Yohana 7
7
Yesu na badūgūye
1Ha numa ya yenīyo, ū Yesu ūbiza wa kūyūyeelela mu Galilaya dūhū, oya ū kūyeelela ī Būyudaya; nguno a bana Būyudaya bakayūkooba kūmūlaga. 2Aho shegeela shigukulu sha Bayudaya ī sha Maduku, 3a bazunaye būng'wīla gīkī, “Īngaga shi lūūlū nū kūūnū, ūje na Būyudaya; nū kwene bakībone a bahemba bako ī milīmo yako īyo ūkwīyītaga! 4Wiyoolecha hape ū kū banhū bayūbona ūmo ūkwītīlaga; nguno atīho munhū nūūlū ūmò ūyo akakoobaga kūmanīka, alīyo hangī ū kūnū wibisa bisa ū mu katūmamīle kakwe!” 5A bazuna ye nabo baalī bataalī ū kūnzunya. 6Nang'hwe ū Yesu ūbawīla, “Lītaalī ū kūshika ī likanza lyane ū nene, ī ling'we ī lyene līlīho gwa dūhū. 7A ba mu sī batīko ū kūmukolwa a bing'we, ū nene banikolilwe, nguno nakūbakaanīlaga gīkī ī milīmo yabo yabubi. 8Jagi a bing'we ū kū shigukulu, ū nene natūjaga ī haha ū kū shigukulu shenīshi, nguno ī likanza lyane lītaalī ū kūng'wa.” 9Aho wabawīla ī yenīyī wikala Galilaya.
10Bahayūja a bazunaye ū kū shigukulu, nū wei ūja, alīyo mu mbisīla, ītī mu kwiyoolecha bo hape. 11A Bayudaya aho balī ū mu shigukulu būyūnkooba, kūnū bakwiwīlaga, “Alī halī ū ng'wene ī gete?” 12Yūbūūka yombo nhaale ū ng'wibita kūlwa nguno yakwe; bangī būyūhaya, “Owiza;” alīyo bamò bahayaga, “Yaya akūlembagūlaga banhū dūhū!” 13Gwike walī atīho nūūlū ūmò, ū wa kūgima kūng'haya hape hape, nguno ya kūbogoha Bayudaya. 14Aho shashika ha gatī gatī ī shigukulu, ū Yesu wingīla ū mu hekalu, wandya kūlanga. 15A Bayudaya būyūkumya balīhaya gīkī, Ū ng'wenūyū ashimanile ginehe ī shandīkwa ū wei, alīyo atalangilwe nūūlū kūlangwa?” 16Ū Yesu ūbashokeja ūhaya gīkī, Ū būlangi ūbo nakūlangaga būtī bone bo ng'wenekīlī, būlī bokwe ūyo anitūmile. 17Ūlū munhū ūkooba kwīta īyo ayītogilwe ūyo anitūmile, akūwitegeleja ū būlangi wenūbū ūlū gīkī būfumile kūlī Mulungu, nūūlū nakūhayaga yane ng'wenekīlī dūhū. 18Ūyo akahayaga yakwe ya ng'wenekīlī, akikoobelaga ikūjo lyakwe. Alīyo ūyo akakoobaga ikūjo lyakwe ūyo antūmile, ū ng'wenūyo alī wa ng'hana, na hangī ū mulī wei būtīmo būbi. 19Ī gīsī ū Musa atang'winhile shilagīlo a bing'we, alīyo atīho nūūlū ūmò wing'we ūyo akashishikīlījaga? Hama ī gīsī nibūlī mulīkooba kūnibūlaga?” 20A banhū būnshokeja gīkī, “Hamo ūlī n'ihūgi shi ī gete, nani ūyo alīkooba kūkūbūlaga?” 21Nang'hwe ū Yesu ūshosha ūbawīla, “Nakabeeja nīmo gūmò, pye a bose ng'wandya kūkumya! 22A bing'we mukasaalaga munhū nūūlū ha sabato, īkī Musa wang'winha shilagīlo sha kūsaala, (nūūlū īkī shitafumile kūlī wei, alīyo kū bakūlūgenji). 23Mubonile īlī būgatū ū munhū ū kūsaalwa nūūlū ha sabato, gīkī shilagīlo sha ng'wa Musa shileke kūkenaagūlwa, hama ū nene nibūlī mukanipelanīla kūlwa kūpīja munhū ha sabato? 24Mutasolanhyage ū mu kalamulīle king'we, ng'ūlamula mu būtūngīlīja.”
