Matayo 6
6
Jeso unaafunza atʼu dzulu ya kulavya
1 #
Mat 23:5
Jeso waamba, “Dzimanyirireni mutsʼihende mahendo genu ga haki mbere za atʼu na maazo ga kukala ni muhenza mudzonyese. Maana, muchihenda vivyo, Abayenu ariye mulunguni kʼandamunosa.
2“Ndo ulavyapho kumupʼa mutʼu ariye na haja, tsʼende uchisema dza alumakwiri ahendavyo. Maana, ao akalapho ahenza aavize mutʼu, ni seti asumize mumo masinagogini na hata njira-njira kwa kuhenza kudzonyesa, na kuhenza kulikwa. Ndo ninamwambira jeri mino, ao bee andaukira gago ga kulikwa ni atʼu tu bahi. 3Ela ukalapho uhenza ulavye kumupʼa mutʼu ariye na haja, tsʼambire mutʼu munjine, 4kwa hata chako ulavyacho chitsʼimanywe, na Abayo Mulungu aonaye maneno gosi hata gahendwago chisiri, undakunosa.”
Jeso unafunza jisi ya kumuvoya Mulungu
(Luka 11:2-4)
5 #
Luk 18:10-14
Jeso waenderera kugomba achiamba, “Na muchikala munavoya, mutsʼikale dza alumakwiri. Maana, ao ahenza kwima na kuvoya masinagogini na chila pʼembe ya njira, chisha kwa laka ra dzulu kwa hata atʼu aaone. Ninamwambira jeri mino, ao bee andaukira uo wa kulikwa ni atʼu tu bahi. 6Ela ukalapho uhenza uvoye, phenya mwako chumbani, na chisha usindike luvi, hʼaya uvoye kwa Abayo ariye phapho hata phapho pha siri, na Abayo aonaye hata ga siri undakunosa. 7Mwimwi muchikala munavoya, tsʼivoyeni mavoyo mare dza atʼu otsʼimumanya Mulungu. Maana, ao anaona kukala, avoyapho mavoyo mare ndipho Mulungu undaasikira. 8Ndo mwimwi tsʼikaleni dza ao, mana, Abayenu Mulungu unagamanya genu gosi murigo nago haja hata mukalapho kʼamudzangwe kumuvoya. 9Ndo muvoyapho, voyani vivi:
‘Baba uriye dzulu mulunguni,
dzinaro takatifu narilikwe,
10ufalumeo naudze:
uhenzaro narihendeke phapha duniani
dza vivyo vihendekavyo kuko mulunguni.
11Hupʼe rero leu huriro huna haja naro chila tsʼiku.
12Na husamehe makosa gehu,
dza vivyo siswi naswi hwasamehevyo ahukoserao.
13Na utsʼihutiye majezoni,
ela hutivye na yuyatʼu Mui.’#6:13 Nakala zinjine zinaonjeza fungu riri na: Maana, Ufalume, widimi, na utukufu ni wako hata kare na kare. Amina.”
14 #
Mar 11:25
Chisha achenderera kwaambira kukala, “Muchiasamehe amukosao, bee hata Abayenu ariye dzulu mulunguni undamusamehe makosa genu namwi. 15Ela mutsʼiphoasamehe amukosao, bee hata Abayenu ariye dzulu mulunguni naye, kʼandamusamehe makosa genu namwi.”
Jeso unafunza dzulu ya kufunga
16Jeso waamba, “Mufungapho, mutsʼikunze nyuso dza alumakwiri ahendavyo, kwa hata adzonyese kwa atʼu kukala afunga. Ninamwambira jeri mino, ao bee andaukira uo wa kulikwa ni atʼu tu bahi. 17Ela muchifunga, ogani uso, na mudziphake mafuha, 18kwa hata anjine atsʼidze akamanya kukala mudzifunga. Naamanye Abayenu Mulungu yiye amanyaye maneno gosi hata ga siri, naye undamunosa.”
