SAN LUCAS 24
24
1Axto'ok agko' axta elmeyákxo makham kelán'ák takhaxpop, cham'a eyeynókxa ekxega ekhem semanal'a, kelsákxók axta anhan ma'a sokmátsa eláneykxo axta. 2Xama axta elwákxo, axta kóteyágweykxak meteymog kélapma axta átog ma'a ekyetnakxa axta; 3kelántaxneyk axta kañe' takhaxpop, axta eyke kót'ak Jesús aphápak. 4Kelyegwakkek axta megkóteyágweykxo, axta kalya'ásegkok ektamhágkaxa, pelakkasek axta ekwet'a apchakneyncha'a apkánet énxet eyaknágkaxa xa kelán'ák nak, apkelyenma axta apkelnakta. 5Awanhok agko' axta elyegwakto, kelháxahanteyk axta ekwokmo eltekxeyágko nakta'a xóp; wánxa agkok, aptahak axta apkelpakhetchesa énxet se'e:
—¿Yaksak ektaha kélchetama kéxegke nepyeseksa énxet'ák apkeletsapma m'a énxet megyetsapma nak? 6Méko s'e. Apxátekhágwokmek xeyk. Kaxénwakxoho kélwáxok ma'a aptémakxa axta apkelanagkama kéxegke, cham'a aphakxa axta makham Galilea, 7apxeyenma axta peya kólmések aptaha nak Apketche énxet ma'a énxet'ák melya'asáxma nak, tén han ekmáheyo kólyepetchesek aksok ektegyéso, apxeyenmék axta anhan exátekhágwók antanxo ekhem.#Mt 16.21; 17.22-23; 20.18-19; Mr 8.31; 9.31; 10.33-34; Lc 9.22; 18.31-33.
8Keñe axta ekxeyenwákxoho awáxók ma'a ektémakxa axta appeywa Jesús. 9Keltennáseyha axta once Jesús apkeltámeséyak ekyókxoho ektahakxa axta ekweté, cham'a elenyekto axta takhaxpop, apyókxoho énxet axta anhan keltennáseyha. 10María Magdalena axta m'a eltennáseykxo axta Jesús apkeltámeséyak, Juana axta anhan, tén han ma'a María ektaha axta Santiago egken, tén han ma'a mók kelán'ák axta. 11Wánxa agkok, ektamhéyak ancha'awók axta eyke apkeneyk Jesús apkeltámeséyak xa ektahakxa axta eláneya, apkelya'ásekmek axta.
12Keñe axta apketchágkakxoho Pedro apmeyákxo m'a takhaxpop. Xama axta apteyanyágkoho kañe' takhaxpop, apáwa axta aksa apwet'ak. Apkenatchesek axta apwet'a ektahakxa, keñe axta apmeyákxo nátegma.
Emaús ámay
(Mr 16.12-13)
13Apkánet Jesús apkeltámeséyak axta apkelmeyákxak tegma apwányam Emaús, cham'a ekhem eyakhawo axta ektahakxa xa. Once kilómetros axta Emaús ma'a tegma apwányam Jerusalén. 14Axta apxénak neyseksa apkelxega ámay ma'a ekyókxoho ektahakxa axta. 15Neyseksa apkeltennéyak axta appaxakweykxo Jesús, keñe axta apkelyetlákxo. 16Apwet'ak axta eykhe, axta eyke kól'awok ékpelkohok.
17Aptahak axta apkelmaxneyeyncha'a Jesús se'e:
—¿Yaksak kélxéna kéxegke kéltennakmo nak ámay?
Apchaknágwokmek axta yetlo ellapwámeyak. 18Cleofas axta apwesey xama xa énxet'ák nak. Aptahak axta apchátegmowágko s'e:
—¿Xépya aksa apxakko' mey'ásegkok ektahakxa axta Jerusalén, neyseksa apha m'a?
19Aptahak axta apchátegmowágko Jesús se'e:
—¿Yaksak axta aksok elánéxko m'a?
