Matiu 5
5
Ntọọñọ ukwọrọ ikọ ke anyọñ abod
1Ke ini Yisọs amaakekịt umiañ atu awo, anye amaadọọk aka aketie ke anyọñ abod. Mme mbed amọ emaenyʌñ eka ebịne anye, 2ndin anye amaatọọñọ adikpeeb ammọ ñkpọ.
Mme ikọ adidiọñ
Anye abo:
3 “Afọfọn anọ mbon e-eweeneke ke sịbidịd,
sia abio ubọọñ Abasi anieeghe ammọ.
4 Afọfọn anọ mbon e-etuaaha ayịd,
sia eyaaedọñ ammọ esịd.
5 Afọfọn anọ mme anie ifure-ifure ido,
sia ammọ eyaedat ederimbod enie.
6 Afọfọn anọ mme andikop biọñ ye nsaditọñ etiido,
sia ammọ eyaenie uyʌkkọ.
7 Afọfọn anọ mme anditua awo mbọm
sia eyaetua ammọ mbọm.
8 Afọfọn anọ mbon e-esịd asanake,
sia ammọ eyaekịt Abasi.
9 Afọfọn anọ mme anam emem,
sia eyaekood ammọ nditọ Abasi.
10 Afọfọn anọ mme mbon e-ebọọhọ ndutʌkkọ ke ntak etiido,
sia abio ubọọñ Abasi anieeghe ammọ.
11 “Afọfọn inọ ndufo ke ini ebọọhọ nsue, ndutʌkkọ ye ndiọi ikọ ke nsu, ke ntak mmi. 12Inem esịd, inyʌñ idaara, sia utịb ndufo ayaakpon ke abio ubọọñ Abasi, kpasʌk ntom ke ekekọbọ mme brọfed ke esed.
Inʌñ ye unwana
13 “Ndufo edo inʌñ ederimbod. Ado adieke inʌñ mmiinemme aba, ediinam die nọ anye amaana anie inem? Ifọnnọ ke baaba usʌñ nte keed aba, ana etop anye eduọk, efiik ke ukod.
14 “Ndufo edo unwana ederimbod. Abio e-ebọppọ ke anyọñ abod ikemeke idịbe. 15Awo isidomoke utuenikañ iben usan ifʌk, ado aben anye adot ke anyọñ nọ anye ayamma anọ afịd awo ke ufọk. 16Ke ukem usʌñ ami ana unwana ndufo ayamma ke iso mme awo, nọ ammọ ekịt nti utom ndufo enyʌñ etooro Ete ndufo ke anyọñ.
Adinam Ibed asu
17 “Ikiikere ke ami ñkedi ma ndibiad Ibed me se mme Brọfed ekekpeeb. Ñkediighe adibabiad, ñkedi adinam nọ ammọ esu. 18Ke akpanikọ ke ami idọkkọ ndufo, tutu anyọñ ye isọñ eboiyo efep, ndomo ntọi keed, ndomo ata etək ntọi ikọ keed idiiwuọhọ ifep ke Ibed ami tutu anye anam uduak a-akenaaha nte anye anam. 19Ke ntodo, awo ake adodo ake adibiad ñkpọkọm ata andisịb ñkan ke atu mme ibed ami me adinam nọ mme awo mfen ekeene ebiad mme ibed ami, eyaedat awo ado nte ata usuuhọ ñkan ke abio ubọọñ Abasi. Ado awo a-anịmme mme ibed ami anyʌñ akpeeb mme awo mfen abaña ammọ eyaedịppe anye itie ke abio ubọọñ Abasi. 20Ndin mmidọkkọ ndufo mbo ke ibọhọke nti uwem ndufo ekpon ekan ake mme Farisi ye mme akpeeb ibed, ndufo idiikemeke-keme idʌk abio ubọọñ Abasi.
Uwod awo
21 “Ndufo emekop naña eketañ enọ mme eteete ñnyịn ebo, ‘Ikiiwot awo, ñko ke awo a-awotto awo ana abọọrọ mbịme ke esob.’ 22Ado ami idọkkọ ndufo mbo ke awo ba keed a-ayatta esịd ye ayịneka amọ ayaabọọrọ mbịme ke esob ikpaisọñ. Ñko awo a-adiidat ayịneka nte ‘Useme,’ ayaabọọrọ mbịme ke esob ikpaisọñ. Ndin awo a-akoodo anye ‘Ntʌn,’ ayaadʌk ke nsi-nsi ikañ.
23 “Ke ntodo, akpedo idaha afo adatta ñkpọ uwa ekọọm adi ke itie uwa, afo atoiyo abo ke ayịnuka amaanie utọk ye afo, 24kpọñ uwa ekọọm mfo do ke itie uwa, kaa kenam emem ye anye, mbemiso afo atịmme adi adinọ enọ mfo.
