SAN JUAN 19
19
1Apkeltamhok axta Pilato kólakheykha Jesús. 2Apkelanak axta sẽlpextétamo kélteté kélpátek am'ák, appekkenchesek axta apkátek Jesús, kéltaxneyásekxeyk axta nahan Jesús apáwa hómáyok. 3Keñe axta apkelyepetchegwokmoho sẽlpextétamo, aptahak axta apcháneya s'e:
—¡Etnehek sat cha'a exchep judíos Wese' apwányam apagkok! kéltekpagkasek axta nahan cha'a nápát Jesús.
4Aptekkek axta makham yókxexma Pilato, aptahak axta apkeláneya énxet'ák se'e:
—Kóllano, ekyentamanteyk ko'o s'e yakwayam enxoho kólya'asagkohok mót'a ko'o ekmaso aptémakxa s'e énxet nak.
5Aptekkek axta yókxexma Jesús yetlo kéltetcheso apkátek am'ák, tén han yetlo aptaxneykekxa m'a apáwa hómáyok axta. Aptahak axta Pilato s'e:
—¡Keso énxet se'e!
6Xama axta apwet'a m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a ektaha axta aptakmelcheso tegma appagkanamap, aptahak axta apkelyennaktésawo apkelpeywa s'e:
—¡Epetches aksok ektegyéso, épetches aksok ektegyéso!
Aptahak axta Pilato apkeláneya énxet'ák se'e:
—Kólyentemekxa kólyepetches kéxegke aksok ektegyéso, hakte mót'ak ko'o ekmaso aptémakxa s'e énxet nak.
7Aptahak axta apkelátegmowágko énxet'ák judíos se'e:
—Yetneyk negko'o segánamakxa egagkok ekxeyenma eyéméxko yetsapok xa, hakte apheyásamákpók apagko' Dios Apketche.
8Xama axta apleg'a Pilato xa, yágwokmok axta makham apkeye. 9Aptaxnekxeyk axta makham kañe' apxagkok Pilato. Aptahak axta makham apkelmaxneyeyncha'a Jesús se'e:
—¿Háxko apkeñamakxa exchep?
Wánxa agkok, axta eyke yátegmowagkok Jesús. 10Aptahak axta Pilato apcháneya Jesús se'e:
—¿Ya emokók heyátegmowagkok? ¿Ya ey'ásegkok sepayhawo ko'o wának kólyepetchesek aksok ektegyéso tén han sepayhawo eynyekxak xép?
11Aptahak axta apchátegmowágko Jesús se'e:
—Axta agkok egkeyásak xép Dios apmopwána hetnésesek ko'o xa, mopwanchek axta exchep hetnésesek apmokókxa enxoho hetnésesek; ékeso eñamakxa ekyawa nak mey'asáxma m'a aptaha axta apkenagko amaxchek ko'o, megkaxnawok mey'asáxma exchep.
12Keñe axta apkelenxanakmo étak Pilato yakwánxa etnehek ényekxak Jesús; wánxa agkok, aptahak axta apkelyennaktésawo apkelpeywa judíos se'e:
—Apyenyekxeyk agkok xép xa énxet nak, metnehek apchásekhayókxa m'a César aptaha nak wese' apwányam Roma. Enxet ektahakxa enxoho apkeltemesásamap wese' apwányam, apkenmexma etnehek ma'a wese' Roma.
13Xama axta apleg'a Pilato xa apkeltamhok axta kóltekkesek Jesús, keñe axta apha Pilato m'a sẽlyekpelchémókxa apkeltémakxa axta hebreos Gabatá, nentéma nak nempeywa kélnegkeneykegkaxa meteymog. 14Amonye ekhem melwagkayam judíos axta m'a, kéltéma axta Pascua, yetseksókhem axta entahak. Aptahak axta Pilato apkeláneya judíos se'e:
—¡Keso wese' kélagkok se'e!
15Wánxa agkok, aptahak axta apkelyennaktésawo apkelpeywa judíos se'e:
—¡Yána emátog! ¡Epetches aksok ektegyéso!
Aptahak axta apkelmaxneyeyncha'a Pilato s'e:
—¿Eypetcheseya ko'o aksok ektegyéso wese' kélagkok?
