Mɑɑtieo 9
9
Yiesu te k gbɑnɑnkpienn dɑɑnɔ pɑɑk
(Mɑɑlk 2.1-12; Luk 5.17-26)
1Ŋɑnn e k Yiesu din ŋmɑt kuɑ bulgbetl nɑ ni, k puot mɔkgbenŋl nɑ gbingbɑnliel k kun u duo ni. 2K nisiɑb din tɑn jii jɑsuɑ nnɑ k u gbɑnɑnt kpo, k b din tien’ɔ liɑnŋ pɑɑk k bɑɑl nɑn’ɔ Yiesu buol ni. Yiesu nbɑ din lɑ bɑɑ tien’ɔ yɑdɑ biɑnŋ nbɑ nɑ, k u yet bɑɑtɔ nɑ ɑ: «N bik, ii mɔk pɑlcienn. N nyik cɑb ɑ biit ɑ.»
3K *senniwɑntesiɑb ji din duki b pɑlɑ ni ɑ: «Juɑ nɑ piɑk k biil Yennu e.»
4Yiesu ŋɑnin din bɑnn b dudukt mɑnŋ ɑ, k boi’b ɑ: «Bee tien k i duki dudukbiit i pɑlɑ ni? 5Mɑɑ yet bɑɑtɔ nɑ ɑ: ‹N nyik cɑb ɑ biit› ɑmi mɑɑ yɑɑ n yet’ɔ ɑ: ‹Fiit kii sonm nɑ,› mɑɑn munle nɑ sinsuuk ni lɑnn po e pɑɑl i? 6N ji sɑɑ wɑnn’i nɑn *Nisɑɑlk Bijɑ mɔk yiikuo tingbounŋ nɑ ni, k sɑɑ nyik cɑb niib b biit,» ŋɑɑn jiɑnt yet juɑ nbɑ k u gbɑnɑnt kpo nɑ ɑ: «Fiit k jii ɑ liɑnŋ kii kun ɑ ŋɑɑk ni.»
7K juɑ mɑnŋ fiil k kun. 8Nibul nɑ nbɑ din lɑ nnɑ mɑnŋ k jɑŋmɑɑni suol’b, k b piɑk dont Yennu nbɑ tul nisɑɑlk yiikuo nɑ buolu.
Yiesu yi Mɑɑtieo
(Mɑɑlk 2.13-17; Luk 5.27-32)
9K Yiesu din nyii lenŋ k sɑɑ, k sɑɑ lɑ jɑsuɑ nnɑ, k b yi’u Mɑɑtieo, k u kɑl u tuonn pɑɑk lɑnpogɑɑldieok ni, k Yiesu yet’ɔ ɑ: «Fiit kii wɑɑ’n.» K u fiil k wɑɑ’u.
10Yiesu nbɑ din sɑɑn Mɑɑtieo nɑ ŋɑɑk k sɑɑ kɑl k di jiet yuo nbɑ nɑ, k *lɑnpogɑɑltieb nɑn biitdɑnm bonciɑnn din kuɑ k tɑn kɑl pukn Yiesu nɑn u *puolpoweitieb po k di nɑn’m. 11Fɑɑliisiɑnnbɑ nɑ nbɑ din lɑ nnɑ mɑnŋ, k b boi u puolpoweitieb nɑ ɑ: «Bee k i wɑntuɑ mɑnŋ di jiet nɑn lɑnpogɑɑltieb nɑn biitdɑnm i?»
12K Yiesu din gbɑt b pinpɑɔk mɑnŋ k yet’b ɑ: «Bin nbɑ mɔk lɑɑfiɑ k luon tebtuɑ. Bin nbɑ yiɑl, ŋɑnm e luon tebtuɑ. 13Ii sɑɑ mɑn k sɑɑ tumi bɑnn lin nbɑ diɑn Yennu mɑɑn ni ɑ: ‹Min, Yennu, n luon ninbɑtinu e k gɑl *mɑlunŋ.› K mɑɑn min, Yiesu, n k bɑɑl ɑ n yiin niŋɑnm kɑɑ, ŋɑɑn n bɑɑl ɑ n yiin biitdɑnm e.»
Mɔlolu lɑbɑɑl
(Mɑɑlk 2.18-22; Luk 5.33-39)
14Tɔn, k Sɑn puolpoweitieb din tɑn bɑɑl Yiesu buol ni k boi’ɔ ɑ: «Tinm nɑn Fɑɑliisiɑnnbɑ loln mɔi yuo kul ɑ. Bee tien k ɑ puolpoweitieb k loln i?»
