Motíosi 9
9
Goéŋugie gá onɛ́mɔnɛmɔ
(Mél 2.1-12; Lók 5.17-25)
1Gɔ́ɔ Yésusu a gɔnɔmɔ́ go íŋene naá gilué, a báá yoogá máŋɛ́, a bɛ́ɛ́ ɛ́dá naá tɛ́sɔnɔ yɛhɛ́#9.1 Go go ɛ́na gá Mélékusu, o bana Mél 2.1, Kapɛlɛnahɔ́mɛ mɔ́ a lɔ́mɔ́ tɛ́sɔnɔ ya Yésusu. O bana tɔ́nɔ Mot 4.13.. 2Batɔ go mo úline na gɛcɛ́gɛlɛ mbɛ́dɛ́ɛ naá dokandá. Yésusu ɛ ɛ́ná goŋaá bá ágana odɛ́má yábɔ́ naá mɔ́ɔ, go oyana gɛcɛ́gɛlɛ a amɔ́: «Moɔnɔ́ bamɛ, sɛmá odɛ́má, bá á go hééhínyée bɛlɔgɔ báhɔ.» 3Kɔ́ɔ muloodio má gicele múncodío mó ɛ́damɔ́ go bágálɛnagalɛna naá ɛdɛ́má mó amɔ́: «Mɔtɔ mɔ́ɔnyɔ a sɛga Asaŋa#9.3 Go eninye na bɔ́ɔbɔ bó lɔ́mɔ́ naá Léfi 24.16.!» 4Kanɛ́ aŋa Yésusu a mbaá lɔmɔ́ i íyimene mbééníŋínyí sábɔ́, go oyɛda a amɔ́: «No lɔ́mɔ́ na bɛbɛ́ bá mbééníŋínyí naá ɛdɛ́má yɛnyɔ́ goakɛ́ o? 5Bóhanɛ́ kanɛ́ bó lɔ́mɔ́ fɛaŋɔ go oyɛda: “Bá á go hééhínyée bɛlɔgɔ báhɔ”, ɛ́na lí, “Fadɛ́gɛ́na, ɛndá o?” 6Ɛɛ́ɛŋ! Kanɛ́ goŋaá nó bi íyímé no amɔ́ Moɔnɔ́ ba mɔtɔ a bɛanana nɛgaŋa ná go héehinenye bɛlɔgɔ naá cí háalá, gɛ́hɛ́ go oyana gɛcɛ́gɛlɛ a amɔ́: “Fadɛ́gɛ́na, o gɔ́lɔ dokandá dáhɔ, go ɛ́da naá mamɔ́ nnyaŋá”.» 7Mɔtɔ go fadɛgɛna a báá gúlúgé naá nnyaŋá yɛhɛ́. 8Go ɛ́na gɔ́ɔgɔ gɛca gá batɔ gɛ́ mbɛɛ́ ɛ́ná boóma moánɛ, gá gɛ́ go bɛa bofoá, gɛ́ bɛ́ɛ́ ɛ́dá go gúmenye Asaŋa go go fáa gɔ́ɔgɔ a mbaá fáá batɔ mbɔ́dɔ ya nɛgaŋa ya ndiemi.
