SAN LUCAS 20
20
Jesús apxawé apmopwána elának aksok
(Mt 21.23-27; Mr 11.27-33)
1Xama ekhem axta apkelwokmok énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa, axta anhan apkelxegexma'a m'a apkelámha apmonye'e nak kélakneykekxexa, cham'a, neyseksa apkelxekmóso axta Jesús énxet'ák kañe' tegma appagkanamap, apkeltennáseyha axta anhan ma'a amya'a segwagkasamo nak teyp. 2Entahak axta amya'a apcháneyákpo Jesús se'e:
—¿Yaksak eyásenneykha exchep eltémo elának xa aksok nak? ¿Yaksak ekméso apmopwána?
3Aptahak axta apchátegmowágko Jesús se'e:
—Peyk ko'o xa almaxneyha kéxegkáxa. Helátegmowak sat: 4¿Yaksak axta eyáphaso Juan yakwayam eyakpásesagkok yegmen énxet? ¿Diosya axta apcháphaso, énxet enxoho axta eykel'a?
5Aptahak axta apkelpakhetcháseykpoho s'e: “Nentemék agkok negátegmowágko Dios apcháphaso, keñe sat etnehek hegána': ‘¿Yaksak axta ektéma kélya'asékmo apkeltenneykha?’ 6Magwanchek nahan anxének ektaha énxet apcháphaso, hakte meteymog hẽlyetnak hennápok énxet'ák, hakte apyókxoho énxet'ák axta melya'áseykmok apkelteneykencha'a Juan ekmámnaksoho m'a amya'a eñama nak Dios.” 7Keñe axta apkelátegmowágko apxéna melya'ásegko eyáphaso Juan yakwayam eyakpásesagkok yegmen énxet. 8Keñe axta aptaha anhan apchátegmowágko Jesús se'e:
—Maltennaksek nahan ko'o xa eñamakxa sekmowána alának xa.
Jesús apyetcháseykekxoho énxet'ák elmasagcha'a apkeltémakxa apkeltamheykha
(Mt 21.33-44; Mr 12.1-11)
9Apchénawók axta apkeltennáseykha Jesús énxet'ák, aptahak axta apkeltenneykha apyetcháseykekxoho s'e: “Apkenákxeyk axta anmen yámet ekxámokma xama énxet,#Is 5.1. apmasáseyha axta nápakha énxet'ák ekha apkeltamheykha m'a xóp apkenákxexa axta anmen yámet, keñe axta apxegama makhawók agko'. 10Xama axta ekwokmo eknakxamáxchexa ekyexna anmen yámet, apcháphásek axta xama apchásenneykha yakwayam elmaxnak ektaha axta apkeltamheykha namyep ma'a ekyexna ektahakxa axta apagkok; wánxa agkok, apchakháha axta eyke, apchápháseykxeyk axta aksa anhan meyke aksok apseykekxa. 11Keñe axta apchápháseykxo makham pók apkeláneykha m'a wese' nak; kélwanyeyha axta eyke anhan ma'a, kélakháha axta anhan, kéláphásekxeyk axta aksa anhan meyke aksok apseykekxa m'a. 12Apchápháseykxeyk axta makham pók, apyensásek axta eyke anhan énxet'ák apkeltamheykha xa, kéltekkesek axta anhan.
13“Aptahak axta appakmeta wese' ektaha apagkok xóp se'e: ‘¿Háxko enxoho atnehek kaxwo'? Wáphaksek sat hatte seyásekhayókxa nak; lapmaxchek sat yeykpok.’ 14Xama axta apwet'a énxet'ák ektaha apkeltamheykha xa, aptahak axta apkelpakhetcháseykpoho s'e: ‘Cháxa peya nak exkekxak xóp xa; agakhek, yakwayam enxoho katnekxak egagkok se'e xóp nak.’ 15Kéltekkesek axta neyseksa kélcheneykekxexa anmen yámet xa, teyp namyep axta anhan apmátegwokmok.
“¿Háxko ektahakxa ekxeyenma kélwáxok kéxegke yakwánxa etnésesek ektaha apagkok kélcheneykekxexa anmen yámet xa énxet'ák nak? 16Ey'ótak sat ennahapwatak xa énxet'ák apkeltamheykha. Pók énxet'ák sat nahan egkeyásekxak xa kélcheneykekxexa nak anmen yámet.”