15K Yiesu din jiin k boi’b ɑ: «Puociɑnu i be, sɑɑnm sii mɔk pɑlbiil yuo nbɑ k puoyuokl sɔlɔ dɑɑ be b buol ni nɑ wɑɑ ɑɑ? Aɑi. Ŋɑɑn yuo bɑɑt, k b tɑn sɑɑ nyinn puoyuokl sɔlɔ nɑ b buol. L yuo e k b sɑɑ lol mɔi.
16«Suɑ kɑn jii cɑbpɑɑnn k lik tɑkpel#Yɑɑyuo ni tiɑt din k tie nɑn mɔtɑɑnɑ yɑl nɑ. L din tuu tol e yiɑn yiɑn. K l i tie k b jii cɑbpɑɑnn k lik tɑkpel, cɑbpɑɑnn nɑ din tuu tol e, k dɑt tɑkpel nɑ k pɑt.. L i tie k u tien nnɑ i e, cɑbpɑɑnn nɑ sɑɑ pɑt tɑkpel nɑ e, k l pɑtmin nɑ n ŋɑnm pukn. 17Suɑ biɑ kɑn sɑk liɑk dɑpɑɑnin dɑlenkpel#Islɑɑeltieb duo ni, b din tuu wu dɑɑn bonkobgbɑnt ni e. B din tuu nyɑ kɔlɑ e, k lol mɔi ŋɑɑn wuun dɑɑn. B din k wu dɑɑn lenɑ ni. L i tie k b tien dɑpɑɑnin kɔlpɑɑnn ni l tuu tot e k jɑnŋ u pɑnŋ biɑnŋ. L i tie k b jii dɑkpel, k wuun kɔlkpel ni, l kɑn biil. Ŋɑɑn b i wuun dɑpɑɑnin kɔlkpel ni, k l yɑɑ lin mɔ yuo nbɑ, l sɑɑ fikt kɔl nɑ k pil e k lin put. ni. Wun nbɑ tun nnɑ, dɑpɑɑnin nɑ i tɑnŋ i mɔ, l sɑɑ put dɑlenkpel nɑ e k biil, k dɑɑn n muɑn, ŋɑɑn b tuu jii dɑpɑɑnin k liɑk linlenpɑɑnn ni e, ɑ l kul dɑɑ biil.»
Yudɑɑnsuɑ bonpobik bɑɑtuk lɑbɑɑl
(Mɑɑlk 5.21-43; Luk 8.40-56)
18Yiesu nbɑ din dɑɑ piɑk nɑn Sɑn puolpoweitieb nɑ, k yudɑɑnsuɑ nnɑ bɑɑl k tɑn gbɑɑn u tuɑnn po, k yet’ɔ ɑ: «N bipoyenml e kpo mɔtɑɑ mɔtɑɑnɑ. Bɑɑt nɑ k tɑn jii ɑ nuu k yii u pɑɑk, k wun lɑ mɑnfuol.»
19K Yiesu din fiil k jii u puolpoweitieb pukn u mɔnŋ pɑɑk, k b wei’ɔ k sɑɑn.
Puosuɑ sii Yiesu liɑtfuouk k lɑ pɑɑku
(Mɑɑlk 5.25-34; Luk 8.42-47)
20Puosuɑ nnɑ mun din be lenŋ, k siik fɑbounŋ k tɑn jɑnŋ binɑ piik nɑn ŋɑnle, k u din tɑn bɑɑl lint Yiesu puolpo k sɑɑ sii u liɑtfuouk mɔgbɑnn, 21k mɑɑn u ponŋ din dukn u pɑl ni e wɑɑ ɑ: «Mi i lek i sii u liɑtfuouk, n sɑɑ lɑ lɑɑfiɑ wɑɑ.»
22K Yiesu din jiɑnt k lɑ puo nɑ, k yet’ɔ ɑ: «N niipuo, ii mɔk pɑlcienn. A yɑdɑ nɑ pɑɑk e te k ɑ lɑ lɑɑfiɑ.» L tɑɑkpɑɑk ni, k u set lɑ lɑɑfiɑ.