25 “Nam emem ye awo usua mfo ke usọp mbemiso anye uben fiin awuọ esob. Nam idaha afo asʌkkọ aba ye anye ke usʌñ, mbaak awo usua mfo adukappa fiin anọ abiireikpe, ndin abiireikpe adukappa fiin anọ etubom, ndin eyatop fiin esịn ke ñkpakọb. 26Ntañ akpanikọ inọ ndufo, awo idiiyakka afo awuọ tutu afo akpe afịd akʌk ama.
Efịbe
27 “Ndufo emekop ke emaebo, ‘Kuusịn efịbe.’ 28Ado ami mbo ke awo a-aseeghe awonwaan ke idiọọk usʌñ akap asesịn efịbe ke esịd amọ. 29Anyen udom mfo akpedo ñkpọiduọ unọ fiin, kịm anye sio duọọk. Afọn afo adinana ndido idem mfo keed, ñkan afịd idem mfo aditak ke nsi-nsi ikañ. 30Ñko ubọk udom mfo akpedo ñkpọiduọ unọ fiin, kpịkke anye top duọọk; sia afọn afo adinana ndido idem mfo keed ñkan afịd idem mfo aditak ke ikañ nsi-nsi.
Uwuọọñọ ndọ
31 “Emaedadak ibo ke awo ake adodo a-asịnne anwaan amọ ana anọ anye ñwed usio ndọ. 32Ado ami ibo ndufo ke awo ake adodo a-asịnne anwaan amọ, ibọhọke ke ntak efịbe, anam anye ado asaña esien; ñko awo a-adọọhọ awonwaan e-emaaekesio ndọ asịn efịbe.
Enwọñọ
33 “Ndufo emekop ñko ke emaebo mme ete ñnyịn ke esed, ‘Ikiibiad enwọñọ ndufo, ana enịm enwọñọ a-ndufo enamma ye Abọọñ.’ 34Ado ami ibo ndufo, ikiinwọnwọñọ unwọñọ ntekeed idian abio Abasi sia ado ebekpo Abasi, 35me ederimbod, sia adooho itie udodukod Abasi, me abio Yerusedem, sia adooho abio akwa adidem. 36Ikiita unwọñọ ke iwuod ndufo ñko, sia afo unieeghe adudu adinam ided mfo akappa ado afia me abubịd. 37Ke ntodo yak ‘Ih’ mfo ado ‘Ih,’ yak ‘Iyo-o’ mfo ado ‘Iyo-o’; akpekan ado, se afo atañ ato setan.
Usieene aka ke usieene
38 “Ndufo emekop ke emaebo ‘Anyen aka ke anyen, eded anyʌñ aka ke eded.’ 39Ado Ami ibo ndufo ikiisio idiọọk awo usieene idiọọk. Utu ke ado, awo akpumia ke mfʌk udom, kanna edem mfʌk uko nọ anye umia ñko. 40Awo akpeyem aduben ñka esob ke ntak afọñ adahaidem, nọ anye afọñidem mfo ñko. 41Awo akpukpak nọ asaña itiad keed ye anye, kappa saña itiad iba. 42Awo ake adodo u-ubeeñeke ñkpọ, kuutre adinọ; ñko awo a-ayemme ewuọọd, kuutre adiwuọọd.
Ma mme asua mfo
43 “Ndufo emekop naña ekesibo, ‘Ma mbọhọidʌñ’ mfo nyʌñ sua awo usua mfo. 44Ado ami ibo ndufo ima mme asua ndufo inyʌñ ibọñ akam inọ mme mbon i-inọọhọ ndufo ndutʌkkọ; 45nọ ndufo edo nditọ Ete ndufo abaaha ke anyọñ, sia unwana utịn amọ ayaayamma anọ nti ye ndiọi awo, anyʌñ anọ nti ye ndiọi awo edịm ukem-ukem. 46Adieke ndufo emaaha mbon i-imaaha ndufo ikpọọñ, nso-o udod ke ediibọ? Ñkọm mme ọbrọbʌd mbon ubọ taksi enyʌñ esinam ntom. 47Ndufo ekpekọọm nditọeka ndufo ikpọọñ, nso-o ke ndufo enam ekan mbio mfen? Nte mbio a-ammiimaaha Abasi inamma ntodo ñko? Ñkọm mbio a-mmiidiọọñọke abasi enyʌñ esinam ntodo. 48Ana ndufo efọn ema, kpa nte Ete ndufo ke anyọñ afọnnọ ama.
सध्या निवडलेले:
Matiu 5: NAAM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