Aptahak axta apcháneya s'e:
—Neykhe m'a kéltemésesakxa axta Jesús apkeñama nak Nazaret, aptaha axta Dios appeywa aplegaso, apxeyenma axta Dios apmopwána elának aksok, tén han ekha ekmowána appeywa, apyókxoho énxet'ák axta anhan apxeyenmak; 20keñe m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelmeykha nak apnámokkok, apmések axta pók énxet'ák apkeltamho emakpok yakwayam enxoho exénakpok ekpayhawo emátog, tén han kólyepetchesek aksok ektegyéso. 21Nelhaxanmeyk axta negko'o elwagkasek teyp énxet'ák Israel ma'a énxet nak, wánxa agkok, antanxo ekhem akke entahak kaxwo' ekteme xa ektaha nak. 22Ẽlyegwakkasek axta eykhe negko'o kelán'ák nelxegexma'a, hakte axto'ok agko' axta kelmeyákxak takhaxpop, 23Keltakháwok axta aksa nátegma, hakte axta kóteyágweykxak Jesús aphápak. Keltennáha axta anhan apxekmowáseykpoho Dios apkelásenneykha, tén han apkeltennasa exnek apxátekhágwokmo. 24Nápakha nelxegexma'a axta anhan apkelmeyákxak takhaxpop natámen xa, hawók axta ektahakxa apwetágweykekxa m'a ektahakxa axta eltenneykha kelán'ák, wánxa agkok, axta eyke ét'ak Jesús.
25Keñe axta aptaha apkeláneya Jesús se'e:
—Méko kélya'áseyak kéxegke, askehek nahan cha'a yakwayam megkólya'ásemek ma'a ekyókxoho ektémakxa axta apkeltenneykha énxet'ák apkellegaso axta Dios appeywa. 26Menyegkók enxeykel'a Mesías xa aksok nak amonye yakwayam etaxnegwakxak makham ma'a ekyetnamakxa nak Dios apcheymákpoho.
27Keñe axta apkeltennáseyncha'a Jesús énxet'ák ekyókxoho m'a ektémakxa axta weykcha'áhak eknaktáxésamaxche ekxeyenma Jesús, axta apchénawók ma'a weykcha'áhak Moisés axta apnaktáxeséyak, ekweykmoho m'a ekyókxoho apnaktáxeséyak axta énxet'ák ektaha axta Dios appeywa apkellegaso.
28Xama axta apkelwákxo énxet'ák ma'a apkelmeyákxexa axta, máxa axta aptahak Jesús apmoko enxoho eyeykhágwók ma'a. 29Wánxa agkok, apkeltamhok axta eyke énxet'ák exnekxak sekxo' ma'a. Aptahak axta apcháneya s'e:
—Exa sekxo' enxagkok, taxnakme', yaktések nahan.
Aptaxneyk axta Jesús kañe' apxagkok xa énxet'ák nak. 30Xama axta apheyncha'a nekha mésa, apmeyk axta pan Jesús, apmések axta ekxeyenma apwáxok Dios, keñe axta apyepta nepyeseksa, apkelmeyásegkek axta anhan xa énxet'ák nak. 31Yetlókók axta anhan apkelyekpelchágwayam aptaha Jesús, wánxa agkok, apmassék axta eyke Jesús nepyeseksa. 32Aptahak axta apkelpakmeta s'e:
—Neyke eyátso exchek neghaxnó sẽltennáseykha segyetlókmo exchek ámay, ẽltennáseyha exchek ma'a ektémakxa nak eknaktáxésamaxche.
33Apkelpekheyáseyha axta apkelxega apkeltakháwo m'a tegma apwányam Jerusalén, axta apkelwetágweykxak apchaknákxo once Jesús apkeltámeséyak ma'a, tén han ma'a apkelxegexma'a axta. 34Entahak axta amya'a apkeláneyákpo apkánet énxet se'e:
—Nakso' neyke agkok apxátekhágwokmo Wese' egegkok, apxekmowásekpók axta anhan Simón.
35Keñe axta anhan apkeltennáseyncha'a apnámokkok ektahakxa axta apweté náxet ámay xa apkánet nak, tén han ma'a apyekpelchágwokmo axta Jesús, cham'a apyepta axta pan.