Yiesu fiin bonpobik nɑ kuun ni
(Mɑɑlk 5.35-43; Luk 8.49-56)
23Yiesu nbɑ din sɑɑ bɑɑl yudɑɑnɔ mɑnŋ ŋɑɑk ni yuo nbɑ, k u lɑ yelpeblɑ pieb yeli, k nibulciɑɔnŋ biɑ bui kumɔni k fɑbn. 24K u yet’b ɑ: «Ii nyi mɑn. Bonpobik nɑ k kpo kɑɑ, ŋɑɑn u guɑnt e.» Ŋɑɑn k b lɑɑ’u. 25Bɑɑ bel niib mɑnŋ k nyinn’b nɑ, k Yiesu kuɑ k suol bonpobik nɑ nuu, k u yient k fiil. 26K niib din muɑnt l lɑbɑɑl tinŋ mɑnŋ ni kul po.
Yiesu nyuɑnt juɑni bɑnle
27Yiesu nbɑ din nyii lenŋ k gɑɑl sɑɑ tuɑnn po nɑ, k jɑb nnɑ bɑnle din tie juɑni k wɑɑ u puolpo, k yikn k yien ɑ: «Fin * Dɑɑfiid yɑɑbuonn, tin’t ninbɑɑɔk.»
28Yiesu nbɑ din sɑɑn k sɑɑ kuɑ ŋɑsiɑk nnɑ ni yuo nbɑ, k juɑni nɑ bɑɑl k kuɑ lenŋ. Ŋɑnn e k u boi’b ɑ: «I tien yɑdɑ nɑn n sɑɑ fit k teb’i wɑɑ?»
K b jiin ɑ: «Yonmdɑɑnɔ, nnn.»
29Ŋɑnn e k u jii u nuu k sii b ninbinɑ, ŋɑɑn yet’b ɑ: «Yɑɑ tien yɑdɑ biɑnŋ nbɑ nɑ, lin tun nnɑ e k tul’i.» 30K b ninbinɑ mɑnŋ nyuɑnt. K Yiesu din yet’b nɑn ninmɔnn ɑ bii mi k bin yet suɑ l po.
31Ŋɑɑn k b din nyii k sɑɑ muɑnt u lɑbɑɑl tinŋ mɑnŋ ni kul ɑ.
Yiesu te k muuk pɑɑk
32Niib bɑnle nbɑ k Yiesu nyuɑnt b ninbinɑ nɑ nbɑ din fiil k nyi yuo nbɑ, k siɑb mun din bɑɑl nɑn jɑsuɑ wun nbɑ k nɑlnbimuuk be u ni nɑ, Yiesu buol ni. 33K Yiesu din nyinn nɑlnbimuuk nɑ juɑ nɑ ni, k u ji fit piin k piɑk l yuo. L din yɑɑl ŋɑɑn lit nibulciɑɔnŋ mɑnŋ, k b ji yien ɑ: «T dɑɑ k mi lɑ bonbuolu nɑ Islɑɑel tinŋ ni nɑ.»
34Ŋɑɑn k Fɑɑliisiɑnnbɑ din dɑɑn nyɑtuk ɑ: «Nɑlnbiit bɑt e tien’ɔ yiikuo ɑ wuu nyint nɑlnbiit niib ni.»
Yiesu mɔk ninbɑtinu nɑn niib
35Tɔn, k Yiesu din kɑk lin doi kul ni nɑn digbɑnbis ni, k kuɑ *Suifnbɑ jɑɑnti diet ni, k muɑntl Yennu nɑɑn lɑbɑmɑnn k tumi niib, k te k bin nbɑ yiɑl yiɑlbuoli buoli nɑn bin nbɑ mɔk gbɑnɑntont kul pɑɑkt. 36Wɑɑ din tɑn lɑ nibulciɑɔnŋ mɑnŋ nɑ k ninbɑɑɔk suol’ɔ, k mɑɑn b din bɑk e k b yɑn ŋmɑt k b kɑɑ somsiɑl, k nɑɑn nɑn pei nbɑ kɑɑ pekpɑɑlk nɑ. 37Ŋɑnn e k u din yet u puolpoweitieb ɑ: «Dii nɑ biel k biɑ yɑb ɑ, ŋɑɑn k dijɑɑntieb wɑɑl. 38L pɑɑk, ii mei mɑn dii mɑnŋ dɑɑnɔ k wun ŋɑnm pukn dijɑɑntieb k te k bin sɑɑn jɑɑn u dii mɑnŋ.»
सध्या निवडलेले:
Mɑɑtieo 9: MOBANT07
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Moba-Lok New Testament © Bible Society of Togo, 2007.
