Luk 2

Yesu ia

(Mat 1.18-25)

1Gɔɔ bee Sezaa Ogusi yãdìlɛ à mɛ̀, wà dũnia gbɛ̃pii nao. 2Wà nao sɛ̃iapi kɛ̀ gɔɔ pɔ Kilini dɛ Sili busu gbɛ̃zɔ̃ɔ ũɛ. 3Baade pii gɛ̀ a bɛ wɛ̃lɛu wà a tɔ́ dalau. 4Yosɛfu sɔ̃ à bɔ̀ Nazalɛti, Galile busuu, à gɛ̀ Davidi bɛ wɛ̃lɛ Bɛtɛlɛũ, Yude busuu, kɛ́ a dɛ Davidi bui ũ yãi. 5À gɛ̀ wà a tɔ́ dalau we ń a nɔkpama Maliamao. A nɔsia, 6ɔ̃ gɔɔ pɔ aa ku we, aà nɛ'igɔɔ kà, 7ɔ̃ à a yoa ì gɔ̃ɛ ũ. À zwãa fĩ̀wà, à aà wùlɛ pɔtuoɔ pɔblebɔu, kɛ́ aai gu e nibɔɔ pilakĩio yãi.

8Sãdãnaɔ ku busu doũpiu, aalɛ i sɛ̃u, gwãasĩna aalɛ ń sãɔ dɔ̃́a. 9Ɔ̃ Dii malaikae bɔ̀ à mɔ̀má, Dii gawi gupùńzi, ɔ̃ vĩa ń kṹ maamaa. 10Ɔ̃ Malaikapi ònɛ́: Ásu to vĩa á kṹo, asa ma mɔ baonakpaiɛ́ɛ, gbɛ̃pii pɔ i kɛ na maamaa. 11Wà Suabana ìɛ́ Davidi wɛ̃lɛu gwãa, ɔ̃mɛ Mɛsi ũ, Dii ũ. 12Seela pɔ a to à aà dɔ̃n kɛ: Á nɛtɛ̃na e wulɛa pɔtuoɔ pɔblebɔu, zwãa fĩfĩwà. 13Kãndo luabɛ iwaɔ ku sãnu ń malaikapio dasidasi, aalɛ Lua taasilɛ aalɛ mɛ:

14Wà Lua tɔbɔ musu,

gbɛ̃́ pɔ an yã kɛ̀ɛ̀ɔ aafia'e tɔɔlɛ.

15Kɛ́ malaikapiɔ gòńla aa tà luabɛ, ɔ̃ sãdãnaɔ òkɔ̃ɛ aa mɛ̀: Wà gɛ́ Bɛtɛlɛũ wà yã pɔ kɛ̀pi e, yã pɔ Dii tò wá dɔ̃̀. 16Ɔ̃ aa fɛ̀lɛ kpakpa aa gɛ̀ bɔ̀ Maliama ń Yosɛfuowa ń nɛtɛ̃napio wulɛa pɔtuoɔ pɔblebɔu. 17Kɛ́ aa aà è, aa yã pɔ wa ònɛ́ nɛtɛ̃napi musu ò. 18Ɔ̃ yã pɔ sãdãnaɔ òpi bɔ̀ gbɛ̃́ pɔ aa màɔ saɛ pii. 19Maliama yãpi kũa a nɔ̀sɛ guu pii, àlɛ laasookɛwà. 20Sãdãnaɔ ɛ̀a tà, aalɛ Lua tɔbɔ, aalɛ aà saaukpa yã pɔ aa mà mɛ́ aa è musu, asa à kɛ̀ lá wa ònɛ́waɛ. 21Kɛ́ a gɔɔ la sù, nɛ tɔ̃zɔ̃gɔɔ kà,#Lev 12.3 ɔ̃ wà tɔkpàɛ̀ Yesu, tɔ́ pɔ malaika ò zadɔ̃ wi aà nɔsio.

Yesu ɔlɔa Diiɛ

22Kɛ́ an gbãbɔgɔɔ kà, aa aà sɛ̀ gɛ̀ ɔlɔi Diiɛ Yelusalɛũ lá Mɔizi ikoyã òwa. 23Asa a ku Dii ikoyãu wà mɛ̀, wà nɛgɔ̃ɛ sɛ̃iaɔ kpawàɛ.#Bɔa 13.2 24Aa sa pɔ wa dìlɛ Dii ikoyãu ò, wà mɛ̀ felena mɛn pla ge felenguulu nɛbɔlɔ mɛn pla.#Lev 12.6-8

25Gbɛ̃e ku Yelusalɛũ, aà tɔ́n Simɛɔ. Gbɛ̃maaɛ, a Lua vĩa vĩ, mɛ́ aà wɛ́ dɔ Isailiɔ misiai. A Lua Nisĩna sɛa, 26ɔ̃ Nisĩnapi òɛ̀ a ga Mɛsi pɔ Dii kpà esaio. 27Nisĩnapi dɔ̀aaɛ̀, ɔ̃ à gɛ̃̀ Lua ua. Kɛ́ Maliama ń Yosɛfuo mɔ̀ ń ń nɛ Yesuo yã pɔ wa dìlɛ ikoyãu kɛa yãi, 28ɔ̃ Simɛɔ aà sì a ɔzĩ, à Lua saaukpà à mɛ̀:

29Mapi n zɔblena, ma laai kpàlɛ sa,

to mà ga lá ń òmɛɛwa Dii,

30asa ma wɛsì Suabana pɔ ń dìlɛlɛ.

