Luhka 23
23
Jesuh Pilata veia ami Cehpüi
(Mt 17:1,2,11-14; Mk 15:1-5; Jn 18:28-38)
1Acunüng ngbumki he ami van tho law u lü Jesuh Pilata veia cehpüi u lü, 2“Hin naw, kami khyang he lam jah hma saki, kei Mesijah, sangpuxang ni ti lü Ketah sangpuxanga veia akhawn ä ngcawn vai ti se, kami ngjak,” tia ami mawm.
3Pilat naw, “Judah hea sangpuxanga na kyaki aw?” ti lü kthäh se, Jesuh naw,
“Ä, na pyena kba kya veng,” ti lü a msang.
4Acunüng Pilat naw ktaiyü ngvai he la khyang hea veia, “Hina khyanga khana mkhuimkhanak vai ia mkatnak am hmu veng,” a ti.
5Cunsepi amimi naw “Kalile khaw üng tün lü, ahi düta Judah khaw avan üng jah mthei hü lü khyang avan jah kpyükpyeh hü bäihki,” tia, aksehlena ami pyen.
Jesuh Heroda veia ami Cehpüi
6Pilat naw ngja lü “Hina khyang hin Kalile khyang aw?” ti lü a jah kthäh. 7Pilat naw Heroda uknaka khaw üngka ti a ksing üng Heroda veia a tüih be. Acunüng, Herod cun Jerusalema awmki. 8Herod naw Jesuh a hmu üng aktäa jekyaiki; isetiakyaküng a mawngma ngja lü ajandea a hmuh vai a ngaih, müncankse he a jah bilaw iyaw bawi ta a hmuh vai a büa phäha kyaki. 9Ngthu khawjah a kthäh; cunsepi Jesuh naw i am pi am msang be. 10Acunüng ktaiyü ngvai he la thum ksing he naw ngdüi u lü aktäa a mi mkatei. 11Herod la a yekap he naw Jesuh hmumsit u lü yaiha pawh u lü jinu akyäp cang suisaki he naw Pilata veia ami tüih be. 12Acuna mhmüp üng Pilat la Herod ngpüi kyu naki xawi. Ajana ani püi ana hneng khawiki xawi.
Jesuh Thi khaia ami Mkhyäp
(Mt 27:15-26; Mk 15:6-15; Jn 18:39—19:16)
13Pilat naw ktaiyü ngvai he, angvai he la khyang he avan jah khü lü, 14“Khyang he lam jah hma saki ti u lü hin ka veia nami lawpüia kyaki; teng u, nami ma a katnak sui ni se nami mkata kba hina khana i a katnak am hmu veng; 15Herod naw pi a katnak cang am hmu naw, a veia ka tüih päng; teng u, thihnak sen vaia i am pawh ve. 16“Acunakyase, kpai lü khyah be vang,” a ti. 17Buhpawh pawi üng khyang mat jah mhlät pet khawia thum awmki.#23:17 Buhpawh pawi üng khyang mat jah mhlät pet khawia thum awmki tia akyang kdik 17 avang üng am ami yuk si.
18Ami van atänga ngpyang u lü, “Hin hin hnim lü, Barabah jah mhlät pea,” ami ti. 19Barabah cun mlüh k’uma ksuksaknak pawh lü khyang a hnima phäha thawngima khyuma kyaki.
20Pilat naw Jesuh a mhlät vai ngaih lü a jah kthäh be. 21Cunsepi ngpyang u lü, “Kutlamktung üng taiha, Kutlamktung üng taiha,” ami ti.
22Pilat naw akthumnaka, “Ise ni? Hin naw ia katnak ni a pawh ve? Thihnak sen vai a khana i am hmu veng; acunakyase kpai lü khyah be vang,” a ti. 23Cunsepi amimi naw angsang yea kutlamktung üng taih vaia amthuia mso u se, acunüng ami ngpyangnak am Pilat ami näng. 24Acuna Pilat naw ami msoa kba Jesuh pawh vaia ngthu a jah pet. 25Suksaknak pawh lü khyang a hnima phäha thawngim üng kyumki ami kthäh jah khyah pe lü; Jesuh cun ami ngaih ngaiha ami pawh vaia a jah pet.
Jesuh Kutlamktung khana ami Taih
(Mt 27:32-44; Mk 15:21-32; Jn 19:17-27)
26Jesuh ami cehpüi k'um üng, Karenih khaw üngka Sihmon naki ngnamca üngka naw lawki ami hmu üng, man u lü Jesuha hnua kutlamktung ami kawh sak.
