Motíosi 5
5
Yésusu a húunenye batɔ naá ogɔndɔ mmoɛná
(Mél 3.13; Lók 6.12-13,20-26)
1Naá goɛ́na gá bitúu bitúu bá batɔ bɛ́ɛbɔ, Yésusu go bólɛga naá ogɔndɔ mmoɛná, gɛ́hɛ́ go lukumene, behúúní bɛ́hɛ́ bá báá mo báyɛkɛ́ná. 2Kɔ́ɔ a gɔ́lɔmɔ́ dogálɔ, go ɛ́da go bó húunenye a amɔ́:
3«Besé makɔ́nɔ́ na batɔ báaba bá lɔ́mɔ́ na odɛ́má yá gosóga, Bufuŋe bá mmoɛná bó lɛ́ gáábɔ́.
4Besé makɔ́nɔ́ na bɛpɔ́ɔ́ bá batɔ, bá ŋga dáŋábá cí yɛ́ɛyɛ Asaŋa a mbaá dáná.
5Besé makɔ́nɔ́ na batɔ báaba bá baŋamɔ́, Asaŋa a ŋga bó bobío odɛ́má.
6Besé makɔ́nɔ́ na batɔ báaba bɔ́ ɔ́bɔnɔmɔ́ ncaná na inyúidi go masɛnɛ má botɛ́nɛ́ɛ, Asaŋa a ŋga bó fáá bá hóogio.
7Besé makɔ́nɔ́ na batɔ báaba bá gɔ́lɔnɔmɔ́ basɔ́gɔ́ɔ mahana, Asaŋa a ŋga bó gɔ́lɔ́ tɔ́nɔ mahana.
8Besé makɔ́nɔ́ na batɔ bá ɛdɛ́má immúmpúu, bá ŋgɛ ɛ́ná Asaŋa. 9Besé makɔ́nɔ́ na batɔ báaba bá yɔgɔnɔmɔ́ goŋaá buumbénú bó bɛ́ɛmba naá boayá bábɔ́, bá ŋga bó dɔ́ŋɔ́nɔ́ɔ baaná bá Asaŋa.
10Besé makɔ́nɔ́ na batɔ báaba basɔ́gɔ́ɔ batɔ bá bó séesenyemú go masɛnɛ má botɛ́nɛ́ɛ, Bufuŋe bá mmoɛná bó lɛ́ gáábɔ́.
11Besé makɔ́nɔ́ na bɛɛnyɔ́ɔ báaba batɔ bá nyó sɛgamɔ́, bá nyó séesenyemú, bá gɔnɔ nyó básómbanɛna mbɔ́dɔ iŋkimée go ufíno yámɛ. 12Békelényéemú nɔnɔ no gunde no aŋgana, bɛsoɛná bɛ́nyɔ́ bɛ́ lɛ́ makɔ́nɔ́nɔ́ɔ naá mmoɛná. Mammana, nɔ́ɔnɔ gɔ́ɔ bá mbaá séésényée mbúsí sá Asaŋa sɛ́ɛsɛ sɛ́ mbaá dóáná gɛ́nyɔ́#5.12 Go eninye nogálɔ ná ŋgɔ́ŋɛ́ nɔ́ɔnɔ na nɔ́ɔnɔ naá kálata ya Bɛcamɛna 36.16; na naá Meŋiigíe 7.52..»
Masɛgɛ na gise gá batɔ
(Mél 9.50; 4.21; Lók 14.34-35; 8.16; 11.33)
13«No lɛ́ masɛgɛ má cí. Kanɛ́ masɛgɛ má amɔ́ má sola, na akɛ́ bá gaá ná gɔnɔ́ má simidie o? Hɔ́ɔlɔ́ má ɛ́yá boóma bá dugúnú, bá má dɛ́a go nnyaáŋgadɛ́ɛ, batɔ bɛ́ ɛ́da go má bínde.»