31N aà yã kɛ̀kɛ bui pii aɛ,

32gupua pɔ a yãbiiwa buiɔnɛ,#Isa 42.6, 49.6

i n gbɛ̃́ Isailiɔ tɔbɔ.

33Yã pɔ a ò nɛpi musu bɔ̀ aà de ń aà dao saɛ. 34-35Simɛɔ samaa'ònɛ́, ɔ̃ a ò nɛpi da Maliamaɛ à mɛ̀:

Ɔ̃mɛ aɔ dɛ seela pɔ Isailiɔ gii ũ,

pɔsia i n zɔ̃ n sɔ̃wa lan fɛ̃ndawa.

Isailieɔ lao, an gbɛ̃eɔ kãfĩ aà yãi,

an nɔ̀sɛ guu yãɔ i bɔ gupuau.

36Nɔɛ ãnabie ku we, aà tɔ́n Ãna, Fanuɛli nɛ, Asɛɛ buiɛ. Nɔɛpi zikũ̀ɛ taotao. À zãkɛ̀ ń a gɔ̃kpamao wɛ̃̀ soplaɛ, 37ɔ̃ à gɔ̃̀ gyaa ũ e wɛ̃̀ basiiɔ̃ ń siiɔ̃o. Ìli bɔ Lua uao, ìɔ luasisi fãanɛ ń gwãasĩnao ń lɛyeo ń wabikɛao. 38Zĩ́ bee gɔ̃̀ɔ à sɔ̃̀ńzi à Lua saaukpà, àlɛ nɛpi yã'o gbɛ̃́ pɔ an wɛ́ dɔ Yelusalɛũ boaiɔnɛ pii.

39Kɛ́ Yosɛfu ń Maliamao kɛ̀ lá a ku Dii ikoyã láuwa pii aa làa, aa ɛ̀a tà ń bɛ wɛ̃lɛu Nazalɛti, Galile busuu. 40Nɛpi fɛ̀lɛ à gbãakũ̀. Ɔ̃nɔ pàɛ̀, mɛ́ ìɔ ku ń Lua baaao.

Yesu gɛa Lua ua a nɛgɔɔ

41Wɛ̃ ń wɛ̃o Yesu de ń aà dao aaì gɛ́ Gɛ̃amusu#Bɔa 12.1-11 dikpɛkɛi Yelusalɛũɛ. 42Kɛ́ Yesu kà wɛ̃̀ kuɛpla, aa ɛ̀a gɛ̀ dikpɛkɛi lá aaì kɛwa. 43Kɛ́ dikpɛ làa, aalɛ tá, ɔ̃ an nɛ Yesu gɔ̃̀ Yelusalɛũ, aa dɔ̃o. 44Aalɛ e a ku ń gbɛ̃́ɔ guuɛ. Kɛ́ aa taa'ò gɔɔ do, ɔ̃ aa gbàsa aalɛ aà wɛɛlɛ ń daɛɔ ń ń gbɛ̃́ dɔ̃aɔ guu. 45Kɛ́ aai aà eo, ɔ̃ aa ɛ̀a gɛ̀ aà wɛɛlɛi Yelusalɛũ. 46A gɔɔ aaɔ̃dezĩ ɔ̃ aa aà è zɔ̃lɛa Lua ua yãdanɛdeɔ guu, àlɛ yãmamá, àlɛ yãlalamá. 47Aà yãdɔ̃a ń aà yãweamáo dì gbɛ̃́ pɔ aalɛ aà yãmaɔwa pii. 48Kɛ́ aà de ń aà dao aà è, à bɔ̀ ń saɛ, ɔ̃ aà da òɛ̀: Bɔyãi ń kɛ̀wɛ̃ɛ màai? N mae ń mapio, wá pɔ yà n wɛɛlɛa guu. 49A wèmá à mɛ̀: Bɔyãi álɛ ma wɛɛlɛi? Kɛ́ à kũ̀ màɔ ku ma Mae kpɛ́u, á dɔ̃o le? 50Ãma aai yã pɔ a ònɛ́pi gbá dɔ̃o.

51Yesu ɛ̀a tàńnɔ Nazalɛti, à misìilɛnɛ́. Aà da yãpiɔ kũa a nɔ̀sɛ guu pii. 52Yesu zɔ̃ɔkũ̀, aà ɔ̃nɔ kã̀fĩ, mɛ́ a na ń Luao ń gbɛ̃nazĩnaɔ.#1 Sam 2.26; Yaa 3.4

सध्या निवडलेले:

Luk 2: Boo2024

ठळक

सामायिक करा

कॉपी करा