Xama axta apkelleg'a énxet'ák xa, aptahak axta apkelpakmeta s'e:
—¡Megkatnehek xa!
17Apkelanawók axta Jesús xa énxet'ák nak. Aptahak axta apkeláneya s'e:
—¿Yaksak eyke ekxeyenma ektéma nak eknaktáxésamaxche s'e?:
‘Tamhákxeyk kaxwo' meteymog
kélmamenyého kólmaha m'a
meteymog apyamasma axta énxet'ák
apkeláneyak nak tegma.’#Sal 118.22.
18Kélyaknenchek sat agkok kéxegke kélahapwakto xa meteymog nak, kólekkexaxkohok sat; cháhapwakteyk agkok nahan kélxama kéxegke xa meteymog nak, kóltepelchaxkohok sat.
19Apmokók axta eykhe emok Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa, hakte apkelya'ásegkok axta énxet'ák apkelxénákpo m'a aptahakxa axta apyetcháseykekxoho Jesús. Enxet'ák axta eyke apkelakak.
Amya'a ekxénamaxche selyakye elmomaxche
(Mt 22.15-22; Mr 12.13-17)
20Kéláphásek axta énxet'ák apteyánegweykmoho ektahakxa, máxa meyke apkeltémakxa axta aptamhágkok, yakwayam etekkesesek aksa appeywa Jesús yakwayam esexnena', keñe egkések ma'a wese' apchásenneykha apkeláneykha yókxexma nak. 21Aptahak axta apkelmaxneyeyncha'a s'e:
—Sẽlxekmóso, negya'ásegkok negko'o ektéma cha'a ekmámnaksoho aksok apxeyenma exchep, tén han ma'a ektémakxa nak apkelxekmóso, hakte metnék cha'a exchep apyekpelchémo ektémakxa nak ekha kéláyo énxet. Ekmámnaksoho exchep apkelxekmóso énxet'ák ma'a apkeltémókxa nak antehek Dios. 22¿Táseya agmések selyakye wese' Roma, asagkek enxeykel'a?
23Apyekpelchawók axta Jesús aptamhágko apkelmaxneyeykha yetlo ekmaso elchetamso apwáxók xa. Aptahak axta apkeláneya s'e:
24—Helxekmos ko'o xama sawo selyakye. ¿Yaksak nát so, yaksak nahan énxet apwesey so kéltáxéso nak?
Aptahak axta apkelátegmowágko s'e:
—Wese' Roma.
25Aptahak axta apkeláneya Jesús se'e:
—Kólmés wese' Roma m'a ektaha nak apagkok, kólmés nahan Dios ma'a ektaha nak apagkok.
26Axta ét'ak yakwánxa etnehek esexnenak Jesús xa énxet'ák nak, cham'a ekyókxoho aptahakxa axta appeywa nápakta'awo' énxet'ák. Pelakkasek axta apkelleg'a xa ektahakxa axta apchátegmowéyak Jesús, apkelwanmeyágkek axta aksa anhan.
Jesús kélmaxneyeykha ektémakxa nennakxétekhágwayam
(Mt 22.23-33; Mr 12.18-27)
27Apkelxegkek axta nápakha saduceos apkelmahágko aphakxa Jesús natámen xa. Exénhok cha'a énxet'ák saduceos méko m'a nennakxétekhágwayam nak,#Hch 23.8. ékeso eñamakxa aptaha axta apkelmaxneyeyncha'a Jesús se'e:
28—Sẽlxekmóso, empekkencháseykekxeyk axta negko'o weykcha'áhak aptáxéso Moisés, apketsekkek agkok xama énxet ekha aptáwa, megkóteya enxoho makham étche m'a aptáwa, keñe apyáxeg emekxak m'a apepma' axta aptáwa, yakwayam enxoho étaksek apketchek m'a apepma' axta.#Dt 25.5. 29Apheykha axta siete apyókxoho énxet aptaha axta apkelyáxeg xamo', kelyamhopmeyk axta m'a aptaha axta metnaha apketkok, apketsekkek axta eyke yetlo meté apketche. 30Keñe axta pók, 31tén han ma'a aptahakxa axta apkántanxo aptéma aptáwa xa kelán'a nak, hawók axta anhan aptamhágkaxa m'a apyókxoho nak, apsawhomákpók axta eyke apkeletsapma yetlo meyke apketchek xa siete nak. 32Keñe axta étsapa nahan axayok ma'a kelán'a nak. 33Wokmek sat agkok nennakxétekhágwayam, ¿yaksak sat katnehek atáwa nepyeseksa siete xa kelán'a nak?
