SAN JUAN 14
14
Jesús apteme ámay ekmaheyak aphakxa Apyap
1“Nágkatneykha kélwáxok. Kólteme megkólya'áseyam Dios, kólteme nahan mehelya'áseyam ko'o. 2Awanhexma yakwayam anxek ma'a Táta apxagkok; maltennaksek axta ko'o peya alánegwakxések kélxanak kéxegke méko enxoho neghakxa m'a. 3Atakhekxak sat ko'o, sat awatak makham ma'a sekpenchesa enxoho seláneso yakwánxa kólhakha kéxegke m'a néten, yakwayam enxoho anaklósawatak kéxegke, yakwayam enxoho nahan kólhakha m'a yakwánxa nak axek ko'o. 4Kélya'ásegkók kéxegke ámay ekmaheyak nak ma'a yakwánxa nak amhagkok ko'o.
5Aptahak axta Tomás apcháneya Jesús se'e:
—Wese', magya'ásegkok negko'o yakwánxa emhagkok xép, ¿háxko antehek negko'o agya'asagkohok xa ámay nak?
6Aptahak axta apchátegmowágko Jesús se'e:
—Ko'o sekteme ámay, ekmámnaksoho, tén han ekyennakte egnenyek. Ko'o sekwánxa ahagkok apkelmeyeykemxa énxet yakwayam elmahagkok ma'a aphakxa nak Táta.#Mt 11.27; Jn 1.18; 6.46; Hch 4.12. 7Elyekpelchawók agkok ko'o kéxegke, kólyekpelkohok sat nahan ma'a Táta; apkelya'ásegkok kéxegke Táta keso kaxwo' nak, hakte apwet'awók kéxegke.
8Aptahak axta Felipe apcháneya Jesús se'e:
—Wese', henxekmós negko'o Apyap, sat wánxa agkok ma'a.
9Aptahak axta apchátegmowágko Jesús se'e:
—Felipe, wegkak ko'o sekha xamo' kéxegke, ¿yahekpelchak makham xép? Enxet ektahakxa enxoho seté ko'o, apwet'ak ma'a Táta; ¿yaksak ektaha apkeltamho nak axekmósek kéxegke Táta? 10¿Apya'asékmeya exchep sektaha ko'o sekyepetcheyo m'a Táta, keñe Táta aptaha sépetcheyo ko'o? Háwe ko'o sekpeywa ahagko' se'e sektahakxa nak seláneya kéxegke. Akke apkelaneyk cha'a aptamheykha m'a Táta aptaha nak sépetcheyo ko'o. 11Nágkólya'ásem sektaha ko'o sekyepetcheyo Táta, tén han aptaha sépetcheyo ko'o m'a Táta. Agkok kóltahak mehelya'áseyam ko'o, nágkólya'asem aksa m'a aksok selané nak ko'o. 12Enxet ektahakxa enxoho mehey'áseyam ko'o, elának sat ma'a ektémakxa nak cha'a ko'o aksok selané, kayeykhágwomhok sat nahan apkelané aksok ekwánxa nak ko'o selané, hakte peyk ko'o amyekxak ma'a aphakxa nak Táta, nakso' xa sektahakxa nak seláneya kéxegke. 13Ekyókxoho aksok kélmaxnagko nak eñama ko'o sekwesey, alának sat ko'o, yakwayam enxoho kataxchek ektémakxa apcheymákpoho Dios eñama m'a Apketche. 14Alának sat ko'o ekyókxoho aksok kélámenyexa enxoho eñama kélxeyenma sekwesey.#Mt 7.7-11; Lc 11.9-13; Jn 15.7,16; 16.23-24; 1 Jn 3.21-22; 5.14-15.
Jesús apxeyenma yáphaksek Espíritu Santo
15“Elásekha'awók agkok ko'o kéxegke, kólyahakxoho sat ma'a seltémókxa nak kóltehek. 16-17Wának sat ko'o yáphásesek kéxegke Táta pók Apmasma aptaha nak Espíritu apmámnaksoho, yakwayam enxoho cha'a exek kélnepyeseksa kéxegke. Enxet'ák ektaha nak apkeleñamakxa apagko' keso náxop mopwanchek exkak xa Espíritu nak, hakte metyehe', mékpelchehek nahan. Kéxegke eyke kélya'ásegkok, hakte apheyk kélnepyeseksa, exek sat nahan cha'a kélwáxok.
