Mattaayo 23
23
Yeesso ꞌdooꞌd tagaammeti amurre ichoow Faarissayo katootoocha
(Marko 12:38-39, Luuka 11:43, 46, 20:45-46)
1Yeesso saahka wihi us urur ichoow abattitiis ba iyidah, 2“Tagaammeti amurre ichoow Farissaayo ba antohi icho amurre Muusa enenyet kaabchaan a khabaan. 3Maantaka wihi icho atin idowaan nabah isuda, toro la yeela, iꞌdaasenyi wihi icho yeelaan ayeelina, iꞌdi tahe icho wihi icho cheekaan ma raahaan. 4Icho huleesi buurenye atin kararaane adah atin korchaane, iꞌdaasenyi icho rubeycho far ma okkhichaane enenyet ma leekhabtaan.
5“Wihi iche yeesso tuumman a yeessa, ꞌdee enenyet arga. Saabohi balballaaddane miinan ichoow keymo kahiitaan. Saabassaas la Chiirnaanneti Waakhe goya kakhabaan. 6Sukuukuyyo ka ichohi inti weyti lakiinkaanyito koorronti ꞌdoonaane, minassi weysiite Yaꞌhuud ka la komborohi weynaaneete ꞌdoonaan. 7Sokkoyyo ka la ichehi weyti inkaanyit ka labariiticho, enenyet tuumman, ‘Eti weenoow,’ idowo iche ꞌdoonaan.
8“Iꞌdaasenyi uus, ‘Eti ween,’ atin liidowin. A mehe Kamuriin a koo kaldach one, atin la a ꞌdooꞌdi yaaftoo kaldach. 9Harrata ka la etoo kalday laka, ‘Aabba!’ iidaahana. Iꞌdi tahe Aabbahoo kaldache serey jiro on khabtaan. 10Toro la uus, ‘Eti ween,’ atin liidowin, iꞌdi tahe atin wohoo kaldache titaaheene, eti atin iween la a koo one, ulla a Ki Lasubhe. 11Eti goytiin ka weyti ween, a falfatiinna. 12A mehe eti tuummane isweynaacho a lanuglaacha, eti tuummane isnuglaacho la a laweynaacha.”
Yeesso tagaammeti amurre ichoow Farissaayo hukkuma
(Marko 12:40, Luuka 11:39-42, 44, 47-52, 20:47)
13“Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin aritti dakhi goobi Waakhe ꞌdooꞌd kahiddaane, atin rubeytiin la goobi Waakh ma gessaane, toro la ꞌdooꞌdi gelin ꞌdoono kajeyissaan.#23:13 Chiirnaanneti Yeedi Waakhe uumacchee gaasoo chiirnaanka a kakhayte. 14 “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin oboorrihi muunkhoyyeenye ekkeysattaane, wihi icho khabaan kakhaattaane, toro la weysi deddeeraassaan. Jeentetaas u Waakh sinati buurenye atin tusa.”
15“Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin harra tuumman ichoow beyohi burbuurenye tabtaane, ꞌdee etoo kalday wihi ꞌdooꞌdi Yaꞌhuud wahti iurgiyissaane, chuꞌus atin sooraahe ka, weyti ꞌdirihiin baabiissaan. Saggi atin meessi ꞌdabi armaanjireen iirattaan u, etaas laka ꞌdirihiinna baabiissaane meessi ꞌdabi armaanjireen irta.
16“Atinha indolaaye ꞌdooꞌd angaamissaan, sinati atin sugto eenna a buure! Atin, ‘Chirri etoo daatte, minki Waakhe buure wahe laka a walahba on,’ iche elattaan. Iꞌdaasenyi ‘Chirri etoo ꞌdahabi minki Waakhe buure kadaatte, wihi us kadaatte a buuhicho,’ iche elattaan. 17ꞌDalammeti indo laa! Mehe khumman, ꞌdahab a, bal minki Waakhe buurenye ꞌdahabaas munyaacho? 18Toro wihi addane atin ꞌdooꞌd abissaan a mehe ya, ‘Chirri etoo chalagti hoola lakasoorriyoocho kadaatte, daatotiis a geeddi lajebcho, iꞌdaasenyi chirri etoo wihi us Waakh siicho kadaatte, wihi us kadaatte a buuhicho.’ 19Indomeleyyo! Mehe khumman, wihi us Waakh siicho bal chalagti wihi us Waakh siicho munyaasso? Chalag on khumman! 20Toollaka eti tuummane chalag kadaatti, chalag ichoow wihi tuummane sarche fuulo iche kadaatta. 21Eti minki Waakhe buure kadaatti la minki Waakhe buure ichoow Waakkhi goya fiddiyo iche kadaatta. 22Eti goobi Waakh kadaatti la, komborti Waakhe antoot ichoow Waakkhi kafiddiyo kadaatta.
