JOHAN 2
2
Kana Phulo Kulakupu
1Atsala akuthuni Galil yeghilo Kana ipikeu phulo kulakupu lakhi shia eno Jisu paza ghi tile ae, 2Jisu ngo pa khopemi ghi kulakupulo ku-sue. 3Kughou atsayiji peitha zulave keno Jisu pa zano pa vilo pi, “Panonguye atsayiji kuhavae.” 4Tile Jisu no li khochile. “Totimi-o noye ivilo kiu pi kepu ani kya? Ido tomphie.” 5Tishive puzu pa zano lokijimi vilo pi, “Pano nongu vilo kiu shilo pini keno ti shilo.”
6Judami chineyehlo qhukimthe chekeu ghenguno azutughuko tsugho tilehi ghope pua, atughuko lakhi khilo azu ahughi shighiano chhilukepuke. 7Jisu no lokijimi vilo pi, “Atughuko hipaqolo azu puwo chhitoi lesulo.” Ike panonguno tipaqolo chhitoi lesu. 8Jisu no panoqo vilo pi, “Itehiye tipau lono kitila shophe puzu aghulhu peithatsuakeu lau pesu wulo.” Ikelo panonguno pa lau tipau pesu wu. 9Aghulhu peitha tsuakeuno azuno atsayiji ilhovekeu michejuno tiye khilano ighikeno paye mthae, lokijimi khunoqono azu shopesu wukeno tipaqoye ithiae, ike aghulhu peithatsu akeu huno kulapuu ku puzu 10pa vilo pi: “Timi kumtsuno atsayiji akiviu paghi peitha cheni eno timiqono khenguyi shove kethiuno shokusa tsayiji peitha cheni. Ikemu noye itehi kutolo atsayiji akiviu puaphi.” 11Jisu no amchipu kumla shikeu gholo hino atughushi Galil yeghi lo Kana phu lono shike, eno pa kimthe jukuvu pephepiyeno pa khopemino pa puluve.
12Hipa thiu Jisu no pa za ngo pa thikuzumi eno pa khopemi sasu Kapernaum lo iqive, eno tilau ghulo kinia-kuthua ngove. #Mt 4.13
Jisu Achinekilo Wukeu
(Mt 21.12-13; Mk 11.15-17; Lk 19.45-46)
13Judamino Hechekulu Ghulhu shichekeu ghuloki kupunuve kehu Jisu no Jerusalem lo iqho. #Ipe 12.1-27 14Tile achinekilo amshi jekemi, bheri jekemi, kobutur jekemi eno pisakilitsu akemino kibepu-alo ngo aghikeu Jisu no ithulu. 15Ike ghaqhikepu kichhe-kighi lakhi pesu Jisu no achineki lono tipaqo kumtsu haphe, eno tipaqo gholono bheri ngo amshi ngo ishi haphe, eno pisa kilitsu akemiqo pisa muno pano kuzalevetsu eno panongu kibepu-a tukulovetsu. 16Eno kobutur je akemi vilo pano pi, “Hileno tipaqo suwuvelo, iPuh ki pesu nonguye alhikishiki shitsu kevilo!” 17Kuchoyesulo ishi pipuakeu pa khopemino kumsuchilelu: “O Alhou, ino ochineki ghenguno alokumsushi akeu huno ami toi ipitiqhike.” #Leshe 69.9
18Ikelo Judamino pa ghechileghi iniju, “Noye amchipu kiu ni piyelukepu ani keno hikithipu shi ani kya?” 19Jisu no khochile: “Achineki hipau xavelo eno ghulo kuthu dolono ino shipuku kitheve nike.” #Mt 26.61; 27.40; Mk 14.58; 15.29 20Tileno Judamino ishipi, “Achineki hipau shikelo ampe lhobidi tsugho luke. Noye ghulo kuthu dolono hipau shipuku kitheluni kesha?”
21Ikemu Jisu no achineki piakeu huye pa phimpi piake. 22Tighenguno kughou akithi lono pa xuputhuve keno paye hipau piakepi pa khopemi no kumsuchilelu, eno panonguye kuchoyesu eno Jisu no pipuakeu tsa pululuve.
Jisu ye Timi kumtsu Ithi ani
23Hechekulu Ghulhu lo Jisu no Jerusalem lo akelo, timi kutomono pano amchipu kumla shikeu ithulu puzu panonguye pa shou pulubeluve. 24Ikemu Jisu ye timi kumtsu akivishi ithi ake ghenguno panoqo shou pulukibe kuhae. 25Khunomu timi vehu pesu pa vilo piakepu avehupu kuhae, kughengu timi lolo kiu anikeno pano akivishi ithiae.
सध्या निवडलेले:
JOHAN 2: SUMIBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