Yésusu a á dɔ́ŋɛ́nɔ́ Motíosi go go mo biene
(Mél 2.13-17; Lók 5.27-32)
9Yésusu u ú úlúkíe hɔ́ɔlɔ́, a ná lɛ́ go ɛ́da a dómbana, go ɛ́na mɔtɔ ufíno yɛ́hɛ́ Motíosi, ndukíi naá hoóma háaha bá ncomɔ́ soanana muinyí má tásɛ. Gɛ́hɛ́ go mo oyana a amɔ́: «Mbienéemú.» Motíosi go fadɛgɛna, go mo biene. 10Gɔ́ɔ Yésusu a bɛ́ɛmbamɔ́ naá go nyáanya naá nnyaŋá ya Motíosi olɔŋɔ na behúúní bɛ́hɛ́; gɛca gá bogólí tásɛ na bologílógí go nco bó bégídene. 11Go ɛ́na gɔ́ɔgɔ Befelisiéŋe bá mbɛɛ́ ɛ́ná nɔ́ɔnɔ, go oyana behúúní bɛ́hɛ́ bá amɔ́: «Goakɛ́ iloodio hɛ́nyɔ́ hɛ́ nyáanyamɔ́ olɔŋɔ na bogólí tásɛ na bologílógí#9.11 Go eninye na bɔ́ɔbɔ bó lɔ́mɔ́ ɔ́ŋɔ́ɔlú naá gig 10-11 na bɔ́ɔbɔ naá Lók 15.1-2. o?» 12Gɔ́ɔ Yésusu ɔ ɔ́bɔmɔ́ dogálɔ dábɔ́ go bó oyana a amɔ́: «Caá akɛ́ batɔ báaba bá lɔ́mɔ́ bá dɛ nómáa bɔ́ɔ bá fúmbemú ugóódíníní, bá lɔ́mɔ́ bɔgɔnɔ́gɔnɔ. 13Ɛ́dá no bámagana boóma bɔ́ɔbɔ dogálɔ dá Asaŋa dɔ́ɔdɔ dó oyamɔ́: “Mmaamanamɔ́ odɛ́má yá ŋgɛ́na mahana, caá bɛbáágá bá bidúgé#9.13 O bana Osée 6.6..” Ɛɛ́ɛŋ, ndɛ́ kanɛ go úle go go nco dɔ́ŋɔnɔ bɛtɛ́nɛ́ɛ bá batɔ, kanɛ́ bologílógí.»
Gɛsɛnɛ gá go bécelene manyáanya
(Mél 2.18-22; Lók 5.33-39)
14Gɔ́ɔ behúúní bá Sáŋa Begiyuminye bá báyɛkɛnamɔ́ Yésusu, go mo úhune bá amɔ́: «Bɛcamɛna bɛ́ lɛ́ hɔ́ɔ bɛ́ɛbɛ bɛɛcɔ́ɔ na befelisiéŋe dɛ bécelenemú manyáanya, behúúní báhɔ bɔ́ɔ bá dɛ bécelénée goakɛ́ o?» 15Yésusu go bó gundie a amɔ́: «Batɔ báaba bá lɔ́mɔ́ dɔ́ŋɛ́nɔ́ɔlú naá gibíné gá gigiŋe bá lɛ́ ba go bɛ́ɛmba go nigúe gɛcamɛna gɛ́ɛgɛ ugiŋénú a gá lɔ́mɔ́ nabɔ́ o? Kanɛ́ medúgú má úlene bá ná bó úlinye ugiŋénú, hɔ́ɔlɔ́ gɔ́ɔ bá ŋgaá bécelénée manyáanya. 16Mɔtɔ a dɛ gídée gilunú gá gɛla na gigísi gá gɛla gɛfáa; goŋaá gigísi gá gɛla gɛfáa gɛ́ɛgɛ bá gídenemú gɛ́ gaá bécílídé gɛ́ gɔ́gɛdɔ gá gilunú, gilefi gɛ́ gɔnɔ go áyɛkanɛna. 17Bá dɛ fɛgáa gɛkɔ́sɔ gá mɔgɛ́bɔ naá bilunú bá kɔbɛ sá bɛɔbɔ, goŋaá bilunú bá kɔbɛ bɛ́ gaá gúdégúdée, mɔgɛ́bɔ má uduge, kɔbɛ sɛ́ sola. Kanɛ́ bá fɛgamɔ́ gɛkɔ́sɔ gá mɔgɛ́bɔ naá kɔbɛ sá páa, mɔgɛ́bɔ na kɔbɛ mó lo go ŋa mó do dɛ́áŋá.»
