Madius 5
5
1Is alum atimi is ahinag aien, um aridjai an nedoon: is wat ateucse aien, eris apan ehelen a ilpu atimi atahaijeg yin. 2Is tas aien, um esege imi ra, um ika, 3Era mun ahesmoij ara et ipjidipjid inliinmopura ara: et ura nelcau an nohatag. 4Era mun ahesmoij ara era ohocred ara: erupu cediaig ara. 5Era mun ahesmoij ara et eropse inliinmopura ara: erupu amen an pece ara. 6Era mun ahesmoij ara et ehtele ra ara um ahvig emda nedo upene: erupu gaije ara. 7Era mun ahesmoij ara era ago nedo aiheuc vai atimi ara: erupu leh naiheuc vai ra ara. 8Era mun ahesmoij ara et adicinadicin inliinmopura ara: erupu ecet Atua ara. 9Era mun ahesmoij ara era asa neigpa ara: uhpu anvi nidara par ika ilpu hal o Atua. 10Era mun ahesmoij ara er edemda vai ra va nedo atoh ura: et ura nelcau an nohatag. 11Eka mun ahesmoij aijaua, eru wit asan tas has vai caua natimi, um atmas vai caua, um athai intas has asega um ahcil vai caua, vai nyak. 12Akumu cediaig aijaua, um imyiacitak alupas: etpu esjilid nimtan imi caua an nohatag: is um ucco nedemda ura vai ilpu profeta eris uhup iramia ara.
13Eka mohoanjop an nobohtan aijaua: ja el et aiyu inmohoanjop, et ehka inlep ago upene vaig, et mun eti upene inlep ago itai vaig iran, ja eh mun erekhaig pan itac, era atga iran atimi. 14Eka itai lah an nobohtan aijaua. Et ehka nadenaigvaig neom iji eigki et amen ijinies an nedoon. 15Era eti atni incop alahala atimi um adahpoi an nipjinitai, ja er atijai an nitai ati incop alahala iran; et par lah ehele atimi asega anliin neom. 16Etmu naunau inlah unyimia aijaua an nuhup o atimi, mika eri alum auritai upene unyimia ara, um imyiahpas Etmamia an nohatag.
17Akumu jim aktaktai aijaua, um ika, kis ham ainyak par auahas intas alep, im intas o ilpu profeta: kis eti ham ainyak par auahas itai, jai kis ham ainyak par ago ehni. 18Et inivaijec ineig ek asaig ehelemia ainyak mika, Inyi yetpan an tid iran nohatag im nobohtan, ja inyi ti yetpan an tid iran tah nidan tintin, im lep tah nesganimtan nidan tintin an tas alep o Atua, um uhum pan naopan iyehki eri ago ehni asega. 19Aien inyi imyipalea tah intas alep haklin iji eigki aien, um esege imi atimi nedo ineigki, etpu upoupo aien an nelcau an nohatag: ja aien inyi imyiaiji aien, um esege imi atimi nedo ineigki, etpu esjilid aien an nelcau an nohatag. 20Ek asaig ehelemia ainyak mika, El et eti esjilid nedo atoh unyimia irai edo atoh o ilpu atimi esege im ilpu Farisi, aki idim eti apan aijaua an nelcau an nohatag.
21Akis atahaijeg aijaua intas ineig eris upyi hup masaig ehele ilpu tu mika, Jim atgei atmas; aien et atgei atmas aien, etpu leh neruvaig aien: 22ja ek asaig ehelemia ainyak mika, Aien et tup edemda vai etoan aien, etpu leh neruvaig aien: aien et ika aien ehele etoan, Et takitai, uhpu tas alep vai yin: aien et ika aien ehele etoan, Ak natimi ahnag, uhpu ati yin an cop an pece has. 23Na wat imyiapan nitai ahlap unyum aiek u natau, jam imyiehva tah nedo ineig unyum et auahas inliinmopoi etoam, 24ude nitai ahlap unyum an nuhup u natau, um atga unyum; namu uhup aiek um tas updak ehele etoam, ja par apan um ahlap an nitai ahlap unyum. 25Namu auroauro aiek um tas updak ehele natimi ineig et tak atimi iram aien, na wit amen ehelen aiek an nefalaig; va yi jim ati euc a natimi ineig et tak atimi iram aien ehele natimi alupas, etpu lep ati euc a natimi alupas ehele naheca o un, etpu lep ati euc aien anliin neom ipjin. 26Et inivaijec ineig ek asaig ehelum ainyak mika, Napu ti lep alau ijo aiek um uhum pan naopan iyehki napu leh ehni nimtam aiek.
