Mattaayo 24
24
Wihi berri sooyateeh, minki Waakhe buurenye laajjebcha
(Marko 13:1-2, Luuka 21:5-6)
1Yeesso minki Waakhe buure kabahe, orey isohtaayi, abattitiis minassi minki Waakhe buure kaaddagsan tusse. 2Ulla wihi us iyidah, “Wahanyeyyoha tuumman yeya! Rume atin icheeka, berri daddaabtoo kaldaye ti addan fuusso lakatabo mele, icho tuumman a lasookhuba.”
Wihi berri sooyateeh, ꞌdooꞌd Yeesso sina latusa
(Marko 13:3-13, Luuka 21:7-19)
3Geedda Yeesso Hali Geeyohi Oolif ka fiddiyo, abattitiis dagsi ka itimiyye wihi iche itidah “Waha maantoh yateehiin? Toro la mehe yateehe emeettaah ichoow ibeenki ꞌdaꞌddaboot tusa?”
4Yeesso wihi us ilaabe, “Yuubsada, uus etoo kalday laka atin ekkeysan! 5A mehe ꞌdooꞌdi ittaawenye ani iskaayyeelo yamiite, ‘Ani a Ki Lasubhe,’ essi, a agartaane, ꞌdooꞌdi ittaawenye ekkeestaan la. 6Yaafohi isdiho ichoow worassi ibuuhine dihoyyoot a daagtaan, iꞌdaasenyi taba iicho atin kanahin. Wahanyeyyoha a sooyateehiine, iꞌdaasenyi ibeenki yomboot uliba a ankhanyahe on. 7Sirgaalle a isdihta, karnato laka isdihaane, ilassi ittaawe ka nabhayye tamiite, harra laka sesseehta. 8Wahaas tuumman a chiis birriissa on.
9“Maantaas a atin ladiiba, ꞌdee sina atin loomhicha, toro atin layagiis. ꞌDooꞌdi harra tuumman la a atin ꞌdiiꞌda jeenteti atin abattiteey itahiin u. 10Maantaas ꞌdooꞌdi buure kakhuufnaanki icho ani ikakhuufaan a kanokhta, dahanohi chiiyeet isgessa, toro la isꞌdiiꞌdaan. 11ꞌDooꞌdi ittaawenye ꞌdooꞌdi Waákh íyeyyeedo iskaayyeelo a buuraata, ꞌdooꞌdi ittaawe ekkeesta. 12Toro la jeenteti hugunꞌdarri ibuuraattuu, ꞌdooꞌdi ittaawe ꞌdooninti us Waakh ꞌdoono a nuglaatta. 13Iꞌdaasenyi eti garrahsate ichoowka sinata ꞌdubiche eleele a lariba. 14Wora Haaggane dakhi Waakh miinsan la harra tuumman ka a lacheeka, garti ꞌdooꞌdi harra tuumman yateehe, ꞌdee ꞌdeerka ibeenki yomboot yateeh.
Wihi berri sooyateeh, iyookkoti laꞌdiiꞌdo minki Waakhe buure lagessa
(Marko 13:14-23, Luuka 21:20-24)
15“ꞌDeerka maanti atin iyookkoti ‘weyti biꞌdirenye, ꞌdooꞌd keehisso,’ meessi lagan katolosso Daaniyelhi goorat Waákh íyeyyeedo cheeke agarteen,#24:15 Daaniyel 9:27, 11:31, 12:11. 16ꞌdeerka ꞌdooꞌdi ili Yaꞌhuudiya fiddiyo tuumman halal a ifirdo. Atihi yeeda soonto yeeda a kigelo. 17Eti minkiis sartiis fuulo uus min geline wohoo rucchul laka khaatin. 18Eti gos goya kijiro, uus nokhanne kabuuꞌdiis sookhaatan. 19Ibeennetaas sinati deyyehoti nuugsatti ichoow ti huleesenye nyaamitto iubaaꞌdan sugto enenna a buure. 20Waakh waho uus maantaas lafirdo maanti il weyti roffo yahe hir ꞌdeyo ommos Seeri Lanaso eheynan. 21A mehe sinati buurenye maantaas jirto, ti geeddaase uus uumacchoti harra ka ma laargine ichoow uliba. Toro wihi iꞌdicheenye lasooargo ba ma jiraan, jirtuu tuumman.
22“Chiꞌ ibeennetaas liigaabin, etoo kalday laka ma sooꞌhado. Iꞌdaasenyi iroonoti ꞌdooꞌdiiski us soobahsatuu, ibeennetaas a lagaabicha. 23Maantaas chiꞌ etoo, ‘Yeya, Ki Lasubhe kalla,’ ommos, ‘Kuulla!’ kiyidah, arummeysan. 24A mehe ꞌdooꞌdoo Ki Lasubhe iskaayyeelo ichoow ꞌdooꞌdi ꞌdooꞌdi Waákh íyeyyeedo iskaayyeelo a soobaha. Icho la wahanyeyyohi ittaawenye nane miigti Waakh tuso ichoow girmo yeelaane, ꞌdee chiꞌiche tateeh ꞌdooꞌdi Waakh soobahsate laka ekkeestaan. 25Yeya, geeddi il ankhayyahe waha a atin isoocheekee.
