JUAN 7
7
Si Jesus ug ang Iyang mga Igsoong Lalaki
1Unya human niini, si Jesus milibot didto sa Galilea ug dili siya buot moadto sa Judea kay ang mga Judio naninguha man sa pagpatay kaniya. 2#Lev. 23:34; Deut. 16:13.Unya nagsingabot na ang kasaulogan sa mga Judio sa mga Balongbalong. 3Ug ang iyang mga igsoong lalaki miingon kaniya, “Biya dinhi ug adto sa Judea aron ang imong mga tinun-an makakita sa mga buhat nga imong gihimo. 4Kay walay tawo nga magbuhat sa tago kon mao may iyang tinguha nga ilhon siya sa dayag. Kon buhaton man nimo kining mga butanga, ipadayag ang imong kaugalingon ngadto sa kalibotan.” 5Kay bisan ang iyang mga igsoon wala man motuo kaniya. 6Ug si Jesus miingon kanila, “Wala pa moabot ang akong panahon, apan ang inyong panahon anaa kanunay. 7Ang kalibotan dili makadumot kaninyo apan kini nagdumot kanako kay nagpamatuod man ako mahitungod niini nga ang mga buhat niini daotan. 8Pangadto kamo sa kasaulogan. Dili#7:8 dili: Sa ubang karaang sinulat, dili pa. ako moadto sa maong kasaulogan, kay ang akong panahon wala pa mahingpit.” 9Human siya misulti niini, nagpabilin siya sa Galilea.
Si Jesus Didto sa Kasaulogan sa mga Balongbalong
10Apan sa nangadto na sa kasaulogan ang iyang mga igsoon, siya usab miadto, dili sa dayag kondili sa tago#7:10 sa tago: Sa ubang karaang sinulat, daw sa tago. lamang. 11Ug didto sa kasaulogan, ang mga Judio nangita kaniya ug nag-ingon, “Hain ba siya?” 12Ug didtoy daghang mga tabi-tabi sa mga tawo mahitungod kaniya. Samtang ang uban nag-ingon, “Siya maayong tawo,” ang uban nag-ingon, “Dili, nagpahisalaag hinuon siya sa mga tawo.” 13Hinuon, tungod sa kahadlok nila sa mga Judio walay misulti sa dayag mahitungod kaniya.
14Sa nanungatunga na ang kasaulogan, si Jesus misaka sa Templo ug nanudlo. 15Busa nahibulong ang mga Judio nga nag-ingon, “Giunsa man niining tawhana sa pagkabaton ug kahibalo nga wala man unta siya makatuon?” 16Ug si Jesus mitubag kanila, “Ang akong gitudlo dili akoa, kondili iya sa nagpadala kanako. 17Kon buot ni bisan kinsa ang pagbuhat sa kabubut-on sa Dios, kinahanglang mahibaloan niya kon ang gitudlo gikan ba sa Dios o nagsulti ba lamang ako gikan sa akong kaugalingon. 18Si bisan kinsa nga magsulti sa kinaugalingon lamang nangita sa iyang kaugalingong dungog apan si bisan kinsa nga nangita sa dungog sa nagpadala kaniya, matinud-anon ug wala diha kaniya ang pagkabakakon. 19Dili ba si Moises mao man ang naghatag kaninyo sa Balaod? Apan wala kaninyoy nagtuman sa Balaod. Nganong nagtinguha man kamo sa pagpatay kanako?” 20Ang katawhan mitubag, “Gisudlan ka ug demonyo! Kinsa bay nagtinguha sa pagpatay kanimo?” 21Si Jesus mitubag kanila, “Gihimo nako ang usa ka buhat, ug kamong tanan natingala niini. 22#Lev. 12:3; Gen. 17:10.Si Moises naghatag kaninyo sa pagtuli, dili tungod kay gikan kini kang Moises kondili gikan sa mga katigulangan, ug kamo nagtuli ug tawo sa adlaw nga igpapahulay. 23#Juan 5:9.Kon ang usa ka tawo tulion man sa adlaw nga igpapahulay aron ang Balaod ni Moises dili malapas, masuko ba diay kamo kanako tungod kay sa adlaw nga igpapahulay giayo nako ang tibuok lawas sa usa ka tawo? 24Ayaw kamo panghukom pinasikad sa makita lamang, kondili panghukom kamo pinaagi sa matarong nga paghukom.”
Mao ba Kini ang Cristo?
