SAN JUAN 21
21
Jesús apxekmowásamákpekxoho siete apkeltámeséyak
1Apxekmowáseykpók axta makham Jesús apkeltámeséyak neyáwa ekpayhegwayam Tiberias natámen ekteme xa. Keso ektahakxa axta apxekmowásamákpekxoho Jesús se'e: 2Apháha axta Jesús apkeltámeséyak ma'a: Simón Pedro, Tomás, apkeltamhomakpo axta Apkánet Appalleykmoho, Natanael axta anhan aphak ma'a, aptaha axta apkeñama Caná yókxexma Galilea, axta anhan ma'a ektaha axta Zebedeo apketchek, apháha axta anhan ma'a apkánet ektaha axta Jesús apkeltámeséyak. 3Aptahak axta Simón Pedro apkeláneya apkelxegexma'a s'e:
—Kelasma sat ko'o ategye'.
Aptahak axta apkelátegmowágko apkelxegexma'a s'e:
—Negko'o sat nahan antehek nenxegexma exchep.
Apkelxegkek axta, apkelchenátwokmek axta yántakpayhe. Axta eyke yakhak kelasma xama enxoho, cham'a aptegyágko axta axta'a kelasma.#Lc 5.5. 4Xama axta peya kalséxma, keñe axta apwetákpo aksa Jesús apkenmeyncha'a neyáwa, axta eyke ékpelchak apkeltámeséyak. 5Aptahak axta apkelmaxneyeyncha'a Jesús se'e:
—Wokma'ák, ¿yagkólakhak kelasma?
—Méko, axta aptahak apkelátegmowágko.
6Aptahak axta Jesús apkeláneya s'e:
—Kólyenyenta' yám'én kélagkok nekha yántakpayhe ekpayhókxa nak nelya'asamakxa, kólmok sat kelasma.
—Aptamhágkek axta anhan xa, keñe axta megkapwagko apleyákxo yám'én apagkok, hakte lanawók axta kelasma yám'én.#Lc 5.6. 7Xama Jesús apkeltámeso axta appakhetchásak Pedro cham'a ektaha axta apchásekhayókxa Jesús. Aptahak axta apcháneya s'e:
—¡Wese' egagkok nak xa!
Aplegók axta aksa Simón Pedro aptaha Wese' egagkok ma'a, apkelántaxneykxeyk axta apkelnakta, hakte meyke apáwa axta aphak, apnextegkek axta anhan neygmen. 8Apkelwákxeyk axta anhan neyáwa m'a nápakha apkeltámeséyak yetlo apkelchánte yántakpayhe. Apyenyawásegkakxek axta yám'én ekláneyo kelasma kañe', hakte keto' axta neyáwa m'a. 9Xama axta apkelántepa yókxexma, apwet'ak axta kélwatno táxa yetlo kélpekkenma kelasma nátex, apwet'ak axta anhan xama pan apyetna m'a. 10Aptahak axta apkeláneya Jesús se'e:
—Kólsanta nekha kelasma kaxwé kélnapma exchek.
11Apkenátweykxeyk axta Simón Pedro yántakpayhe, apyenyawásegkakxeyk axta yám'én neyáwa yetlo ekláneyo kelasma elyawe m'a kañe', ciento cincuenta y tres axta ekyókxoho. Xámok axta eykhe kelasma, axta eyke kalyeptéxchek yám'én. 12Aptahak axta Jesús apkeláneya s'e:
—Kólchempoho, kóltaswata'.
Kelnókek axta etnehek apkelmaxneyeykha apkeltámeséyak se'e: ‘¿Yaksak énxet xép?’, hakte apya'ásegkok axta aptaha Wese' egegkok. 13Apyepetchegwokmók axta Jesús apkeltámeséyak, apmeyk axta pan, keñe axta apkelmeyásegko apkeltámeséyak; hawók axta anhan aptemésesakxa m'a kelasma.
14Cháxa ektahakxa axta antanxo apxekmowásamákpekxoho Jesús apkeltámeséyak natámen apxátekhágwayam xa.
Jesús appakhetcheso Simón Pedro
15Apsawhégkek axta aptéyak, aptahak axta Jesús apkelmaxneyeyncha'a Simón Pedro s'e:
—Simón, Juan apketche, ¿Awanheya exchep seyásekhayo yagkaxnawok ma'a ekwánxa nak apkelásekhayo apnámokkok?
