Luka 22
22
Long'we ya kūmūlaga Yesu
Mat 26:1-5,14-16; Mko 14:1-2,10-11; Yoh 11:45-53
1Hūna lūūlū shegeela kūshika shigukulu sha migatī ītī na shibimbya, īsho shikitanagwa pasaka. 2A bagabīji bataale na a balangi ba shilagīlo būsangwa bakūkoobaga nzīla ya kūnyagaja ū Yesu; gwike baalī babogoha a banhū. 3Ū Shetani ūng'wingīla Yuda, ūyo witanagwa Isikaliote; walī ūmò wa babo ikūmi na babīlī. 4Hūna ū munhū ng'wenūyo ūja kū bagabīji bataale na balang'hani ba hekalu, ūūkalomana nabo ūmo alaboolekegeje ū Yesu bandime. 5Bakayega no, bizunīlīja kūng'winha hela. 6Nang'hwe wizunīlīja nabo mīlī ngima; wandya na kūkooba ng'wanya gwa kūboolekeja, balandime aho ibita lya banhū lītīho.
Kūlonja lonjiwa kwa pasaka
Mat 26:17-19; Mko 14:12-21; Yoh 13:21-30
7Hūna lūshika lūshikū ūlo lwalī lwa migatī ītī na shibimbya; ūlo shiigelile īsīnzwe ī ng'holo ya pasaka. 8Ū Yesu ūbatūma ba Petelo na Yohana; ūhaya, “Jagi mukīlonja lonje ī pasaka tūlaalye.” 9Būmūja gīkī, “Ūtogilwe tūje halī ūko tūkīlonja longeje?” 10Ūbawīla, “Jagi ū mu nzengo, ūlū mulashike mo mukūmona ngosha aseselile lūnno lwa minzī; nondeelagi mukingīle ning'we ū mu numba īyo alakingīle. 11Ūlū ng'ūshika ng'wīlagi ū ng'wenekīlī kaya gīkī, ‘Ū Nangi alībūja: Shilī halī ī chumba sha bageni ūmo nakūlīīla pasaka hamò na bahemba bane?’ 12Akūng'oolekeja chumba shitaale shilī kū golofa shigolanije ng'hana ng'hana, lonja lonjagi ng'wenūmo.” 13Aho baja būsanga gīt'ūmo akabawīlīla, ng'hana bīlonja lonja ī pasaka.
Kūtūūlwa sangīla
Mat 26:26-30; Mko 14:22-26; 1Bk 11:23-25
14Lyahayūshika ī likanza, wigasha kūlya shilīwa hamò nabo a batūng'wa bakwe. 15Ūbawīla gīkī, “Naalī na ng'hūmbū ningī no ja kwīlya hamò ning'we ī pasaka yenīyī, kūko nataalī kūluhiwa. 16Nguno nalīmuwīla gīkī natīlya hangī, kūshisha aho īkūshikīlījiwa mu būtemi bo ng'wa Mulungu.” 17Hūna ūsola shikombe; aho wamala kūlūmba, ūbinha alīhaya gīkī, “Anukūlagi mugabanhe, 18nguno nalīmuwīla kūfuma haha, natūng'wa hangī matwajo ga nzabibu kūshisha būshike ū būtemi bo ng'wa Mulungu.” 19Ūsola na ngatī, aho wamala kūlūmba ūgūmeganya; ūbinha kūnū alībawīla gīkī, “Ū gwenūyū mīlī gwane, ūyo gūlīfunyiwa kūlwa nguno ying'we, mulīītage gīkī kūlwa kūnizūkwa.” 20Aho bamala ū kūlya, nī shikombe wīta gīko; ūbawīla gīkī, “Ī shikombe īshi shilī ilagane ipya mu mininga gane, ayo galidīka kūlwa nguno ying'we. 21Gwike managi gīkī, ū nkono gwakwe ū nodeeji wane gūlī hamò nane a ha meza aha! 22Ū Ng'wana wa Munhū ajile gīt'ūmo īhelelilwe, alīyo alī mu kwihīga kūtaale no ū munhū ūyo alīnodeela!” 23Bandya kwibūja boi benekīlī gīkī hīmba nani ū mubo ūyo wahayaga kūgwīta ū mhayo gwenūyo!