Aptahak axta apkelátegmowágko apkelámha apmonye'e appasmo apkelmaxnéseso Dios énxet'ák apagkok se'e:
—Méko negko'o pók wese' apwányam egagkok, wánxa m'a César, aptaha nak wese' apwányam egagkok.
16Keñe axta apmésa Pilato énxet'ák ma'a Jesús yakwayam épetchesek aksok ektegyéso.
Jesús kélyepetcheso aksok ektegyéso
(Mt 27.32-44; Mr 15.21-32; Lc 23.26-43)
17Apxegkek axta Jesús appatma aksok ektegyéso, yakwayam emhagkok ma'a yókxexma kéltéma axta “Kélpátek Axchapok” (apkeltémakxa nak hebreos Gólgota). 18Kélyepetchesekmek axta aksok ektegyéso Jesús ma'a yetlo apkánet énxet, xama axta apkelya'asamakxa, keñe axta pók nepsagkalwa, keñe axta Jesús neyseksa. 19Aptáxések axta Pilato ektéma nak se'e: “Jesús apkeñama Nazaret judíos Wese' apwányam apagkok.” Apkeltamhok axta kólpekkenek néten aksok ektegyéso. 20Apxámok axta judíos apkelyetseta xa kéltáxéso nak, hakte keto' axta tegma apwányam kélyepetchesakxa axta aksok ektegyéso Jesús, hebreo appeywa axta kéltáxéso, tén han ma'a latín ektaha axta romano apkelpeywa, tén han ma'a griego appeywa nak. 21Ekeso eñamakxa apkelpakmeta axta énxet'ák judíos apteme axta apkelámha apmonye'e appasmo apkelmaxnéseso Dios énxet'ák apagkok. Aptahak axta apcháneya Pilato s'e:
—Na etne aptáxéso: ‘Judíos Wese' apwányam apagkok’, etne aptáxéso s'e: ‘Apkeltemesásamap judíos Wese' apwányam apagkok’.
22Aptahak axta apchátegmowágko Pilato s'e:
—Mayakmagkasemek xa sektahakxa nak sektáxéso.
23Apkelmákxeyk axta Jesús apkelántaxno sẽlpextétamo natámen apyepetcheso aksok ektegyéso, hawók nápakha axta aptahak apkelyápetchásamap, xama nápakha axta cha'a apmákxak pók. Apmeyk axta anhan ma'a apáwa apwenakte axta, meyke kélyetnakte axta eyke m'a, napwa'ék axta aksa kélyetnakte. 24Ekeso eñamakxa aptaha axta apkelpakhetcháseykpoho sẽlpextétamo s'e:
—Mólyeptek sat, antawaksek sat xama aksok, ekwatnakxa sat kamok.
Cháxa ektahakxa axta ektaha m'a ektémakxa nak eknaktáxésamaxche weykcha'áhak se'e: “Apkelyapetcháseykpek selnakta, keñe aptawásegko xama aksok yakwayam emok apáwa apwenakte m'a ektahakxa enxoho apchakhémo.”#Sal 22.18. Cháxa apkelánegko axta sẽlpextétamo xa.
25Kenmáha axta egken Jesús ma'a nekha apyexnakxa axta aksok ektegyéso, axta anhan ma'a Jesús egken yáxeg, María axta anhan ma'a, ektaha axta Cleofás aptáwa, María Magdalena axta anhan kenmáha m'a. 26Xama axta apwet'a Jesús egken enmeyncha'a xamo' ma'a apkeltámeso ektaha axta apchásekhayókxa, aptahak axta apcháneya egken se'e:
—Cháxa étche xa.
27Keñe axta anhan aptaha Jesús apcháneya apkeltámeso s'e:
—Cháxa egken xa.
Axta kenyamhok apyentamákxo apxagkok Jesús apkeltámeso m'a María.
Jesús apketsapma
(Mt 27.45-56; Mr 15.33-41; Lc 23.44-49)
28Apya'ásegkok axta Jesús ekpenchásexko elánamáxche xa, yakwayam enxoho katnehek ma'a ektémakxa axta eknaktáxésamaxche weykcha'áhak,#Sal 69.21. aptahak axta appakmétencha'a s'e:
—Hem eyakhak ko'o.