23“Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Iꞌdi tahe atin wihi ikhummaneynane iꞌdi geeyohi golol haaggicho iꞌdi maanta nyaaykee ichoow bisaaree ka, Kamur gisi tomonnaatteet a ibihissaan. Iꞌdaasenyi wihi amurre ka wihi weyti khumman liiekkaacho a ꞌdiisseen. Waha a iꞌdi maanta ꞌdooꞌdi jiti fissan ka lahukkumo ichoow uurnugleel ichoow atinhi ꞌdooꞌdi lakakhuufo tateehiin a ꞌdiisseen. Kamur gisi tomonnaatteet ibahcha iꞌdaasenyi wahanyeyyohi weyti khumman aꞌdiinna. 24Atinha indo laaye toro ꞌdooꞌd angaamissaan, atin dahassihi bicchehi atin tabhuubiin goya kajiro taartaane iꞌdaasenyi naffi gaal khorkhissaan!
25“Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin kokkoob ichoow baakhuul khariissa dikhtaane, iꞌdaasenyi gololi goytiin kijiro a wihi atin ꞌdamaam ka ꞌdooꞌd sarteen. 26Atinha Farissaayo indo laa, koloo uurassiin goya dikha, ꞌdee wahanyeyyoha kharaat laka biꞌdir a bahaanee.
27“Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin a iꞌdi hawwaalohi sarcho riingihi dakhan lakadowe, kharicho haagganyahe, iꞌdaasenyi goya lafohi ꞌdooꞌdi tuume ichoow wahanyeyyohi biꞌdirenye buuha. 28Atin laka iꞌdaasu, chaꞌatin laargo ꞌdooꞌdoo fiffissane iyoogtahiine, ugoka uuriin goyaka, atin a ꞌdooꞌdi iskaayyeelo toro hugunꞌdarri kaassohti.
29“Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atine goꞌddassi enenyet lakahawwaalo ꞌdooꞌdi Waákh íyeyyeedo idissaane, toro hawwaalohi ꞌdooꞌdi fiffissan eykoddaan. 30Atin mehe elattaan ya, ‘Kootte maanti goorat aacchinyeteen jirte jirre ka, diiggi ꞌdooꞌdi Waákh íyeyyeedo icho khubeen ma leegello.’ 31Atin ꞌdeerka ꞌdooꞌda goorat ꞌdooꞌdi Waákh íyeyyeedo bakkiche a aacchinyetaanya elattaane, iꞌdaas ka la saggi atin rubeytiin uskeel iyeessaane cheektaan. 32Maantaka taba atin laka iꞌdi aacchinyetiin u, uskeelaas inti icho dabarroocheen buuhicha.
33“Atinha iꞌdi toofafe! Dessi toof! Saggoh meessi ꞌdabi armaanjireene Waakh atin igooche ikabahsattaan? 34Maantaka, ꞌdooꞌdi Waákh íyeyyeedo a atin isooerga, ꞌdooꞌdi kharayyee ichoow ꞌdooꞌdi jiti Waakh enenyet abcho a atin isooerga. Atin la gaasichekoo a tagiisiine, gaasoo laka massalaaba kakaahtaane, gaasoo laka minassiinki weysiite Yaꞌhuud ka jahtaane, gaasoo laka kolba ilkerengeettoo ka sina omhissaan. 35Jeentetaas u la, diiggi ꞌdooꞌdi fiffissane harra kakhubte tuumman berri atine atin fuula, uus diig Aabelhi fissan lakasookhabti ichoowka ínam Barachiiyahi magahiis Sakkariiya layadeeh. Ulla minki Waakhe buure ichoow chalagti hoola lakasoorriyoocho dahchooda dubunuunu kayigaaseen. Atin laka uskeelaas a leegesseen gon. 36Rume atin icheeka, waha tuumman ꞌdooꞌdi iꞌdee iche lakahukkuma.
Yeesso ilkerengeetti weene Yeerusaleem ooya
(Luuka 13:34-35)
37“Yeerusaleemoow, ilkerengeetti weenoow, atin ꞌdooꞌdi Waákh íyeyyeedo a tagiisiine, ꞌdooꞌdi Waakh atin isooerge la dagah kachibtaan. Saggi orran lukki weylassiis barbarre goya igessatuu, an geeddi buurenye anihi dahanoheey atin koogoogo ꞌdoone, iꞌdaasenyi atin ma ꞌdoonin. 38Yeya, Waakh rubeytiis minki Waakhe buurenye kiine a kaguure, minki marah kalday atin ikatabe. 39A mehe wihi an atin icheeko, yombuu toro ma iargartaane ichoowka, ‘Waakh ki magahi Kamur kayamiit a imaale,’ tadeehiin.”#23:39 Sabuur 118:26.
सध्या निवडलेले:
Mattaayo 23: rel
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2018, Wycliffe Bible Translators, Inc. All rights reserved.