Yombo kūlwa būtaale
24Kūhayimanīla yajūūka yombo a ha gatī yabo; baliyoja gīkī hīmba nani ū mubo igeleelilwe kūbiza ntaale wabo. 25Nang'hwe ūbawīla, “A batemi ba mahanga h'abo bakabizaga bataale; na a basugi babo bakakumīlījiagwa gīkī bashilela mhīna. 26Alīyo ū kū bing'we ītī gīko, ū ntaale mu bing'we ni abizage gītī hū ndo, ū nsugi nang'hwe abize gītī ntoneeji. 27Angū ū ntaale ni alī; ūyo igashije akūlyaga shilīwa, nūūlū ūyo akūtagambaga na būtoneeji? Atī ūyo igashije? Īlī gīt'ūmo nalī ū nene ū mu bing'we; nalī gītī ntoneeji! 28Alīyo a bing'we h'abo mulī hamò nane ū ng'wikanza lya kūgeng'wa kwane pyī ī lyose. 29Na lūūlū nū nene namubīkīlile būtemi gīt'ūmo Baba anibīkīlile ū nene; 30gīkī mulabize ba kūyūlya na kūng'wa hamò nane a ha meza yane ū mu būtemi bone. Nīyo muligashe ha masumbī ga būtemi, mubize balamuji ba ng'anda ikūmi n'ibīlī ja Baisilaeli.”
Petelo akūnema Yesu
Mat 26:31-35; Mko 14:27-31; Yoh 13:36-38
31“Simoni bebe Simoni, managa gīkī ū Shetani alī na ng'hūmbū no no no ja kūmusūngūla gītī būsīga. 32Alīyo naamalile kūkūlombela, gīkī ū kūzunya kwako kūtizūchabagīla. Ū bebe ūlū ūlanigalūkīle, ūkūbaguzuhya na a baana bang'wing'we!” 33Ū Petelo ūnshokeja gīkī, “Seeba angū nīyo ū nene nazunije nūūlū kūtungwa hamò nang'ho, pyī nūūlū kūcha nang'ho!” 34Nang'hwe ūhaya, “Petelo nalīkūwīla ī lelo īyī ītūhīla ng'hungulume aho ū bebe ūtaalī kūnilema ng'hangala idatū gīkī ūtanimanile.”
Ikanza lya kūsola shilanga
35Hūna ū Yesu ongeja kūbawīla gīkī, “Aho nakamutūma kūja mutī na mbogoshi, nūūlū mfuko, nūūlū shilatū, mukagehelwa shikolo?” Būhaya, “Tūtagehelilwe.” 36Hūna ūhaya, “Alīyo ī haha, ūyo alī na mbogoshi ni īsolage, nū yūyo alī na mfuko nang'hwe īīte chene; ūyo atī na lūshū ni ajinjage nūūlū shizwalo alūgūle. 37Nguno nalīmuwīla shiigelile gūshikīlījiwe ū mhayo ūyo gwandīkilwe kūlwane; gīkī, ‘Akabalanījiwa mu bagomi’. Na ng'hana īyo nahelelilwe shiigelile īshikīīle a ha būkalīkījo wayo!” 38Nabo būng'wīla, “Seeba tūlī najo shū ibīlī a henaha.” Nang'hwe ūbawīla, “Jigelaga lūūlū ī jenījo.”
Kūlomba mu lūgūlū lo mizeituni
Mat 26:36-46; Mko 14:32-42
39Aho wīnga a henaho, ūja kū lūgūlū lo mizeituni, gīt'ūmo wītīlaga na kale; na a bahemba bakwe būnondeela. 40Wahayūshika ū kwipandī lyenīlo ūbawīla gīkī, “Lombagi mutizingīla mu kūgeng'wa.” 41Hūna ūbīngīla, ūja kabbaala ka bū kūle gītī bo kūluuta kawe. Ūūkatuja mazwi wandya kūlomba; 42Ūhaya gīkī, “Baba ūlū ūlīzunya nīngījage ī shikombe shenīshi! Gwike ītī gīt'ūmo natogelilwe nene, alīyo īyo wītogilwe bebe hū yene īshikīlījiwe.” [ 43Malaika ūng'wilongela kūfuma ng'wigūlū, wiza ūnguzuhya. 44Kūlwa kūsaatwa kūtaale, walombaga na būjangīīzu no no no, mu kwifunya kose; kūshisha lūyīlo lūyūtoona ha sī, gītī mamote ga mininga!] 45Wahayūbūūka aho walombelaga, ūja aho baalī a bahemba, ūbasanga balaalaga, nguno ya būpīna. 46Ūbawīla gīkī, “Nibūlī ng'walaalaga? Būūkagi mulombe, mutizingīla mu kūgeng'wa!”