14«No lɛ́ gise gá batɔ. Tɛ́sɔnɔ fóágáalú naá ogɔndɔ mmoɛná, ɛ dɛ báá ɔsɛ́gɔ́ɔlú. 15Bá dɛ nébígényée lámba go go yɛ ága naá iséní gadɛ́ɛ, kanɛ́ bá yɛ dálanamɔ́ naá gɛdálɛ́ná gá yɛ́, ɛ seemenye mɔtɔ uŋkimée mɔ́ɔnyɔ a lɔ́mɔ́ naá nnyaŋá#5.15 Naá gɛcamɛna moánɛ gíiní, nnyaŋá sá batɔ naá Ɛ́sɛlahɛ́ɛlɛ báaba bá lɔ́mɔ́ kanɛ bonɔ́mɛ makɔ́nɔ́nɔ́ɔ sɛ́ mba lɛ́ goana cómba mmue.. 16Caŋa táŋɛ́ mmue, bonyáa nɔnɔ naá oŋgíso yá batɔ. Bó gaá ŋaáa goŋaá bɛ́ ɛ́nana bɛnɔ́gɔ́ bɛ́nyɔ́ bá meŋiigíe, bɛ́ ɛ́da go gúmenye Isée bɛnyɔ́ mɔ́ɔnyɔ naá mmoɛná.»
Yésusu a húunenye moóma mɔ́ɔmɔ naá Gicele
17«No béeniŋenye no amɔ́ ndɔ́mɔ́ úléelú go go nco go úlie gicele gá Mɔ́sɛsɛ na gohúunenye gá mbúsí sá Asaŋa o? Akɛ́ɛ, ndɛ́ kanɛ go úle go go nco mó úlie, mmbuú úlé go go nco mó hóogio. 18Mammana ŋgaá nyó oyáná daŋɛ́daŋɛ caá, otóotoɛ yá mmoɛná na cí go dómba, akɛ́ ɛnandáda, akɛ́ hɛómaŋkóma há hímmue, bá dɛ ŋgá mó úlie naá kálata ya gicele gó ɛ́da húme aŋa buimée bó ŋgaá bóhóógío#5.18 gó ɛ́da húme aŋa buimée bó ŋgaá bóhóógío: go kikilidie gúncodío gó lɔ́mɔ́ gó ɛ́da húme naá go mana gá boóma buimée.. 19A dúme godɔ́ɔdɔ, mɔ́ɔnyɔ a ŋgaá dómbá ɛndɔndɔ́sɛnɔ táŋɛ́ hímmue, a húunenye batɔ go ŋa nɔ́ɔ caŋa mmue, bendiemi a ŋga bɛ́ɛ́mbá hɛómaŋkóma naá Bufuŋe bá mmoɛná. Kanɛ́ mɔ́ɔnyɔ a ŋgɔɔ́ ɔyɔ́ɔ aŋa bɛlɔsɛnɔ bɛ́ɛbɛ bɛ́ oyamɔ́, a bɛ́ húunenye go batɔ, bendiemi bá ŋga mo gɔ́lɔ́ gɛantáa naá Bufuŋe bá mmoɛná. 20Ŋgaá nyó oyáná caá, ɛ́na mbɔ́dɔ yɛnyɔ́ ya go gumbene bɛlɔsɛnɔ ɛ dɛ dómbá yɛ́ɛyɛ ya muloodio má bicele na Befelisiéŋe, no do ŋgá bóso go bɛa undukí naá Bufuŋe bá mmoɛná.»