25Kwitulwa bana Yelusalemu balebe bandya kūbūja gīkī, Ū ng'wenūyū, atī ng'wene ūyo bakūkoobaga kūmūlaga? 26Hama ī haha angū lolagi alīyomba hape hape dūhū, alīyo batūng'wītīlaga nūūlū mhayo, hamo shi ī gete a basugi bamanile gīkī hū ng'wene ū Kilisito? 27Alīyo nahene ū ng'wenūyū tūmanile shi ūko afumile, lelo ū Kilisito ng'wenekīlī ūlū wiza, ndūhū nūūlū munhū ūmò ūyo akūmana ūko afumīīle!” 28Hūna ū Yesu aho alīlanga ū mu hekalu, ūhamuka n'ilaka lya higūlya ūhaya gīkī, “Na ng'hana bizagi munimanile ū nene, pyī nū kūko nafumile. Gwike natizile kūlwane nene ng'wenekīlī, ūyo anitūmile ng'wene ntūngīlīja; alīyo a bing'we mutaamanile! 29Ū nene naamanile nguno nafumile kūlī wei, hangī hū ng'wene ūyo anitūmile.” 30Būhaya kūndima, alīyo īkī ī likanza lyakwe lyalī lītaalī ū kūshikana, atigelile nūūlū ūmò wa kūngoloolela makono. 31Ū ng'wibita lyenīlo bakakwīla a banhū ba kūnzunya, būyūhaya gīkī, Ū Kilisito ūlū alize, akwīta mitaale kūtinda īyo akwītaga ū ng'wenūyū?”
32A Bafalisayo būbigwa a banhū bakūng'hayaga mihayo īlī gīko mu kūng'ung'uula ng'ung'uula. Hūna a bagabīji bataale na a Bafalisayo būtūma bashilikale, gīkī baje bakandime. 33Nang'hwe ū Yesu ūhaya, “Lyasaagaga ikanza ido no ī lya kwikala hamò ning'we ū nene; najile kūlī we ūyo anitūmile. 34Mukūnikooba alīyo mutūnipandīka, nīyo mutūdūla ū kwiza ūko nalīkikala.” 35A Bayudaya bandya kwilūnjalūnja boi benekīlī baliwīla gīkī, Ū ng'wenūyū, alīhaya kūja halī ūko dūtūdūla ū kūmpandīka a bise? Hamo alīhaya kūja kū balobeji ba kū sī ja Bayunani ayūbalanga na Bayunani kwenūko! 36Ū mhayo gwenūyū wagūhaya, ni gūlī na makūlū kī? ‘Ī gīkī, Mukūnikooba alīyo mutūnipandīka,’ nī gīkī, ‘Ūko nalīkikala mutūdūla ū kwiza ko?’”
37A ha lūshikū lo kūmalīja shigukulu, ūlo lūlī lūshikū lūtaale, ū Yesu akīmīīla ūhamuka n'ilaka lya higūlya ūhaya gīkī, “Ose ose ūyo akolilwe nota ni izage kūlī nene ang'we. 38Ūyo ūnizunya, myongo ya minzī gabupanga īkwandya kūsela kūfuma mulī we, gīt'ūmo shandīkwa shihayīlile.” 39Ū mhayo gwenūyo akagūhaya kūlwa ng'wa Moyo Ng'wela, ūyo bakūng'wanukūla a bazunya; nguno ū Moyo walī ataalī ū kwiza, īkī ū Yesu walī ataalī ū kūgūngūhiwa.
40Hūna bangī ū ng'wibita aho bīyigwa ī mihayo yenīyo, būhaya gīkī, “Ī gete ū ng'wenūyū hū ng'wene ū Ng'hangi!” 41Bangī gīkī, Ū ng'wenūyū Kilisito!” Alīyo bamò būhaya, Ū Kilisito afume Galilaya? 42Tūhaya ī shandīkwa shihayile gīkī ū Kilisito alī wa lūganda lo ng'wa Daūdi, na gīkī akūfuma Betelehemu, igūngūli īlo lyalī lya ng'wa Daūdi?” 43Būbiza bikīla kīla a banhū kūlwa nguno yakwe. 44Bamò babo būyūgengagenga kūhaya kūndima, alīyo atigelile nūūlū ūmò wa kūngoloolela nkono gokwe.
45Nose a bashilikale būshoka ū kū bagabīji bataale na a Bafalisayo, būshikīla kūbūjiwa gīkī, “Nibūlī ng'waneka?” 46A bashilikale benabo būshosha balīhaya gīkī, “Ataalī kūyomba munhū nūūlū ūmò gīt'ūmo akūyombelaga ū munhū ng'wenūyū!” 47A Bafalisayo būbawīla, “Gashi hangī na a bing'we ng'wakalemva lemva! 48Ī gīsī nani ū mu basugi, nūūlū ū mu Bafalisayo ūyo anzunije ū munhū ng'wenūyo? 49Lelo ī libita lya banhū īlī, a bene angū bazumilwe dūhū; nguno nīyo nī shilagīlo batashimanile!” 50Ūmò wabo, Nikodemo, ūyo walī waja kūlī Yesu ī kwandya, ūbawīla gīkī, 51“Bing'we ī shilagīlo shise shikanamulaga ū munhū nūūlū ataalī kūdegelekwa tame, īmanwe īyo akūyītaga?” 52Nabo būnshokeja balīng'wīla gīkī, Ū bebe nang'ho, ūlī muna Galilaya hamo shi ī gete? Gīsīlījaga, ūkūbona nang'ho ī gīkī ataalī kwilonga ng'hangi kūfuma Galilaya nūūlū kamò!” [ 53Hūna busalang'hana, būlī ng'wene ūja kū ng'wakwe.
सध्या निवडलेले:
Yohana 7: SUKBI15
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Sukuma Bible © Bible Society of Tanzania, 2019.
