Luk 1
1
1Wà ɔkpà yã pɔ kɛ̀ wá guu dau siua lá guu zɛ́zɛwa dasi, 2lá gbɛ̃́ pɔ aa dɛ yãpi seeladeɔ ń a baokpanaɔ ũ za káauɔ òwɛ̃ɛwa. 3Tiasa mapi sɔ̃, lá ma wɛtɛ̀ yãpiɔi dodo za a daalɛawa, má è a maa mà kɛ̃nɛ zɛ́zɛ, ma gbɛ̃́ bɛɛɛde Teofili, 4kɛ́ ǹ e ǹ yã pɔ wa dànɛ sãasã dɔ̃ yãi.
Malaika dɔaaa Zãa Da'ilɛna ia yã'oa
5Yude busu ki Helodi gɔɔ sa'onae ku, aà tɔ́n Zakali. A ku Abia sa'onaɔ gãli guuɛ. Aà na tɔ́n Ɛlizabɛti. Aalona buiɛ lɔ. 6Ampla mpii aa maa Luaɛ. Aaìɔ ku taaesai, aa Dii ikoyã ń yã pɔ a dìlɛɔ kũa. 7Aa nɛ vĩo, asa Ɛlizabɛtiá fĩiɛ, mɛ́ ampla mpii aa zikũ̀.
8Gɔɔ pɔ sa'oa kà an gãliwa, Zakali mɛ́ lɛ́ Lua gbagba. 9Lá sa'onapiɔ ì kɛwa, aa likpà, ɔ̃ lí Zakali sɛ̀ aà gɛ́ tulaletikai tɛ́a Dii kpɛ́u. 10Tulaleti katɛagɔɔ bila kã̀aa kpɛɛlɛ pii, aalɛ wabikɛ. 11Ɔ̃ Dii malaikae bɔ̀ à mɔ̀wà, à zɛ̀ tulaleti katɛakĩi ɔplaai. 12Kɛ́ Zakali aà è, à bilikɛ̀, vĩa aà kũ̀. 13Ɔ̃ malaikapi òɛ̀: Nsu to vĩa n kũo Zakali. Lua n wabikɛa sì, n na Ɛlizabɛti a nɛ'i gɔ̃ɛ ũ, ní tɔkpaɛ̀ Zãa. 14N pɔ a kɛ na, ńyɔ̃ yaalɔ, wa pɔnakɛ aà ia yãmusu dasi, 15asa aɔ dɛ Diiɛ gbɛ̃zɔ̃ɔ ũɛ. A wɛ̃ ge igbãae mio,#Nao 6.3 Lua Nisĩna aɔ aà paa za aà da gbɛɛuɛ. 16A to Isailiɔ zɛ ń Dii ń Luao dasi, 17a dɔaa Diiɛ ń Lua Nisĩna gbãa pɔ Ɛlia vĩ yãao. A to maeɔ lɛdoũkɛ ń ń nɛɔ,#Mal 3.23-24 a to swãyãmansaideɔ gbɛ̃maaɔ ɔ̃nɔ sɛ́. A gbɛ̃́ɔ kɛkɛ an sɔu iɔ maà Diiɛ.
18Ɔ̃ Zakali malaikapi là à mɛ̀: Kpelewa má yãpi sĩana dɔ̃i? Asa maezinan ma ũ, mɛ́ ma na zikũ̀ lɔ. 19Ɔ̃ malaikapi wèwà à mɛ̀: Mamɛ má Gabliɛli,#Dan 8.16, 9.21 miɔ zɛa Lua aɛ. Ɔ̃mɛ ma zĩ yãpi oinɛ, mà baonapi kpanɛ. 20Ma, n lɛ́na a naalɛ, ńyɔ̃ fɔ̃ ǹ yã'oo e yãpi gɛ kɛò, kɛ́ ni ma yã pɔ a kɛ a gɔɔwa sio yãi. 21Gɔɔ bee sɔ̃ wàlɛ Zakali dã. Aà gɛ̃gɛ̃a luakpɛu bɔ̀ ń saɛ. 22Kɛ́ à bɔ̀, i fɔ̃ yã'òńnɔo, ɔ̃ wa dɔ̃̀ kɛ́ à wɛpungu è luakpɛuɛ. Lá aà lɛ́na nàalɛ, ɔ̃ àlɛ yã'onɛ́ ń ɔo. 23Kɛ́ Zakali sa'ogɔɔ lɛ́ kà, ɔ̃ à tà a bɛ. 24Bee gbɛa aà na Ɛlizabɛti nɔsì, ɔ̃ à azĩa ùlɛ e mɔ sɔo à mɛ̀: 25Dii kɛ̀, à ma wɛ̃nagwà, à wibɔ̀mɛɛ.