26“ꞌDeerka chirri ꞌdooꞌdoo, ‘Kaaleya Ki Lasubhe kuulla hidaad kajiraa,’ atin iidah iiranna, ommos chiꞌicho, ‘Inta yeya, usu kalla min goyaka meelassi goyaatteet kijira,’ atin iyidaaheen arummeysanna. 27Iꞌdi tahe saggi ankhadhi beri kaankhado bahay ka liiarguu, Ínam Aadam laka emeettiis iꞌdaase tateeh. 28Inti golfof jiifo, intaase raꞌd kawara.
Wihi berri maanti Ínam Aadam soonokhti yateeh
(Marko 13:24-27, Luuka 21:25-28)
29“Uus sinayyohi maanassaas kutaan,
“ ‘Orrahe a daayatta,
yeyyah la banayhiis ma soobahcho,
yiyyihimo serey a kasookhubtaane,
miigti saraat la lakorkokicha.’#24:29 Isaaya 13:10, 34:4.
30“Maantaas wihi emeetti Ínam Aadam tuso serey ka a soobahaane, yaafohi harra tuumman la ooyaan. Ínam Aadam usuhi mirsohi saraat fuulo miig ichoow weynaanti buure khabaayi yamiit argaan. 31Ulla Herti Waakhe arabi fallee afuufto harra ierga, iche la ꞌdooꞌdi Waakh soobahsate harra ꞌdollohiche affarcho ichoow sereyta daayan ꞌdollohiche tuumman kasoobaayissa.
Wihi berri sooyateeh, runti geeyi fiig lakaabti
(Marko 13:28-31, Luuka 21:29-33)
32“Taba geeyi fiig yeeda kaabda. Uuꞌ liikhimohiis ulhawtaane seeb bahchaan, saggi ꞌdaato isoodowwaatte a garattaan. 33Saggaas on u maanti atin wahanyeyyoha tuummane ibeenki ꞌdaꞌddaboot tuso agarteen, saggi soonokhantiis isoodowwaatte kola ititah a garattaan! 34Rume atin icheeka, ꞌdooꞌdi iꞌdee ma tuumo ichoowka wahanyeyyoha tuumman yateehiin. 35Sereyta daayan ichoow harra a kutaane, iꞌdaasenyi yeedasseey jirtuu tuumman ma kutaan.
Wihi berri sooyateeh, et maan ichoow chirri us soonokhti garti mele
(Marko 13:32-37, Luuka 17:26-30, 34-35)
36“Aabbaheey on menye, et maantaas ommos sahaꞌddaas garti mele. Herti Waakhe goobi Waakh fiddiito ommos Ínam Aadam laka ma gartaan. 37Iꞌdi goorat ibeenne Noowa eheet, iche ibeenki Ínam Aadam yamiit laka yateeh. 38Iꞌdi tahe geeddi goorat ꞌduley harra ikhaatin, enenyet iꞌdi orrankateet u a golossate one, minan laka laaddiste ichoowka Noowa koobanhi buure goya gele. 39Wihi sooyateeh ma abanne ichoowka icho tuumman ꞌduley khaate. Emeet Ínam Aadam ka laka iꞌdaas on tateeh. 40Et lamma gose kijirta, koo lakhaata ki addan la lakataba. 41Deyyehotoo lammeenye golol isleetunto, too lakhaata ti addan la lakataba.
42“Maantaka toorribda, a mehe ibeenki Kamuriin yamiit ma garattaanee. 43Iꞌdaasenyi waha abda. Chirri ooyohi min leh sahaꞌddi ibeen eti hatto leh yamiit garti, ma urꞌdo miinkiis ma ꞌdiicho ma lajebcho. 44ꞌDeerka atin laka toorribda giꞌde iꞌdi tahe Ínam Aadam sahaꞌddi liikamurine yamiite.
Wihi berri sooyateeh, falfati lakakhuufo a ti hiliche mujjum haaggisso
(Luuka 12:41-48)
45“Kamalda bal, ilbooyi lakakhuufo toro kharee a ayyo? A ki kamuriis goobiis iweynaache, toro la geeddi mujjume ka ilbooyye kamuriis gololicho. 46Ilbooyi liimaalo a ki kamuriis usuhi hiliis mujjum haaggicho sooeleelo. 47Rume atin icheeka, kamuriis wihi us khabo tuummane dahantiis gessa, iweynaacha. 48Iꞌdaasenyi eemba ilbooya a suuje, ‘Kamureey geeddi deere foga kijira,’ isiyidahye, 49ꞌdeerka ilbooyyeti wahalhiise sina kawaariyye, meleefuyyo leegolossayye, toro la farso leeyubhub. 50Kamuri ilbooyaas, maanti us ikamurine soonokhta toro sahaꞌddi us igaranne soonokhta. 51Usu seleye goggoocha, toro ꞌdooꞌdi iskaayyeelo goya gata. Intaas ka ooya, bolokh ka ilko iskaroba.”
सध्या निवडलेले:
Mattaayo 24: rel
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2018, Wycliffe Bible Translators, Inc. All rights reserved.