Ŋgónana na mbɔ́dɔ ya go ɔŋɛnɔ gá bihéehinye
(Mél 11.25; Lók 12.57-59)
21«No mbɔ ɔ́bɔ́ bá bóó oyáná batɔ bá cóá goŋaá: “O do óná mɔtɔ; mɔ́ɔnyɔ o ónamɔ́ mɔtɔ, bɛ́ ɛ́da nɛhɛ́ naá nɛgála#5.21 Gihúmie 20.13; tɔ́nɔ kálata ya Bicele 5.17.”. 22Kɔ́ɔ yɔmɔ́ɔ ŋgaá nyó oyáná caá: uŋkimée mɔ́ɔnyɔ ɔ ɔ́bɔmɔ́ mpímí na ondimóní, a ŋgɛ ɛ́dá básáaga naá nɛgála; uŋkimée mɔ́ɔnyɔ a dɔ́ŋɛnɔmɔ́ ondimóní a amɔ́ “nnyama”, a ŋgɛ ɛ́dá básáaga naá Nɛgála Nɛgɔ́nɔ́. Mɔ́ɔnyɔ a ŋgaá dɔ́ŋɛ́nɔ́ ondimóní a amɔ́: “uŋgegeegú”, bendiemi a háanana goŋaá bá mo nɔɔ naá gɛbɔlɔ́gɔdɔ gá íyuke há kanɛ go fúenene. 23Kanɛ́ go amɔ́ go ɛ́da fadɛgɛna go go nco fáa Asaŋa gɛbáágá gáhɔ naá gɛdálɛ́ná, o báá bééníŋínyée hɔ́ɔ goŋaá tɛ́ɔbɛnɔ a bɛanana gɛsɛnɛ nahɔ, 24síé o báá dɛ́ɛ́ná gɛbáágá gáhɔ naá boayá bá gɛdálɛ́ná, o manɛ go ɛ́da bégedie na tɛ́ɔbɛnɔ, o lo go nco gunde kanɛ́ o fáa gɛbáágá gáhɔ. 25Gɛcamɛna gɛ́ɛgɛ o gá lɔ́mɔ́ go pɛ́ na mɔtɔ bahɔ ba gɛsɛnɛ, bégedíemú fɛaŋɔ nɛhɛ́, go goŋaá a dɛ ɛ́dá nahɔ naá usúmbí bɛsɛnɛ, usúmbí bɛsɛnɛ a go íŋene go gisimbi gɛ́ go nɔɔ naá ncíbo ya gɛaŋɔ́. 26Mammana, ŋgaá go oyáná caá, o do ná húme naá ncíbo ya gɛaŋɔ́ yɛ́ɛyɔ, aáŋa o gá lɛ́ o do soáa ufínó yáhɔ yɔ́ɔyɔ akɛ́ faláŋa ummue ɛ dɛ síéné.
Gɛdáŋa na gɛlɔgɔ
(Mot 18.8-9; Mél 9.43,47-48)
27«No mbɔ ɔ́bɔ́ bá bóó oyáná batɔ bá cóá goŋaá: “O do ŋaáa gɛdáŋa#5.27 Gihúmie 20.14; tɔ́nɔ naá kálata ya Bicele 5.18.”. 28Kanɛ́ yɔmɔ́ɔ ŋgaá nyó oyáná caá: mɔ́ɔnyɔ a núunidemú okɔ́dɔ ba sɔ́gɔ́ɔ na mbééníŋínyí ya ŋaá a bɛ́dɛmɛna nɛhɛ́, a báa go ŋa gɛdáŋa nɛhɛ́ naá odɛ́má yɛ́hɛ́.
29«Aáŋa niíso náhɔ ná ombɔ́gɔ onɔ́mɛ nɛ́ go dómana goŋaá o lɔgɔ, nɛ́ báláamɔ́ o nɛ́ umbe halaháláa; bó lɛ́ bese go busío báhɔ goŋaá gɛnamá gáhɔ gímmue gɛ́ yíme, gó dómba goŋaá bá nɔɔ nnyɔ́dɔ yahɔ iŋkimée naá gɛbɔlɔ́gɔdɔ gá íyuke há kanɛ go fúenene. 30Aáŋa ombɔ́gɔ yáhɔ yá onɔ́mɛ yó go dómana goŋaá o lɔgɔ, yó sómbáamɔ́ o yó umbe halaháláa; bó lɛ́ bese go busío báhɔ goŋaá gɛnamá gáhɔ gímmue gɛ́ yíme, gó dómba goŋaá nnyɔ́dɔ yahɔ iŋkimée yɛ ɛ́da naá gɛbɔlɔ́gɔdɔ gá íyuke há kanɛ go fúenene.