Malaika dɔaaa Yesu ia yã'oa
26A mɔ soolodeu Lua malaika Gabliɛli zĩ̀ Galile wɛ̃lɛ pɔ wì mɛ Nazalɛti. 27À gɛ̀ nɛnɔɛ lɛsoe kĩi, aà tɔ́n Maliama. A gɔ̃kpama vĩ Davidi bui ũ, aà tɔ́n Yosɛfu. 28Kɛ́ malaikapi gɛ̃̀ aà kĩi, a òɛ̀: Fɔɔ baaade! Dii kunnɔɛ. 29Maliama bilikɛ̀ yãpiwa, à laasookɛ̀ à mɛ̀: Fɔ bee mi dɛa ni? 30Ɔ̃ malaikapi òɛ̀:
Maliama, nsu to vĩa n kũo,
asa Lua baaadànguɛ.
31Ma! Ńyɔ̃ nɔsi, ní nɛ'i gɔ̃ɛ ũ,
ní tɔkpaɛ̀ Yesu.
32Aɔ dɛ gbɛ̃zɔ̃ɔ ũ, wali oɛ̀ Musude Nɛ.
Dii Lua a aà kpa aà dezi Davidi kpalau,
33iɔ dɛ Yakɔbu buiɔ kia ũ gɔɔpii,
aà kpala aɔ laaa vĩo.#2 Sam 7.12, 16; Isa 9.6
34Ɔ̃ Maliama ò malaikapiɛ: Lá mi gɔ̃ɛ dɔ̃ yãao, bee a kɛ kpelewa ni? 35Malaika wèwà à mɛ̀:
Lua Nisĩna a dinɛ,
Musude gbãa i mɔma.
A yãi nɛ pɔ ńyɔ̃ ipi kua aɔ adoa,
wali oɛ̀ Lua Nɛ.
36N daɛ Ɛlizabɛti nɛgɔ̃ɛ nɔsia sɔ̃ a zikũ guu. Nɔɛ pɔ wa aà dɔ̃ fĩi ũpi ku ń nɔ̀ mɔ sooloo tia. 37Asa Lua lí fu yãewao.#Daa 18.14 38Ɔ̃ Maliama mɛ̀: Dii zɔblenan ma ũ. Aà kɛmɛɛ lá ń òwa. Ɔ̃ malaikapi aà tò we.
Maliama gɛa Ɛlizabɛti gwai
39Gɔɔ bee Maliama fɛ̀lɛ gɛ̀ wɛ̃lɛ pɔ ku Yude busu gusĩsĩdeu gɔ̃̀ɔ. 40À gɛ̀ Zakali bɛ, ɔ̃ à fɔkpà Ɛlizabɛtiwa. 41Kɛ́ à Maliama fɔpi mà, aà nɛ vĩ̀vĩ aà gbɛɛ guu, ɔ̃ Lua Nisĩna dɛ̀dɛwà, 42ɔ̃ à wii gbãa lɛ̀ à mɛ̀: Baaaden n ũ dɛ nɔɛ piila. Baaaden nɛ pɔ ku n gbɛɛu ũ lɔ. 43Bɔ́n ma ũ kɛ́ ma Dii da mɔ̀ ma gwaii? 44Gɔɔ pɔ ma swãlɛ̀ n fɔwa lé, nɛ pɔ ku ma gbɛɛu vĩ̀vĩ ń pɔnaoɛ. 45Baaaden n ũ, asa ń sì yã pɔ Dii ònɛ a kɛɛ. 46Ɔ̃ Maliama mɛ̀:
Malɛ Dii tɔbɔ ma sɔ̃ guu,
47ma nɔ̀sɛ lɛ́ yaalɔ Lua ma Suabanawa,#1 Sam 2.1
48asa à ma yãdà,
mapi aà zɔblena pɔ mi ka pɔe ũo.
Za gbã e gɔɔpii waliɔ omɛɛ baaadeɛ,
49asa Lua Gbãadepi yãzɔ̃ɔkɛ̀mɛɛ.
Aà tɔ́ kua adoa.
50Ì wɛ̃nadɔ̃ gbɛ̃́ pɔ aaì vĩakɛɛɔnɛ e ń buiwa.
51À a gãsĩ pòo à a gbãa ɔlɔ̀nɛ́,
à waladeɔ fã̀aa ń ń laasooɔ.
52À gbãadeɔ bɔ̀ kpalau,
à táaaɔ kã̀fĩ.
