THEU NAI 22
22
Peh teang nai reitachi
1“Khumi leaungrei ly si mo, beram mo, paviu iy padei nai mo py ne sy, jo vui nai mo py ne sy, si harei jeng y si pangrei, beram harei jeng y beram palyhrei, peh ai nai tla. 2-4Ni ly paviu nai deaungkho y peh ai tla nai ne. Ni ly peh pajau y lawh baly amymy ai ajo iy peh ai nai tla. Paviu nai si, beram, keaungngo kano kasauchi ni teng y kangheng avum lawh baly, ni ly nucho peh ai nai tla.
“Kangviu leaungrei ly vum y yhm ateng vau iy paviu nai thym khala, kangviu ai padei nai khumi ly kamngo tlo y leang. Na i py kani thun y paviu nai molam y kangviu ai padei lawh baly, padei nai keung ly kamngo tla.
5“Khumi leaungrei ly tawnbawichi ai li y, ti y baly kreip akho theung y teicha patlai iy, ami i li theung y teicha cha hai lawh baly, mymy i li, ti y baly kreip akho theung i hawi keh nai amti amjang hawi jeng peh teang ai nai tla.
6“Khumi leaungrei ly my i li mo, hlau mo, mai leng nai khala, kamru mai my ami i li, hlaura i chohlengchi, choh keungchi kang lawh baly, mai leng nai keung ly phra hai nai deaungkho y peh ai nai tla.
7“Khumi leaungrei my takhra khumi leaungrei teng y tangka, ti y baly vang kateng vawnsaichi au nai khala, kangviu my paviu veng iy, huni kangviu ai avum lawh baly, paviu nai keung ly nucho peh ai nai tla. 8Na i py kangviu ai avum y lawh baly, vawn kry nai keung ai Tameuh ai chiu nai meingtym y pahawi iy, khumi takhra i yhmtheaung paviu y, nanai vaineng abeu hai ai nai tla.
9“Si, beram, keaungngo kano kasau hawi ateaungchi tama nai molam y, khumi leaung nyhrei a-ei hawi lawh baly, nini leaung nyhrei ai Tameuh i mo y chih nai khala, paviu nai khumi ly nucho peh ai nai tla.
10“Khumi leaungrei my keaungngo kano kasau, si, beram hawi takhra tawnbawichi kry pi ai nai au nai khala, huni tawnbawi ly dei nai, ti y baly no nga nai, ti y baly paviu vui nai awm iy huni molam y pany nai keungchi py by y baly, 11Tameuh ai chiu nai meingtym y chei iy tawnbawichi um paviu y, nanai tawnbawi kry nai keung ly vaineng abeu ai nai tla; huna nai sa baly tawnbawi yhmkeung ly sum ai nai tla, peh ai nai tlo y. 12Na i py tawnbawi ai paviu nai keung ne lawh baly, paviu nai khumi ly tawnbawi keung ai peh teang sy. 13Kasui takai my kei nai ne baly, pany ai nai kadei veu patei pajau ai nai tla. Mawi kasi my kei nai ne baly peh ai nai tlo y.
14“Khumi leaungrei ly takhra khumi leaungrei teng i tawnbawi alai iy, yhmkeung nengniu y huni tawnbawi ly no nga, ti y baly dei vui ai na baly, alai nai keung ly peh teang ai nai tla. 15Na i py yhmkeung mei ka-niu y tamo nga nai dei lawh baly, alai nai keung ly peh ai nai tlo y; huni tawnbawi ai vang hawi alai nai ne lawh baly, alai nai vang naini pei ai nai tla.
Amkym ai nai hawi Reita leu pei naichi
16“Khumi leaungrei ly anglo leaungrei ai pom ai nai, amhm ampo teng y deng y naimy preang hai vui lawh baly, tamo muvang pei iy huni anglo ai pom ai nai tla.#Leu 22.28–29 17Na i py huni anglo i ampo my, huni neampacho hawi apom hai ai nai ngai hai y lawh baly, pajanglai tangka hawi ampo teng y peh pi ai nai tla.
18“Uimiu khawn nai neampachy ai ly padei takengkei ai tla.#Leu 18.10–11
19“Tawnbawi ai pajang nai khumi ai ly padei ai nai tla.#Lev 18.23, 20.15–16; Leu 27.21
20“Kai, Areng ai ny y naimy tameuh takhra teng y apathyp lawh baly, huni khumi ai ly padei ai tla.#Leu 17.2–7
21“Cheng takhra ai ana ai nai tlo y; ati mana nai mo na baly nangchi py Aikupta pri y cheng takhra kamta awm reng nai deaungkho y ne.#Theu 23.9; Lev 19.33–34; Leu 24.17–18, 27.19 22Neampachy lumai hawi nurochi ai ana ai nai tlo y. 23Nangchi ly huni khumichi ai ana nai deaungkho y, nichimy kai teng y kasabawmra hnei lawh baly, Kai Areng my pathang pi ai. 24Kai ly kado theu nai deaungkho y, nangchi ai tavai keung y dei hai ai. Naibaly nangchi i ajuchi ly neampachy lumai lawm ai i, nangchi i chanauchi py nuro nukai cho lawm u ai.
25“Nangchi ly kai i khumichi theung i mawn keh nai khumichi ai tangka alai ai nai pei baly, tangka paseng nai keung kamta ly ty cho moh.#Lev 25.35–38; Leu 15.7–11, 23.19–20 26Nang teng y khumi leaungrei ly ka-ym sa nai kanih khai baly, nang ly kani dym hai y naimy ni teng y pei pi teang ai nai tla.#Leu 24.10–13 27Ati mana nai mo na baly ni ly akhiu ai nai kanih harei awm khyh nai deaungkho y, ni ly mana i pajau ai mo? Ni ly sabawm ai nai kai teng y hnei takeng baly, kai ly pahen nai keung ne i kapathang pi ai.
28“Nangchi ly Tameuh #22.28 Tameuh: ti y baly tara chih nai keung. ai thui tamawn rumrang moh; nangchi i cheng lu sa nai keung ai pasawi moh.#Ataw 23.5
29“Nang i amti amjang hawi thengthai chaluchi py, kreip hang py, olive asitui py, kai teng y talam ai nai tla.
Nangchi i chapo chaluchi py kai teng y talam ai nai tla. 30Nang i tawnbawi cho chalu katai hawi beram cho katai chalu py kai teng y talam ai nai tla. Kani saryhrei ly amhm hawi khai iy tajarei kani y ly kai teng y talam ai nai tla.
31“Nangchi ly kai i chengchi ne; nangchi ly kasui takaichi my kei nai amso tawnbawi mawi ly cho u moh. Uichi ai phai pacho u.#Lev 17.15
सध्या निवडलेले:
THEU NAI 22: KCL02
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Khumi Common Language Bible © Bible Society of Myanmar, 2005.