29Yetneyk axta xama egheykok ekláneyo anmen ekmanyása m'a. Kélyásesek axta anmen ekmanyása xama ekhól'a sogweygke kélleklo apwáxok, xama yámet axta kéltétak naw'a m'a, keñe axta kélya'ásesa apátog Jesús. 30Apyenchek axta Jesús xa anmen ekmanyása nak, aptahak axta appakmétencha'a s'e:
—Penchásexchek elánamáxche.
Keñe axta ekwéweynto apkátek apketsapa.
Kélyetxakkaso nápakha Jesús
31Keto' axta ekhem melwagkayam axta judíos ma'a, kéltéma axta Pascua, mopmenyék axta judíos kalyetlósamha aksa kélhapák néten aksok ektegyéso ekhem nellókasamakxa nelyampé, hakte awanhók agko' axta kéláyo m'a ekhem nak. Ekeso eñamakxa kéltamho axta Pilato yának kólekkexchesek apyay'ák ma'a ektaha axta kélyepetcheso aksok ektegyéso tén han yának kólhexyawasagkok ma'a kélhapák. 32Apkelxegkek axta sẽlpextétamo apkelekkexchesek axta apyay'ák apyexno apmonye, keñe axta anhan apkelekkexchesa apyay'ák ma'a pók, ektaha axta kélyepetchesamo xamo' aksok ektegyéso Jesús. 33Xama axta apkelyepetchegwokmoho nahan Jesús xa sẽlpextétamo nak, apwet'ak axta apketsapa. Ekeso eñamakxa megkólekkexchesa axta apyay'ák Jesús.
34Xama sẽlpextétamo axta eyke apkelyetxakkásak nápakha sawhéwa Jesús, ñohok axta ektepa éma tén han yegmen. 35Cháxa énxet ektaha axta apweteykegkoho xa, ektaha nak han apxeyenma xa, ekmámnaksoho nahan apxeyenma; apya'ásegkok nahan aptéma ekmámnaksoho appeywa, yakwayam enxoho kóltehek kéxegkáxa megkólya'áseyam. 36Temék axta ekyókxoho xa ektaha nak, yakwayam enxoho kasawhaxkohok katnehek ektémakxa nak eknaktáxésamaxche s'e: “Megkólekkexchesek sat apexchakkok xama enxoho.”#Ex 12.46; Nm 9.12; Sal 34.20; 1 Co 5.7. 37Keñe anhan mók eknaktáxésamaxche ektéma s'e: “Elanok sat ma'a énxet'ák ektaha axta apkelyetxakxo.”#Zac 12.10; Ap 1.7.
Jesús kélatawanya
(Mt 27.57-61; Mr 15.42-47; Lc 23.50-56)
38Apkelmaxnegwokmek axta José Pilato, yakwayam eswok Jesús aphápak natámen ekteme xa, cham'a José aptaha axta apkeñama Arimatea. José axta apteme apyetleykekxa aptémakxa Jesús, apyexamakpoho axta eyke, hakte judíos axta apkeyék. Apcha'awók axta anhan Pilato, keñe axta apxega José apsawa Jesús aphápak. 39Nicodemo axta anhan apwokmok ma'a, cham'a apya'áyeykmo nak Jesús xama axta'a appakhetchesekmo,#Jn 3.1-2. apsókok axta treinta kilos sokmátsa kelenchaheykekxa yámet ánek ekmátsa ekpakneyam la'a tén han ma'a pánakte kélláneyo axta cha'a sokmátsa égmenek. 40Apmeyk axta Jesús aphápak, José tén han Nicodemo, appextetchek axta apáwa kéltexneyak axta sokmátsa, cham'a apkeltémakxa nak cha'a énxet'ák judíos yakwayam yatawónek apkeletsapma. 41Yetneyk axta aksok kélcheneykekxexa m'a ekpayhókxa axta kélchexnakxa aksok ektegyéso Jesús, yetneyk axta anhan takhaxpop kaxwé elánamáxche m'a kélcheneykekxexa nak aksok. Axta kólpekkenweykmok makham xama kélhápak enxoho. 42Axta appekkenwokmok Jesús aphápak ma'a, hakte keto' axta m'a takhaxpop nak, peyk axta anhan kammok ekhem apkellókasamakxa apkelyampé énxet'ák judíos.
सध्या निवडलेले:
SAN JUAN 19: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
