Jenesis 14
14
Lot Sawys gans Abram
1Hag y hwarva yn dydhyow Amrafel myghtern Shinar, Aryok myghtern Ellasar, Kedorlaomer myghtern Elam, ha Tidal myghtern Goyim, 2y hwrug an re ma gwerrya erbynn Bera myghtern Sodom hag erbynn Birsha myghtern Gomorra, Shinab myghtern Adma ha Shemeber myghtern Seboyim, ha myghtern Bela (henn yw Soar). 3Oll an re ma a veu kuntellys war-barth yn nans Siddim (henn yw Mor an Hoelan). 4Dewdhek blydhen i a servyas Kedorlaomer hag y'n trydhegves blydhen i a rebellyas.
5Hag y'n peswardhegves blydhen, Kedorlaomer ha'n vyghternedh esa ganso a dheuth ha fetha an Refaim yn Ashteroth-karnaym ha'n Zuzim yn Ham ha'n Emim yn Shave-kiryathaym, 6Ha'n Horysi yn aga menydh Seir bys yn El-paran, usi ryb an difeythtir. 7Hag i a dhehwelis ha dos dhe En-mishpat (henn yw Kadesh) ha fetha gwlas oll an Amalekysi ha'n Amorysi ynwedh esa trigys yn Haseson-tamar. 8Ha myghtern Sodom eth yn-mes, ha myghtern Gomorra ha myghtern Adma ha myghtern Seboyim ha myghtern Bela (henn yw Soar), hag araya rag kas er aga fynn yn nans Siddim, 9erbynn Kedorlaomer myghtern Elam, Tidal myghtern Goyim, Amrafel myghtern Shinar, hag Aryok myghtern Ellasar: peswar myghtern erbynn pymp. 10Nans Siddim o leun a bollow pyg. Myghternedh Sodom ha Gomorra a fias, ha koedha ena, ha'n remenant a fias dhe'n menydh. 11Ena i a gemmeras oll an pythow a Sodom ha Gomorra hag oll aga boes ha mos yn-kerdh. 12Hag i a gemmeras Lot, mab broder Abram, esa trigys yn Sodom, ha'y bythow, ha mos yn-kerdh.
13Ena y teuth unn dianker ha leverel hemma dhe Abram an Ebrow, esa trigys ryb derow Mamre; Amoryas o ev, broder Eshkol ha broder Aner, hag yth ens i keffrysysi Abram. 14Ha pan glewas Abram bos y vroder#14:14 y vroder: Henn yw y noy Lot, neb a veu mab Haran, broder Abram. kemmerys prisner, ev a guntellas y dus dyskys yn arvow,#14:14 ev a guntellas y dus dyskys yn arvow: Amendys. Ebrow hag ev a wakhas y dus dyskys. genys yn y ji ev, trihans hag etek aga niver ha'ga helghya bys yn Dan. 15Hag yn nos ev a rannas y lu er aga fynn, ev ha'y wesyon, ha'ga fetha, ha'ga chasya bys yn Hoba usi a'n barth kledh dhe Damaskus. 16Hag ev a dhaskavas oll y bythow hag ynwedh y vroder Lot ha'y bythow ev, ha'n benynes ynwedh ha'n bobel.
Abram Bennigys gans Melkisedek
17Ha myghtern Sodom eth yn-mes dh'y vetya wosa ev dhe dhehweles dhiworth gweskel Kedorlaomer ha'n vyghternedh esa ganso yn nans Shave (henn yw Nans an Myghtern). 18Ha Melkisedek myghtern Salem a dhros yn-mes bara ha gwin, hag ev o oferyas Duw Ughella.#14:18-20 Duw Ughella: Ebrow El Elyon. 19Hag ev a'n bennigas ha leverel,
‘Benniges re bo Abram gans Duw Ughella,
Gwrier nev ha nor.
20Ha benniges re bo Duw Ughella
neb a dhaskorras dha eskerens a-berth y'th dorn.’
Hag ev a ros dhodho dega a bup-tra.
21Ena myghtern Sodom a leveris dhe Abram, ‘Ro dhymm an dus ha kemmer an pythow dhiso jy dha honan.’ 22Mes Abram a leveris dhe vyghtern Sodom, ‘My re dhrehevis ow leuv dhe'n Arloedh, Duw Ughella, Gwrier nev ha nor, 23na wrav kemmeres naneyl neusenn na hwath kroen-sandal dhiworth pup-tra eus dhis, rag own ty dhe leverel, “My re wrug Abram rych”: 24travyth saw an pyth re dhybris an dus yowynk, ha'n rann a dhegoedh dhe'n wer eth genev, Aner, Eshkol ha Mamre. Kemmerens i aga rann.’
सध्या निवडलेले:
Jenesis 14: ABK
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Kesva an Taves Kernewek 2004, 2024
© Cornish Language Board 2004, 2024