ܡܠܐܟ݂ܝ 3
3
ܐ݇ܬܵܝܬܵܐ ܕܡܲܠܲܐܟ݂ܵܐ ܕܡܵܪܝܵܐ
1”ܗܵܐ، ܐܵܢܵܐ ܫܲܕܘܼܪܹܐ ܝܘܸܢ ܐܝܼܙܓܲܕܝܼ، ܘܒܸܬ ܗܲܕܸܪ ܐܘܼܪܚܵܐ ܩܵܕ݇ܡܝܼ، ܡܸܢܫܸܠܬܵܢܹ̈ܐ ܒܸܬ ܐܵܬܹܐ ܠܗܲܝܟܠܹܗ، ܡܵܪܝܵܐ ܕܐܲܚܬܘܿܢ ܒܸܒܥܵܝܵܐ ܝܬܘܿܢ، ܕܝܼܠܹܗ ܡܲܠܲܐܟ݂ܵܐ ܕܘܲܥܕܵܐ، ܕܐܲܚܬܘܿܢ ܟܹܐ ܒܵܣܡܵܐ ܠܵܘܟ݂ܘܿܢ ܒܝܼܹܗ، ܗܵܐ، ܒܹܐܬܵܝܵܐ ܝܠܹܗ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 2”ܘܡܵܢܝܼ ܡܵܨܹܐ ܚܵܡܹܠ ܒܝܵܘܡܵܐ ܕܐ݇ܬܵܝܬܹܗ؟ ܘܡܵܢܝܼ ܟܵܠܹܐ ܟܲܕ ܦܵܐܹܫ ܚܸܙܝܵܐ؟ ܣܵܒܵܒ ܗ̇ܘ ܐܲܝܟ݂ ܢܘܼܪܵܐ ܕܨܲܪܸܦܵܢܵܐ ܝܠܹܗ، ܘܐܲܝܟ݂ ܟܸܒܪܝܼܬܵܐ ܕܡܲܚܘܸܪܵܢܵܐ. 3ܘܒܸܬ ܝܵܬܹܒ݂ ܐܲܝܟ݂ ܨܲܪܸܦܵܢܵܐ ܘܕܲܟ݂ܝܵܢܵܐ ܕܣܹܐܡܵܐ، ܘܒܸܬ ܕܲܟܹܐ ܠܒܢܲܝ̈ ܠܹܘܝܼ، ܘܒܸܬ ܨܲܦܹܐ ܠܗܘܿܢ ܐܲܝܟ݂ ܕܲܗܒ݂ܵܐ ܘܐܲܝܟ݂ ܣܹܐܡܵܐ، ܘܒܸܬ ܗܵܘܝܼ ܠܡܵܪܝܵܐ ܡܲܩܪܸ̈ܒ݂ܵܢܹܐ ܕܩܘܼܪܒܵܢܵܐ ܒܙܲܕܝܼܩܘܼܬܵܐ. 4ܘܒܸܬ ܗܵܘܹܐ ܒܲܣܝܼܡܵܐ ܠܡܵܪܝܵܐ ܩܘܼܪܒܵܢܵܐ ܕܝܼܗܘܼܕܵܐ ܘܕܐܘܿܪܸܫܠܸܡ، ܐܲܝܟ݂ ܝܵܘܡܵܢܹ̈ܐ ܕܥܵܠܲܡ، ܘܐܲܝܟ݂ ܫܸܢܹ̈ܐ ܩܲܕܝܼܡܵܝܹ̈ܐ. 5ܘܒܸܬ ܩܲܪܒܸܢܸܢ ܐܸܠܵܘܟ݂ܘܿܢ ܠܸܥܒ݂ܵܕܵܐ ܕܝܼܘܵܢ ܘܒܸܬ ܡܲܠܝܸܙܸܢ ܠܝܼܵܗ݇ܒ݂ܵܐ ܣܵܗܕܘܼܬܵܐ ܥܲܠ ܚܲܪ̈ܵܫܹܐ، ܘܥܲܠ ܓܲܝܵܪܹ̈ܐ، ܘܥܲܠ ܝܵܡܝܵܢܹ̈ܐ ܒܕܘܼܓܠܵܐ، ܘܥܲܠ ܙܵܠܡܵܢܹ̈ܐ ܕܗܵܩܵܐ ܕܐܲܓ݂ܝܼܪܵܐ، ܘܕܐܲܪܡܸܠܬܵܐ، ܘܕܝܵܬܘܿܡܵܐ، ܘܥܲܠ ܡܲܩܠܸܒܵܢܹ̈ܐ ܕܡܵܫܵܚܲܛ، ܘܥܲܠ ܐܵܢܝܼ ܕܠܹܐ ܙܵܕܥܝܼ ܡܸܢܝܼ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 6”ܣܵܒܵܒ ܐܵܢܵܐ ܝܘܸܢ ܡܵܪܝܵܐ، ܘܠܹܐ ܫܲܚܠܸܦܸܢ، ܒܘܼܬ ܐܵܗܵܐ، ܐܲܚܬܘܿܢ، ܒܢܲܝ̈ ܝܲܥܩܘܿܒ݂، ܠܵܐ ܬܝܼܡ ܠܵܘܟ݂ܘܿܢ.
