LUCAS 4
4
Ang Pagtintal kang Jesus
(Mat. 4:1-11; Mar. 1:12-13)
1Unya si Jesus nga puno sa Espiritu Santo, mibalik gikan sa Jordan, ug gidala siya sa Espiritu ngadto sa kamingawan 2sulod sa 40 ka adlaw diin siya gitintal sa yawa. Wala siya mokaon sulod niadtong mga adlawa ug pagkahuman niini, gigutom siya. 3Ug ang yawa miingon kaniya, “Kon ikaw Anak sa Dios, sugoa kining bato nga mahimong pan.” 4#Deut. 8:3. Si Jesus mitubag kaniya, “Nasulat, ‘Ang tawo dili mabuhi sa pan lamang.’” 5Unya gidala siya sa yawa ngadto sa itaas ug sa daklit gipakita kaniya ang tanang mga gingharian sa kalibotan, 6ug miingon kaniya, “Ihatag nako kanimo kining tanang kagahom ug ang ilang himaya, kay kini gitugyan man kanako ug ihatag ko kini ngadto kang bisan kinsa nga buot nakong hatagan. 7Busa, kon ikaw mosimba kanako, maimo kining tanan.” 8#Deut. 6:13. Ug si Jesus mitubag kaniya, “Nasulat kini,
‘Simbahon nimo ang Ginoo nga imong Dios,
ug siya lamang ang imong alagaran.’”
9Unya ang yawa#4:9 ang yawa: Sa Grego, siya. midala kaniya ngadto sa Jerusalem ug mipatungtong kaniya sa kinahabogang bahin sa Templo ug miingon kaniya, “Kon ikaw Anak sa Dios, ambak gikan dinhi ngadto sa ubos, 10#Sal. 91:11-12. kay nasulat man kini,
‘Siya magsugo sa iyang mga anghel mahitungod kanimo,
sa pagbantay kanimo,’
11ug nga
‘Sa ilang mga kamot ikaw ilang sapnayon
aron ang imong tiil dili maigo sa bato.’”
12 #
Deut. 6:16. Ug si Jesus mitubag kaniya, “Giingon, ‘Ayaw tintala ang Ginoo nga imong Dios.’” 13Sa nahuman na sa yawa ang tanang mga pagpanintal, mibiya siya gikan kaniya hangtod sa laing higayon.
Ang Pagsugod ni Jesus sa Iyang Pagpangalagad
(Mat. 4:12-17; Mar. 1:14-15)
14Unya diha sa gahom sa Espiritu, si Jesus mibalik sa Galilea ug ang balita mahitungod kaniya miabot sa tanang kasikbit nga kayutaan. 15Ug siya nagtudlo diha sa ilang mga sinagoga, dinayeg sa tanan.
Si Jesus Gisalikway Didto sa Nazaret
(Mat. 13:53-58; Mar. 6:1-6)
16Unya siya miadto sa Nazaret, diin didto siya magtubo, ug sumala sa iyang nabatasan, misulod siya sa sinagoga sa adlaw nga igpapahulay. Ug mitindog siya aron pagbasa, 17ug gihatagan siya ug basahon nga iya sa propeta nga si Isaias. Iyang giablihan ang basahon ug nakita niya ang dapit diin didto nasulat,
18“Ang Espiritu sa Ginoo ania kanako,
iya akong gidihogan aron sa pagwali sa Maayong Balita ngadto sa mga kabos.
Gipadala niya ako aron sa pagpahibalo sa kagawasan alang sa mga binilanggo
ug sa pagpahiuli sa panan-aw sa mga buta, sa paghatag ug kagawasan ngadto sa mga dinaogdaog,
19 #
Isa. 61:1-2 (LXX). sa pagpahibalo sa tuig nga gikahimut-an sa Ginoo.”