Go inye ogɛ́
(Mot 19.7-9; Mél 10.4-5,10-12; Lók 16.18)
31«No mbɔ ɔ́bɔ́ tɔ́nɔ bá bóó oyáná batɔ bá cóá goŋaá: Mɔ́ɔnyɔ i inyemú ogɛ́ a háanana go mo íŋene kálata yɛ́ɛyɛ ɛ dúfenyemú goŋaá nɛbáná nábɔ́ nɛ́ á maná#5.31 Bicele 24.1.. 32Kanɛ́ yɔmɔ́ɔ ŋgaá nyó oyáná caá: “Mɔtɔ mɔ́ɔnyɔ i inyemú ogɛ́, aáŋa caá goŋaá a á hémé hanyɔ́#5.32 aáŋa caá goŋaá a á hémé hanyɔ́: gokikilidie gúncoó gó lɛ́: goana aáŋa nɛbáná nábɔ́ nɛ́ dɛ báá ladáalú. O bana kálata ya Léfi 18.6-18., a á mo dómá goŋaá a ŋanana gɛdáŋa; tɔ́nɔ, mɔtɔ mɔ́ɔnyɔ a giŋemú okɔ́dɔ mɔ́ɔnyɔ bá mo inyemú, a á ŋaáa gɛdáŋa”.
Bɔ́ɔbɔ bó lɔ́mɔ́ gobálɛa
33«No mbɔ ɔ́bɔ́ gɔnɔ́ bá bóó oyáná batɔ bá cóá goŋaá: “O do hóámá o do lɔbɛ́nɔ́ kanɛ go hóogio mbálɛɛná yahɔ; kanɛ́ hóógío bɔ́ɔbɔ o mbaá dáná naá mbálɛɛná yahɔ naá oŋgíso yá Daadáa#5.33 O bana kálata ya Léfi 19.12; kálata ya Ɛmbanɔ 30.3; kálata ya Bicele 23.22-24.”. 34Kanɛ́ yɔmɔ́ɔ ŋgaá nyó oyáná caá, no do bálɛáa akɛ́ sɔŋɛ: no do bálɛáa akɛ́ mmoɛná, goakɛ́ ɛ lɛ́ oŋgɛ́yɔ́ yá Asaŋa. 35No do bálɛáa akɛ́ cí, goakɛ́ ɛ lɛ́ gɛdálɛ́ná bɛgɔ́ndɔ́ bɛ́hɛ́; no do bálɛáa akɛ́ Yolósalɛmɛ, goakɛ́ bó lɔ́mɔ́ tɛ́sɔnɔ ya ufuŋe ogɔ́nɔ́. 36O do bálɛáa akɛ́ go odóɛ yáhɔ, goakɛ́ o do bósó bá go gundie cóɛ mmue mmúmpúu ɛ́na lí piídidi naá odóɛ yáhɔ. 37Ŋgáa ɛɛ́ɛŋ bahɔ a bɛ́ɛmba “ɛɛ́ɛŋ”, akɛ́ɛ bahɔ a bɛ́ɛmba “akɛ́ɛ”; bɔ́ɔbɔ bó bádálanamɔ́ hɔ́ɔ búntió bó ɛ́damɔ́ go úlene naá Ohándá.
