Pi zi tiki 4
4
Kayin gaini Abel
1Adam a fana gaiɗi Eva na munini, te tika fel, te wa Kayin, te muɗa: Gaini EPIƊ-ƊAI mu wa ɗif ktai. 2Te wa Abel na tawalni pra, Abel ɗa a ɗif zi giɗimi adumai, Kayin ɗa a ɗif zi hirim lai. 3Girvudi ktai, Kayin a ka ɓaka n'a zaŋ gaini wazagai na war vowaini wiini EPIƊ-ƊAI. 4Abel ɗa a ka alini adumai n'a wa avut war farani ɗa aŋ ɓaka gaini emelni lai. Arni EPIƊ-ƊAI a yima Abel gaini ɓakani ɗa. 5Amma a bunda arni edi sini Kayin gaini ɓakani par lai.
Kayin a bunda hi gara arni a yima amai kai. 6EPIƊ-ƊAI a miɗini wiini Kayin: Tuku, ku za hiy buri maɗa? Arku a yima amai kai buri maɗa? 7Na ɓa ku za pɗem aga ku rɗa amai, na ɓa ku za pɗem kai ɗa, tuwur a na ruɓtuku mini hlaiku, a dara a yimuku, amma a pɗem ɓa ku rɗa amai midini. 8Kayin a miɗini wiini Abel na tawalni: Hulumu gunumusi yawwa. Won hlai n'e cû edi war baŋa ɗa, Kayin a faka sini Abel na tawalni, a fuɗaŋ edi. 9EPIƊ-ƊAI a miɗini wiini Kayin: Tawalku Abel ɗa aŋ wata ɗa? A waya seŋ a muɗa: Mu sɗa kai, mu ɗif zi giɗimi tawala ɗi? 10Alaw a muɗa: Ku za ɵa ɗa a maɗa? Felni tawalku a ɗuulasi haa amai sa ta, 11Tiyana par ku tusa li gaini afti n'a mala mini edi aŋ yima felni tawalku na ku fuɗaŋ edi war tuku par ɗa. 12Won hlai n'aga ku hirma afti ɗa aga a suku warni kai, aga ku hina blaŋ blaŋ, ku zogo hlai paŋ midini afti.
13Kayin a miɗini wiini EPIƊ-ƊAI: Girŋa ɗa a guma gara a kiɗa a luba gaya kai. 14Na ɓa girna, ku burgaŋa li edi midini afti hanɗa par, arku aga a kiɗa sa kai, aga mu hina aŋ hili blaŋ blaŋ, aga mu zogo hlai paŋ midini afti; asiya ɗi paŋ n'a navaŋa li ɗa aga a fuɗaŋa. 15EPIƊ-ƊAI a miɗini: Zaw kai, na ɓa a fuɗuku li, a vurguku, e fiɗi ɗai azuku muguzak. EPIƊ-ƊAI a tika wala zi siŋki miɗini Kayin ta kapai ɗif n'a navaŋ a fuɗaŋ kai. 16Kayin a yima sini edi wuzani arni EPIƊ-ƊAI par, a sumna midini afti na Nod, tini Eden war gal na piɗi futi na dawai par.
Pinzibani Kayin
17Kayin a fana gaiɗi munini, te tika fel, te wa Henok. Kayin a rga fuŋ n'abai ktai, a sini yikini Henok maini yikini ahini nɵa. 18Henok a wa Irad, Irad a wa Mehuyayel, Mehuyayel a wa Metusayel, Metusayel a wa Lamek.
19Lamek a mula falakai sulu, na ktai yikiɗi ɓa: Ada, na zamai Silla. 20Ada te wa Yabal, ni a epiɗi nagai n'e simni pini gumu gaini farani faraiɗi, 21tawalni yikini Yubal, ni a epiɗi nagai n'e ɵiɓi adill gaiɗi nagai n'e yibi algaita. 22Silla zaw ɗa te wa Tubal Kayin, a ɗif zi gɵi fai fai, a epiɗi nagai n'e gɵi kiya gaini kawai, tawalni na muni yikiɗi Naama. 23Lamek a miɗiɗi wiiɗi falakaini: Ada gaiɗi Silla ɵini, falakaini Lamek zigi ɵimaki mini seŋ na mu muɗaŋ, na ɓa ɗif a ɵoɗoŋa sa li edi ɗa, mu fuɗa ɗif, ɗif a zaŋa wuruk li ɗa, mu fuɗa arwagwi lai. 24Aftini, Kayin e virgiŋ azi muguzak, amma Lamek azi doogo doogo muguzak pi muguzak. 25Adam a fana gaiɗi munini pra, te wa ahi ktai a sini yikini ɓa: Set, buri ɓa Alaw a saŋasi pinziba zamai ktai war balamni Abel buri Kayin a fuuɗaŋ su. 26Set a wa ahi ktai lai, a sini yiki ɓa: Enos. War mefeŋ ni par, ɗai e tiki piɗi aŋ siiwi Alaw, e yikiŋ ɓa: EPIƊ-ƊAI.
सध्या निवडलेले:
Pi zi tiki 4: MUSGUM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964