CHABANGCHAM 4
4
Cain nai Abel
1Sichiujiu Adam niu panao Eve tu nphiuji khaide, siga pah pawon phung mide. Paniu panah npiumai khat manalujiu din-e, “Rapiu niu nkha khaibo gasu Iniu npiumai nah khat daolude.” Sichiujiu paniu pazanse Cain mathak khaide. 2Pasai paniu npiumai nah khat, Abel tu lunglan-e. Abel niu mily khuanmai khat thiukhang-e, khatdi Cain niu chalu tien thiumai khat thiukhang-e. 3Wathengkha sai Cain niu palu atiat lubo gasu miusy phungwang Rapiu khuga kadkhai-e. 4#Heb 11.4.Sigasu Abel niu pagu piangraithubo mily khattu kamshat lujiu withubo damse kadkhai-e. Rapiu niu Abel tu khatdi pagu kadkhaiboga pachun kimde. 5Chiudi Cain tu khatdi pagu kadkhaibo situ lukhai makge. Siga Cain palung pomchang pom mide, chiujiu palung pomboniu pazu mangtik mide. 6Siga Rapiu niu Cain khuga din-e, “Nang dekamjiu nalung pomjiulo? Dekamjiu nalung pombo siniu nazu mangtik bamjiulo?” 7Nangniu majibose kamkhai bamsai, nang nuibam rabo-e,#4.7: nuibam rabo-e: maksai Iniu nagu kadkhaise lukhai bamniu rabo-e. chiudi kasabose nangniu kamkhai mide, nuan haise nagu kamun mungga maju bam-e. Haisiniu natu mawangnijiu bam-e, chiudi haisitu nangniu ngamsiak rabo-e.
8 #
Mt 23.35; Lk 11.51; 1 Jn 3.12. Sigasu Cain niu pasaikariupiu khuga din-e, “Anai chalulam mengkhe,” Panai chalulam tadbo gasu Cain niu pasaikariupiu Abel tu kamshat mide.
9 Rapiu niu Cain khuga maniu-e, “Nasaikariupiu Abel delam bamlo?”
Paniu paokakge, “I simakge, Iniu asaikariupiutu alukin jiuma?”
10 #
Heb 12.24. Siga Rapiu niu din-e, “Dekamjiu nangniu haikumbo kasabo ngamse kamjiulo? Nasaikariupiu zai siniu kadih gasu chakhum lukhaira dinbo khuan siniu atu kujiu bam-e. 11Nang tasiang hangga bam mide, nang wadaodi tatien tentiu silak mide. Nangniu nasai kariupiutu kamshat mibo jengniu, haise pazainiu chungkham mide. 12Nangniu alin-tara lingkhai bamdi kadih-tam siniu wadi lungpad ngamlak mide, kadihpiriga naky hajiu rontadjiu lungra mide.”
13Siga Cain niu Rapiu khuga din-e, “Haibo sajaise aleng kungju-e, I phungtad lakge. 14Nangniu atu nakhu gasu khatdi haibo kadih gasu hathon mide. Kadihpiriga aky hajiu Iniu rontad kinsai, atu kadaomai siniu kamshat mirabo-e.”
15Chiudi Rapiu niu paokakge, “Sichiu lakge, mai khat kumboniu natu kamshat misai, Iniu chakhum ruilon chinnia khai rabo-e,” Sichiujiu mai khatniudi kamshat makra Cain khuga kam tasi khai bide. 16Sichiujiu Cain niu Rapiu khugasu tadmide, khatdi Eden gu tingbanglam “Rontadbo” chiu kubo kadih gase lung mide.
Cain Kaikikdung
17Cain nai panaoniu panai nah npiumai khat lung-e, pazanniu Enoch chiu ku-e. Siga Cain niu namdi khat thiukhang lujiu, sise panah zan champonjiu mathak khai-e. 18Enoch niu piumai nah khat lung-e, pazanniu Irad chiujiu mathak khai-e, pahai Mahujael piu-e, khatdi Mahujael niu piumai nah khat lung-e, pazanniu Mathushael chiujiu mathak khai-e, pahai Lamech piu-e, 19Lamech niu panao nia thiu-e,, panai zan siniu Adah nai Zillah chiu-e. 20Adah niu Jabal tu mana-e, pahai chakhao maruijiu mathenkyga lungmai paopeh si-e. 21Pasaikariupiu Jubal hainiu chalui kathiumai khatdi nthiam nai tara thinmai paopeh si-e. 22Zillah niu Tubal Cain tu mana-e, pahai chagi khatdi tanaagi gasu wa mania hina kampadbo piu-e. Tubal Cain tanpui khat bam-e, pazanniu Naamah chiu ku-e
23Lamech niu panao kania khuga din-e,
Adah nai Zillah yo, alad nkinglo,
Iniu akhangmai khattu kamshat mide,
palamra paniu atu dapbo gasu-e.
24Cain tu kamshatboga khang chinniatu kamshatne chiusai,
atu kamshat maitura khang riakchinnia-je-chinniakiu kamshat rabo-e,.
Seth nai Enosh
25Adam nai panao siniu npiumai nah khat lung lan-e. Siga paniu din-e, “Cain niu kamshat mibo sung Tingwang niu aleng npiumai nah khat pikhai lande.” Sichiujiu paniu patu Seth#4.25: Seth: Hebrew Ladga “pikhaibo” chiubo-e. chiujiu kukhaide. 26Seth niu npiumai nah khat lung-e, paniu pazan Enosh chiu mathak khai-e. Haichiujiu chamaina hainiu Rapiu zan masanbo hai kahumjiu thin sude.
सध्या निवडलेले:
CHABANGCHAM 4: LIANBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.