20Unya iyang gilukot ang basahon ug giuli kini ngadto sa piniyalan ug milingkod siya. Ug ang mga mata sa tanan nga diha sa sinagoga mitutok ngadto kaniya. 21Unya misugod siya sa pagsulti ngadto kanila, “Karon, kining bahina sa kasulatan natuman diha sa inyong pagpamati niini.” 22Ang tanan nagsulti ug maayo mahitungod kaniya, ug nahibulong sa malumo nga mga pulong nga migula gikan sa iyang baba. Sila miingon, “Dili ba anak man kini ni Jose?” 23Ug siya miingon kanila, “Sa walay duhaduha inyong isulti kanako kining maong panultihon, ‘Doktor, ayoha ang imong kaugalingon! Buhata usab dinhi sa imong kaugalingong lungsod ang among nadungog nga imong gibuhat didto sa Capernaum.’ ” 24#Juan 4:44. Ug siya miingon, “Sa pagkatinuod sultihan ko kamo, walay propeta nga kahimut-an sa iyang kaugalingong lungsod. 25#1 Hari 17:1. Apan sa pagkatinuod sultihan ko kamo, adunay daghang mga biyuda sa Israel sa panahon ni Elias, sa diha nga ang langit gitak-opan sa tulo ka tuig ug unom ka bulan ug sa dihang miabot ang dakong gutom sa tibuok nasod, 26#1 Hari 17:8-16. apan wala kanilay gipaadtoan kang Elias gawas lamang sa Sarepta, sa yuta sa Sidon, ngadto sa babaye nga usa ka biyuda. 27#2 Hari 5:1-14. Ug dihay daghang mga sanlahon sa Israel sa panahon ni Eliseo nga propeta, apan wala kanilay nahinloan gawas lamang kang Naaman nga Sirianhon.” 28Sa pagkadungog nila niini, ang tanan nga diha sa sinagoga nasuko pag-ayo. 29Nanindog sila ug giabog siya paingon sa gawas sa lungsod ug gidala ngadto sa tumoy sa bungtod diin didto matukod ang ilang lungsod, aron ilang ilabog siya sa ubos. 30Apan agi sa taliwala nila, milakaw siya.
Ang Tawo nga may Daotang Espiritu
(Mar. 1:21-28)
31Unya si Jesus milugsong ngadto sa Capernaum, usa ka lungsod sa Galilea. Ug sa adlaw nga igpapahulay nagtudlo siya kanila, 32#Mat. 7:28-29. ug nahibulong sila sa iyang pagtudlo kay ang iyang pagpanulti inubanan man ug kagahom. 33Ug didto sa sinagoga may tawo nga adunay espiritu sa usa ka demonyo nga hugaw, ug misinggit siya sa kusog nga tingog, 34“Oy! Unsay imong tuyo kanamo, Jesus nga Nazaretnon? Mianhi ba ikaw aron paglaglag kanamo? Nakaila ako kon kinsa ikaw, ang Balaan nga gikan sa Dios.” 35Apan gibadlong siya ni Jesus nga nag-ingon, “Hilom ug gula gikan kaniya!” Sa diha nga ang tawo gilamba sa yawa diha sa ilang taliwala, migula siya gikan sa tawo nga wala makahimo kaniya ug kadaot. 36Silang tanan nahibulong ug nag-ingon sa usa ug usa, “Unsa ba kining pulonga? Kay uban sa katungod ug sa gahom iyang gimandoan ang mga hugawng espiritu ug sila migula.” 37Unya ang balita mahitungod kaniya miabot ngadto sa tanang kasikbit nga kayutaan.
Giayo ni Jesus ang Ugangang Babaye ni Pedro
(Mat. 8:14-15; Mar. 1:29-31)
38Unya mitindog siya ug mibiya sa sinagoga ug misulod sa balay ni Simon. Ang ugangang babaye ni Simon taas kaayo ug hilanat, ug sila mihangyo kang Jesus alang kaniya. 39Ug siya mitindog sa tungod niya ug iyang gibadlong ang hilanat, ug kini mibiya kaniya ug dihadiha mibangon siya ug mialagad kanila.
Sa Pagsalop sa Adlaw Daghan ang Gipang-ayo ni Jesus
(Mat. 8:16-17; Mar. 1:32-34)
40Sa diha nga nagkasalop na ang adlaw, ang tanan nga adunay masakiton sa nagkalainlaing mga sakit midala kanila ngadto kaniya, ug iyang gitapion ang iyang mga kamot sa matag usa kanila, ug giayo sila. 41Ug gikan sa daghang mga tawo migula ang mga yawa nga nagsinggit, “Ikaw mao ang Anak sa Dios!” Apan gibadlong niya sila ug wala tugoti sa pagsulti kay sila nakaila man nga siya mao ang Cristo.
Nagwali si Jesus Didto sa mga Sinagoga
(Mar. 1:35-39)
42Sa pagkaadlawan na, mibiya siya ug miadto sa usa ka mingaw nga dapit. Unya ang mga tawo nangita ug miadto kaniya ug ila untang pugngan siya sa pagbiya kanila. 43Apan siya miingon kanila, “Kinahanglan nga akong iwali ang maayong balita mahitungod sa gingharian sa Dios ngadto sa ubang kalungsoran usab kay ako gipadala alang sa maong tuyo.” 44Ug siya nagwali sulod sa mga sinagoga sa Judea.#4:44 Judea: Sa ubang karaang sinulat, Galilea.
सध्या निवडलेले:
LUCAS 4: ABCEB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Philippine Bible Society, 2011
