaci kameya mupwenga utangatanga, uhandunune meya nameya.
7Kalunga atengele utangatanga, anandunwine meya apwile muxi yautangatanga nameya apwile helu lyautangatanga, kaha capwile ngoco.
8Utangatanga Kalunga aulukile ngwenyi, Lilu. Kwapwile cingoloxi, kaha kwapwile cimene, likumbi lyamucivali.
9Kalunga ambile ngwenyi, Meya ali muxi yalilu azavukile kumwe, kaha tunda yisoloke. Kaha capwile ngoco.
10Tunda Kalunga ayilukile ngwenyi, Mavu. Kaha kuzavuka cameya acilukile ngwenyi, Tulungalwiji. Kaha Kalunga acimwene ngwenyi, cinawahe.
11Kalunga ambile ngwenyi, Hamavu hasoke mwila, navyuma vyakwima jimbuto vituta, namitondo yakwima mihako mwaya miyaci yayo, muyikiko muli jimbuto jayo hamavu. Kaha capwile ngoco.
12Hamavu hasokele mwila navyuma vyakwima jimbuto vituta mwaya miyaci yavyo, namitondo yakwima mihako muyikiko muli jimbuto jayo mwaya miyaci yayo. Kaha Kalunga acimwene ngwenyi, cinawahe.
13Kwapwile cingoloxi, kaha kwapwile cimene, likumbi lyamucitatu.
14Kalunga ambile ngwenyi, Hautangatanga walilu hapwenga vyakumunyika vihandunune musana naufuku, vipwenga vinjikizo, vilwezenga jingonde namakumbi namyaka.
15Vipwenga vyakumunyika hautangatanga walilu, vimunyikenga hamavu. Kaha capwile ngoco.
16Kalunga atangile vyakumunyika vyavinene vivali, eci cakumunyika cacinene cikuma kupwa nawata wamusana, eci cakumunyika cacindende kupwa nawata waufuku. Avatangile vatanganyika nawa.
17Kalunga avihakile hautangatanga walilu vimunyikenga hamavu,
18vipwenga nawata wamusana nawaufuku, vihandununenga musana namilima. Kaha Kalunga acimwene ngwenyi, cinawahe.
19Kwapwile cingoloxi, kaha kwapwile cimene, likumbi lyamuciwana.
20Kalunga ambile ngwenyi, Mumeya muyonge mayongomena avakweci myono yakuyoya, kaha tujila vatukenga helu lyamavu hautangatanga walilu.
21Kalunga atangile tunyama vamukalungalwiji vavanene navakweci myono yakuyoya vakutambuka vosena, vayongelemo mumeya mwaya miyaci yavo, natujila vosena vakweci mavava mwaya miyaci yavo. Kaha Kalunga acimwene ngwenyi, cinawahe.
22Kalunga avakiswile, avambile ngwenyi, Kasemenunga, mukavule cikuma, mukasulise meya amutulungalwiji, kaha tujila nawa vakavule cikuma hamavu.
23Kwapwile cingoloxi, kaha kwapwile cimene, likumbi lyamucitanu.
24Kalunga ambile ngwenyi, Hamavu halovoke vakweci myono yakuyoya mwaya miyaci yavo, navimuna, navaka-kuhalala hamavu, natunyama vahamavu mwaya miyaci yavo. Kaha capwile ngoco.
25Kalunga atengele tunyama vahamavu mwaya miyaci yavo, navimuna mwaya miyaci yavo, navaka-kuhalala hamavu vosena mwaya miyaci yavo. Kaha Kalunga acimwene ngwenyi, cinawahe.
26Kalunga alyambile ngwenyi, Tutengenu mutu wakutambula kuli Etu, wakulifwana naYetu, #Samu 8.6-8.vapwenga nawangana wavaixi vamukalungalwiji, natujila vamwilu, navimuna, naha-mavu hosena, navaka-kuhalala vakutambuka hamavu vosena.
27Kalunga atangile mutu wakutambula kuli Ikiye. Amutangile wakutambula kuli Kalunga. #Mateu 19.4; Mako 10.6. Avatangile nalunga napwevo.
28Kalunga avakiswile, kaha Kalunga avambile ngwenyi, Semenunga mukavule cikuma, mukasulise hamavu, mukawononone. Twamenunga nawangana wavaixi vamukalungalwiji, natujila vamwilu, navaka-kuyoya vakutambuka hamavu vosena.
29Kalunga avambile ngwenyi, Talenu, ngunamihane vyuma vyakwima jimbuto vituta vyosenevi vili kwilu lyamavu kwosena, namitondo yosena yakwima mihako yamitondo yakwima jimbuto, navipwa vyakulya kuli enu.
30Kaha kuli tunyama vahamavu vosena, nakuli tujila vahelu vosena, nakuli vaka-kuhalala hamavu vosena, vakweci myono yakuyoya, ngunavahane vyuma vyosena vituta kupwa kulya cavo. Kaha capwile ngoco.
31Kalunga amwene vyuma vyosena vize atengele, kaha ngwenyi, Vinawahe cikuma. Kwapwile cingoloxi, kaha kwapwile cimene, likumbi lyamucitanu nalimwe.
सध्या निवडलेले:
KUPUTUKA 1: LUE70
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Luvale Bible © Bible Society of Zambia, 1970.