Yésusu e é éŋúgíe moádɔmbɔ́ na okɔ́dɔ ba go húmene manɔ́ŋɔ́
(Mél 5.21-43; Lók 8.40-56)
18Aŋa Yésusu a mbaá ŋá a gá bó oyanɛna dogálɔ dɔ́ɔdɔ, ofɛanɔ́ɔ ba mɔtɔ go úle a báá bolá, gɛ́hɛ́ go danda a gule enúu naá busío bɛ́hɛ́, go oyɛda amɔ́: «Ombóla bamɛ a gá lɛ́ na go gúe, sɔ́kɔlɛ, úlé o nco mo dála ɛmbɔ́gɔ, a gɔɔ́ ɔyɔ́.» 19Yésusu go fadɛgɛna, olɔŋɔ na behúúní bɛ́hɛ́, a báá mo biené. 20Aŋa bá mbaá lɔmɔ́ bɛ́ ɛ́dana, okɔ́dɔ mɔ́ɔnyɔ a mbaá lɔmɔ́ a nóma ogɔnɔ́ yá manɔ́ŋɔ́ go mo émene bó ná lɛ́ nnyómá sɛ́ɔ́dɔ́ na ɛ́handɛ́, go báyɛkɛna Yésusu naá nnyimé, a báá báláfɛ́ná udúu yá gɛla gɛ́hɛ́. 21A mba lɛ́ a bágálɛnagalɛna a amɔ́: «Caá mbáláfɛna goana akɛ́ gɛla gɛ́hɛ́, keé éŋúgé.» 22Yésusu a á bákoɛlɛ́dá, go mo ɛ́na, gɛ́hɛ́ go mo oyana amɔ́: «Sɛmá odɛ́má, ombóla bamɛ, gioliminyo gáhɔ gɛ́ á go sódío#9.22 Gɛ́ á go sódío ɛ́na gɔnɔ́ Gɛ́ á go éŋúgíe..» Hɔ́ɔ na hɔ́ɔ, naá gɛcamɛna moánɛ, okɔ́dɔ mɔ́ɔnyɔ go dómba go éŋuge. 23Gɔ́ɔ Yésusu ɛ ɛ́damɔ́ bola naá nnyaŋá ya ofɛanɔ́ɔ ba mɔtɔ mɔ́ɔnyɔ. Aŋa a mbɛɛ́ ɛ́ná buúmbí ncolí#9.23 Buúmbí ncolí ɛ́na gɔnɔ́ Boyoní mesígí bɔ́ɔ bá díligenenemú bakɔ́dɔ bá mbií naá bɛantá bá egúe. na gitúu gá batɔ gɛ́ bégide, go bó oyana a amɔ́: 24«Héménée nɔnɔ, moádɔmbɔ́ ba okɔ́dɔ mɔ́ɔnyɔ a dɛ báá gúe, a lɔ́mɔ́ godɔnɔ́ɔ.» Gɔ́ɔ batɔ bɛ́ ɛ́damɔ́ go mo hɔɔnɔ. 25Aŋa bá mbaá ŋá bá báá go hémie mɔtɔ uŋkimée go hanyɔ́, Yésusu go íŋene naá nɛgɛlɛ́, go gumbene gɛtɔmbɔ́ɔ gá ombóla ba okɔ́dɔ mɔ́ɔnyɔ go ombɔ́gɔ, gɛ́hɛ́ go dómba go foyoga. 26Boóma gá bɔ́ go dómba go saa naá gigísi gá cí gɛ́ɛgɔ giimée.
