LUCAS 17
17
Ang Sala
(Mat. 18:6-7, 21-22; Mar. 9:42)
1Ug si Jesus miingon sa iyang mga tinun-an, “Dili gayod mahitabo nga dili moabot ang mga pagpanintal sa pagpakasala, apan alaot ang tawo nga pinaagi kaniya moabot kini! 2Maayo pa alang kaniya nga higtan siya ug galingan nga bato diha sa iyang liog ug itambog ngadto sa dagat, kay sa makaangin siya sa usa niining mga gagmay sa pagpakasala. 3#Mat. 18:15. Pagbantay kamo sa inyong kaugalingon. Kon ang imong igsoon makasala, badlonga siya, ug kon siya maghinulsol, pasayloa siya. 4Ug kon sa usa ka adlaw makasala siya sa makapito batok kanimo, ug sa makapito moduol siya kanimo ug moingon, ‘Nagbasol ako,’ kinahanglang pasayloon nimo siya.”
Ang Pagtuo
5Unya ang mga apostoles miingon sa Ginoo, “Dugangi ang among pagtuo!” 6Ang Ginoo miingon, “Kon kamo adunay pagtuo nga sama sa liso sa mustasa, makaingon kamo niining kahoy nga sikomoro, ‘Maibot ug matanom ka sa lawod,’ ug kini motuman kaninyo.
Ang Katungdanan sa Sulugoon
7“Kinsa ba kaninyo, nga may sulugoon nga nagdaro o nagbantay sa mga karnero, nga moingon kaniya sa pag-abot niya gikan sa uma, ‘Ngari dayon ug lingkod sa kan-anan’? 8Dili ba ingnon man hinuon siya, ‘Andama ang akong panihapon ug andama usab ang imong kaugalingon ug silbihi ako hangtod nga makakaon ug makainom ako, ug human niini makakaon ug makainom ka na’? 9Magpasalamat ba siya sa iyang sulugoon tungod kay kini mituman sa iyang sugo? 10Mao usab kamo, sa dihang mabuhat ninyo ang tanang gisugo kaninyo, ingna ninyo, ‘Kami mga sulugoon nga walay pulos kay igo man lamang kami nga nagtuman sa tanan nga gisugo kanamo.’ ”
Gihinloan ni Jesus ang Napulo ka Sanlahon
11Sa iyang paglakaw padulong sa Jerusalem, siya misubay sa utlanan sa Samaria ug sa Galilea. 12Ug sa pagsulod niya sa usa ka balangay, siya gisugat sa napulo ka tawong sanlahon nga nagtindog sa layo, 13ug misinggit nga nag-ingon, “Jesus, Agalon, kaluy-i intawon kami.” 14#Lev. 14:1-32. Ug sa iyang pagkakita kanila, siya miingon kanila, “Lakaw ug ipakita ang inyong kaugalingon ngadto sa mga pari.” Ug samtang nanglakaw sila, nangaayo sila. 15Unya usa kanila, sa iyang pagkakita nga siya maayo na, mibalik ug sa kusog nga tingog nagdayeg sa Dios. 16Ug siya mihapa sa tiilan ni Jesus ug nagpasalamat kaniya. Ug kadto siya usa ka Samarianhon. 17Si Jesus miingon, “Dili ba napulo man ang nangaayo? Hain man diay ang siyam? 18Wala ba kanilay mibalik ug nagdayeg sa Dios gawas niining langyaw?” 19Ug si Jesus miingon kaniya, “Tindog ug lakaw, ang imong pagsalig nakapaayo kanimo.”
Ang Gingharian sa Dios
(Mat. 24:23-28, 36-41)
20Sa gipangutana siya sa mga Pariseo kon kanus-a moabot ang gingharian sa Dios, siya mitubag ug miingon kanila, “Ang gingharian sa Dios dili moabot nga inubanan sa mga ilhanan nga makita. 21Ug dili usab sila moingon, ‘Ania ra!’ o ‘Atua ra!’ Kay tan-awa, ang gingharian sa Dios anaa sa taliwala ninyo.”
22Siya miingon sa iyang mga tinun-an, “Ang mga adlaw moabot nga kamo mangandoy sa pagtan-aw sa usa sa mga adlaw sa Anak sa Tawo, apan dili kamo makakita niini. 23Ug sila moingon unya kaninyo, ‘Atua ra!’ o ‘Ania ra!’ Ayaw kamo pag-adto ug ayaw kamo pagsunod kanila. 24Kay ingon nga ang kilat mokilab ug mohayag sa langit gikan sa usa ka bahin ngadto sa pikas, mao usab unya ang Anak sa Tawo sa iyang adlaw.#17:24 sa iyang adlaw: Wala kini sa ubang karaang sinulat. 25Apan kinahanglan una nga siya mag-antos sa daghang mga butang ug isalikway niining kaliwatana. 26#Gen. 6:5-8. Ingon sa nahitabo kaniadto sa mga adlaw ni Noe, mao usab unya sa mga adlaw sa Anak sa Tawo. 27#Gen. 7:6-24. Sila nangaon, nanginom, nangasawa ug namana hangtod sa adlaw sa pagsulod ni Noe sa arka, ug ang lunop miabot ug gilaglag silang tanan. 28#Gen. 18:20–19:25. Ingon usab sa nahitabo kaniadto sa mga adlaw ni Lot, sila nangaon, nanginom, namalit, namaligya, nananom, nagtukod ug mga balay, 29apan sa adlaw sa pagpahawa ni Lot sa Sodoma, gikan sa langit nag-ulan ug kalayo ug asupri ug gilaglag silang tanan. 30Mao usab unya sa adlaw nga ipadayag na ang Anak sa Tawo. 31#Mat. 24:17-18; Mar. 13:15-16. Niadtong adlawa, siya nga atua sa atop ug ang iyang mga butang anaa sa sulod sa balay, ayaw pakanaoga aron sa pagkuha pa niini, ug mao man usab siya nga atua sa uma, ayaw na pabalika. 32#Gen. 19:26. Hinumdomi ninyo ang asawa ni Lot. 33#Mat. 10:39; 16:25; Mar. 8:35; Luc. 9:24; Juan 12:25. Si bisan kinsa nga nagtinguha sa pagluwas#17:33 pagluwas o pagpatunhay. sa iyang kinabuhi, mawad-an hinuon siya niini, apan si bisan kinsa nga mawad-an sa iyang kinabuhi, magpatunhay hinuon niini. 34Sultihan ko kamo, nga niana unyang gabhiona adunay duha ka tawo sa usa ka higdaanan, ang usa kuhaon ug ang usa mahibilin. 35Duha ka babaye maggaling, ang usa kuhaon ug ang usa mahibilin.”#17:35 Ang ubang karaang sinulat nagdugang ug bersikulo 36: Duha ka lalaki anha sa uma, ang usa kuhaon ug ang usa mahibilin. 37Ug sila miingon kaniya, “Asa man, Ginoo?” Siya mitubag kanila, “Diin gani ang patay, atua usab didto magtapok ang mga agila.”
सध्या निवडलेले:
LUCAS 17: ABCEB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Philippine Bible Society, 2011
