ATITI AWM ANGCHEI NAI 35
35
Tameuh my Bethela meingtym y Jakob ai amtheaung hai nai
1Tameuh my Jakob teng y, “Bethela meingtym y chei ly hu y awm. Ngamjo ai jei nai deaungkho y preang nai thym khala i, nang teng y amteng nai kai Tameuh i vui apathyp ai nai maicham so,” napi. #AA 28.11–17
2Naibaly Jakob ly my i yhm dengtheungchi hawi mymy hawi vanrei awm nai khumi bawibawichi teng y, “Nangchi teng y awm nai tameuh takhrachi ai ly aphi u pawn; nangmychi py apachai u ly ateaung kachaichi amthyp u. 3Achi ly hi i dengdairei Bethela mang y chei ai; kai patang naira avum nai thym khala sabawm iy, kai chei naira tleirei y kai hawi vanrei awm nai Tameuh teng y apathyp ai nai, huni meingtym y maicham sa ai,” napi. 4Naibaly nichi ly mymychi i kano amchochi py, cheng takhrachi i tameuhchi py Jakob teng y pei u i, Jakob my Sekhem mary sahawi i ngopraibiu keung anui y up bo.
5Jakob hawi my i chapochi theu u nai khala, tengpang sahawi mary i khumichi ly khri pa-rei jei u i, nichi ai hui vam y bo. 6Jakob ly mymy i khumichi hawi Luza mary y tym u bo. Vai ly Bethela napi. Huni ly Kanan pri y awm nai ne. 7Jakob ly amjo teng i nai preang nai khala, Tameuh my amteng hai nai huni meingtym ai ly Bethela, nanai pathi bo. Hunira y maicham sa nai ne. 8Rebeka ai kry nai keung Deborah dei i, veu ai ly Bethela tokalawi mang ngopraibiu keung anui y up. Hunai deaungkho y huni meingtym ai ly “meikatui tla nai ngopraibiu keung,” nanai amyn pathi bo.
9Jakob ly Mesopotamia pri i nai tym bi nai khala, Tameuh my amteng hai bi iy amtheaung hai. 10Tameuh my ni teng y, “Nang i amyn ly Jakob ne, Na i py vai dengdairei Israela napi ai,” napi. Hunai deaungkho y Tameuh my Jakob ai ly Israela, nanai amyn pathi bo.#AA 32.28 11Naibaly Tameuh my ni teng y, “Kai ly ati cheaungkhang sa nai Tameuh ne; cho chanau neangneang peung sy. Nang i dengdairei khumi cheng cheaungkhang angpreng ai i, nang ly samrangchi i amsi sangum lawm ai.#AA 17.4–8 12Kai my Abraham hawi Isaka teng y pei nai pri ly nang ai kang pei ai; nang bo y nang i kangpreangchi teng y py pei ai,” napi. 13Naibaly Tameuh ly ni teng i nai theu vui bo. 14Tameuh my leu pei nai huni meingtymra y Jakob ly pany jo ai nai leungcheng leng iy, huni salo y olive asitui hawi kreip athai hang lei i kachai sa bo.#AA 28.18–19 15Ni ly huni meingtym ai Bethela, nanai amyn pathi nai ne.
Rakeli dei nai
16Jakob hawi yhm dengtheungchi ly Bethela i nai theu iy Ephrath mary hawi palo rawm nai meingtymra tym baly, Rakeli ly deaungdi tapen ai nai achai i khri pa-rei kajeu no nai ne. 17Khri pa-rei kajeu no i, deaungdi syn nai keung my ni teng y, “Paleung mawn moh Rakeli awi, deaungdi neampacho leaungrei tapen bi bo,” napi. 18Na i py mymy ly dei enten nai khala chapo ai ly Benoni,#35.18 Benoni: Hebrai leu y “Kaimy patang hai nai chapo” nanai sai ne. nanai amyn pathi; na i py ampo my ly Benjamin,#35.18 Benjamin: Hebrai leu y “Taham hawi nai chapo” nanai sai ne. nanai amyn pathi bo.
19Rakeli ly dei bo i, veu ai ly Ephrath mary mang y chei nai lam teng y up bo; vai ly huni meingtym ai ly Bethlehem, napi. 20Jakob my pany jo ai nai hunira y lengseaung pado bo; vaini khrairei Rakeli i tapreaung angawm meingtym pany jo nai ne. 21Naibaly Jakob ly hu i nai asyh iy, Eda yhm ka-sang palem mang y meingtym sa bo.
Jakob i chapochi
(1 Neng 2.1–2)
22Huni pri y Jakob awm nai thym khala y, Ruben my ampo i aju katheang Bilaha hawi i ahawi bo. Jakob my pany nai khala y khri pa-rei kado theu.
Jakob ly chapo leaung holai nyhrei awm nai ne.#AA 49.4 23Leah my tapen nai chapochi ly Ruben, (Jakob i chapo chalu) Simeon, Levi, Juda, Isakhar hawi Zebulunchi ne. 24Rakeli i chapochi ly Josepha hawi Benjamin ne. 25Rakeli i miseaung nu Bilaha i chapochi ly Dan hawi Naphtali ne. 26Leah i miseaung nu Zilpah i chapochi ly Kad hawi Aser ne. Huni chapochi ai ly Mesopotamia pri y awm nai khala y tapen nai ne.
Isaka dei nai
27Jakob ly Abraham hawi Isaka awm nai Hebron mary sahawi Mamre meingtym y awm jo nai ampo Isaka teng y tym bo.#AA 13.18 28Isaka ly saneng chungvai atlo vui tajarei awm bo. 29Naibaly mymy ly miteaung cheang i dei bo; mymy ai ly chapo Esaw hawi Jakob nini my pavum hawi bo.
सध्या निवडलेले:
ATITI AWM ANGCHEI NAI 35: KCL02
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Khumi Common Language Bible © Bible Society of Myanmar, 2005.