ܚܣܵܟ݂ܬܵܐ ܕܡܲܥܣܵܪܵܐ ܘܩܘܼܪܒܵܢܵܐ
7ܗܵܐ، ܡ̣ܢ ܝܵܘܡܵܢܹ̈ܐ ܕܒܵܒܵܘܵܬܵܘ̈ܟ݂ܘܿܢ ܩܠܝܼܒ ܠܵܘܟ݂ܘܿܢ ܡ̣ܢ ܩܵܢܘܿܢܝܼ̈ ܘܠܵܐ ܢܛܝܼܪܲܝ ܠܵܘܟ݂ܘܿܢ، ܕܘܼܪܘܼܢ ܠܟܸܣ ܠܝܼ، ܘܒܸܬ ܕܵܝܪܹܢ ܐܸܠܵܘܟ݂ܘܿܢ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. ”ܘܐ݇ܡܝܼܪܵܘܟ݂ܘܿܢ، ’ܒܡܘܿܕܝܼ ܕܵܝܪܲܚ؟‘ 8ܩܵܡܘܿ، ܟܹܐ ܙܵܠܹܡ ܒܲܪܢܵܫܵܐ ܠܐܲܠܵܗܵܐ؟ ܣܵܒܵܒ ܐܲܚܬܘܿܢ ܒܸܙܠܵܡܵܐ ܝܬܘܿܢ ܐܸܠܝܼ. ܘܐ݇ܡܝܼܪܵܘܟ݂ܘܿܢ، ’ܒܡܘܿܕܝܼ ܙܠܝܼܡ ܠܲܢ ܐܸܠܘܼܟ݂؟‘ ܒܡܲܥܣܵܪܵܐ ܘܒܩܘܼܪܒܵܢܵܐ ܕܡܲܪܲܡܬܵܐ. 9ܒܠܵܘܛܬܵܐ ܐܲܚܬܘܿܢ ܠܝܼܛܵܐ ܝܬܘܿܢ، ܣܵܒܵܒ ܐܸܠܝܼ ܐܲܚܬܘܿܢ ܒܸܙܠܵܡܵܐ ܝܬܘܿܢ، ܟܠܵܗ̇ ܐܘܼܡܬܵܐ. 10ܡܲܝܬܹܝܡܘܼܢ ܟܠܹܗ ܡܲܥܣܵܪܵܐ ܠܐܵܘܨܪܹ̈ܐ ܕܒܲܝܬܝܼ، ܕܗܵܘܝܵܐ ܡܹܐܟ݂ܘܼܠܬܵܐ ܓܵܘܹܗ، ܘܕܹܐ ܓ̰ܲܪܒܘܼܢ ܠܝܼ ܒܐܵܗܵܐ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ”ܐܸܢ ܠܵܐ ܦܵܬܚܹܢ ܐܸܠܵܘܟ݂ܘܿܢ ܟܵܘܵܬܹ̈ܐ ܕܫܡܲܝܵܐ ܘܣܵܦܩܹܢ ܐܸܠܵܘܟ݂ܘܿܢ ܒܘܼܪܟܬܵܐ ܗܲܠ ܕܐܵܡܪܝܼܬܘܿܢ ܒܲܣܵܐ. 11ܘܒܸܬ ܢܵܓ̰ܘܹܢ ܒܘܼܬ ܕܝܼܵܘܟ݂ܘܿܢ ܒܪܸܓ̰ܒܵܐ ܐܵܟ݂ܠܵܢܵܐ، ܘܠܹܐ ܡܲܚܪܸܒ݂ ܛܥܘܼܢܝܵܬܹ̈ܐ ܕܐܲܪܥܵܘܟ݂ܘܿܢ، ܘܠܹܐ ܪܲܦܝܼܵܐ ܐܸܠܵܘܟ݂ܘܿܢ ܓܸܦܬܵܐ ܒܚܲܩܠܵܐ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 12”ܘܒܸܬ ܝܵܗ݇ܒ݂ܝܼ ܛܘܼܒ݂ܵܐ ܐܸܠܵܘܟ݂ܘܿܢ ܟܠܲܝܗܝ ܐܸܡܘܵܬܹ̈ܐ، ܟܲܕ ܗܵܘܹܝܬܘܿܢ ܐܲܚܬܘܿܢ ܐܲܪܥܵܐ ܕܨܸܒ݂ܝܵܢܵܐ،“ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ.