Jesús apxekmowásamákpekxoho apkeltámeséyak
(Mt 28.16-20; Mr 16.14-18; Jn 20.19-23)
36Neyseksa apkeltenneykha axta makham énxet'ák, cham'a apkenegwákxo axta makham Jesús nepyeseksa. Aptahak axta apkeláneya apkelpeykásegko s'e:
—Meyke ektahakxa kélwáxok sat katnehek kéxegke.
37Apkelyegwakkek axta xa énxet'ák nak, kélhagák axta apkeneyk ét'ak. 38Wánxa agkok, aptahak axta apkeláneya Jesús se'e:
¿Yaksak ektaha kélyegwe nak? ¿Yaksak ektaha ekya'ásekmo nak kélwáxok? 39Kóllano emék tén han emagkok. Ko'o s'e. Helpaknegwoho, hellano nahan: méko ápetek ma'a kélhagák, méko nahan axchakkok, keñe kéxegke kélwet'a ekyetna ko'o ekyókxoho xa.
40Xama axta aptaha appeywa xa, apxekmósek axta apmék tén han apmagkok. 41Wánxa agkok, makhemek axta eyke apkelya'áseyam xa énxet'ák nak, eñama m'a elpayheykekxa axta apwáxók, tén han eñama m'a ekpelakkaso axta apkelweté. Aptahak axta apkelmaxneyeyncha'a Jesús se'e:
—¿Yetneya nento, atwok sat ko'o?
42Kélmések axta nekha kelasma kélyakxakxo, 43apmeyk axta anhan Jesús xa kelasma nak, aptókek axta nahan nápakta'awo' xa énxet'ák nak. 44Keñe axta aptaha apkeláneya s'e:
—Cha'a etnahak ko'o m'a sektémakxa axta seltennáseykha kéxegke sekhamakxa axta makham kélnepyeseksa: eltennasegkek axta cha'a kéxegke ekmáheyo kasawhaxkohok katnehek ma'a ekyókxoho ektémakxa nak eknaktáxésamaxche Moisés segánamakxa apagkok sexeyenma ko'o, tén han ma'a eknaktáxésamaxko axta énxet'ák Dios appeywa apkellegaso weykcha'áhak apagkok, tén han ma'a eknaktáxésamaxko nak Salmos.
45Apkelya'asásegwokmek axta Jesús ektémakxa eknaktáxésamaxche Dios appeywa xa énxet'ák nak. 46Aptahak axta apkeláneya s'e:
—Xeyenmék eknaktáxésamaxche ekmáheyo yetsapok Mesías, tén han ekxeyenma ekmáheyo exátekhágwók antanxo ekhem; 47kóltennaha sat ekyókxoho yókxexma amya'a eñama nak Mesías, Jerusalén sat kólénhok sekxo', yakwayam enxoho elyakmagkasek apwáxók énxet'ák, yakwayam enxoho megkólyakmagkásekxék ma'a apkeltémakxa nak melya'asáxma. 48Kéxegke ektaha kélweteykegkoho xa. 49Wáphásesek sat kéxegke m'a apxeyenma axta egkések kéxegke Táta.#Hch 1.4. Kólhakha sat kéxegke s'e tegma apwányam Jerusalén ekwokmoho kélxaka kélmowána eñama nak néten.
Jesús apmeyeykekxa néten
(Mr 16.19-20)
50Apnaklókek axta Jesús nepyáwa tegma apwányam xa énxet'ák nak ekweykmoho m'a Betania. Apkelya'ásek axta néten apmék apkelmaxnésesa aksok eltakmela eleñama néten. 51Neyseksa apkelmaxnéseso aksok eltakmela eleñama néten axta apkexaya aksa Jesús xa énxet'ák nak, kélya'áseykxeyk axta néten.#Hch 1.9-11. 52Apkeltakháwok axta tegma apwányam Jerusalén yetlo elpayheykekxa apwáxók xa énxet'ák nak, cham'a natámen axta apkelpeykesamo Jesús. 53Elántaxnegwakxohok axta cha'a kañe' tegma appagkanamap eltemésesek apcheymákpoho Dios.
सध्या निवडलेले:
SAN LUCAS 24: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