Bɔ́ɔbɔ bó lɔ́mɔ́ bibégundí
(Lók 6.29-30)
38«No mbɔ ɔ́bɔ́ goŋaá bá mbo oyɛ́dá bá amɔ́: “Niíso nɛ́ bégundie go niíso, niínyo nɛ́ bégundie go niínyo#5.38 O bana Gihúmie 21.24; Léfi 24.20; Bicele 19.21.”. 39Kanɛ́ yɔmɔ́ɔ ŋgaá nyó oyáná caá, o do bááŋɛ́gá ombɛ́. Mɔtɔ a amɔ́ a go góba ombɔ́lɛ́ naá ɛdáma ná ombɔ́gɔ onɔ́mɛ, mo sɛncɛ́gɛ́náamɔ́ nɛ́ɛnɛ níntió. 40Aáŋa mɔtɔ a lɛ́galɛga go ɛ́da nahɔ naá usúmbí bɛsɛnɛ go go bɔgɔ gɛla gáhɔ gɛ́ɛgɛ o bááganamɔ́ naá cí, mo dɛ́ɛ́nɛ́náamɔ́ tɔ́nɔ gɛ́ɛgɛ gá isió. 41Mɔtɔ a amɔ́ a go gaŋa goŋaá o bádóɛgɛna gɛnóɛ́, go ɛnda kɛ́lɔmɛ́da mmue, ɛndáa kɛ́lɔmɛ́da ɛ́handɛ́ olɔŋɔ nɛhɛ́. 42Fáá mɔ́ɔnyɔ a go ɔŋɔnɔmɔ́, gɔnɔ́, o do fíídíe nnyimé mɔtɔ mɔ́ɔnyɔ a lɛ́galɛgamɔ́ go bɔlɔ boóma naá maamɔ́ɔ.
Maamánáa nɔnɔ babɛlɔ́bɛlɔ bɛ́nyɔ́
(Lók 6.27-28,32-36)
43«No mbɔ ɔ́bɔ́ goŋaá bá mbo oyɛ́dá bá amɔ́: “O maamana sɔ́gɔ́ɔ bahɔ, o bɛlabɛla obɛlɔ́bɛlɔ bahɔ#5.43 O bana Léfi 19.18.”. 44Kanɛ́ yɔmɔ́ɔ ŋgaá nyó oyáná caá, maamánáa nɔnɔ babɛlɔ́bɛlɔ bɛ́nyɔ́, no bósógolonyo go báaba bá nyó séesenyemú. 45Nɔ́ɔ gɔ́ɔ, no gaá ná bɛ́ɛ́mbá baaná bá Isée bɛnyɔ́ mɔ́ɔnyɔ naá mmoɛná, goakɛ́ a numenye buisí bɛ́hɛ́ go babɛ́ na besi, a gɔnɔ niigenye nobólá go batɔ báaba bá ŋananamɔ́ besé na báaba bá ŋananamɔ́ gɛbɛ́. 46Moatɛ́, no amɔ́ no maamana báaba bá nyó maamanamɔ́, kasɛ́á bɛsoɛná no gaá ná bɛáa o? Bogólí tásɛ bá ŋanana nɔ́ɔ caŋa mmue. 47Gɔnɔ́, no amɔ́ no bédíigenye goana bolimóní bɛ́nyɔ́, no ŋananamɔ́ ɛkádɛ gá go békúke o? Bindiíyímé Asaŋa bɛ́ ŋanana nɔ́ɔ caŋa mmue. 48Bɛɛnyɔ́ɔ kanɛ́, bɛ́ɛ́mba nɔnɔ bɛgɔ́nɛ́naga, aŋa Isée bɛnyɔ́ mɔ́ɔnyɔ naá mmoɛná a lɔ́mɔ́ gɛgɔ́nɛ́naga#5.48 Go eninye ŋgɔ́ŋɛ́ yɛ́ɛyɛ na yɛ́ɛyɛ naá kálata ya Léfi 19.2; tɔ́nɔ naá kálata ya Bicele 18.13..
सध्या निवडलेले:
Motíosi 5: YAS
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
