Mataio 3
3
Ioane Babatisoꞌa Iesu ibi Ruhiniro
(Mareko 1:1-8, Luka 3:1-18, Ioane 1:19-28)
1Eꞌe madaḡano Ioane Babatisoꞌa Iudea habaꞌano haba bohaꞌa onaadu haramiro, raenaꞌa, 2“Sauꞌanonoꞌo ḡihuroꞌi, mazaḡa Badiꞌaꞌa ibitoziniꞌeteꞌe madaḡa ꞌai haniteha.” 3Ibite peroveta vazeḡa Isaiaꞌa Ioane Babatiso moneo ꞌahige reiro, raenaꞌa,
“Vaze ꞌahoganiꞌa haba bohaꞌano huauꞌohe, raenaꞌa,
'Zuhiꞌa Boroꞌa onaꞌiuma! Ani ibi ruhiboꞌi, zu ani veize ibi mae dudunoꞌi.'”#3:3 Isaia 40:3
4Ioane dabuaꞌe kamelo ogaḡa hina haḡairo zu boromakau ogaḡa miniḡa hina gabaiḡano utiro. Ebu fihore zu Avore godaga aro. 5Ierusalemaonoꞌo, Iudea habaꞌa niduꞌanonoꞌo zu Ioridana vuḡa ḡenaḡa neḡa niduꞌanonoꞌo vazevazeꞌa Ioane vaḡe onamiro. 6Ebu zeꞌa sauꞌaze rae furenirotene Ioridana vuḡano bapatizoziro.
7Farisea azaḡa zu Sadukea azaḡa ḡehaḡaniꞌa bapatizo mouga radu Ioane vaḡe onairo. Ebu aniꞌa ze horozirotene ziro, raenaꞌa, “Zaꞌe Zarama ubugaubuga heuḡa! Vazeꞌa zae mazao, 'Badiꞌaꞌonoꞌo maḡunuꞌa onaine ferau muhinoꞌi,' rae reiro. Rehano feranogaꞌe mene idaraꞌuma. 8U ibite haḡai sau'aono'o ḡihuriroteꞌe haḡaiḡa furenoꞌi. 9Ebu ago ꞌahige zamaroꞌi, 'Emeꞌe Aberahamo mariga, eꞌanoꞌo Badiꞌaꞌa mene maḡunofiꞌuma.' Mazaḡa, e ziꞌohe, Badia'a hadi ꞌadi hina Aberahamo mariga haḡaine zuni idaḡa. 10Izidi Badiꞌaꞌa ḡiro 'ai ire taigano teha. Eꞌanoꞌo huga manoḡa mene iniꞌeteꞌe ireḡa niduꞌa'e udi higonadu ire rogao feuniꞌuma.
11Zaeꞌa sauꞌanonoꞌo ḡihurine, eꞌe tahiḡa veize, eḡeꞌa vu hina bapatizoziꞌohe. Rehano eḡe ḡaruna onaiteꞌe vazeḡa ani gigiꞌaniꞌe ufeta ḡihiꞌa. Aniꞌe eḡe vitihoga. Eḡe'a ani tamaka odoheꞌeteꞌe tuḡureḡa vazeḡa rae rouga zuni mene idaḡa. Aniꞌe Vine Zaḡoḡa ebu ire roga hina bapatizoziꞌuma. 12Maho hiriveꞌeteꞌe madaḡano, vazeꞌa kari hina rouḡa tenadu maho huꞌiꞌohe, ebu iguḡa manoneꞌohe zu meba hare deheneꞌohe.#3:12 Girikio, Vuidi hiriveꞌeteꞌe hariḡa idaidaḡa Ebu hugaꞌe nuꞌonadu suaba zamaḡano tiꞌohe, rehano iguḡaꞌe mene vidauꞌeteꞌe ire rogaḡano hufi haoneꞌohe. Eꞌe teige, Badiꞌaꞌa vazevaze rovoziꞌuma.”
13Eꞌe madaḡano Iesuꞌe Ioaneꞌa bapatizonoga radu Galilea habaꞌanonoꞌo Ioane vaḡe Ioridana vuḡa onairo. 14Rehano Ioaneꞌa Iesu garariro, raenaꞌa, “Ḡaeꞌa eḡe bapatizohifo. Nougaꞌahi ḡaꞌe eḡe vaḡe onaeha?” 15Iesuꞌa naenaeniro, raenaꞌa, “Izidiꞌe ꞌouge haḡaoꞌi. Eme Badiꞌaꞌa urateꞌeteꞌe haḡaiḡa niduꞌa haḡaifine, ꞌougiꞌuma.” Ebu Ioaneꞌa Iesu ḡoere mae ḡihinadu bapatizoniro. 16Iesu bapatizoniroteꞌe enogano ani vuonoꞌo gaba tire onamiro. Tire onamirotene, adureꞌa bohatanadu Iesuꞌa Badiꞌa Viganiꞌa Tubugo niniḡa teige ane vaḡe ovairoteꞌe horoniro. 17Ebu ago ꞌahoganiꞌa adureꞌono'o ḡoeriro, raenaꞌa, “ꞌAdiꞌe eḡe ubude. Eḡeꞌa zamare borofeꞌohe. E ani mazao matu'e rudau'ohe.”
सध्या निवडलेले:
Mataio 3: KSJ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Wycliffe Bible Translators, INC.