27Akis atahaijeg aijaua intas ineig eris upyi hup masaig ehele ilpu tu mika, Namu jim ago ingaijid aiek: 28ja ek asaig ehelemia ainyak mika, Aien et alum intakata aien um merit vai yin, et mun idim ago ingaijid inliinmopon aien vai yin. 29El et itai epihtau imi euc nesganimtam inmatam, anum atipagki aiek, um ethaig: et upene vai euc, mika uhpu auahas nuarin-nohum et ethi, jam has, nikavaig, uhpu ethaig nohum asega an pece has. 30El et itai epihtau imi euc nikmam inmatam, anum acaldei aiek, um ethaig: et upene vai euc, mika uhpu auahas nuarin-nohum et ethi, jam has, nikavaig, uhpu ethaig nohum asega an pece has. 31Eris lep ika, Aien et abrai ehgan aien, etmu alupai yin nitasvitai aien va nabrai yin o un: 32ja ek asaig ehelemia ainyak mika, Aien et abrai ehgan aien, eti vai ago ingaijid, et ika aien yi ago ingaijid ehgan va nedo o un: im lep aien et leh yin aien eris abrai yin, mika yi ehgan, et ago ingaijid aien.
33Im lep ineig, akis atahaijeg aijaua intas ineig eris upyi hup masaig ehele ilpu tu, um ika, Jim upyi asan tas ahcil aiek, ja etmu inivaijec intas upyi asaig unyum aiek ehele Ihova: 34ek asaig ehelemia ainyak mika, Akumu jim tas atcinuhri aijaua: jim tas atcinuhri va nohatag; et dorona o Atua ineigki: 35im lep va nobohtan; et itai atijai neduon iran ineigki: im lep vaig Jerusalem; et uarin-pece ineigki o Natimarid esjilid. 36Namu jim tas atcinuhri va nidjinum aiek, et ehka vai euc nagovaig yi ahi um apeig tah numri nidjinum. 37Akumu ika aijaua, Maiya, maiya; O’o, o’o: et ahes irai Tiapolo intas asega et esjilid an tas eraigki.
38Akis atahaijeg aijaua intas ineig eris asaig mika, Aru nesganimtan an nesganimtan, im lep neijin an neijin: 39ja ek asaig ehelemia ainyak mika, Uhu wit ago nedo has vai caua, akumu jim aru aijaua: et wit ahpoi nahpam inmatam tah, anum ahidaig pan nahaijin nahpam aiek ehelen. 40El et imyiisjis iram tah natimi, mika yi leh napelumai uhup unyum, anum lep alupai yin napelumai itac aiek. 41El et ika ehelum tah, an ahced yin aiek um apan a mail et ethi, anum ahced yin aiek um apan a mail et ero. 42Alupai natimi ineig itai aiek et ugni euc vaig aien, um jim atidjum aiek irai natimi ineig et ika aien, Imyihio tah nitai aiek, ja par lep leh.
43Akis atahaijeg aijaua intas ineig eris asaig mika, Etmu aiyu inliinmopom aiek va atimi eblaamnem unyum, jam has inliinmopom va atimi tak atimi iram: 44ja ek asaig ehelemia ainyak mika, Akumu aiheuc vai ra aijaua era tak atimi iramia ara, um asan tas upene vai ra era asan tas has vai caua ara, um ago nedo upene vai ra era amcel vai caua ara, um alaigaheni vai ra era ago nedo has vai caua ara, um abli caua; 45va akupu ilpu hal o Etmamia an nohatag aijaua: et ika aien yi aridjai nagesega o un vai ilpu atimi auatatimi im ilpu atimi upene, et lep ika aien yi ehe vai ilpu atimi et atoh nedo ura im ilpu atimi et eti atoh nedo ura. 46El eka aiheuc vai ra ache aijaua, era aiheuc vai caua ara, akupu leh inhe aijaua? era ago nedo ineigki a ilpu atimi akwanaham. 47El eka aiheuc vai ilpu etoamia ache aijaua, et eti esjilid nedo unyimia irai edo oi tak atimi; era ago nedo ineigki a ilpu atimi akwanaham. 48Akumu ago nedo atoh asega aijaua, et idivaig Etmamia an nohatag, et idim atoh nedo asega o un.
सध्या निवडलेले:
Madius 5: ATY1863
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
historic text maintained by the British and Foreign Bible Society