18“Makxeykxek sat ko'o kéxegke; awatak sat makham yakwayam axek kélnepyeseksa kéxegke. 19Kaxwo' sat kamaskok sét'a énxet'ák apkeleñamakxa apagko' nak keso náxop; kéxegke sat eyke hélwetak cha'a, kólwetak sat nahan ekyennakte kélnenya'ák, hakte kayhek ko'o egkenyek. 20Kólya'ásegwók sat kéxegke sektaha ko'o sekyepetcheyo Táta, cham'a ekhem sat, kólya'ásegwók sat nahan kéxegke kéltaha selyepetcheyo ko'o, tén han sektaha ko'o sekyepetcheyo kéxegke. 21Enxet ektahakxa enxoho apma takha' seltémókxa nak kóltehek, cham'a apkelyaheykekxoho enxoho, exekmóshok aptaha nakso' seyásekhayo. Yásekhohok sat nahan Táta m'a énxet aptaha nak seyásekhayo ko'o. Wásekhohok sat nahan ko'o xa, axekmósaxkohok sat nahan ko'o m'a énxet nak.
22Aptahak axta apkelmaxneyeyncha'a Judas se'e (háwe eyke m'a Iscariote):
—Wese', ¿yaksak ektaha apmoko nak henxekmósakpohok negko'o, keñe memoko exekmósakpohok ma'a énxet'ák apkeleñama nak keso náxop?
23Aptahak axta apchátegmowágko Jesús se'e:
—Enxet ektahakxa enxoho seyásekhayo ko'o, elyahakxohok ma'a ektémakxa nak sekpeywa; yásekhohok sat nahan ma'a Táta, ólchexyok sat nahan negko'o yakwayam antehek negyepetcheyo xa énxet nak, Táta tén han ko'o. 24Enxet aptaha nak meheyásekhayo ko'o, melyahakxók cha'a m'a sektémakxa nak sekpeywa ko'o. Háwe ko'o sekpeywa ahagko' sektahakxa nak sekpeywa kélhaxno nak kéxegke, Táta appeywa xa, aptaha axta seyáphaso ko'o.
25“Eltennásek ko'o kéxegke ekyókxoho xa neyseksók sekha makham kélnepyeseksa kéxegke; 26Espíritu Santo sat eyke elxekmósek kéxegke ekyókxoho aksok, elya'asásegwakxohok sat nahan ma'a ekyókxoho sektémakxa nak selanagkama kéxegke, cham'a Espíritu aptaha nak Apmasma kéxegke, peya nak yáphásesek kéxegke Táta eñama ko'o sekwesey.
27“Ekpekkenchásekxeyk kéxegke meyke ektahakxa kélwáxok. Ekmések ko'o kéxegke meyke ektahakxa kélwáxok eñama nak ko'o, megkaxnawók ma'a ektémakxal'a segméso meyke ektahakxa egwáxok énxet apheykha nak keso náxop. Nágkatneykha kélwáxok, nágkólé' nahan. 28Kélleg'ak axta kéxegke sekxéna ko'o peya atakhekxa', tén han peya awatak makham yakwayam axnaták kélnepyeseksa kéxegke. Nakso' agkok selásekhayo ko'o kéxegke, kalpayhekxak kélwáxok kélyekpelcha enxoho peya amyekxak ko'o m'a aphakxa nak Táta, hakte maxnawo ko'o Táta. 29Nano' axta seltennasa kéxegke amonye ekteme xa, yakwayam enxoho megkólya'asemek, ektaha sat xa.
30“Malenxanmagkók sat selpakhetcheso kéxegke, hakte xegakmek ma'a ektaha nak wese' keso náxop. Méko eykhe ekmowána hélának ko'o, 31megkatnehek eyke megkatné, yakwayam enxoho elya'ásegwók apyókxoho énxet apheykha nak keso náxop sektaha seyásekhayo ko'o m'a Táta, tén han elya'ásegwók seláneya ko'o m'a apkeltémókxa nak atnehek.
“Kólchaknaha. Nók ólxog.”
सध्या निवडलेले:
SAN JUAN 14: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