27A hnua läki hea khyang khawjah üng Jesuh kyahki hea nghnumi avang awmki he. 28Acun he Jesuh naw jah nghlat si lü, “Jerusalema canu he aw, kei am na kyah u lü nami mäta phäh la nami ca hea phäha kyap ua. 29“Isetiakyaküng, ‘cingkia nghnumi ta a jo sen ve, na am pawinakia pum la na naw am a awk khawia cih ta a jo sen ve’ ami tinaka mhmüp pha law khai. 30#Hos 10:8; Malam 6:16“Acunüng khawmcunga veia, ‘Jah sip lawa,’ khawngjung khawkawngea veia, ‘Jah mük lawa’ ti law khai he, 31“Thing xünga veia pi hinkba ami ti üng akhyawnga veia ta ikba kya khai aw?” a ti.
32Acunüng a veia khyangka nghngih ami jah hnim vaia ami jah cehpüi hnga. 33Acunüng luyuh hmün ami tinak ami pha law üng acuia a kpat lama mat, a k'eng lama mat, khyangka xawi am kutlamktung üng ami taih. 34Jesuh naw, “Ka Pa aw, jah mhläta; i ami pawh am ksing hei ve u,”#23:34“Ka Pa aw, jah mhläta; i ami pawh am ksingei ve u” tia Jesuha pyen avang üng am ami yuk si. a ti.
Acunüng, a suisak he cung kphawng u lü ami jah ngpaiei.
35 #
Sal 22:7
Khyang he naw ngdüi u lü ami tengei. Angvai he naw, “Khyang kce ta jah küikyan khawiki; Pamhnama a xü Mesijah kcang a ni üng amät pi ngküikyanei kyu se,” tia ami ksenak.
36 #
Sal 69:21
Yekap he naw pi yaiha ami pawh a veia capyit jukthui lawpüi u lü, peki he naw, 37“Judah hea sangpuxanga na kya kcang üng, namät la namät ngküikyanei kyua,” ami ti.
38Acunüng a lu khana, “Hin hin, Judah hea sangpuxang ni,” tia ami taih.
39Acunüng, khyangka mat, a peia ami taih naw pi, kse na lü, “Nang Mesijaha na kya üng, namät ngküikyanei kyu lü, keini pi jah küikyan lawa,” a ti.
40Cunsepi, akce mat naw a jüinak am msang lü, “Mhnam ye pi am na kyühki aw? Atänga mkhuimkhanak mi khamei hmaih ye se, 41ningni cun ni khamei kung khaia ni kyaki; ni katnaka phu däng ni hlawheiki ni; hin naw ia katnak am pawh naw,” a ti. 42“Jesuh aw, Sangpuxanga na law üng na sümeia,” a ti.
43Acunüng, Jesuh naw, “Tuhngawi Paradaia ka hlawnga na ve khaia ning khyütam na veng,” a ti.
Jesuh Thiki
(Mt 27:45-56; Mk 15:33-41; Jn 19:28-30)
44 #
Ex 26:31-33
Acun cun mhmüp naji xaleinghngiha kya lü, mülam naji kthum cäpa nghngi am vai lü avan üng khaw nghmüp lawki. 45Acunüng Temple üng jihnu, anglung üng nghngiha tek lawki. 46#Sal 31:5Acunüng, Jesuh naw angsanga, “Ka Pa aw, na kut üng ka ngmüimkhya ning pe veng,” a ti. Acun ti lü thiki.
47Acunüng, yekap ngvai naw acun a hmuh üng, “Hin hin akcanga khyang ngsungpyuna kya ve,” ti lü, Pamhnam mküimtoki.
48Khyang avan acun tengei khaia lawki he, acuna awm ihe ami jah hmu üng ami mkyang kbei u lü puksetnak am cit beki he. 49#Lk 8:2,3Acunüng, Kalile khaw üngka naw läk lawkia nghnumi he la Jesuh ksingki he avan, acun teng u lü, athuknaka ngdüiki he.
Jesuh ami K'ut
(Mt 27:57-61; Mk 15:42-47; Jn 19:38-42)
50Acunüng khyang mat Josep naki ngvainu, ngsungpyun lü dawki awmki. 51Ani cun Kawngci member kya lü pi ami pawhmsah ami bilawh he am jah ngaisimkia kyaki. Judah khaw, Arimahte khyanga kya lü, Pamhnama khaw a na ngak’uhei khawiki, 52Pilata veia cit lü Jesuha yawk a kthäh. 53Jesuha yawk khya lü jih am hlawpki naw, u pi am ami k'uhnak khawia, ng’uhnün üng a k'uh. 54Acunüng, acuna mhmüp cun kyawngkai amhmanaka kya lü Sabbath mhmüp pha law hlüki.
55Acunüng, Kalile khawa Jesuh läki nghnumi he cun Josep am atänga cit u lü, ng’uhnün la acunüng ikba Jesuha yawk ami tak cun tengki he. 56#Ex 20:10; Deut 5:14Acunkäna nghlat be u lü, ng’uinghname la, situie jah pyang u lü thum naw a pyena kba Sabbath mhmüp üng xüieiki he.
सध्या निवडलेले:
Luhka 23: DNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The New Testament in Dai © The Word for the World International and North East Centre for Training and Research, 2018.