Kūlodeelwa na kūding'wa kwa ng'wa Yesu
Mat 26:47-56; Mko 14:43-50; Yoh 18:3-11
47Aho ataalī ūyomba, kūhayimanīla lyashika ibita alītongeelile ū Yuda, ūyo walī ūmò wa babo ikūmi na babīlī. Ūng'wegeela ū Yesu kūmbipa! 48Nang'hwe ū Yesu ūng'wīla, “Yuda ū Ng'wana wa Munhū ūlīnodeela bo kūmbipa?” 49Abo baalī nang'hwe ū Yesu aho babona yaja gīko; būhaya, “Seeba tūbamamaaje shū!” 50Na ng'hana ūmò wabo ūhubenga līlūshū, lyūbītīla gūtū go būlyo go ntūmami o ntaale wa bagabīji; gūtīnīka! 51Nang'hwe ū Yesu ūshosha, “Lekagi ī gīko.” Ūgūkuumya ū gūtū, ūmpīja. 52Hūna ū Yesu ūbawīla a bagabīji bataale na a balang'hani ba hekalu, pye na a banamhala abo baalī biza kūndima; ūhaya gīkī, “Ng'wiza na mapanga na milang'ha gītī kūdima nsambo! 53Īkī būlī lūshikū nalūdīlaga hamò ning'we mu hekalu, alīyo ng'walī mutūgemaga ū kūnidima. Gwike īlī līlī ikanza ling'we na lya būdūla bo giiti!”
Petelo kūnema Yesu
Mat 26:69-75; Mko 14:66-72; Yoh 18:15-18,25-27
54Aho bandima būntwala kū ng'wa ntaale wa bagabīji; nū Petelo ūkūūbīja bo ka kūle. 55Bahayūshika būbacha moto ha gwalugwa bigasha; nang'hwe ū Petelo wiza hoi wigasha hamò nabo. 56Aho igashije gīko, ntūmami nkīma ūmona kūlwa būpe bo moto, ūnkalalīla; kūhayimanīla wahaya, “Nū yūyū walī hamò nang'hwe!” 57Ūlema no; kūnū alīhaya gīkī, “Bebe mayū, ū nene nataamanile ū munhū ng'wenūyo!” 58Aho kabīta kakanza kado ūngī ūmona; nang'hwe ūhaya, “Tūhaya nū bebe ūlī ūmò wabo ahene!” Nang'hwe ū Petelo ūhaya, “Bebe ngosha, natī ng'wene!” 59Lyahayūbīta hangī ikanza gītī lya sa īmò, ūngī hangī wandya kūhaya, nīyo alīfunya na būkaanīji gīkī, “Ī gete ng'hana nū ng'wenūyū walī hamò nang'hwe, angū nīyo nang'hwe muna Galilaya!” 60Ū Petelo ūhaya hangī gīkī, “Bebe baba, ū nene natūgūmanaga gete ūyo ūlīgūhaya!” Aho wakalīcha dūhū ū kūyomba gīko, haho na haho yūhīla ng'hungulume. 61Nang'hwe ū Seeba wikībūka ūnola ū Petelo; ū Petelo ūgwizūkwa ū mhayo go ng'wa Seeba ūyo walī wang'wīla gīkī, “Ī lelo ūkūnilema ng'hangala idatū aho ng'hungulume ītaalī kūhīla!” 62Gūnchima no, ūfuma hanze ūūkalīla mu kūsaatwa kūtaale!
Yesu ng'wibanza lya Bayudaya
Mat 26:57-68; Mko 14:53-65; Yoh 18:19-24
63A banhū abo banang'hanaga ū Yesu bandya kūngīmba nyachilū na kūntūla, kūnū 64bankundīkījaga ū kū miso; hūna bang'wīla gīkī, “Alimanījaga nani wakūtūla!” 65Būyūmponangīja na mihayo yīngī mingī ya kūnsondagūla! 66Aho wela, a banamhala na a bagabīji bataale na a balangi ba shilagīlo bikobya, hūna wenhwa ū Yesu ng'wibanza lyabo. 67Bandya kūng'wīla, “Bebe tūwīlage ūlū ūlī Kilisito;” nang'hwe ūbawīla gīkī, “Al'īkī nahene nūūlū nakamuwīla mutīko ū kūzunya. 68Hama nūūlū nūmubūja mhayo nahene hangī mutūdūla nūūlū kūnishokeja. 69Gwike kūfuma haha ū Ng'wana wa Munhū akūbiza igashije kū nkono gwa būlyo gwa nguzu, gwa ng'wa Mulungu.” 70Pye a bose būhoolanīja kūhaya gīkī, “Ū bebe hū ūlī Ng'wana wa ng'wa Mulungu?” Nang'hwe ūbawīla, “A bing'we h'abo mulīhaya nalī ng'wene.” 71Hūna būhaya gīkī, “Tūtaalī na nguno kī hangī na būkaanīji būngī? Angū twang'wigwa wahaya na nomo gwakwe wei ng'wenekīlī!”
सध्या निवडलेले:
Luka 22: SUKBI15
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Sukuma Bible © Bible Society of Tanzania, 2019.
