ATITI AWM ANGCHEI NAI 45
45
Josepha ly mymy ai amjochi teng y ama hai nai
1Josepha ly paleung ka-dawn am-yh pajau y nai deaungkho y, mymy i miseaungchi ai angtheung i dengdairei theu u pawn ai nai leu pei bo. Naibaly Josepha ly mymy ai amjo amnauchi teng y ama hai nai khala, takhra khumi leaungrei py awm hai y nai ne. #Ataw 7.13 2Na i py ni i tao pajeng parai naimy vo hang nai ly Aikupta khumichi my thai u i, samrang teng y satang tym hai bo. 3Josepha my amjochi teng y, “Kai ly Josepha ne. Ngaai ly heng jo rai a?” nanai deng. Na i py amjochi ly huni leu thai baly khri pa-rei jei u nai deaungkho y ati sai py pathang u thai y. 4Naibaly Josepha my nichi teng y, “Kai teng y athui u,” napi. Nichi athui u i Josepha my, “Kai ly nangchi my Aikupta pri y jo vui nai nangchi i amnau Josepha ne. 5Nangchi ly kai ai hi y jo vui nai deaungkho y, paleung hawi y nai awm u moh; amymychi ai py kamngo apei u moh. Hini ly Tameuh my khumichi ai atleu ai nai kai ai ang pato man nai ne. 6Hini pri y takang theu nai saneng nyhrei awm khyh rai; li hlau sa ai nai hawi choh bai palo pakym achu ai nai ngo pajau y nai saneng pangrei awm rai. 7Tameuh my nangchi hawi nangchi i kangpreangchi heng thai ai nai mymy i lyh ai hawi parai nai hawimy, nangchi ai atleu ai nai kai ai ang pato man nai bo. 8Hunai deaungkho y nangchi my kai ai hini meingtym y pato nai ny y leang, Tameuh my ang pato nai teu. Mymy ly kai ai samrang i bangtang kalenra y ang khai bo. Kai ly hini Aikupta pri verei y peang nai keung ne.
9“Vai nangchi ly ngaai teng y vawi u kaliki ly ‘Tameuh my kai ai Aikupta pri verei y peang ai nai, pri peang nai keung y ang khai bo; kai teng y jeu kaliki ba.#Ataw 7.14 10Ngaai hawi vanrei cho chanauchi, katuchi, beramchi, mi-ichi, sichi hawi ngaai i yhmtheaung katui bawibawichi syn iy, kai hawi kasa nai Kosen meingtym y awmra nga u ai. 11Nangchi Kosen meingtym y awm u baly kaimy kang kry ai. Takang theu ai nai mo mang saneng pangrei awm rai; nangchi hawi nangchi i yhm dengtheungchi, beram, mi-i, sichi ai ka-lam khai ai nai kangai hai y leang,” napi.
12Josepha my, “Vai nangchi hawi leu arum nai khumi ly Josepha ne, nanai Benjamin py, nangchi bawibawi my py mei hawi niu u bo. 13Kai ly Aikupta pri y mana tanrei sa thai naira awm mo, nanai hawi nangchi i niu nai ngiereichi py ngaai teng y amti pi u. Ngaai ai py hi y jeu hai u kaliki,” napi.
14Huna nai leu taviu chum baly amnau Benjamin ai takawi iy vo bo; Benjamin py amjo ai takawi teang i vo bo. 15Naibaly amjochi ai py pachawm iy vo nai ne. Hunaibaly amjo amnauchi ly Josepha hawi leu arum u bo.
16Josepha i amjo amnauchi tym nai satang ai samrang hawi samrang i bangtangchi thai nai khala, khri pa-rei amo theu u bo. 17Samrang pharao my Josepha teng y, “Ngamjo ngamnauchi ai, mychi i keaungngo kano kasauchi tleaung y vawnsaichi tang iy Kanan pri y vawi hai ly 18mymychi i ampo hawi yhm dengtheungchi ai hini pri y vawi sy. Kaimy nichi ai Aikupta pri y hawi keh nai meingtym y awm hai ai. Nichi ly hini pri y kajeu kawi pa-rei cha ai nai nga ai. 19Nichi i aju chanauchi hawi ampo ai tang ai nai Aikupta pri i keaungngo ka-richi py syn u sy. 20Nichi ly mychi i yhmtheaungchi khai u su ai nai pasai u moh sy; Aikupta pri verei i yhmtheaung katuichi ly nichi i yhmtheaung katuichi lawm ai,” napi.
21Jakob i chapochi ly samrang Pharao my thui nai kamta sa u nai ne. Samrang i leu pei nai kamta Josepha ly nichi ai keaungngo ka-richi hawi, lam y cha ai nai teicha teineichi py pei pi bo. 22Josepha my amjochi ai ateaung athachi pei pi bawibawi nai ne; na i py Benjamin ai ly tangka chang chungvai thomrei hawi ateaung atha pangrei pei pi. 23Mymy ly ampo i vui keaungngo kano kasau horei tleaung y, Aikupta pri y hawi keh nai vawnsaichi py, takhra keaungngo kano kasau horei tleaung y ly lam y cha ai nai teicha teineichi hawi chochi py pei pi nai ne. 24Naibaly mymy ly amjochi ai lam y ajo y ai nai leu taviu chum baly, Kanan pri y vawi hai bo.
25Nichi ly Aikupta pri dengdairei theu nai Kanan pri ampo teng y tym u bo. 26Nichi my, “Josepha ly heng jo rai na a! Mymy ly Aikupta pri verei y peang nai samrang lawm bo,” nanai ampo teng y amti u. Huna nai khala y Jakob ly ym pajau y nai y mynkym vui na.
27Na i py Josepha my nichi teng y thui pi nai leu saichi ampo teng y amti pi nai hawi, Aikupta pri i nai mymy ai la ai nai Josepha my pato nai keaungngo ka-richi ai niu baly, mynkym naira i amcheng teang iy, 28mymy ly “Kai i chapo Josepha heng jo lawh na a! Kai i kadeaung nai ly angym bo! Kai dei y rai khala ni hawi avum ai nai kachei ai,” nanai thui nai ne.
सध्या निवडलेले:
ATITI AWM ANGCHEI NAI 45: KCL02
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Khumi Common Language Bible © Bible Society of Myanmar, 2005.