25Busa may mga taga-Jerusalem nga nag-ingon, “Dili ba kining tawhana mao man ang buot unta nilang patyon? 26Ug karon ania na siya ug nagsulti sa dayag, apan wala silay gisulti batok kaniya! Dili ba kaha nga ang mga pangulo nahibalo nga kini siya mao ang Cristo? 27Apan nasayod kita diin gikan kining tawhana. Apan ang Cristo sa dihang moabot na, walay si bisan kinsa nga masayod diin siya gikan.” 28Tungod niini, misinggit si Jesus diha sa iyang pagpanudlo sulod sa Templo ug miingon, “Nakaila kamo kanako, ug nasayod kamo diin ako gikan. Apan wala ako moanhi sa akong kaugalingong pagbuot. Siya nga nagpadala kanako tinuod apan kamo wala makaila kaniya. 29Ako nakaila kaniya kay ako gikan man kaniya ug siya ang nagpadala kanako.” 30Tungod niini naninguha sila sa pagdakop kaniya apan walay midakop kaniya kay wala pa man moabot ang iyang panahon. 31Apan daghan sa mga tawo ang mituo kaniya ug miingon, “Kon moabot na ang Cristo, himoon ba kaha niya ang labaw pa ka daghang milagro kay sa nahimo niining tawhana?”
Si Jesus Gipadad-an ug mga Tawo Aron sa Pagdakop Kaniya
32Unya ang mga Pariseo nakadungog sa panon sa katawhan nga nagsultihanay sa ingon mahitungod kaniya ug ang mga pangulong pari ug ang mga Pariseo nagpadala ug mga tawo aron sa pagdakop kaniya. 33Busa si Jesus miingon, “Ako makig-uban pa kaninyo sulod sa mubong panahon ug unya moadto na ako kaniya nga nagpadala kanako. 34Kamo mangita kanako apan dili kamo makakaplag kanako ug kon asa ako, dili kamo makaadto.” 35Ug ang mga Judio nag-ingon sa usa ug usa, “Asa man kaha siya buot moadto nga dili man kuno kita makakaplag kaniya? Buot ba siyang moadto sa mga Judio nga nagkatibulaag taliwala sa mga Grego ug manudlo sa mga Grego? 36Unsa may buot niyang ipasabot sa iyang pag-ingon, ‘Kamo mangita kanako apan dili kamo makakaplag kanako,’ ug, ‘Kon asa ako, dili kamo makaadto’?”
Mga Sapa sa Tubig nga Buhi
37 #
Lev. 23:36. Unya sa kataposang adlaw nga mao ang labing dakong adlaw sa kasaulogan, si Jesus mitindog ug misinggit nga nag-ingon, “Kon adunay tawong giuhaw, paaria siya kanako aron siya moinom. 38#Ezek. 47:1; Zac. 14:8.Ang motuo kanako, sumala sa giingon sa Kasulatan, ‘Gikan sa iyang kasingkasing modagayday ang mga sapa sa tubig nga buhi.’” 39Ug siya nagsulti niini mahitungod sa Espiritu nga dawaton sa mga nagtuo kaniya kay ang Espiritu wala pa man ikahatag, kay niadtong tungora si Jesus wala pa man himayaa.
Ang mga Tawo Nagkasumpaki
40Sa ilang pagkadungog niining mga pulonga, dihay pipila sa mga tawo nga nag-ingon, “Sa pagkatinuod kini siya mao ang propeta.” 41Ang uban nag-ingon, “Kini siya mao ang Cristo.” Apan dihay nag-ingon, “Maggikan ba sa Galilea ang Cristo? 42#2 Sam. 7:12; Mik. 5:2. Dili ba giingon man sa Kasulatan nga ang Cristo maggikan sa kaliwatan ni David ug gikan sa Betlehem, ang balangay diin didto si David?” 43Busa nahitabo ang pagkabahin sa mga tawo tungod kaniya. 44Ang uban kanila buot untang modakop kaniya apan walay mihilabot kaniya.
Ang Pagkawalay Pagtuo sa mga Kadagkoan sa mga Judio
45Unya ang mga modakop unta kang Jesus namalik ngadto sa mga pangulong pari ug sa mga Pariseo. Ug sila nangutana kanila, “Nganong wala man ninyo siya dad-a dinhi?” 46Sila mitubag, “Wala pa gayoy tawo nga nakasulti sama niining tawhana!” 47Ang mga Pariseo mitubag kanila, “Nalimbongan ba diay usab kamo? 48Aduna bay usa sa mga pangulo o sa mga Pariseo nga mituo kaniya? 49Apan kining mga tawo nga walay kahibalo sa balaod mga tinunglo.” 50#Juan 3:1-2. Apan usa kanila nga mao si Nicodemo, kadtong miadto kang Jesus, nangutana kanila, 51“Maghukom ba diay ang atong balaod ug usa ka tawo aron silotan bisan ug wala pa siya mapaminaw ug masayran unsa ang iyang nabuhat?” 52Sila mitubag kaniya, “Gikan ka ba usab diay sa Galilea? Susiha ug imong masuta nga walay propeta nga maggikan sa Galilea.”#7:52 Ang labing karaang sinulat wala maglakip sa 7:53 ngadto sa 8:11. Ang ubang sinulat nagbutang niini human sa 7:36, ang uban human sa 21:25 ug ang uban human sa Lukas 21:38, uban sa mga kalainan sa teksto.
Ang Babaye nga Nasakpan nga Nanapaw
[53Ug ang matag usa kanila mipauli sa iyang kaugalingong balay,
सध्या निवडलेले:
JUAN 7: ABCEB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©Philippine Bible Society, 2011