Aptahak axta apchátegmowágko Pedro s'e:
—Wese', apya'ásegkok xép seyásekhayo ko'o.
—Aptahak axta apcháneya Jesús se'e:
—Eltakmelches seknaktóso nekkések apketkók.
16Aptahak axta makham Jesús apkelmaxneyeyncha'a Pedro s'e:
—Simón, Juan apketche, ¿eyásekhayoya exchep?
Aptahak axta apchátegmowágko Pedro s'e:
—Wese', apya'ásegkok xép seyásekhayo.
Aptahak axta makham Jesús apcháneya s'e:
—Eltakmelches seknaktóso nekkések.
17Antanxo apkelmaxneyeykekxa axta entahak. Aptahak axta makham se'e:
—Simón, Juan apketche, ¿eyásekhayoya exchep?
Kelapwokmek axta Pedro hakte antanxo axta entahak apkelmaxneyeykekxoho nakso' kexaha apchásekhayo. Aptahak axta apchátegmowágko Pedro s'e:
—Wese', apya'ásegkok xép xa ekyókxoho nak: apya'ásegkok xép seyásekhayo ko'o.
Aptahak axta apcháneya Jesús se'e:
—Eltakmelches seknaktóso nekkések. 18Etaxnekxak axta cha'a exchep aptaxno yakwayam emhagkok apmokókxa enxoho emhagkok, cham'a aptémakxa axta apketkok; wánxa agkok, apwanakmek sat agkok, elpékesek sat xép apaktegák, keñe sat pók énxet etaxneyásekxa aptaxno, ey'aksek sat ma'a memokókxa enxoho emhagkok xép. Nakso' xa sektahakxa nak seyáneya exchep.
19Xama axta aptaha appeywa Jesús xa, apya'asásegwokmek axta yakwánxa katnehek apketsapma Pedro, yakwayam enxoho exekmósek ektémakxa nak aptakmalma Dios eñama xa yakwánxa nak katnehek apketsapma Pedro. Keñe axta aptaha apcháneya s'e:
—¡Hétlawha!
Jesús apkeltámeso ektaha axta apchásekhayókxa
20Xama axta appeynchakpoho Pedro, apwet'ak axta apxegakmo Jesús apkeltámeso ektaha axta apchásekhayókxa, cham'a apyepetcha'awo axta Jesús neyseksa aptéyak, cham'a aptaha axta anhan apkelmaxneyeyncha'a s'e: “Wese', ¿yaksak m'a peya nak etlakkasesek yának emakpok xép?”#Jn 13.25. 21Xama axta apwet'a Pedro m'a, aptahak axta apkelmaxneyeyncha'a Jesús se'e:
—Wese', ¿háxko sat katnehek xa énxet nak?
22Aptahak axta apchátegmowágko Jesús se'e:
—Emenyék agkok ko'o elenxanmohok makham apha xa énxet nak ekwokmoho sekwakto makham ko'o, ¿yaksak ektaha apkeltamho nak ey'asagkohok? Hetlawha exchep.
23Ekeso eñamakxa ekpayhekxo axta amya'a nepyeseksa énxet'ák eyánemaxko megyetsepek ma'a énxet nak. Axta eyke exénak Jesús peya megyetsepe', axta eyke aptahak appeywa s'e: “Emenyék agkok ko'o elenxanmohok makham apha xa énxet nak ekwokmoho sekwakto makham ko'o, ¿yaksak ektaha apkeltamho nak ey'asagkoho?”
24Cháxa Jesús apkeltámeso ektaha axta apxeyenma xa, ektaha axta anhan apchásekhayókxa Jesús, axta nahan aptáxéso m'a. Negya'ásegkok negko'o ektaha ekmámnaksoho aksok apxeyenma.
25Xámok axta nahan mók aksok apkelané Jesús, kélsawhawók axta agkok kélnaktáxesagko weykcha'áhak ekyókxoho aksok apkelané Jesús, méko axta katnehek ekhágkaxa weykcha'áhak kélnaktáxeseyak keso náxop.
सध्या निवडलेले:
SAN JUAN 21: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