13”ܚܘܼܠܸܢܗܘܿܢ ܥܲܠܝܼ ܚܲܒܪ̈ܵܘܟ݂ܘܿܢ،“ ܒܹܐܡܵܪܵܐ ܝܠܹܗ ܡܵܪܝܵܐ. ”ܘܐ݇ܡܝܼܪܵܘܟ݂ܘܿܢ، ’ܡܘܿܕܝܼ ܗܘܼܡܙܸܡ ܠܲܢ ܥܲܠܘܼܟ݂؟‘ 14ܐ݇ܡܝܼܪܵܘܟ݂ܘܿܢ، ’ܣܪܝܼܩܬܵܐ ܝܠܵܗ̇ ܠܸܦܠܵܚܵܐ ܠܐܲܠܵܗܵܐ، ܘܡܘܿܕܝܼ ܝܘܼܬܪܵܢܵܐ ܐܝܼܬ ܕܢܛܝܼܪܲܢ ܢܛܘܼܪܬܹܗ، ܘܕܚܕܝܼܪܲܢ ܒܦܵܫܲܡܬܵܐ ܩܵܕ݇ܡ ܡܵܪܝܵܐ ܚܲܝܠܬܵܢܵܐ؟ 15ܘܐܵܕܝܼܵܐ ܐܲܚܢܲܢ ܛܘܼܒ݂ܵܐ ܒܝܼܵܗ݇ܒ݂ܵܐ ܝܘܲܚ ܠܚܬܝܼܪܹ̈ܐ، ܐܘܼܦ ܦܝܼܫ ܠܗܘܿܢ ܡܘܼܩܘܝܼܹܐ ܥܵܒ݂ܕܵܢܹ̈ܐ ܕܪܲܫܝܼܥܘܼܬܵܐ، ܐܘܼܦ ܓ̰ܘܼܪܸܒ ܠܗܘܿܢ ܠܐܲܠܵܗܵܐ، ܘܦܨܹܐ ܠܗܘܿܢ.‘“
ܡܵܪܝܵܐ ܪܲܚܘܼܡܹܐ ܥܲܠ ܙܕܝܼܥܘܼ̈ܗܝ
16ܗ̇ܝܓܵܗ ܗܘܼܡܙܸܡ ܠܗܘܿܢ ܙܕܝܼܥܹ̈ܐ ܕܡܵܪܝܵܐ، ܐ݇ܢܵܫܵܐ ܥܲܡ ܚܲܒ݂ܪܹܗ، ܘܡܘܼܨܝܸܬ ܠܹܗ ܡܵܪܝܵܐ ܘܫܡܝܼܥ ܠܹܗ، ܘܦܝܼܫ ܠܹܗ ܟܬܝܼܒ݂ܵܐ ܟܬܵܒ݂ܵܐ ܕܕܟ݂ܵܪܵܐ ܩܵܕ݇ܡܘܼܗܝ، ܠܙܕܝܼܥܹ̈ܐ ܕܡܵܪܝܵܐ ܘܠܚܵܫܒ݂ܵܢܹ̈ܐ ܕܫܸܡܹܗ. 17ܘܒܸܬ ܗܵܘܝܼ ܕܝܼܝܼ، ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܠܝܵܘܡܵܐ ܕܐܵܢܵܐ ܥܵܒ݂ܕܹܢܗܘܿܢ ܓܲܙܵܐ ܕܓܵܢܝܼ، ܘܒܸܬ ܪܲܚܡܸܢ ܥܲܠܲܝܗܝ، ܕܵܐܟ݂ܝܼ ܕܪܲܚܸܡ ܐ݇ܢܵܫܵܐ ܥܲܠ ܒܪܘܿܢܹܗ ܕܦܵܠܹܚ ܐܸܠܹܗ. 18ܘܒܸܬ ܕܵܝܪܝܼܬܘܿܢ ܘܚܵܙܹܝܬܘܿܢ ܒܹܝܠ ܙܲܕܝܼܩܵܐ ܠܪܲܫܝܼܥܵܐ، ܒܹܝܠ ܦܵܠܚܵܢܵܐ ܠܐܲܠܵܗܵܐ، ܠܗ̇ܘ ܕܠܵܐ ܦܵܠܹܚ ܐܸܠܹܗ.
सध्या निवडलेले:
ܡܠܐܟ݂ܝ 3: ABTAB
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Aramaic Bible Translation Assyrian Bible © 2025 Aramaic Bible Translation