Yésusu e é éŋúgíe begélígeli báandɛ́
27Gɔ́ɔ Yésusu u ú úlukiemú hɔ́ɔlɔ́, ɛ ɛ́da a dómbana, begélígeli báandɛ́ go ɛ́da bá mo fídene, bá ánca bá amɔ́: «Moɔnɔ́ ba Défidi, có ɛ́náamɔ́ mahana!» 28Aŋa Yésusu a mbɛɛ́ ɛ́dá bola naá nnyaŋá, begélígeli go mo báyɛkɛna, gɛ́hɛ́ go bó úhune a amɔ́: «No olimonyo goŋaá ndɛ́ ba go ŋa boóma moánɛ o?» Bɔ́ɔ go gundie bá amɔ́: «Daadáa, dɛ olimonyo.» 29Gɛ́hɛ́ go bó báláfɛna go oŋgíso, go oyɛda a amɔ́: «Ŋgáa bó nyó bɛ́ɛ́mbɛna go mbɔ́dɔ yɛ́ɛyɛ no áganamɔ́ odɛ́má yɛ́nyɔ́ hɔ́ɔ.» 30Kɔ́ɔ oŋgíso yábɔ́ yá fuunugemú. Yésusu go bó bébégidine a amɔ́: «Bébeŋéemú nɔnɔ, mɔtɔ a dɛ íyímé boóma moánɛ.» 31Kanɛ́ bé émene, gáábɔ́ go ɛ́da bá gúmenye ufíno yá Yésusu naá gigísi gá cí gɛ́ɛgɔ giimée.
Yésusu a á gúné gɛgáda gá giliíli naá gimmúke gɛ́ bɛ́ɛ́ ɛ́dá go gálagala
(Lók 11.14-15)
32Aŋa bá mbaá lɛ bá dómbana, batɔ go úlene Yésusu na mɔtɔ ba gɛgáda gá giliíli, mɔ́ɔ gimmúke. 33Gɔgɔ́ aŋa a mbaá gúné gɛgáda gá giliíli gɛ́ɛgɔ, gimmúke go ɛ́da go gálagala. Bitúu bá batɔ go ɛ́da go békúke, bɛ́ oya bɛ́ amɔ́: «Mbɔ́dɔ ya boóma aŋa yɛ́ɛyɛ náana ɛ gá báasa ɛ dɛ ɛ́nɛ́gá naá Ɛ́sɛlahɛ́ɛlɛ.» 34Kanɛ́ Befelisiéŋe bá mba lɛ́ bó oya bá amɔ́: «Bó lɔ́mɔ́ na bogaaga bá ufuŋe yá bɛgáda bá biliíli gɔ́ɔ a gúnemú bɛgáda bá biliíli#9.34 Go eninye na bɔ́ɔbɔ o banamɔ́ naá 12.24..»
Yésusu ɛ ɛ́ ɛ́ná a amɔ́ bitúu bá batɔ bɛ́ lɛ́ kanɛ ombeŋíbéŋí
(Mél 6.6b,34; Lók 10.2)
35Yésusu a mba lɛ́ ɛ ɛ́da ɛ ɛnda naá tɛ́sɔnɔ iŋkimée na naá bɛdɔŋɔ biimée, a húunenye naá nnyaŋá sábɔ́ sá mbósógólí, a dúmenye Gɛnɔ́gɔ́ gá Cɔ́mɔ gá Bufuŋe bá mmoɛná, e éŋugenye ɛgɔnɔ́ iŋkimée na bɛnɛ́mɔ biimée. 36Kanɛ́ mahana go mo gɔ́lɔ go busío bá bitúu bitúu bá batɔ bɛ́ɛbɛ a mbaá lɛ a núune dɔmbɔ́ɔlú kanɛ bogaaga, aŋa bɛdómbáa bá kanɛ ombeŋíbéŋí#9.36 Go eninye na bɔ́ɔbɔ o banamɔ́ naá Ɛmbanɔ 27.17; naá 1 Mefuŋe 22.17.. 37Gɔ́ɔ o oyanamɔ́ behúúní bɛ́hɛ́ a amɔ́: «Masáŋa má lɛ́ degédegé, boyogóní sɔŋɛ. 38Bósógólónyóomú nɔnɔ Moatɛ́ɛ ba masáŋa a dóma boyogóní naá mɔ́ masáŋa.»
सध्या निवडलेले:
Motíosi 9: YAS
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