Utajiri wa mulunguni ndio utajiri wa jeri
(Luka 12:32-34)
19 #
Jak 5:2, 3 Jeso waamba, “Tsʼiikeni mbere kukala matajiri phapha duniani, pharipho utajiri wenu unaidima kwinjirwa ni myungu, ukariswa ni kʼanga, hebu ukaphenyererwa ni aivi. 20Ela mwimwi ikani mbere kukala mukale matajiri a mulunguni, kuriko utajiri wenu kʼawidima kwinjirwa ni myungu, kʼauriswa ni kʼanga, hebu kuphenyererwa ni aivi. 21Maana, moyo wa mutʼu chila ukati waza pharatʼu pharipho utajiriwe.”
Mwanga wa mwiri
(Luka 11:34-36)
22Jeso waenderera kugomba achiamba, “Matsogo ndigo garigo dza taa ra mwirio. Kwa vivyo, gachikala ni mazima, mwirio wosi undakala una mwanga. 23Ela matsogo gachikala ni makongo, bee hata ao mwirio wosi nao ni seti ukale na dziza. Ndo mumo mwako ndani murimo nimukale mwanga muchikala na dziza, dziza riro rindakala riro ra gigigi kamare.”
Mwikeni Mulungu mbere hicheye
(Luka 16:13; 12:22-31)
24Jeso waamba, “Kʼakuna mutʼu aidimaye kwahikirahikira matajiri airi ukati umwenga. Maana, mumwenga undamutsukirirwa na munjine amuhenze, hebu undamusirikisa mumwenga, na yiye munjine amuphurye. Ndo kʼamwidima kumuhikirahikira Mulungu na pʼesa.
25“Ndo ninamwambira mino, mutsʼibabaikire mazagazi genu, kukala mundaryani na munweni, hebu mutsʼibabaikire miiri yenu, kukala mundavalani. Maana, uzima ndio chitʼu cha maana, kuchira leu, na mwiri nao una maana, muno kuchira nguwo. 26Lolani ara nyama a kuburuka. Ao kʼaarima na kʼaaguwa, na hebu kʼaadziikira mbeko vitsagani, ela Abayenu ariye mulunguni unaarisa vivyo. Hʼaya kafuje mwimwi murio hata muna maana muno kuchira ao nyama a kuburuka? 27Na mutsʼibabaike kwakukala, kʼakuna aidimaye kudzonjezera hata dakika mwenga kwakwe maishani kwa kubabaika. 28Na kwadze mubabaikire mavalo sambi? Hwalani mufano wa maruwa gatsamulavyo mumo mindani. Gago kʼagahenda kazi, na kʼagadzifumira nguwo. 29#1 Afal 10:4-7; 2 Mgu 9:3-6Ela ninamwambira mino, ni madzo gago genye hata Selemani mwenye na utajiriwe wosi, chisha kʼadzivikire nguwo mbidzo dza mwenga ra maruwa gaga. 30Ndo chikala Mulungu unagamanyirira hata maruwa, garigo rero ga phapho na machero ganangʼolwa, akale yiye kʼandamwidimisa mupate nguwo mwimwi? Heka mwimwi hata kuluphiro renu ni dide vino? 31Hʼaya bee mutsʼibabaike kwamba, ‘Hundaryani?’ Hebu ‘Hundanwani?’ Hebu ‘Hundavalani?’ 32Maana, gago gosi bee ndigo gazungulukirwago ni atʼu osi otsʼimumanya Mulungu. Ela mwimwi Abayenu ariye dzulu mulunguni unamanya kukala, munago haja gago gosi. 33Ndo ikani mbere maneno ga Ufalume wa Mulungu mwanzo, na hakiye, na gago gosi mundaonjezwa dzuluye. 34Na mutsʼibabaikire ga machero kwakukala, chila tsʼiku yina gakwe mai ga kutosha. Utsʼihwale ga machero ukagatsanganya na ga rero.”
सध्या निवडलेले:
Matayo 6: CHIDUR
ठळक
सामायिक करा
कॉपी करा
Want to have your highlights saved across all your devices? Sign up or sign in