53À pɔmaaɔ kpà nɔandɛnaɔwa aa kã̀,
à ɔdeɔ gbàɛ ɔgii.
54À a zɔblena Isailiɔ ĩ̀a,
an yã i sãaaguo.
55À wɛ̃nadɔ̃̀ Ablahaũ ń a buipiɔnɛ#Daa 17.7
lá à a lɛgbɛ̃̀ wá deziɔnɛwa.
56Maliama zɔ̃̀lɛ ń Ɛlizabɛtio lan mɔ aaɔ̃wa, ɔ̃ à gbàsa tà a bɛ.
Zãa Da'ilɛna ia
57Ɛlizabɛti nɛ'igɔɔ kà, ɔ̃ à nɛ'ì gɔ̃ɛ ũ. 58Kɛ́ aà fãanideɔ ń aà daɛɔ mà lá Dii wɛ̃nadɔ̃̀ɛ̀, aa pɔnakɛ̀aanɔ. 59A gɔɔ swaaɔ̃dezĩ aa mɔ̀ tɔ̃zɔ̃i nɛpiɛ,#Lev 12.3 wi aà mae Zakali tɔ́ kpaɛ̀, 60ɔ̃ aà da mɛ̀: Aawo! Wàli oɛ̀ Zãa. 61Aa òɛ̀: N daɛɔ guu, gbɛ̃e tɔ́pi vĩo. 62Ɔ̃ aa yã'ò aà maeɛ ń ɔo, kɛ́ wà e dɔ̃ tɔ́ pɔ a ye wà kpaɛ̀. 63Zakali pɔ pɔ á lakɛ̃wà gbɛ̀a, ɔ̃ a kɛ̃̀wà: Aà tɔ́n Zãa. Yãpi bɔ̀ ń saɛ mpii. 64Wegɔ̃ɔ aà lɛ́na gòlɛ, à lɛbɔ̀ àlɛ yã'o, àlɛ Lua saaukpa. 65Ɔ̃ vĩa ń fãanideɔ kũ̀ pii, ɔ̃ Yude busu gusĩsĩde gbɛ̃́ɔ lɛ́ yãpi galikɛ pii. 66Ɔ̃ gbɛ̃́ pɔ aa yãpi màɔ kũa ń nɔ̀sɛ guu aa mɛ̀: Bɔ́ nɛpi aɔ dɛ a ũ ziai? Asa Dii ɔliaaaaziɛ.
67Lua Nisĩna dɛ̀dɛ aà mae Zakaliwa, ɔ̃ à ãnabikɛkɛ̀ à mɛ̀:
68Wà Dii Isailiɔ Lua saaukpa!
À mɔ̀ à a gbɛ̃́ɔ bò.
69À Suaban gbãade bɔ̀wɛ̃ɛ
a zɔblena Davidi bui guu,
70lá a dà a ãnabiɔnɛ aa ò za ziziwa.
71Aa mɛ̀ a wá sí wá ibɛɛɔwa,
a wá bɔ gbɛ̃́ pɔ zawágupiɔ ɔzĩ.
72Màa à wá deziɔ wɛ̃nagwà,
aà bàa pɔ kuńnɔ yã i sãaaguo.
73À lɛgbɛ̃̀ wá dezi Ablahaũɛ#Daa 22.16-18
74à mɛ̀ á wá bɔ wá ibɛɛɔ ɔzĩ,
í wá gba zɛ́ wà zɔbleɛ vĩasai,
75wá kua iɔ adoaɛ̀ gbɛ̃maaɔ ũ
e wá wɛ̃ni lɛu.
76Mpi sɔ̃ ma nɛ,
wali onɛ Musude ãnabi,
asa mmɛ ńyɔ̃ dɔaa ǹ zɛkɛkɛ Diiɛ.#Mal 3.1
77Ńyɔ̃ to aà gbɛ̃́ɔ dɔ̃ lá a ń suaba,
lá a ń duuna kɛ̃má,
78sosobi pɔ wá Lua vĩ sabai.
Bɔa musu a mɔ wá gwai lá gu ì dɔwa,
79i gupu gbɛ̃́ pɔ ku gusiauɔnɛ
ń gbɛ̃́ pɔ ku ga lɛzĩɔ,#Isa 9.1
i wá gbá pɛlɛ aafia zɛ́u.
80Nɛpi zɔ̃ɔkũ̀, à gɔ̃̀ kãgbãade ũ. A ku gbáau e gɔɔ pɔ à bɔ̀ gupuau Isailiɔwa.
सध्या निवडलेले:
Luk 1: Boo2024
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Boko Bible © SIM International, 2024.
