LOS HECHOS 6
6
Kélyéseykha siete appasmeykha kéltamheykha kélakneykekxexa
1Apkelpakmeteyha axta énxet'ák apkelpakmeyesma nak griego apkelpeywa, axta apxénak ma'a énxet'ák apkelpakmeyesma nak hebreo apkelpeywa, hakte apxámákxeyk axta énxet apteme melya'áseyam, apxénchek axta megkatakmalma cha'a kélpasmo m'a kelán'ák griegas ektamheyak nak tampe', cham'a ekyókxoho ektémakxa nak kélpasmo cha'a. 2Apchánchesákxeyk axta apyókxoho énxet'ák apteme melya'áseyam Jesús xa doce seykha amya'a nak. Aptahak axta apkeláneya s'e:
—Megkatakmelak negko'o agyensók ma'a ektémakxa nak nenlegaso Dios appeywa, yakwayam anlánekxak ma'a yakwánxa enxoho katnehek ektegyamaxche nento. 3Elyáxeg, ékeso eñamakxa neltamho nak kóltegyaha kélnepyeseksa kéxegke énxet ekha nak kéláyo, tén han ma'a ekha nak apya'áseyak aksok, tén han ma'a apláneyo nak apwáxok Espíritu Santo, yakwayam enxoho kalanaxchek xa kéltamheykha nak. 4Anlenxanmohok sat negko'o nenteme nempeywa nelmaxnagko, anlenxanmohok sat nahan neltenneykha m'a amya'a eñama nak Dios.
5Hawók axta mók elchetamso apwáxók apyókxoho xa énxet'ák nak, kélyésáha axta Esteban, aptaha axta ekyawe mey'áseyam, tén han apláneyo apwáxok Espíritu Santo. Felipe axta anhan kélyésáha, tén han ma'a Prócoro, tén han ma'a Nicanor, Timón axta anhan ma'a, tén han ma'a Parmenas, Nicolás axta anhan ma'a, aptaha axta apkeñama Antioquía, cham'a apyetleykekxo axta apkeltémakxa énxet'ák judíos nano' axta. 6Keñe axta kélnaklákxo aphágkaxa seykha amya'a xa énxet'ák nak, apkelmaxnésesek axta anhan ma'a, apnegkenchek axta anhan apmék énxet'ák seykha amya'a apyetseksa'ák xa énxet'ák nak.
7Payhekxeyk axta kéllegaso Dios appeywa, apxámágkek axta anhan énxet'ák apteme melya'áseyam Jesús ma'a tegma apwányam Jerusalén. Wokmók axta anhan ma'a énxet'ák judíos ektaha axta appasmo apkelmaxnéseso apnámokkok, aptemék axta anhan melya'áseyam.
Esteban apmomap
8Apkelanak axta cha'a Esteban aksok sempelakkaso nak agweta' tén han ma'a aksok magkenatcheso nak agweta' nepyeseksa énxet'ák, hakte awanhok agko' axta entahak apmopwána eñama Dios apméso. 9Pók xama énxet'ák axta apkelátegmoweykpok Esteban, cham'a apkeleñama axta apchakneykekxexa judíos kéltéma axta Kélchexeykekxexa Apkelmomap. Nápakha énxet'ák apkeleñama Cirene axta anhan ma'a, tén han ma'a énxet'ák apkeleñama axta Alejandría. Axta anhan ma'a énxet'ák apkeleñama axta Cilicia, tén han ma'a énxet'ák apkeleñama axta yókxexma Asia. 10Wánxa agkok, mopwancha'ak axta eyke apkelátegmowágko, hakte apkeltennáha axta Esteban yetlo apya'áseykegkoho eñama apméso m'a Espíritu Santo. 11Apkelmeyásegkek axta selyakye pók xama énxet xa énxet'ák nak, yakwayam enxoho exének apkellegaya enmexeykencha'a appeywa Esteban ma'a Moisés, tén han ma'a Dios. 12Cháxa aptamhágkaxa axta apyennegkesáxma apkellókasa énxet'ák xa, tén han ma'a apkelámha apmonye'e nak kélakneykekxexa, tén han ma'a énxet'ák apkelxekmóso nak ektémakxa segánamakxa; axta keñamak apmákpo Esteban xa, kélyentamákxeyk axta anhan nápakta'awo' apheykegkaxa m'a énxet'ák ekyawe nak kéláyo. 13Aptegyágkek axta anhan énxet'ák ektaha axta megkamámnaksoho apkelxeyenma. Aptahak axta apkelpeywa s'e:
—Melwatésakmok apxeyenma ekmaso tegma appagkanamap egagkok xa énxet nak, tén han apkenmexa m'a ektémakxa nak segánamakxa egagkok. 14Nenleg'ak negko'o apxéna peya etegkesek tegma appagkanamap ma'a Jesús apkeñama nak Nazaret, tén han peya eyakmagkasek ma'a nentémakxa sempekkencháseykekxa axta Moisés.
15Xama axta apkelano Esteban ma'a énxet'ák ekyawe nak kéláyo apchaknákxo axta m'a, tén han ma'a apyókxoho énxet'ák nak, apwet'ak axta ektaha nápát Esteban ma'a ektémakxal'a Dios apchásenneykha nápát.
सध्या निवडलेले:
LOS HECHOS 6: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