34Aptahak axta apchátegmowágko Jesús se'e:
—Kelyamhápeykegkek énxet keso náxop, tén han kelán'ák; 35énxet'ák ekpayhawo nak elántexek ma'a axnagkok negókxa nak, cham'a ekpayhawo nak han enakxétekhágwók, kamaskok sat elyamhápegko énxet tén han kelán'ák, 36kamaskok sat apkeletsapa, hakte exnágwakxohok sat Dios apkelásenneykha, Dios apketchek sat nahan etnahagkok eñama m'a apnakxétekhágwayam. 37Egya'asásegweykmek nahan negko'oxa Moisés apnakxétekhágweykmo cha'a m'a énxet'ák apkeletsapma axta, eñama m'a amya'a ekxeyenma nak eyálewoma axta yámet ekweseyl'a yásek, cháxa ekxeyenma nak Wese' egegkok aptaha Abraham Dios apagkok, tén han ma'a Isaac, tén han ma'a Jacob.#Ex 3.6. 38Háwe énxet'ák apkeletsapma Dios apagkok ma'a Dios, wánxa Dios apagkok ma'a énxet'ák meletsapma nak, hakte máxa entemék meletsapma enxoho énxet nápakto' Dios.
39Nápakha apkelxekmóso apnámokkok ektémakxa segánamakxa axta aptahak apcháneya Jesús se'e:
—Sẽlxekmóso, tásek apchátegmowéyak.
40Massék axta anhan apmoko elmaxneyekxohok cha'a hakte kelnawágwokmek axta.
¿Yaksak apyepmeyk nano' Mesías?
(Mt 22.41-46; Mr 12.35-37)
41Aptahak axta apkelmaxneyeyncha'a Jesús se'e:
—¿Yaksak ektéma apkelxeyenma nak énxet'ák Mesías aptaha David aptáwen neptámen? 42Hakte David apagko' axta anhan aptemék appeywa s'e, cham'a ekyetnama nak ma'a eknaktáxésamaxchexa nak Salmos:
‘Aptahak axta Wese' Dios appakhetchesa
Wese' ahagkok Mesías se'e:
Exa ekpayhókxa nak selya'asamakxa,
43ekwokmoho seknegkenchesa kóneg apmagkok
ekyókxoho apkelenmexma nak.’#Sal 110.1.
44¿Háxko katnehek etnehek Mesías David aptáwen neptámen, apkeltéma enxoho David Wese' apagkok ma'a Mesías?
Jesús apxeyenma nápakta'awo' apkeltémakxa m'a énxet'ák apkelxekmóso nak apnámokkok ektémakxa segánamakxa
(Mt 23.1-36; Mr 12.38-40; Lc 11.37-54)
45Apyókxoho énxet axta aphaxnók apkeltenneykha Jesús. Aptahak axta apkeláneya apkeltámeséyak se'e: 46“Kólawho kéxegke énxet'ák apkelxekmóso nak apnámokkok ektémakxa nak segánamakxa, hakte atsek emawhok elweynchamha yetlo apkelántaxno apkelwenakte, atsek nahan cha'a yának kólpeykesek yetlo kéláyo m'a apheykegkaxal'a énxet. Etegyagkok nahan cha'a eltakmela apkeltaháno m'a kañe' apchakneykekxexa énxet'ák judíos, tén han yepmenyéhok katakmelhok ma'a apteykegkaxa nak aptéyak; 47elyementók nahan cha'a axanák ma'a kelán'ák tampe' nak, ahóxek nahan cha'a katnehek aptamhéyak nempeywa nelmaxnagko yakwayam ekpósek xa apkeltémakxa nak. Awanhek sat katnehek kéllegasáseykegkoho xa énxet'ák nak.”
सध्या निवडलेले:
SAN LUCAS 20: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
