Metiu 4
4
Satan i Tof Iesu
Mak 1:12-13; Luk 4:1-13
1 #
Ibru 2:18; 4:15 Ke Tanwa Kalkaluu ka lame Iesu una sunbiil isi Satan ik tof u. 2Aunbiing Iesu i fafel na ifet e sangful e biing ke ifet e sangful e wor, ka fitol. 3Ke tom fasobor ka tapiek sing i, ma ka tarah, “Male o Kalalik ke God, ke ok fas foron fat igii rik tapiek beret.”
4 #
Lo 8:3
Iesu ka kiliis u aragii, “Ri siit ta u ae na Buk na Gogoh le, ‘Fanu biil ri liu la na inen sau, biil. Ri liu na foron sun orek tikii ae i suu tina ngusu God.’”
5Namih, Satan ka lame u una Ierusalem, i e maleh kalkaluu, ke ka fiti u bae na fungan Felun Tunmapek. 6#BukSong 91:11,12Ke ka fas u aragii, “Male o Kalalik ke God, ke ok wof puh. Wara le ri siit ta u na Buk na Gogoh aragii,
‘God in fas foron angelo kia ini wo
ke rik pose pes wo ini limri,
isi biil ifasi on tuke kekem na ti fat.’”
7 #
Lo 6:16
Ke Iesu ka kiliis u aragii, “Ri siit u sabin na Buk na Gogoh le, ‘Gong o luun Kumguui, God kiam, na fatoftof.’”
8Namih, Satan ka tel pes Iesu sabin una nenge tara pungpung, ke ka finngas u ini foron matanfuntih tikii na piklinbat ke ini foron memeh kiri. 9Ke ka fas Iesu aragii, “Ian ta foron tier tikii igii usuf o, male on ilepul ma ok lotu unaisang.”
10 #
Lo 6:13
Ke Iesu ka tara sing i aragii, “Satan! Ti koseng iau! Wara le ri siit ta u na Buk na Gogoh aragii, ‘On lotu unaisa Kumguui, God kiam, ma on wong sing i sau.’”
11Ke Satan ka la koseng u, ma foron angelo ri ka tapiek ke ri ka lupes u.
Iesu i Tipes Fafas na Galili
Mak 1:14-15; Luk 4:14-15
12 #
Metiu 14:3; Mak 6:17; Luk 3:19,20 Aunbiing Iesu ka ongen ta u le ri ka luun ta Jon na felun kamkabet, ke ka fis una falifu na Galili. 13#Jon 2:12Ka apti tina Nasaret ke ka melmel na Kapernaum. Kapernaum i fatat isi dan kawil na Galili, na nanal ken fan Sebulun ke fan Naptali. 14Tier igii i tapiek una fasuut orek ae profet Aisaia i use ta u aragii,
15 #
Aisaia 9:1,2 “Nanal ken fan Sebulun
ke nanal ken fan Naptali,
na sal una dan kawil,
na nenge bulin dan na Ioridan,
Galili ken fanu ae biil ri fan Iudaia.
16Fanu ae ri liu na palgan kubunor,
ri ka par ta tara malal.
Ma fanse ae malmaluu ken minet i afit ri,
malal ka popos ta ulo ri.”#Aisaia 9:1-2
17 #
Metiu 3:2
Na aunbiing mang ae, Iesu ka tipes fafas aragii, “Gamen sokiliis liu kimi, wara le matanfuntih na kukulii ka fatat.”
Iesu i Kam pes Ifet e Kalalik na Fafausum Famu kia
Mak 1:16-20; Luk 5:1-11
18Aunbiing Iesu i toltole bulin dan kawil la na Galili, ka par iun latualik, Saimon ae ri foteng u la ini Pita ru latualik e Enru. Ru linlin ubiin la na dan kawil, wara le ru un tom ienmaket. 19Ke Iesu ka fas ru aragii, “Kamu mi lo iau, isi iak fausum kamu na sinangun dat fanu.” 20Fanpil ru ka la koseng foron ubiin kiruh ke ru ka mi lo Iesu.
21Iesu ka la tinaiwa, ke ka par nenge un latualik sabin, Jems ru latualik e Jon, ru un kalalik ke Sebedi. Ru tinawii na palgan mon tura temruh, rituul tumtumarnge foron ubiin kirituul la. Iesu ka kam pes ruh, 22ma fanpil ru ka la koseng mon ke koseng temruh ma ru ka mi lo Iesu.
Iesu i Faliu Marmarsan Sasem
Luk 6:17-19
23 #
Metiu 9:35; Mak 1:39 Iesu i la na foron falifu tikii na Galili ma ka tel fafausum na foron felun lotu kiri. Ka famam fafas ini Rokap na Fafas na matanfuntih ke God, ke ka faliu fanu koseng marmarsan sasem tikii. 24Ususe lo ka sararah usuf fanu tikii na falifu na Siria, pesu ri ka filange fanu tikii ae ri sem marmarsan sasem usuf i, fanu ae ri kalsakai tara fangungut, fanu ae tanwa laulau i susuef ulo ri, fanu ae ri gokgok la turan fanu ae baban fo ri i met, ma Iesu ka faliu ri. 25Tara gur na fanu tina falifu na Galili, Dekapolis, Ierusalem, Iudaia ke tina nenge bulin dan na Ioridan ri ka mi lo Iesu.
सध्या निवडलेले:
Metiu 4: BJP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2015, 2021 Wycliffe Bible Translators, Inc. All rights reserved
