Ñwaè' Matïìyoè 3
3
1À m ba à nfè' anà Jǒn ŋwɛ̀ bàptir bèe à kɛ' a ce fè'shi blǎa Nyʉ̀ à ntee rìŋ à ŋgǒŋ Jùdiyà. 2E m làa enɛ̂, “Kupse-nè yè ndèe, ma' yè buu bbebep njobè' nfè' ce kʉʉ Nyʉ̀ yi be kɛ̀', ce ghɛɛ.” 3Ŋwɛ̀ ca yu ŋwɛ̀ ce Àsayà ŋwɛ̀ ncep ntuu Nyʉ̀ à m làa yuu a kuu ye. E m làa enɛ̂,
“Ŋwɛ̀ mò' ce fuŋ à ntee rìŋ a ce làa enɛ̂,
‘Kupshi nè nduunjì nè Tatâ,
nashi tɛ yi ba kùyɛɛ.’ ”
4Jǒn à m yar bcɛ̀' ce a m ba' nè mnyǒr Kàmɛ̂l, a cʉʉ ŋgùp nyàa njep mbùu. Vi byee à m ba mŋguu ba blù. 5Bèe a m ce lǒ à rla' Jɛ̀rusalɛ̀m, ba à ŋgǒŋ Jùdiyà, ker ba à mla' ce mi m ba àgee rdip Jodàn, a ce dù ce yɛ ye. 6Wowèe a m suŋ yàp buu bbebep ce a m gèe, e baptìr wowèe njep rdip Jodàn. 7E ka' yɛ àmbò bèe magòr efa mʉ̀ bèe Farìsi, ba bèe Sadùsî, a vʉ̀ enɛ e bo bàptir wowèe, e laa nè wowèe enɛ̂, “Boo bfî, ŋwɛ̀ ce e bɛɛ wèe tɛ wèe bo caŋ sòrti efa rshentee ce Nyʉ̀ be ko'si nè bèe nà à bɛɛ nda? 8Gèe là nè buu ce vi be ce dùŋshi enɛ wèe à kupse, a ma' yè buu bbebep. 9Wèe fa lòr weenɛ wèe à ka' ce làa enɛ̂, ‘Abràham yu yèr tâ,’ wèe fʉr wee btu efa ŋgɛ' ka'. M ce suŋ wèe enɛ àde' Nyʉ̀ ku lor blùr ca beesi à boo Abràhâm. 10A lɛ̀ njàa njep mbùu ce wɛɛ. Ce ce yi ka' tɛ yʉ bòŋboŋ ka', banɛ a be gwàr, mà' njep mor. 11M ce bàptir ya wèe nè mdip à rdùŋshi enɛ wèe à kupse, a ma' yè buu bbebep. Geewa'a, ŋwɛ̀ ce e ce vʉ̀ embe mɛ̌ njì nà yu ŋwɛ̀ ce e tʉr ŋger a caa mɛ̀. Mɛ̀ ghɛɛte à ŋwɛ̀ ce àde' m byɛ' vi blaba' ka'. E be bàptir wèe nè Yʉ' Rara, ba nè mor. 12Yì gʉ̀ yu mba yě bò tɛ e bo fyɛpshi mi msaŋ àgho, baashi lɛ̀ njep koo, à ka' ba yi àmbò bbʉ̀shì efa gho, e be ghùp tòo njep mor ce àde' yi liitì ka'.”
13À m ba à nfè' anà, Jisòs à lǒ à ŋgǒŋ Galèlê, a du mbà rdip Jodàn tɛ Jǒn bo bàptir ye. 14Jǒn à ce ròo njì à rkanì, a laa enɛ̂, “Yu ba wɛ̀ ce wɛ̀ ba bàptir mɛ̀, wɛ̀ vʉ wɛnɛ m baptir wɛ̀ à njɛ̌ɛ kɛ?” 15Jisòs à beesì enɛ̂, “Mà'shi tɛ yi ba wa'a sè'ni na. Yi yu bòŋboŋ enɛ sèe gee ca tɛ sèe bo gèe buu wɛɛwɛ ce vi yu yɛɛnì.” Jǒn à byemì. 16E ka' bàptir Jisòs wɛɛ, e ku fʉʉ enjep rò. Awɛ rbuu li mʉ'tì, e yɛ àmbò Yʉ' Nyʉ̀ yi sùu mbe yě ndùu àmbò bèŋ wa'a. 17Njèndoŋ à laa embe bùu enɛ̂, “Cena yu muu wà ce mɛ̀ kòŋ sê, a ce yu' rbòŋ nè ye.”
सध्या निवडलेले:
Ñwaè' Matïìyoè 3: LNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Limbum New Testament © Bible Society of Cameroon, 2003.
